| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
13. ஸேரெய்யவக்³கோ³
13. Sereyyavaggo
1. ஸேரெய்யகத்தே²ரஅபதா³னவண்ணனா
1. Sereyyakattheraapadānavaṇṇanā
அஜ்ஜா²யகோ மந்தத⁴ரோதிஆதி³கங் ஆயஸ்மதோ ஸேரெய்யகத்தே²ரஸ்ஸ அபதா³னங். அயம்பி புரிமஜினவரேஸு கதாதி⁴காரோ ததோ பரேஸு அத்தபா⁴வஸஹஸ்ஸேஸு விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே ப்³ராஹ்மணகுலே நிப்³ப³த்தோ விஞ்ஞுதங் பத்வா திண்ணங் வேதா³னங் பாரங் க³ந்த்வா இதிஹாஸாதி³ஸகலப்³ராஹ்மணத⁴ம்மேஸு கோடிப்பத்தோ ஏகஸ்மிங் தி³வஸே அப்³போ⁴காஸே ஸபரிவாரோ டி²தோ ப⁴க³வந்தங் தி³ஸ்வா பஸன்னமானஸோ ஸேரெய்யபுப்ப²ங் க³ஹெத்வா ஆகாஸே கி²பந்தோ பூஜேஸி. தானி புப்பா²னி ஆகாஸே விதானங் ஹுத்வா ஸத்தாஹங் ட²த்வா பச்சா² அந்தரதா⁴யிங்ஸு. ஸோ தங் அச்ச²ரியங் தி³ஸ்வா அதீவ பஸன்னமானஸோ தேனேவ பீதிஸோமனஸ்ஸேன காலங் கத்வா துஸிதாதீ³ஸு நிப்³ப³த்தோ தத்த² தி³ப்³ப³ஸுக²மனுப⁴வித்வா ததோ மனுஸ்ஸஸுக²மனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ விஞ்ஞுதங் பாபுணித்வா புப்³ப³வாஸனாப³லேன ஸத்த²ரி பஸன்னோ பப்³ப³ஜித்வா நசிரஸ்ஸேவ அரஹா அஹோஸி.
Ajjhāyakomantadharotiādikaṃ āyasmato sereyyakattherassa apadānaṃ. Ayampi purimajinavaresu katādhikāro tato paresu attabhāvasahassesu vivaṭṭūpanissayāni puññāni upacinanto vipassissa bhagavato kāle brāhmaṇakule nibbatto viññutaṃ patvā tiṇṇaṃ vedānaṃ pāraṃ gantvā itihāsādisakalabrāhmaṇadhammesu koṭippatto ekasmiṃ divase abbhokāse saparivāro ṭhito bhagavantaṃ disvā pasannamānaso sereyyapupphaṃ gahetvā ākāse khipanto pūjesi. Tāni pupphāni ākāse vitānaṃ hutvā sattāhaṃ ṭhatvā pacchā antaradhāyiṃsu. So taṃ acchariyaṃ disvā atīva pasannamānaso teneva pītisomanassena kālaṃ katvā tusitādīsu nibbatto tattha dibbasukhamanubhavitvā tato manussasukhamanubhavitvā imasmiṃ buddhuppāde ekasmiṃ kulagehe nibbatto viññutaṃ pāpuṇitvā pubbavāsanābalena satthari pasanno pabbajitvā nacirasseva arahā ahosi.
1. ஸோ அபரபா⁴கே³ புராகதகுஸலங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ அஜ்ஜா²யகோ மந்தத⁴ரோதிஆதி³மாஹ. தங் ஹெட்டா² வுத்தத்த²மேவ.
1. So aparabhāge purākatakusalaṃ saritvā somanassajāto pubbacaritāpadānaṃ pakāsento ajjhāyako mantadharotiādimāha. Taṃ heṭṭhā vuttatthameva.
3. ஸேரெய்யகங் க³ஹெத்வானாதி ஸிரிஸே ப⁴வங் ஜாதிபுப்ப²ங் ஸேரெய்யங், ஸேரெய்யமேவ ஸேரெய்யகங், தங் ஸேரெய்யகங் க³ஹெத்வானாதி ஸம்ப³ந்தோ⁴. ப⁴க³வதி பஸன்னோ ஜாதிஸுமனமகுளசம்பகாதீ³னி புப்பா²னி பதிட்ட²பெத்வா பூஜேதுங் காலங் நத்தி²தாய தத்த² ஸம்பத்தங் தங் ஸேரெய்யகங் புப்ப²ங் க³ஹெத்வா பூஜேஸிந்தி அத்தோ². ஸேஸங் ஸப்³ப³த்த² உத்தானமேவாதி.
3.Sereyyakaṃ gahetvānāti sirise bhavaṃ jātipupphaṃ sereyyaṃ, sereyyameva sereyyakaṃ, taṃ sereyyakaṃ gahetvānāti sambandho. Bhagavati pasanno jātisumanamakuḷacampakādīni pupphāni patiṭṭhapetvā pūjetuṃ kālaṃ natthitāya tattha sampattaṃ taṃ sereyyakaṃ pupphaṃ gahetvā pūjesinti attho. Sesaṃ sabbattha uttānamevāti.
ஸேரெய்யகத்தே²ரஅபதா³னவண்ணனா ஸமத்தா.
Sereyyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. ஸேரெய்யகத்தே²ரஅபதா³னங் • 1. Sereyyakattheraapadānaṃ
