| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៣-៤. សេរីសុត្តាទិវណ្ណនា
3-4. Serīsuttādivaṇṇanā
១០៤. តតិយេ ទាយកោតិ ទានសីលោ។ ទានបតីតិ យំ ទានំ ទេមិ, តស្ស បតិ ហុត្វា ទេមិ, ន ទាសោ ន សហាយោ។ យោ ហិ អត្តនា មធុរំ ភុញ្ជតិ, បរេសំ អមធុរំ ទេតិ, សោ ទានសង្ខាតស្ស ទេយ្យធម្មស្ស ទាសោ ហុត្វា ទេតិ។ យោ យំ អត្តនា ភុញ្ជតិ, តទេវ ទេតិ, សោ សហាយោ ហុត្វា ទេតិ។ យោ បន អត្តនា យេន តេន យាបេតិ, បរេសំ មធុរំ ទេតិ, សោ បតិ ជេដ្ឋកោ សាមិ ហុត្វា ទេតិ។ អហំ ‘‘តាទិសោ អហោសិ’’ន្តិ វទតិ។
104. Tatiye dāyakoti dānasīlo. Dānapatīti yaṃ dānaṃ demi, tassa pati hutvā demi, na dāso na sahāyo. Yo hi attanā madhuraṃ bhuñjati, paresaṃ amadhuraṃ deti, so dānasaṅkhātassa deyyadhammassa dāso hutvā deti. Yo yaṃ attanā bhuñjati, tadeva deti, so sahāyo hutvā deti. Yo pana attanā yena tena yāpeti, paresaṃ madhuraṃ deti, so pati jeṭṭhako sāmi hutvā deti. Ahaṃ ‘‘tādiso ahosi’’nti vadati.
ចតូសុ ទ្វារេសុតិ តស្ស កិរ រញ្ញោ សិន្ធវរដ្ឋំ សោធិវាករដ្ឋន្តិ ទ្វេ រដ្ឋានិ អហេសុំ, នគរំ រោរុវំ នាម។ តស្ស ឯកេកស្មិំ ទ្វារេ ទេវសិកំ សតសហស្សំ ឧប្បជ្ជតិ, អន្តោនគរេ វិនិច្ឆយដ្ឋានេ សតសហស្សំ។ សោ ពហុហិរញ្ញសុវណ្ណំ រាសិភូតំ ទិស្វា កម្មស្សកតញាណំ ឧប្បាទេត្វា ចតូសុ ទ្វារេសុ ទានសាលាយោ ការេត្វា តស្មិំ តស្មិំ ទ្វារេ ឧដ្ឋិតអាយេន ទានំ ទេថាតិ អមច្ចេ ឋបេសិ។ តេនាហ – ‘‘ចតូសុ ទ្វារេសុ ទានំ ទីយិត្ថា’’តិ។
Catūsu dvāresuti tassa kira rañño sindhavaraṭṭhaṃ sodhivākaraṭṭhanti dve raṭṭhāni ahesuṃ, nagaraṃ roruvaṃ nāma. Tassa ekekasmiṃ dvāre devasikaṃ satasahassaṃ uppajjati, antonagare vinicchayaṭṭhāne satasahassaṃ. So bahuhiraññasuvaṇṇaṃ rāsibhūtaṃ disvā kammassakatañāṇaṃ uppādetvā catūsu dvāresu dānasālāyo kāretvā tasmiṃ tasmiṃ dvāre uṭṭhitaāyena dānaṃ dethāti amacce ṭhapesi. Tenāha – ‘‘catūsu dvāresu dānaṃ dīyitthā’’ti.
សមណព្រាហ្មណកបណទ្ធិកវនិព្ពកយាចកានន្តិ ឯត្ថ សមណាតិ បព្ពជ្ជូបគតា។ ព្រាហ្មណាតិ ភោវាទិនោ។ សមិតបាបពាហិតបាបេ បន សមណព្រាហ្មណេ ឯស នាលត្ថ។ កបណាតិ ទុគ្គតា ទលិទ្ទមនុស្សា កាណកុណិអាទយោ។ អទ្ធិកាតិ បថាវិនោ។ វនិព្ពកាតិ យេ ‘‘ឥដ្ឋំ, ទិន្នំ, កន្តំ, មនាបំ, កាលេន, អនវជ្ជំ ទិន្នំ, ទទំ ចិត្តំ បសាទេយ្យ, គច្ឆតុ ភវំ ព្រហ្មលោក’’ន្តិអាទិនា នយេន ទានស្ស វណ្ណំ ថោមយមានា វិចរន្តិ។ យាចកាតិ យេ ‘‘បសតមត្តំ ទេថ, សរាវមត្តំ ទេថា’’តិអាទីនិ ច វត្វា យាចមានា វិចរន្តិ។ ឥត្ថាគារស្ស ទានំ ទីយិត្ថាតិ បឋមទ្វារស្ស លទ្ធត្តា តត្ថ ឧប្បជ្ជនកសតសហស្សេ អញ្ញម្បិ ធនំ បក្ខិបិត្វា រញ្ញោ អមច្ចេ ហារេត្វា អត្តនោ អមច្ចេ ឋបេត្វា រញ្ញា ទិន្នទានតោ រាជិត្ថិយោ មហន្តតរំ ទានំ អទំសុ។ តំ សន្ធាយេវមាហ។ មម ទានំ បដិក្កមីតិ យំ មម ទានំ តត្ថ ទីយិត្ថ, តំ បដិនិវត្តិ។ សេសទ្វារេសុបិ ឯសេវ នយោ។ កោចីតិ កត្ថចិ។ ទីឃរត្តន្តិ អសីតិវស្សសហស្សានិ។ ឯត្តកំ កិរ កាលំ តស្ស រញ្ញោ ទានំ ទីយិត្ថ។ តតិយំ។
Samaṇabrāhmaṇakapaṇaddhikavanibbakayācakānanti ettha samaṇāti pabbajjūpagatā. Brāhmaṇāti bhovādino. Samitapāpabāhitapāpe pana samaṇabrāhmaṇe esa nālattha. Kapaṇāti duggatā daliddamanussā kāṇakuṇiādayo. Addhikāti pathāvino. Vanibbakāti ye ‘‘iṭṭhaṃ, dinnaṃ, kantaṃ, manāpaṃ, kālena, anavajjaṃ dinnaṃ, dadaṃ cittaṃ pasādeyya, gacchatu bhavaṃ brahmaloka’’ntiādinā nayena dānassa vaṇṇaṃ thomayamānā vicaranti. Yācakāti ye ‘‘pasatamattaṃ detha, sarāvamattaṃ dethā’’tiādīni ca vatvā yācamānā vicaranti. Itthāgārassa dānaṃ dīyitthāti paṭhamadvārassa laddhattā tattha uppajjanakasatasahasse aññampi dhanaṃ pakkhipitvā rañño amacce hāretvā attano amacce ṭhapetvā raññā dinnadānato rājitthiyo mahantataraṃ dānaṃ adaṃsu. Taṃ sandhāyevamāha. Mama dānaṃ paṭikkamīti yaṃ mama dānaṃ tattha dīyittha, taṃ paṭinivatti. Sesadvāresupi eseva nayo. Kocīti katthaci. Dīgharattanti asītivassasahassāni. Ettakaṃ kira kālaṃ tassa rañño dānaṃ dīyittha. Tatiyaṃ.
១០៥. ចតុត្ថំ វុត្តត្ថមេវ។ ចតុត្ថំ។
105. Catutthaṃ vuttatthameva. Catutthaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya
៣. សេរីសុត្តំ • 3. Serīsuttaṃ
៤. ឃដីការសុត្តំ • 4. Ghaṭīkārasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā)
៣. សេរីសុត្តវណ្ណនា • 3. Serīsuttavaṇṇanā
៤. ឃដីការសុត្តវណ្ណនា • 4. Ghaṭīkārasuttavaṇṇanā
