| Library / Tipiṭaka / তিপিটক • Tipiṭaka / পেতৰত্থু-অট্ঠকথা • Petavatthu-aṭṭhakathā |
৬. সেরিণীপেতিৰত্থুৰণ্ণনা
6. Seriṇīpetivatthuvaṇṇanā
নগ্গা দুব্বণ্ণরূপাসীতি ইদং সত্থরি জেতৰনে ৰিহরন্তে সেরিণীপেতিং আরব্ভ ৰুত্তং। কুরুরট্ঠে কির হত্থিনিপুরে সেরিণী নাম একা রূপূপজীৰিনী অহোসি। তত্থ চ উপোসথকরণত্থায ততো ততো ভিক্খূ সন্নিপতিংসু। পুন মহাভিক্খুসন্নিপাতো অহোসি। তং দিস্ৰা মনুস্সা তিলতণ্ডুলাদিং সপ্পিনৰনীতমধুআদিঞ্চ বহুং দানূপকরণং সজ্জেত্ৰা মহাদানং পৰত্তেসুং। তেন চ সমযেন সা গণিকা অস্সদ্ধা অপ্পসন্না মচ্ছেরমলপরিযুট্ঠিতচিত্তা তেহি মনুস্সেহি ‘‘এহি তাৰ ইদং দানং অনুমোদাহী’’তি উস্সাহিতাপি ‘‘কিং তেন মুণ্ডকানং সমণানং দিন্নেনা’’তি অপ্পসাদমেৰ নেসং সম্পৰেদেসি, কুতো অপ্পমত্তকস্স পরিচ্চাগো।
Naggā dubbaṇṇarūpāsīti idaṃ satthari jetavane viharante seriṇīpetiṃ ārabbha vuttaṃ. Kururaṭṭhe kira hatthinipure seriṇī nāma ekā rūpūpajīvinī ahosi. Tattha ca uposathakaraṇatthāya tato tato bhikkhū sannipatiṃsu. Puna mahābhikkhusannipāto ahosi. Taṃ disvā manussā tilataṇḍulādiṃ sappinavanītamadhuādiñca bahuṃ dānūpakaraṇaṃ sajjetvā mahādānaṃ pavattesuṃ. Tena ca samayena sā gaṇikā assaddhā appasannā maccheramalapariyuṭṭhitacittā tehi manussehi ‘‘ehi tāva idaṃ dānaṃ anumodāhī’’ti ussāhitāpi ‘‘kiṃ tena muṇḍakānaṃ samaṇānaṃ dinnenā’’ti appasādameva nesaṃ sampavedesi, kuto appamattakassa pariccāgo.
সা অপরেন সমযেন কালং কত্ৰা অঞ্ঞতরস্স পচ্চন্তনগরস্স পরিখাপিট্ঠে পেতী হুত্ৰা নিব্বত্তি। অথ হত্থিনিপুরৰাসী অঞ্ঞতরো উপাসকো ৰণিজ্জায তং নগরং গন্ত্ৰা রত্তিযা পচ্চূসসমযে পরিখাপিট্ঠং গতো তাদিসেন পযোজনেন। সা তত্থ তং দিস্ৰা সঞ্জানিত্ৰা নগ্গা অট্ঠিত্তচমত্তাৰসেসসরীরা অতিৰিয বীভচ্ছদস্সনা অৰিদূরে ঠত্ৰা অত্তানং দস্সেসি। সো তং দিস্ৰা –
Sā aparena samayena kālaṃ katvā aññatarassa paccantanagarassa parikhāpiṭṭhe petī hutvā nibbatti. Atha hatthinipuravāsī aññataro upāsako vaṇijjāya taṃ nagaraṃ gantvā rattiyā paccūsasamaye parikhāpiṭṭhaṃ gato tādisena payojanena. Sā tattha taṃ disvā sañjānitvā naggā aṭṭhittacamattāvasesasarīrā ativiya bībhacchadassanā avidūre ṭhatvā attānaṃ dassesi. So taṃ disvā –
৪৬৪.
464.
‘‘নগ্গা দুব্বণ্ণরূপাসি, কিসা ধমনিসন্থতা।
‘‘Naggā dubbaṇṇarūpāsi, kisā dhamanisanthatā;
উপ্ফাসুলিকে কিসিকে, কা নু ত্ৰং ইধ তিট্ঠসী’’তি॥ –
Upphāsulike kisike, kā nu tvaṃ idha tiṭṭhasī’’ti. –
গাথায পুচ্ছি। সাপিস্স –
Gāthāya pucchi. Sāpissa –
৪৬৫.
465.
‘‘অহং ভদন্তে পেতীম্হি, দুগ্গতা যমলোকিকা।
‘‘Ahaṃ bhadante petīmhi, duggatā yamalokikā;
পাপকম্মং করিত্ৰান, পেতলোকং ইতো গতা’’তি॥ –
Pāpakammaṃ karitvāna, petalokaṃ ito gatā’’ti. –
গাথায অত্তানং পকাসেসি। পুন তেন –
Gāthāya attānaṃ pakāsesi. Puna tena –
৪৬৬.
466.
‘‘কিং নু কাযেন ৰাচায, মনসা দুক্কটং কতং।
‘‘Kiṃ nu kāyena vācāya, manasā dukkaṭaṃ kataṃ;
কিস্সকম্মৰিপাকেন, পেতলোকং ইতো গতা’’তি॥ –
Kissakammavipākena, petalokaṃ ito gatā’’ti. –
গাথায কতকম্মং পুচ্ছিতা –
Gāthāya katakammaṃ pucchitā –
৪৬৭.
467.
‘‘অনাৰটেসু তিত্থেসু, ৰিচিনিং অড্ঢমাসকং।
‘‘Anāvaṭesu titthesu, viciniṃ aḍḍhamāsakaṃ;
সন্তেসু দেয্যধম্মেসু, দীপং নাকাসিমত্তনো॥
Santesu deyyadhammesu, dīpaṃ nākāsimattano.
৪৬৮.
468.
‘‘নদিং উপেমি তসিতা, রিত্তকা পরিৰত্ততি।
‘‘Nadiṃ upemi tasitā, rittakā parivattati;
ছাযং উপেমি উণ্হেসু, আতপো পরিৰত্ততি॥
Chāyaṃ upemi uṇhesu, ātapo parivattati.
৪৬৯.
469.
‘‘অগ্গিৰণ্ণো চ মে ৰাতো, ডহন্তো উপৰাযতি।
‘‘Aggivaṇṇo ca me vāto, ḍahanto upavāyati;
এতঞ্চ ভন্তে অরহামি, অঞ্ঞঞ্চ পাপকং ততো॥
Etañca bhante arahāmi, aññañca pāpakaṃ tato.
৪৭০.
470.
‘‘গন্ত্ৰান হত্থিনিং পুরং, ৰজ্জেসি ময্হ মাতরং।
‘‘Gantvāna hatthiniṃ puraṃ, vajjesi mayha mātaraṃ;
‘ধীতা চ তে মযা দিট্ঠা, দুগ্গতা যমলোকিকা।
‘Dhītā ca te mayā diṭṭhā, duggatā yamalokikā;
পাপকম্মং করিত্ৰান, পেতলোকং ইতো গতা’॥
Pāpakammaṃ karitvāna, petalokaṃ ito gatā’.
৪৭১.
471.
‘‘অত্থি মে এত্থ নিক্খিত্তং, অনক্খাতঞ্চ তং মযা।
‘‘Atthi me ettha nikkhittaṃ, anakkhātañca taṃ mayā;
চত্তারি সতসহস্সানি, পল্লঙ্কস্স চ হেট্ঠতো॥
Cattāri satasahassāni, pallaṅkassa ca heṭṭhato.
৪৭২.
472.
‘‘ততো মে দানং দদতু, তস্সা চ হোতু জীৰিকা।
‘‘Tato me dānaṃ dadatu, tassā ca hotu jīvikā;
দানং দত্ৰা চ মে মাতা, দক্খিণং অনুদিচ্ছতু।
Dānaṃ datvā ca me mātā, dakkhiṇaṃ anudicchatu;
তদাহং সুখিতা হেস্সং, সব্বকামসমিদ্ধিনী’’তি॥ –
Tadāhaṃ sukhitā hessaṃ, sabbakāmasamiddhinī’’ti. –
ইমাহি ছহি গাথাহি অত্তনা কতকম্মঞ্চেৰ পুন তেন অত্তনো কাতব্বং অত্থঞ্চ আচিক্খি।
Imāhi chahi gāthāhi attanā katakammañceva puna tena attano kātabbaṃ atthañca ācikkhi.
৪৬৭. তত্থ অনাৰটেসু তিত্থেসূতি কেনচি অনিৰারিতেসু নদীতল়াকাদীনং তিত্থপদেসেসু, যত্থ মনুস্সা ন্হাযন্তি, উদককিচ্চং করোন্তি, তাদিসেসু ঠানেসু। ৰিচিনিং অড্ঢমাসকন্তি ‘‘মনুস্সেহি ঠপেত্ৰা ৰিস্সরিতং অপিনামেত্থ কিঞ্চি লভেয্য’’ন্তি লোভাভিভূতা অড্ঢমাসকমত্তম্পি ৰিচিনিং গৰেসিং। অথ ৰা অনাৰটেসু তিত্থেসূতি উপসঙ্কমনেন কেনচি অনিৰারিতেসু সত্তানং পযোগাসযসুদ্ধিযা কারণভাৰেন তিত্থভূতেসু সমণব্রাহ্মণেসু ৰিজ্জমানেসু। ৰিচিনিং অড্ঢমাসকন্তি মচ্ছেরমলপরিযুট্ঠিতচিত্তা কস্সচি কিঞ্চি অদেন্তী অড্ঢমাসকম্পি ৰিসেসেন চিনিং, ন সঞ্চিনিং পুঞ্ঞং। তেনাহ ‘‘সন্তেসু দেয্যধম্মেসু, দীপং নাকাসিমত্তনো’’তি।
467. Tattha anāvaṭesu titthesūti kenaci anivāritesu nadītaḷākādīnaṃ titthapadesesu, yattha manussā nhāyanti, udakakiccaṃ karonti, tādisesu ṭhānesu. Viciniṃ aḍḍhamāsakanti ‘‘manussehi ṭhapetvā vissaritaṃ apināmettha kiñci labheyya’’nti lobhābhibhūtā aḍḍhamāsakamattampi viciniṃ gavesiṃ. Atha vā anāvaṭesu titthesūti upasaṅkamanena kenaci anivāritesu sattānaṃ payogāsayasuddhiyā kāraṇabhāvena titthabhūtesu samaṇabrāhmaṇesu vijjamānesu. Viciniṃ aḍḍhamāsakanti maccheramalapariyuṭṭhitacittā kassaci kiñci adentī aḍḍhamāsakampi visesena ciniṃ, na sañciniṃ puññaṃ. Tenāha ‘‘santesu deyyadhammesu, dīpaṃ nākāsimattano’’ti.
৪৬৮. তসিতাতি পিপাসিতা। রিত্তকাতি কাকপেয্যা সন্দমানাপি নদী মম পাপকম্মেন উদকেন রিত্তা তুচ্ছা ৰালিকমত্তা হুত্ৰা পরিৰত্ততি। উণ্হেসূতি উণ্হসমযেসু। আতপো পরিৰত্ততীতি ছাযাট্ঠানং মযি উপগতায আতপো সম্পজ্জতি।
468.Tasitāti pipāsitā. Rittakāti kākapeyyā sandamānāpi nadī mama pāpakammena udakena rittā tucchā vālikamattā hutvā parivattati. Uṇhesūti uṇhasamayesu. Ātapo parivattatīti chāyāṭṭhānaṃ mayi upagatāya ātapo sampajjati.
৪৬৯-৭০. অগ্গিৰণ্ণোতি সম্ফস্সেন অগ্গিসদিসো। তেন ৰুত্তং ‘‘ডহন্তো উপৰাযতী’’তি। এতঞ্চ, ভন্তে, অরহামীতি, ভন্তেতি তং উপাসকং গরুকারেন ৰদতি। ভন্তে, এতঞ্চ যথাৰুত্তং পিপাসাদিদুক্খং, অঞ্ঞঞ্চ ততো পাপকং দারুণং দুক্খং অনুভৰিতুং অরহামি তজ্জস্স পাপস্স কতত্তাতি অধিপ্পাযো। ৰজ্জেসীতি ৰদেয্যাসি।
469-70.Aggivaṇṇoti samphassena aggisadiso. Tena vuttaṃ ‘‘ḍahanto upavāyatī’’ti. Etañca, bhante, arahāmīti, bhanteti taṃ upāsakaṃ garukārena vadati. Bhante, etañca yathāvuttaṃ pipāsādidukkhaṃ, aññañca tato pāpakaṃ dāruṇaṃ dukkhaṃ anubhavituṃ arahāmi tajjassa pāpassa katattāti adhippāyo. Vajjesīti vadeyyāsi.
৪৭১-৭২. এত্থ নিক্খিত্তং, অনক্খাতন্তি ‘‘এত্তকং এত্থ নিক্খিত্ত’’ন্তি অনাচিক্খিতং। ইদানি তস্স পরিমাণং ঠপিতট্ঠানঞ্চ দস্সেন্তী ‘‘চত্তারি সতসহস্সানি, পল্লঙ্কস্স চ হেট্ঠতো’’তি আহ। তত্থ পল্লঙ্কস্সাতি পুব্বে অত্তনো সযনপল্লঙ্কস্স। ততোতি নিহিতধনতো একদেসং গহেত্ৰা মমং উদ্দিস্স দানং দেতু। তস্সাতি ময্হং মাতুযা।
471-72.Ettha nikkhittaṃ, anakkhātanti ‘‘ettakaṃ ettha nikkhitta’’nti anācikkhitaṃ. Idāni tassa parimāṇaṃ ṭhapitaṭṭhānañca dassentī ‘‘cattāri satasahassāni, pallaṅkassa ca heṭṭhato’’ti āha. Tattha pallaṅkassāti pubbe attano sayanapallaṅkassa. Tatoti nihitadhanato ekadesaṃ gahetvā mamaṃ uddissa dānaṃ detu. Tassāti mayhaṃ mātuyā.
এৰং তায পেতিযা ৰুত্তে সো উপাসকো তস্সা ৰচনং সম্পটিচ্ছিত্ৰা তত্থ অত্তনো করণীযং তীরেত্ৰা হত্থিনিপুরং গন্ত্ৰা তস্সা মাতুযা তমত্থং আরোচেসি। তমত্থং দস্সেতুং –
Evaṃ tāya petiyā vutte so upāsako tassā vacanaṃ sampaṭicchitvā tattha attano karaṇīyaṃ tīretvā hatthinipuraṃ gantvā tassā mātuyā tamatthaṃ ārocesi. Tamatthaṃ dassetuṃ –
৪৭৩.
473.
সাধূতি সো পটিস্সুত্ৰা, গন্ত্ৰান হত্থিনিং পুরং।
Sādhūti so paṭissutvā, gantvāna hatthiniṃ puraṃ;
অৰোচ তস্সা মাতরং –
Avoca tassā mātaraṃ –
‘‘ধীতা চ তে মযা দিট্ঠা, দুগ্গতা যমলোকিকা।
‘‘Dhītā ca te mayā diṭṭhā, duggatā yamalokikā;
পাপকম্মং করিত্ৰান, পেতলোকং ইতো গতা॥
Pāpakammaṃ karitvāna, petalokaṃ ito gatā.
৪৭৪.
474.
‘‘সা মং তত্থ সমাদপেসি, ৰজ্জেসি ময্হ মাতরং।
‘‘Sā maṃ tattha samādapesi, vajjesi mayha mātaraṃ;
‘ধীতা চ তে মযা দিট্ঠা, দুগ্গতা যমলোকিকা।
‘Dhītā ca te mayā diṭṭhā, duggatā yamalokikā;
পাপকম্মং করিত্ৰান, পেতলোকং ইতো গতা॥
Pāpakammaṃ karitvāna, petalokaṃ ito gatā.
৪৭৫.
475.
‘‘‘অত্থি চ মে এত্থ নিক্খিত্তং, অনক্খাতঞ্চ তং মযা।
‘‘‘Atthi ca me ettha nikkhittaṃ, anakkhātañca taṃ mayā;
চত্তারি সতসহস্সানি, পল্লঙ্কস্স চ হেট্ঠতো॥
Cattāri satasahassāni, pallaṅkassa ca heṭṭhato.
৪৭৬.
476.
‘‘‘ততো মে দানং দদতু, তস্সা চ হোতু জীৰিকা।
‘‘‘Tato me dānaṃ dadatu, tassā ca hotu jīvikā;
দানং দত্ৰা চ মে মাতা, দক্খিণং অনুদিচ্ছতু।
Dānaṃ datvā ca me mātā, dakkhiṇaṃ anudicchatu;
তদাহং সুখিতা হেস্সং, সব্বকামসমিদ্ধিনী’॥
Tadāhaṃ sukhitā hessaṃ, sabbakāmasamiddhinī’.
৪৭৭.
477.
‘‘ততো হি সা দানমদা, তস্সা দক্খিণমাদিসী।
‘‘Tato hi sā dānamadā, tassā dakkhiṇamādisī;
পেতী চ সুখিতা আসি, তস্সা চাসি সুজীৰিকা’’তি॥ –
Petī ca sukhitā āsi, tassā cāsi sujīvikā’’ti. –
সঙ্গীতিকারা আহংসু। তা সুৰিঞ্ঞেয্যাৰ।
Saṅgītikārā āhaṃsu. Tā suviññeyyāva.
তং সুত্ৰা তস্সা মাতা ভিক্খুসঙ্ঘস্স দানং দত্ৰা তস্সা আদিসি। তেন সা পটিলদ্ধূপকরণসম্পত্তিযং ঠিতা মাতু অত্তানং দস্সেত্ৰা তং কারণং আচিক্খি, মাতা ভিক্খূনং আরোচেসি, ভিক্খূ তং পৰত্তিং ভগৰতো আরোচেসুং। ভগৰা তমত্থং অট্ঠুপ্পত্তিং কত্ৰা সম্পত্তপরিসায ধম্মং দেসেসি। সা দেসনা মহাজনস্স সাত্থিকা অহোসীতি।
Taṃ sutvā tassā mātā bhikkhusaṅghassa dānaṃ datvā tassā ādisi. Tena sā paṭiladdhūpakaraṇasampattiyaṃ ṭhitā mātu attānaṃ dassetvā taṃ kāraṇaṃ ācikkhi, mātā bhikkhūnaṃ ārocesi, bhikkhū taṃ pavattiṃ bhagavato ārocesuṃ. Bhagavā tamatthaṃ aṭṭhuppattiṃ katvā sampattaparisāya dhammaṃ desesi. Sā desanā mahājanassa sātthikā ahosīti.
সেরিণীপেতিৰত্থুৰণ্ণনা নিট্ঠিতা।
Seriṇīpetivatthuvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পেতৰত্থুপাল়ি • Petavatthupāḷi / ৬. সেরিণীপেতৰত্থু • 6. Seriṇīpetavatthu
