| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೩-೪. ಸೇರೀಸುತ್ತಾದಿವಣ್ಣನಾ
3-4. Serīsuttādivaṇṇanā
೧೦೪. ತತಿಯೇ ದಾಯಕೋತಿ ದಾನಸೀಲೋ। ದಾನಪತೀತಿ ಯಂ ದಾನಂ ದೇಮಿ, ತಸ್ಸ ಪತಿ ಹುತ್ವಾ ದೇಮಿ, ನ ದಾಸೋ ನ ಸಹಾಯೋ। ಯೋ ಹಿ ಅತ್ತನಾ ಮಧುರಂ ಭುಞ್ಜತಿ, ಪರೇಸಂ ಅಮಧುರಂ ದೇತಿ, ಸೋ ದಾನಸಙ್ಖಾತಸ್ಸ ದೇಯ್ಯಧಮ್ಮಸ್ಸ ದಾಸೋ ಹುತ್ವಾ ದೇತಿ। ಯೋ ಯಂ ಅತ್ತನಾ ಭುಞ್ಜತಿ, ತದೇವ ದೇತಿ, ಸೋ ಸಹಾಯೋ ಹುತ್ವಾ ದೇತಿ। ಯೋ ಪನ ಅತ್ತನಾ ಯೇನ ತೇನ ಯಾಪೇತಿ, ಪರೇಸಂ ಮಧುರಂ ದೇತಿ, ಸೋ ಪತಿ ಜೇಟ್ಠಕೋ ಸಾಮಿ ಹುತ್ವಾ ದೇತಿ। ಅಹಂ ‘‘ತಾದಿಸೋ ಅಹೋಸಿ’’ನ್ತಿ ವದತಿ।
104. Tatiye dāyakoti dānasīlo. Dānapatīti yaṃ dānaṃ demi, tassa pati hutvā demi, na dāso na sahāyo. Yo hi attanā madhuraṃ bhuñjati, paresaṃ amadhuraṃ deti, so dānasaṅkhātassa deyyadhammassa dāso hutvā deti. Yo yaṃ attanā bhuñjati, tadeva deti, so sahāyo hutvā deti. Yo pana attanā yena tena yāpeti, paresaṃ madhuraṃ deti, so pati jeṭṭhako sāmi hutvā deti. Ahaṃ ‘‘tādiso ahosi’’nti vadati.
ಚತೂಸು ದ್ವಾರೇಸುತಿ ತಸ್ಸ ಕಿರ ರಞ್ಞೋ ಸಿನ್ಧವರಟ್ಠಂ ಸೋಧಿವಾಕರಟ್ಠನ್ತಿ ದ್ವೇ ರಟ್ಠಾನಿ ಅಹೇಸುಂ, ನಗರಂ ರೋರುವಂ ನಾಮ। ತಸ್ಸ ಏಕೇಕಸ್ಮಿಂ ದ್ವಾರೇ ದೇವಸಿಕಂ ಸತಸಹಸ್ಸಂ ಉಪ್ಪಜ್ಜತಿ, ಅನ್ತೋನಗರೇ ವಿನಿಚ್ಛಯಟ್ಠಾನೇ ಸತಸಹಸ್ಸಂ। ಸೋ ಬಹುಹಿರಞ್ಞಸುವಣ್ಣಂ ರಾಸಿಭೂತಂ ದಿಸ್ವಾ ಕಮ್ಮಸ್ಸಕತಞಾಣಂ ಉಪ್ಪಾದೇತ್ವಾ ಚತೂಸು ದ್ವಾರೇಸು ದಾನಸಾಲಾಯೋ ಕಾರೇತ್ವಾ ತಸ್ಮಿಂ ತಸ್ಮಿಂ ದ್ವಾರೇ ಉಟ್ಠಿತಆಯೇನ ದಾನಂ ದೇಥಾತಿ ಅಮಚ್ಚೇ ಠಪೇಸಿ। ತೇನಾಹ – ‘‘ಚತೂಸು ದ್ವಾರೇಸು ದಾನಂ ದೀಯಿತ್ಥಾ’’ತಿ।
Catūsu dvāresuti tassa kira rañño sindhavaraṭṭhaṃ sodhivākaraṭṭhanti dve raṭṭhāni ahesuṃ, nagaraṃ roruvaṃ nāma. Tassa ekekasmiṃ dvāre devasikaṃ satasahassaṃ uppajjati, antonagare vinicchayaṭṭhāne satasahassaṃ. So bahuhiraññasuvaṇṇaṃ rāsibhūtaṃ disvā kammassakatañāṇaṃ uppādetvā catūsu dvāresu dānasālāyo kāretvā tasmiṃ tasmiṃ dvāre uṭṭhitaāyena dānaṃ dethāti amacce ṭhapesi. Tenāha – ‘‘catūsu dvāresu dānaṃ dīyitthā’’ti.
ಸಮಣಬ್ರಾಹ್ಮಣಕಪಣದ್ಧಿಕವನಿಬ್ಬಕಯಾಚಕಾನನ್ತಿ ಏತ್ಥ ಸಮಣಾತಿ ಪಬ್ಬಜ್ಜೂಪಗತಾ। ಬ್ರಾಹ್ಮಣಾತಿ ಭೋವಾದಿನೋ। ಸಮಿತಪಾಪಬಾಹಿತಪಾಪೇ ಪನ ಸಮಣಬ್ರಾಹ್ಮಣೇ ಏಸ ನಾಲತ್ಥ। ಕಪಣಾತಿ ದುಗ್ಗತಾ ದಲಿದ್ದಮನುಸ್ಸಾ ಕಾಣಕುಣಿಆದಯೋ। ಅದ್ಧಿಕಾತಿ ಪಥಾವಿನೋ। ವನಿಬ್ಬಕಾತಿ ಯೇ ‘‘ಇಟ್ಠಂ, ದಿನ್ನಂ, ಕನ್ತಂ, ಮನಾಪಂ, ಕಾಲೇನ, ಅನವಜ್ಜಂ ದಿನ್ನಂ, ದದಂ ಚಿತ್ತಂ ಪಸಾದೇಯ್ಯ, ಗಚ್ಛತು ಭವಂ ಬ್ರಹ್ಮಲೋಕ’’ನ್ತಿಆದಿನಾ ನಯೇನ ದಾನಸ್ಸ ವಣ್ಣಂ ಥೋಮಯಮಾನಾ ವಿಚರನ್ತಿ। ಯಾಚಕಾತಿ ಯೇ ‘‘ಪಸತಮತ್ತಂ ದೇಥ, ಸರಾವಮತ್ತಂ ದೇಥಾ’’ತಿಆದೀನಿ ಚ ವತ್ವಾ ಯಾಚಮಾನಾ ವಿಚರನ್ತಿ। ಇತ್ಥಾಗಾರಸ್ಸ ದಾನಂ ದೀಯಿತ್ಥಾತಿ ಪಠಮದ್ವಾರಸ್ಸ ಲದ್ಧತ್ತಾ ತತ್ಥ ಉಪ್ಪಜ್ಜನಕಸತಸಹಸ್ಸೇ ಅಞ್ಞಮ್ಪಿ ಧನಂ ಪಕ್ಖಿಪಿತ್ವಾ ರಞ್ಞೋ ಅಮಚ್ಚೇ ಹಾರೇತ್ವಾ ಅತ್ತನೋ ಅಮಚ್ಚೇ ಠಪೇತ್ವಾ ರಞ್ಞಾ ದಿನ್ನದಾನತೋ ರಾಜಿತ್ಥಿಯೋ ಮಹನ್ತತರಂ ದಾನಂ ಅದಂಸು। ತಂ ಸನ್ಧಾಯೇವಮಾಹ। ಮಮ ದಾನಂ ಪಟಿಕ್ಕಮೀತಿ ಯಂ ಮಮ ದಾನಂ ತತ್ಥ ದೀಯಿತ್ಥ, ತಂ ಪಟಿನಿವತ್ತಿ। ಸೇಸದ್ವಾರೇಸುಪಿ ಏಸೇವ ನಯೋ। ಕೋಚೀತಿ ಕತ್ಥಚಿ। ದೀಘರತ್ತನ್ತಿ ಅಸೀತಿವಸ್ಸಸಹಸ್ಸಾನಿ। ಏತ್ತಕಂ ಕಿರ ಕಾಲಂ ತಸ್ಸ ರಞ್ಞೋ ದಾನಂ ದೀಯಿತ್ಥ। ತತಿಯಂ।
Samaṇabrāhmaṇakapaṇaddhikavanibbakayācakānanti ettha samaṇāti pabbajjūpagatā. Brāhmaṇāti bhovādino. Samitapāpabāhitapāpe pana samaṇabrāhmaṇe esa nālattha. Kapaṇāti duggatā daliddamanussā kāṇakuṇiādayo. Addhikāti pathāvino. Vanibbakāti ye ‘‘iṭṭhaṃ, dinnaṃ, kantaṃ, manāpaṃ, kālena, anavajjaṃ dinnaṃ, dadaṃ cittaṃ pasādeyya, gacchatu bhavaṃ brahmaloka’’ntiādinā nayena dānassa vaṇṇaṃ thomayamānā vicaranti. Yācakāti ye ‘‘pasatamattaṃ detha, sarāvamattaṃ dethā’’tiādīni ca vatvā yācamānā vicaranti. Itthāgārassa dānaṃ dīyitthāti paṭhamadvārassa laddhattā tattha uppajjanakasatasahasse aññampi dhanaṃ pakkhipitvā rañño amacce hāretvā attano amacce ṭhapetvā raññā dinnadānato rājitthiyo mahantataraṃ dānaṃ adaṃsu. Taṃ sandhāyevamāha. Mama dānaṃ paṭikkamīti yaṃ mama dānaṃ tattha dīyittha, taṃ paṭinivatti. Sesadvāresupi eseva nayo. Kocīti katthaci. Dīgharattanti asītivassasahassāni. Ettakaṃ kira kālaṃ tassa rañño dānaṃ dīyittha. Tatiyaṃ.
೧೦೫. ಚತುತ್ಥಂ ವುತ್ತತ್ಥಮೇವ। ಚತುತ್ಥಂ।
105. Catutthaṃ vuttatthameva. Catutthaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya
೩. ಸೇರೀಸುತ್ತಂ • 3. Serīsuttaṃ
೪. ಘಟೀಕಾರಸುತ್ತಂ • 4. Ghaṭīkārasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā)
೩. ಸೇರೀಸುತ್ತವಣ್ಣನಾ • 3. Serīsuttavaṇṇanā
೪. ಘಟೀಕಾರಸುತ್ತವಣ್ಣನಾ • 4. Ghaṭīkārasuttavaṇṇanā
