| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
13. සෙරෙය්‍යවග්‌ගො
13. Sereyyavaggo
1. සෙරෙය්‍යකත්‌ථෙරඅපදානවණ්‌ණනා
1. Sereyyakattheraapadānavaṇṇanā
අජ්‌ඣායකො මන්‌තධරොතිආදිකං ආයස්‌මතො සෙරෙය්‍යකත්‌ථෙරස්‌ස අපදානං. අයම්‌පි පුරිමජිනවරෙසු කතාධිකාරො තතො පරෙසු අත්‌තභාවසහස්‌සෙසු විවට්‌ටූපනිස්‌සයානි පුඤ්‌ඤානි උපචිනන්‌තො විපස්‌සිස්‌ස භගවතො කාලෙ බ්‍රාහ්‌මණකුලෙ නිබ්‌බත්‌තො විඤ්‌ඤුතං පත්‌වා තිණ්‌ණං වෙදානං පාරං ගන්‌ත්‌වා ඉතිහාසාදිසකලබ්‍රාහ්‌මණධම්‌මෙසු කොටිප්‌පත්‌තො එකස්‌මිං දිවසෙ අබ්‌භොකාසෙ සපරිවාරො ඨිතො භගවන්‌තං දිස්‌වා පසන්‌නමානසො සෙරෙය්‍යපුප්‌ඵං ගහෙත්‌වා ආකාසෙ ඛිපන්‌තො පූජෙසි. තානි පුප්‌ඵානි ආකාසෙ විතානං හුත්‌වා සත්‌තාහං ඨත්‌වා පච්‌ඡා අන්‌තරධායිංසු. සො තං අච්‌ඡරියං දිස්‌වා අතීව පසන්‌නමානසො තෙනෙව පීතිසොමනස්‌සෙන කාලං කත්‌වා තුසිතාදීසු නිබ්‌බත්‌තො තත්‌ථ දිබ්‌බසුඛමනුභවිත්‌වා තතො මනුස්‌සසුඛමනුභවිත්‌වා ඉමස්‌මිං බුද්‌ධුප්‌පාදෙ එකස්‌මිං කුලගෙහෙ නිබ්‌බත්‌තො විඤ්‌ඤුතං පාපුණිත්‌වා පුබ්‌බවාසනාබලෙන සත්‌ථරි පසන්‌නො පබ්‌බජිත්‌වා නචිරස්‌සෙව අරහා අහොසි.
Ajjhāyakomantadharotiādikaṃ āyasmato sereyyakattherassa apadānaṃ. Ayampi purimajinavaresu katādhikāro tato paresu attabhāvasahassesu vivaṭṭūpanissayāni puññāni upacinanto vipassissa bhagavato kāle brāhmaṇakule nibbatto viññutaṃ patvā tiṇṇaṃ vedānaṃ pāraṃ gantvā itihāsādisakalabrāhmaṇadhammesu koṭippatto ekasmiṃ divase abbhokāse saparivāro ṭhito bhagavantaṃ disvā pasannamānaso sereyyapupphaṃ gahetvā ākāse khipanto pūjesi. Tāni pupphāni ākāse vitānaṃ hutvā sattāhaṃ ṭhatvā pacchā antaradhāyiṃsu. So taṃ acchariyaṃ disvā atīva pasannamānaso teneva pītisomanassena kālaṃ katvā tusitādīsu nibbatto tattha dibbasukhamanubhavitvā tato manussasukhamanubhavitvā imasmiṃ buddhuppāde ekasmiṃ kulagehe nibbatto viññutaṃ pāpuṇitvā pubbavāsanābalena satthari pasanno pabbajitvā nacirasseva arahā ahosi.
1. සො අපරභාගෙ පුරාකතකුසලං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො අජ්‌ඣායකො මන්‌තධරොතිආදිමාහ. තං හෙට්‌ඨා වුත්‌තත්‌ථමෙව.
1. So aparabhāge purākatakusalaṃ saritvā somanassajāto pubbacaritāpadānaṃ pakāsento ajjhāyako mantadharotiādimāha. Taṃ heṭṭhā vuttatthameva.
3. සෙරෙය්‍යකං ගහෙත්‌වානාති සිරිසෙ භවං ජාතිපුප්‌ඵං සෙරෙය්‍යං, සෙරෙය්‍යමෙව සෙරෙය්‍යකං, තං සෙරෙය්‍යකං ගහෙත්‌වානාති සම්‌බන්‌ධො. භගවති පසන්‌නො ජාතිසුමනමකුළචම්‌පකාදීනි පුප්‌ඵානි පතිට්‌ඨපෙත්‌වා පූජෙතුං කාලං නත්‌ථිතාය තත්‌ථ සම්‌පත්‌තං තං සෙරෙය්‍යකං පුප්‌ඵං ගහෙත්‌වා පූජෙසින්‌ති අත්‌ථො. සෙසං සබ්‌බත්‌ථ උත්‌තානමෙවාති.
3.Sereyyakaṃ gahetvānāti sirise bhavaṃ jātipupphaṃ sereyyaṃ, sereyyameva sereyyakaṃ, taṃ sereyyakaṃ gahetvānāti sambandho. Bhagavati pasanno jātisumanamakuḷacampakādīni pupphāni patiṭṭhapetvā pūjetuṃ kālaṃ natthitāya tattha sampattaṃ taṃ sereyyakaṃ pupphaṃ gahetvā pūjesinti attho. Sesaṃ sabbattha uttānamevāti.
සෙරෙය්‍යකත්‌ථෙරඅපදානවණ්‌ණනා සමත්‌තා.
Sereyyakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 1. සෙරෙය්‍යකත්‌ථෙරඅපදානං • 1. Sereyyakattheraapadānaṃ
