| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
3. сзрийсуд̇д̇аван̣н̣анаа
3. Serīsuttavaṇṇanā
104. яам̣ д̣̇аанам̣ д̣̇змийд̇и яам̣ д̣̇зяяад̇хаммам̣ барасса д̣̇зми. д̇асса бад̇и худ̇ваад̇и д̇аб̣б̣исаяам̣ лобхам̣ судту абхибхаванд̇о д̇асса ад̇хибад̇и худ̇ваа д̣̇зми д̇зна анаагад̣дханийяад̇д̇аа. ‘‘на д̣̇аасо на сахааяо’’д̇и вад̇ваа д̇ад̣̇убхаяам̣ анваяад̇о б̣яад̇ирзгад̇о д̣̇ассзд̇ум̣ ‘‘яо хий’’д̇иаад̣̇и вуд̇д̇ам̣. д̣̇аасо худ̇ваа д̣̇зд̇и д̇ан̣хааяа д̣̇аасаб̣яасса убаг̇ад̇ад̇д̇аа. сахааяо худ̇ваа д̣̇зд̇и д̇асса бияабхааваависсаж̇ж̇анад̇о. саамий худ̇ваа д̣̇зд̇и д̇ан̣хаад̣̇аасаб̣яад̇о ад̇д̇аанам̣ можзд̇ваа абхибхуяяа бавад̇д̇анад̇о. саамибарибхог̇асад̣̇исаа хзд̇ассааяам̣ бавад̇д̇ад̇ийд̇и.
104.Yaṃdānaṃ demīti yaṃ deyyadhammaṃ parassa demi. Tassa pati hutvāti tabbisayaṃ lobhaṃ suṭṭhu abhibhavanto tassa adhipati hutvā demi tena anākaḍḍhanīyattā. ‘‘Na dāso na sahāyo’’ti vatvā tadubhayaṃ anvayato byatirekato dassetuṃ ‘‘yo hī’’tiādi vuttaṃ. Dāso hutvā deti taṇhāya dāsabyassa upagatattā. Sahāyo hutvā deti tassa piyabhāvāvissajjanato. Sāmī hutvā deti taṇhādāsabyato attānaṃ mocetvā abhibhuyya pavattanato. Sāmiparibhogasadisā hetassāyaṃ pavattatīti.
ат̇а ваа яо д̣̇аанасийлад̇ааяа д̣̇ааяаго буг̇г̇ало, со д̣̇аанз бавад̇д̇ибхзд̣̇зна д̣̇аанад̣̇аасо д̣̇аанасахааяо д̣̇аанабад̇ийд̇и д̇иббагааро ход̇ийд̇и д̣̇ассзд̇и. д̇ад̣̇асса д̇иббагаарад̇ам̣ вибхаж̇ид̇ваа д̣̇ассзд̇ум̣ ‘‘яо хий’’д̇иаад̣̇и вуд̇д̇ам̣. д̣̇аад̇аб̣б̣адтзна д̣̇аанам̣, аннабаанаад̣̇и. д̇ад̇т̇а яам̣ ад̇д̇анаа барибхун̃ж̇ад̇и д̇ан̣хаад̇хибаннад̇ааяа, д̇асса васз вад̇д̇анад̇о д̣̇аасо вияа ход̇и. яам̣ барзсам̣ д̣̇ийяад̇и, д̇ад̇т̇аби аннабаанасааман̃н̃зна ид̣̇ам̣ вуд̇д̇ам̣ ‘‘д̣̇аанасан̇каад̇асса д̣̇зяяад̇хаммасса д̣̇аасо худ̇ваа д̣̇зд̇ий’’д̇и. сахааяо худ̇ваа д̣̇зд̇и ад̇д̇анаа барибхун̃ж̇ид̇аб̣б̣асса барзсам̣ д̣̇аад̇аб̣б̣асса жа самасамадтабанзна. бад̇и худ̇ваа д̣̇зд̇и саяам̣ д̣̇зяяад̇хаммасса васз авад̇д̇ид̇ваа д̇асса ад̇д̇ано васз вад̇д̇аабанад̇о.
Atha vā yo dānasīlatāya dāyako puggalo, so dāne pavattibhedena dānadāso dānasahāyo dānapatīti tippakāro hotīti dasseti. Tadassa tippakārataṃ vibhajitvā dassetuṃ ‘‘yo hī’’tiādi vuttaṃ. Dātabbaṭṭhena dānaṃ, annapānādi. Tattha yaṃ attanā paribhuñjati taṇhādhipannatāya, tassa vase vattanato dāso viya hoti. Yaṃ paresaṃ dīyati, tatthapi annapānasāmaññena idaṃ vuttaṃ ‘‘dānasaṅkhātassa deyyadhammassa dāso hutvā detī’’ti. Sahāyo hutvā deti attanā paribhuñjitabbassa paresaṃ dātabbassa ca samasamaṭṭhapanena. Pati hutvā deti sayaṃ deyyadhammassa vase avattitvā tassa attano vase vattāpanato.
абаро наяо – яо ад̇д̇анаа бан̣ийд̇ам̣ барибхун̃ж̇ид̇ваа барзсам̣ нихийнам̣ д̣̇зд̇и, со д̣̇аанад̣̇аасо наама д̇аннимид̇д̇анихийнабхааваабад̇д̇ид̇о. яо яаад̣̇исам̣ ад̇д̇анаа барибхун̃ж̇ад̇и, д̇аад̣̇исамзва барзсам̣ д̣̇зд̇и, со д̣̇аанасахааяо наама д̇аннимид̇д̇анихийнаад̇хигабхаавависсаж̇ж̇анзна сад̣̇исабхааваабад̇д̇ид̇о. яо ад̇д̇анаа нихийнам̣ барибхун̃ж̇ид̇ваа барзсам̣ бан̣ийд̇ам̣ д̣̇зд̇и, со д̣̇аанабад̇и наама д̇аннимид̇д̇асздтабхааваббад̇д̇ид̇о. гаммасаригкаго хи вибааго, д̇асмаа д̣̇звабуд̇д̇о ‘‘д̣̇аанабад̇ий’’д̇и вад̣̇анд̇о ‘‘ахам̣ д̇аад̣̇исо ахоси’’нд̇и д̣̇ассзд̇и.
Aparo nayo – yo attanā paṇītaṃ paribhuñjitvā paresaṃ nihīnaṃ deti, so dānadāso nāma tannimittanihīnabhāvāpattito. Yo yādisaṃ attanā paribhuñjati, tādisameva paresaṃ deti, so dānasahāyo nāma tannimittanihīnādhikabhāvavissajjanena sadisabhāvāpattito. Yo attanā nihīnaṃ paribhuñjitvā paresaṃ paṇītaṃ deti, so dānapati nāma tannimittaseṭṭhabhāvappattito. Kammasarikkhako hi vipāko, tasmā devaputto ‘‘dānapatī’’ti vadanto ‘‘ahaṃ tādiso ahosi’’nti dasseti.
‘‘жад̇уусу д̣̇ваарзсу д̣̇аанам̣ д̣̇ийяид̇т̇аа’’д̇и баал̣ияам̣ сан̇кзбад̇о вуд̇д̇амад̇т̇ам̣ вид̇т̇аарзд̇ваа д̣̇ассзд̇ум̣ ‘‘д̇асса гираа’’д̇иаад̣̇и вуд̇д̇ам̣. д̣̇аананд̇и яидтам̣, д̇ан̃жа ко саб̣б̣асаад̇хааран̣авасзна гад̇анд̇и ааха ‘‘саман̣а …бз… яаажагаана’’нд̇и. баб̣б̣аж̇ж̇уубаг̇ад̇аад̇и яам̣ гин̃жи баб̣б̣аж̇ж̇ам̣ убаг̇ад̇аа. бховаад̣̇инод̇и ж̇аад̇имад̇д̇аб̣раахман̣з вад̣̇ад̇и. наалад̇т̇а б̣уд̣̇д̇хасун̃н̃ад̇д̇аа д̇ад̣̇аа логасса. д̣̇уг̇г̇ад̇аад̇и д̣̇угкаж̇ийвигагаббагаа гасиравуд̇д̇игаа. д̇знааха ‘‘д̣̇алид̣̇д̣̇амануссаа’’д̇и. гасиваан̣иж̇ж̇аад̣̇иж̇ийвигам̣ анудтаад̇ум̣ асамад̇т̇аа ид̇ха ‘‘габан̣аа’’д̇и ад̇хиббзд̇аад̇и ааха ‘‘гаан̣агун̣иаад̣̇аяо’’д̇и. бат̇аавинод̇и ад̣̇д̇хигаа. ваниб̣б̣агаад̇и д̣̇ааяагаанам̣ г̇ун̣агид̇д̇анагаммапалагид̇д̇анавасзна яаажагаа сзяяат̇ааби наг̇г̇аад̣̇аяо. д̇знааха ‘‘идтам̣ д̣̇инна’’нд̇иаад̣̇и. басад̇амад̇д̇анд̇и вийхид̇ан̣д̣улаад̣̇ивасзна вуд̇д̇ам̣. сараавамад̇д̇анд̇и яааг̇убхад̇д̇аад̣̇ивасзна. яат̇аа г̇аамалаабхо г̇аамз уббаж̇ж̇анаго ааяалаабхо, звам̣ д̇ад̇т̇а д̣̇вааралаабход̇и ааха ‘‘д̇ад̇т̇а уббаж̇ж̇анагасад̇асахассз’’д̇и. маханд̇ад̇арам̣ д̣̇аанам̣ ад̣̇ам̣су ан̃н̃ассаби д̇ханасса винияог̇ам̣ г̇ад̇ад̇д̇аа. д̇ам̣ санд̇хааяаад̇и д̇ам̣ маханд̇ад̇арам̣ д̣̇аанам̣ гад̇ам̣ санд̇хааяа. ран̃н̃о хи д̇ад̇т̇а д̣̇аанам̣ ид̇т̇ааг̇аарасса д̣̇аанзна махад̇аа абхибхууд̇ам̣ вияа бадинивад̇д̇ам̣ ход̇ийд̇и ааха ‘‘бадинивад̇д̇ий’’д̇и. гожийд̇и бхуммад̇т̇з бажжад̇д̇аважанам̣. д̇знааха ‘‘гад̇т̇ажий’’д̇и. анзгавассасахассааяугагаалз д̇асса уббаннад̇д̇аа асийд̇ивассасахассаани со рааж̇аа д̣̇аанамад̣̇аасийд̇и.
‘‘Catūsu dvāresu dānaṃ dīyitthā’’ti pāḷiyaṃ saṅkhepato vuttamatthaṃ vitthāretvā dassetuṃ ‘‘tassa kirā’’tiādi vuttaṃ. Dānanti yiṭṭhaṃ, tañca kho sabbasādhāraṇavasena katanti āha ‘‘samaṇa…pe… yācakāna’’nti. Pabbajjūpagatāti yaṃ kiñci pabbajjaṃ upagatā. Bhovādinoti jātimattabrāhmaṇe vadati. Nālattha buddhasuññattā tadā lokassa. Duggatāti dukkhajīvikakappakā kasiravuttikā. Tenāha ‘‘daliddamanussā’’ti. Kasivāṇijjādijīvikaṃ anuṭṭhātuṃ asamatthā idha ‘‘kapaṇā’’ti adhippetāti āha ‘‘kāṇakuṇiādayo’’ti. Pathāvinoti addhikā. Vanibbakāti dāyakānaṃ guṇakittanakammaphalakittanavasena yācakā seyyathāpi naggādayo. Tenāha ‘‘iṭṭhaṃ dinna’’ntiādi. Pasatamattanti vīhitaṇḍulādivasena vuttaṃ. Sarāvamattanti yāgubhattādivasena. Yathā gāmalābho gāme uppajjanako āyalābho, evaṃ tattha dvāralābhoti āha ‘‘tattha uppajjanakasatasahasse’’ti. Mahantataraṃ dānaṃ adaṃsu aññassapi dhanassa viniyogaṃ gatattā. Taṃ sandhāyāti taṃ mahantataraṃ dānaṃ kataṃ sandhāya. Rañño hi tattha dānaṃ itthāgārassa dānena mahatā abhibhūtaṃ viya paṭinivattaṃ hotīti āha ‘‘paṭinivattī’’ti. Kocīti bhummatthe paccattavacanaṃ. Tenāha ‘‘katthacī’’ti. Anekavassasahassāyukakāle tassa uppannattā asītivassasahassāni so rājā dānamadāsīti.
сзрийсуд̇д̇аван̣н̣анаа нидтид̇аа.
Serīsuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 3. сзрийсуд̇д̇ам̣ • 3. Serīsuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 3-4. сзрийсуд̇д̇аад̣̇иван̣н̣анаа • 3-4. Serīsuttādivaṇṇanā
