| Library / Tipiṭaka / ਤਿਪਿਟਕ • Tipiṭaka / ਅਪਦਾਨ-ਅਟ੍ਠਕਥਾ • Apadāna-aṭṭhakathā |
੧੩. ਸੇਰੇਯ੍ਯવਗ੍ਗੋ
13. Sereyyavaggo
੧. ਸੇਰੇਯ੍ਯਕਤ੍ਥੇਰਅਪਦਾਨવਣ੍ਣਨਾ
1. Sereyyakattheraapadānavaṇṇanā
ਅਜ੍ਝਾਯਕੋ ਮਨ੍ਤਧਰੋਤਿਆਦਿਕਂ ਆਯਸ੍ਮਤੋ ਸੇਰੇਯ੍ਯਕਤ੍ਥੇਰਸ੍ਸ ਅਪਦਾਨਂ। ਅਯਮ੍ਪਿ ਪੁਰਿਮਜਿਨવਰੇਸੁ ਕਤਾਧਿਕਾਰੋ ਤਤੋ ਪਰੇਸੁ ਅਤ੍ਤਭਾવਸਹਸ੍ਸੇਸੁ વਿવਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ વਿਪਸ੍ਸਿਸ੍ਸ ਭਗવਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ વਿਞ੍ਞੁਤਂ ਪਤ੍વਾ ਤਿਣ੍ਣਂ વੇਦਾਨਂ ਪਾਰਂ ਗਨ੍ਤ੍વਾ ਇਤਿਹਾਸਾਦਿਸਕਲਬ੍ਰਾਹ੍ਮਣਧਮ੍ਮੇਸੁ ਕੋਟਿਪ੍ਪਤ੍ਤੋ ਏਕਸ੍ਮਿਂ ਦਿવਸੇ ਅਬ੍ਭੋਕਾਸੇ ਸਪਰਿવਾਰੋ ਠਿਤੋ ਭਗવਨ੍ਤਂ ਦਿਸ੍વਾ ਪਸਨ੍ਨਮਾਨਸੋ ਸੇਰੇਯ੍ਯਪੁਪ੍ਫਂ ਗਹੇਤ੍વਾ ਆਕਾਸੇ ਖਿਪਨ੍ਤੋ ਪੂਜੇਸਿ। ਤਾਨਿ ਪੁਪ੍ਫਾਨਿ ਆਕਾਸੇ વਿਤਾਨਂ ਹੁਤ੍વਾ ਸਤ੍ਤਾਹਂ ਠਤ੍વਾ ਪਚ੍ਛਾ ਅਨ੍ਤਰਧਾਯਿਂਸੁ। ਸੋ ਤਂ ਅਚ੍ਛਰਿਯਂ ਦਿਸ੍વਾ ਅਤੀવ ਪਸਨ੍ਨਮਾਨਸੋ ਤੇਨੇવ ਪੀਤਿਸੋਮਨਸ੍ਸੇਨ ਕਾਲਂ ਕਤ੍વਾ ਤੁਸਿਤਾਦੀਸੁ ਨਿਬ੍ਬਤ੍ਤੋ ਤਤ੍ਥ ਦਿਬ੍ਬਸੁਖਮਨੁਭવਿਤ੍વਾ ਤਤੋ ਮਨੁਸ੍ਸਸੁਖਮਨੁਭવਿਤ੍વਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ વਿਞ੍ਞੁਤਂ ਪਾਪੁਣਿਤ੍વਾ ਪੁਬ੍ਬવਾਸਨਾਬਲੇਨ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍વਾ ਨਚਿਰਸ੍ਸੇવ ਅਰਹਾ ਅਹੋਸਿ।
Ajjhāyakomantadharotiādikaṃ āyasmato sereyyakattherassa apadānaṃ. Ayampi purimajinavaresu katādhikāro tato paresu attabhāvasahassesu vivaṭṭūpanissayāni puññāni upacinanto vipassissa bhagavato kāle brāhmaṇakule nibbatto viññutaṃ patvā tiṇṇaṃ vedānaṃ pāraṃ gantvā itihāsādisakalabrāhmaṇadhammesu koṭippatto ekasmiṃ divase abbhokāse saparivāro ṭhito bhagavantaṃ disvā pasannamānaso sereyyapupphaṃ gahetvā ākāse khipanto pūjesi. Tāni pupphāni ākāse vitānaṃ hutvā sattāhaṃ ṭhatvā pacchā antaradhāyiṃsu. So taṃ acchariyaṃ disvā atīva pasannamānaso teneva pītisomanassena kālaṃ katvā tusitādīsu nibbatto tattha dibbasukhamanubhavitvā tato manussasukhamanubhavitvā imasmiṃ buddhuppāde ekasmiṃ kulagehe nibbatto viññutaṃ pāpuṇitvā pubbavāsanābalena satthari pasanno pabbajitvā nacirasseva arahā ahosi.
੧. ਸੋ ਅਪਰਭਾਗੇ ਪੁਰਾਕਤਕੁਸਲਂ ਸਰਿਤ੍વਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਜ੍ਝਾਯਕੋ ਮਨ੍ਤਧਰੋਤਿਆਦਿਮਾਹ। ਤਂ ਹੇਟ੍ਠਾ વੁਤ੍ਤਤ੍ਥਮੇવ।
1. So aparabhāge purākatakusalaṃ saritvā somanassajāto pubbacaritāpadānaṃ pakāsento ajjhāyako mantadharotiādimāha. Taṃ heṭṭhā vuttatthameva.
੩. ਸੇਰੇਯ੍ਯਕਂ ਗਹੇਤ੍વਾਨਾਤਿ ਸਿਰਿਸੇ ਭવਂ ਜਾਤਿਪੁਪ੍ਫਂ ਸੇਰੇਯ੍ਯਂ, ਸੇਰੇਯ੍ਯਮੇવ ਸੇਰੇਯ੍ਯਕਂ, ਤਂ ਸੇਰੇਯ੍ਯਕਂ ਗਹੇਤ੍વਾਨਾਤਿ ਸਮ੍ਬਨ੍ਧੋ। ਭਗવਤਿ ਪਸਨ੍ਨੋ ਜਾਤਿਸੁਮਨਮਕੁਲ਼ਚਮ੍ਪਕਾਦੀਨਿ ਪੁਪ੍ਫਾਨਿ ਪਤਿਟ੍ਠਪੇਤ੍વਾ ਪੂਜੇਤੁਂ ਕਾਲਂ ਨਤ੍ਥਿਤਾਯ ਤਤ੍ਥ ਸਮ੍ਪਤ੍ਤਂ ਤਂ ਸੇਰੇਯ੍ਯਕਂ ਪੁਪ੍ਫਂ ਗਹੇਤ੍વਾ ਪੂਜੇਸਿਨ੍ਤਿ ਅਤ੍ਥੋ। ਸੇਸਂ ਸਬ੍ਬਤ੍ਥ ਉਤ੍ਤਾਨਮੇવਾਤਿ।
3.Sereyyakaṃ gahetvānāti sirise bhavaṃ jātipupphaṃ sereyyaṃ, sereyyameva sereyyakaṃ, taṃ sereyyakaṃ gahetvānāti sambandho. Bhagavati pasanno jātisumanamakuḷacampakādīni pupphāni patiṭṭhapetvā pūjetuṃ kālaṃ natthitāya tattha sampattaṃ taṃ sereyyakaṃ pupphaṃ gahetvā pūjesinti attho. Sesaṃ sabbattha uttānamevāti.
ਸੇਰੇਯ੍ਯਕਤ੍ਥੇਰਅਪਦਾਨવਣ੍ਣਨਾ ਸਮਤ੍ਤਾ।
Sereyyakattheraapadānavaṇṇanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਅਪਦਾਨਪਾਲ਼ਿ • Apadānapāḷi / ੧. ਸੇਰੇਯ੍ਯਕਤ੍ਥੇਰਅਪਦਾਨਂ • 1. Sereyyakattheraapadānaṃ
