| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
2. නාථවග්‌ගො
2. Nāthavaggo
1-4. සෙනාසනසුත්‌තාදිවණ්‌ණනා
1-4. Senāsanasuttādivaṇṇanā
11-14. දුතියස්‌ස පඨමෙ නාතිදූරන්‌ති ගොචරට්‌ඨානතො අඩ්‌ඪගාවුතතො ඔරභාගතාය නාතිදූරං. නාච්‌චාසන්‌නන්‌ති පච්‌ඡිමෙන පමාණෙන ගොචරට්‌ඨානතො පඤ්‌චධනුසතිකතාය න අතිආසන්‌නං. තාය ච පන නාතිදූරනාච්‌චාසන්‌නතාය ගොචරට්‌ඨානපටිපරිස්‌සයාදිරහිතමග්‌ගතාය ච ගමනස්‌ස ච ආගමනස්‌ස ච යුත්‌තරූපත්‌තා ගමනාගමනසම්‌පන්‌නං. දිවසභාගෙ මහාජනසංකිණ්‌ණතාභාවෙන දිවා අප්‌පාකිණ්‌ණං. අභාවත්‌ථො හි අයං අප්‌ප-සද්‌දො ‘‘අප්‌පිච්‌ඡො’’තිආදීසු විය. රත්‌තියං මනුස්‌සසද්‌දාභාවෙන රත්‌තිං අප්‌පසද්‌දං. සබ්‌බදාපි ජනසන්‌නිපාතනිග්‌ඝොසාභාවෙන අප්‌පනිග්‌ඝොසං.
11-14. Dutiyassa paṭhame nātidūranti gocaraṭṭhānato aḍḍhagāvutato orabhāgatāya nātidūraṃ. Nāccāsannanti pacchimena pamāṇena gocaraṭṭhānato pañcadhanusatikatāya na atiāsannaṃ. Tāya ca pana nātidūranāccāsannatāya gocaraṭṭhānapaṭiparissayādirahitamaggatāya ca gamanassa ca āgamanassa ca yuttarūpattā gamanāgamanasampannaṃ. Divasabhāge mahājanasaṃkiṇṇatābhāvena divā appākiṇṇaṃ. Abhāvattho hi ayaṃ appa-saddo ‘‘appiccho’’tiādīsu viya. Rattiyaṃ manussasaddābhāvena rattiṃ appasaddaṃ. Sabbadāpi janasannipātanigghosābhāvena appanigghosaṃ.
අප්‌පකසිරෙනාති අකසිරෙන සුඛෙනෙව. සීලාදිගුණානං ථිරභාවප්‌පත්‌තියා ථෙරා. සුත්‌තගෙය්‍යාදි බහු සුතං එතෙසන්‌ති බහුස්‌සුතා. තමුග්‌ගහධාරණෙන සම්‌මදෙව ගරූනං සන්‌තිකෙ ආගමිතභාවෙන ච ආගතො පරියත්‌තිධම්‌මසඞ්‌ඛාතො ආගමො එතෙසන්‌ති ආගතාගමා. සුත්‌තාභිධම්‌මසඞ්‌ඛාතස්‌ස ධම්‌මස්‌ස ධාරණෙන ධම්‌මධරා. විනයස්‌ස ධාරණෙන විනයධරා. තෙසං ධම්‌මවිනයානං මාතිකාය ධාරණෙන මාතිකාධරා. තත්‌ථ තත්‌ථ ධම්‌මපරිපුච්‌ඡාය පරිපුච්‌ඡති. අත්‌ථපරිපුච්‌ඡාය පරිපඤ්‌හති වීමංසති විචාරෙති. ඉදං, භන්‌තෙ, කථං, ඉමස්‌ස කො අත්‌ථොති පරිපුච්‌ඡාපරිපඤ්‌හාකාරදස්‌සනං. අවිවටඤ්‌චෙව පාළියා අත්‌ථං පදෙසන්‌තරපාළිදස්‌සනෙන ආගමතො විවරන්‌ති. අනුත්‌තානීකතඤ්‌ච යුත්‌තිවිභාවනෙන උත්‌තානිං කරොන්‌ති. කඞ්‌ඛාඨානියෙසු ධම්‌මෙසු සංසයුප්‌පත්‌තියා හෙතුතාය ගණ්‌ඨිට්‌ඨානභූතෙසු පාළිප්‌පදෙසෙසු යාථාවතො විනිච්‌ඡයප්‌පදානෙන කඞ්‌ඛං පටිවිනොදෙන්‌ති.
Appakasirenāti akasirena sukheneva. Sīlādiguṇānaṃ thirabhāvappattiyā therā. Suttageyyādi bahu sutaṃ etesanti bahussutā. Tamuggahadhāraṇena sammadeva garūnaṃ santike āgamitabhāvena ca āgato pariyattidhammasaṅkhāto āgamo etesanti āgatāgamā. Suttābhidhammasaṅkhātassa dhammassa dhāraṇena dhammadharā. Vinayassa dhāraṇena vinayadharā. Tesaṃ dhammavinayānaṃ mātikāya dhāraṇena mātikādharā. Tattha tattha dhammaparipucchāya paripucchati. Atthaparipucchāya paripañhati vīmaṃsati vicāreti. Idaṃ, bhante, kathaṃ, imassa ko atthoti paripucchāparipañhākāradassanaṃ. Avivaṭañceva pāḷiyā atthaṃ padesantarapāḷidassanena āgamato vivaranti. Anuttānīkatañca yuttivibhāvanena uttāniṃ karonti. Kaṅkhāṭhāniyesu dhammesu saṃsayuppattiyā hetutāya gaṇṭhiṭṭhānabhūtesu pāḷippadesesu yāthāvato vinicchayappadānena kaṅkhaṃ paṭivinodenti.
එත්‌ථ ච නාතිදූරං නාච්‌චාසන්‌නං ගමනාගමනසම්‌පන්‌නන්‌ති එකං අඞ්‌ගං, දිවා අප්‌පාකිණ්‌ණං, රත්‌තිං අප්‌පසද්‌දං, අප්‌පනිග්‌ඝොසන්‌ති එකං, අප්‌පඩංසමකසවාතාතපසරීසපසම්‌ඵස්‌සන්‌ති එකං, තස්‌මිං ඛො පන සෙනාසනෙ විහරන්‌තස්‌ස…පෙ.… පරික්‌ඛාරාති එකං, තස්‌මිං ඛො පන සෙනාසනෙ ථෙරා…පෙ.… කඞ්‌ඛං පටිවිනොදෙන්‌තීති එකං. එවං පඤ්‌ච අඞ්‌ගානි වෙදිතබ්‌බානි. දුතියාදීනි උත්‌තානත්‌ථානි.
Ettha ca nātidūraṃ nāccāsannaṃ gamanāgamanasampannanti ekaṃ aṅgaṃ, divā appākiṇṇaṃ, rattiṃ appasaddaṃ, appanigghosanti ekaṃ, appaḍaṃsamakasavātātapasarīsapasamphassanti ekaṃ, tasmiṃ kho pana senāsane viharantassa…pe… parikkhārāti ekaṃ, tasmiṃ kho pana senāsane therā…pe… kaṅkhaṃ paṭivinodentīti ekaṃ. Evaṃ pañca aṅgāni veditabbāni. Dutiyādīni uttānatthāni.
සෙනාසනසුත්‌තාදිවණ්‌ණනා නිට්‌ඨිතා.
Senāsanasuttādivaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya
1. සෙනාසනසුත්‌තං • 1. Senāsanasuttaṃ
2. පඤ්‌චඞ්‌ගසුත්‌තං • 2. Pañcaṅgasuttaṃ
3. සංයොජනසුත්‌තං • 3. Saṃyojanasuttaṃ
4. චෙතොඛිලසුත්‌තං • 4. Cetokhilasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā)
1. සෙනාසනසුත්‌තවණ්‌ණනා • 1. Senāsanasuttavaṇṇanā
2. පඤ්‌චඞ්‌ගසුත්‌තවණ්‌ණනා • 2. Pañcaṅgasuttavaṇṇanā
3-4. සංයොජනසුත්‌තාදිවණ්‌ණනා • 3-4. Saṃyojanasuttādivaṇṇanā
