| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3-4. ஸேரீஸுத்தாதி³வண்ணனா
3-4. Serīsuttādivaṇṇanā
104. ததியே தா³யகோதி தா³னஸீலோ. தா³னபதீதி யங் தா³னங் தே³மி, தஸ்ஸ பதி ஹுத்வா தே³மி, ந தா³ஸோ ந ஸஹாயோ. யோ ஹி அத்தனா மது⁴ரங் பு⁴ஞ்ஜதி, பரேஸங் அமது⁴ரங் தே³தி, ஸோ தா³னஸங்கா²தஸ்ஸ தெ³ய்யத⁴ம்மஸ்ஸ தா³ஸோ ஹுத்வா தே³தி. யோ யங் அத்தனா பு⁴ஞ்ஜதி, ததே³வ தே³தி, ஸோ ஸஹாயோ ஹுத்வா தே³தி. யோ பன அத்தனா யேன தேன யாபேதி, பரேஸங் மது⁴ரங் தே³தி, ஸோ பதி ஜெட்ட²கோ ஸாமி ஹுத்வா தே³தி. அஹங் ‘‘தாதி³ஸோ அஹோஸி’’ந்தி வத³தி.
104. Tatiye dāyakoti dānasīlo. Dānapatīti yaṃ dānaṃ demi, tassa pati hutvā demi, na dāso na sahāyo. Yo hi attanā madhuraṃ bhuñjati, paresaṃ amadhuraṃ deti, so dānasaṅkhātassa deyyadhammassa dāso hutvā deti. Yo yaṃ attanā bhuñjati, tadeva deti, so sahāyo hutvā deti. Yo pana attanā yena tena yāpeti, paresaṃ madhuraṃ deti, so pati jeṭṭhako sāmi hutvā deti. Ahaṃ ‘‘tādiso ahosi’’nti vadati.
சதூஸு த்³வாரேஸுதி தஸ்ஸ கிர ரஞ்ஞோ ஸிந்த⁴வரட்ட²ங் ஸோதி⁴வாகரட்ட²ந்தி த்³வே ரட்டா²னி அஹேஸுங், நக³ரங் ரோருவங் நாம. தஸ்ஸ ஏகேகஸ்மிங் த்³வாரே தே³வஸிகங் ஸதஸஹஸ்ஸங் உப்பஜ்ஜதி, அந்தோனக³ரே வினிச்ச²யட்டா²னே ஸதஸஹஸ்ஸங். ஸோ ப³ஹுஹிரஞ்ஞஸுவண்ணங் ராஸிபூ⁴தங் தி³ஸ்வா கம்மஸ்ஸகதஞாணங் உப்பாதெ³த்வா சதூஸு த்³வாரேஸு தா³னஸாலாயோ காரெத்வா தஸ்மிங் தஸ்மிங் த்³வாரே உட்டி²தஆயேன தா³னங் தே³தா²தி அமச்சே ட²பேஸி. தேனாஹ – ‘‘சதூஸு த்³வாரேஸு தா³னங் தீ³யித்தா²’’தி.
Catūsu dvāresuti tassa kira rañño sindhavaraṭṭhaṃ sodhivākaraṭṭhanti dve raṭṭhāni ahesuṃ, nagaraṃ roruvaṃ nāma. Tassa ekekasmiṃ dvāre devasikaṃ satasahassaṃ uppajjati, antonagare vinicchayaṭṭhāne satasahassaṃ. So bahuhiraññasuvaṇṇaṃ rāsibhūtaṃ disvā kammassakatañāṇaṃ uppādetvā catūsu dvāresu dānasālāyo kāretvā tasmiṃ tasmiṃ dvāre uṭṭhitaāyena dānaṃ dethāti amacce ṭhapesi. Tenāha – ‘‘catūsu dvāresu dānaṃ dīyitthā’’ti.
ஸமணப்³ராஹ்மணகபணத்³தி⁴கவனிப்³ப³கயாசகானந்தி எத்த² ஸமணாதி பப்³ப³ஜ்ஜூபக³தா. ப்³ராஹ்மணாதி போ⁴வாதி³னோ. ஸமிதபாபபா³ஹிதபாபே பன ஸமணப்³ராஹ்மணே ஏஸ நாலத்த². கபணாதி து³க்³க³தா த³லித்³த³மனுஸ்ஸா காணகுணிஆத³யோ. அத்³தி⁴காதி பதா²வினோ. வனிப்³ப³காதி யே ‘‘இட்ட²ங், தி³ன்னங், கந்தங், மனாபங், காலேன, அனவஜ்ஜங் தி³ன்னங், த³த³ங் சித்தங் பஸாதெ³ய்ய, க³ச்ச²து ப⁴வங் ப்³ரஹ்மலோக’’ந்திஆதி³னா நயேன தா³னஸ்ஸ வண்ணங் தோ²மயமானா விசரந்தி. யாசகாதி யே ‘‘பஸதமத்தங் தே³த², ஸராவமத்தங் தே³தா²’’திஆதீ³னி ச வத்வா யாசமானா விசரந்தி. இத்தா²கா³ரஸ்ஸ தா³னங் தீ³யித்தா²தி பட²மத்³வாரஸ்ஸ லத்³த⁴த்தா தத்த² உப்பஜ்ஜனகஸதஸஹஸ்ஸே அஞ்ஞம்பி த⁴னங் பக்கி²பித்வா ரஞ்ஞோ அமச்சே ஹாரெத்வா அத்தனோ அமச்சே ட²பெத்வா ரஞ்ஞா தி³ன்னதா³னதோ ராஜித்தி²யோ மஹந்ததரங் தா³னங் அத³ங்ஸு. தங் ஸந்தா⁴யேவமாஹ. மம தா³னங் படிக்கமீதி யங் மம தா³னங் தத்த² தீ³யித்த², தங் படினிவத்தி. ஸேஸத்³வாரேஸுபி ஏஸேவ நயோ. கோசீதி கத்த²சி. தீ³க⁴ரத்தந்தி அஸீதிவஸ்ஸஸஹஸ்ஸானி. எத்தகங் கிர காலங் தஸ்ஸ ரஞ்ஞோ தா³னங் தீ³யித்த². ததியங்.
Samaṇabrāhmaṇakapaṇaddhikavanibbakayācakānanti ettha samaṇāti pabbajjūpagatā. Brāhmaṇāti bhovādino. Samitapāpabāhitapāpe pana samaṇabrāhmaṇe esa nālattha. Kapaṇāti duggatā daliddamanussā kāṇakuṇiādayo. Addhikāti pathāvino. Vanibbakāti ye ‘‘iṭṭhaṃ, dinnaṃ, kantaṃ, manāpaṃ, kālena, anavajjaṃ dinnaṃ, dadaṃ cittaṃ pasādeyya, gacchatu bhavaṃ brahmaloka’’ntiādinā nayena dānassa vaṇṇaṃ thomayamānā vicaranti. Yācakāti ye ‘‘pasatamattaṃ detha, sarāvamattaṃ dethā’’tiādīni ca vatvā yācamānā vicaranti. Itthāgārassa dānaṃ dīyitthāti paṭhamadvārassa laddhattā tattha uppajjanakasatasahasse aññampi dhanaṃ pakkhipitvā rañño amacce hāretvā attano amacce ṭhapetvā raññā dinnadānato rājitthiyo mahantataraṃ dānaṃ adaṃsu. Taṃ sandhāyevamāha. Mama dānaṃ paṭikkamīti yaṃ mama dānaṃ tattha dīyittha, taṃ paṭinivatti. Sesadvāresupi eseva nayo. Kocīti katthaci. Dīgharattanti asītivassasahassāni. Ettakaṃ kira kālaṃ tassa rañño dānaṃ dīyittha. Tatiyaṃ.
105. சதுத்த²ங் வுத்தத்த²மேவ. சதுத்த²ங்.
105. Catutthaṃ vuttatthameva. Catutthaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
3. ஸேரீஸுத்தங் • 3. Serīsuttaṃ
4. க⁴டீகாரஸுத்தங் • 4. Ghaṭīkārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā)
3. ஸேரீஸுத்தவண்ணனா • 3. Serīsuttavaṇṇanā
4. க⁴டீகாரஸுத்தவண்ணனா • 4. Ghaṭīkārasuttavaṇṇanā
