| Library / Tipiṭaka / တိပိဋက • Tipiṭaka / ဇာတကပာဠိ • Jātakapāḷi |
၃၇၇. သေတကေတုဇာတကံ (၆-၁-၂)
377. Setaketujātakaṃ (6-1-2)
၈.
8.
မာ တာတ ကုဇ္ဈိ န ဟိ သာဓု ကောဓော၊ ဗဟုမ္ပိ တေ အဒိဋ္ဌမသ္သုတဉ္စ။
Mā tāta kujjhi na hi sādhu kodho, bahumpi te adiṭṭhamassutañca;
မာတာ ပိတာ ဒိသတာ 1 သေတကေတု၊ အာစရိယမာဟု ဒိသတံ ပသတ္ထာ။
Mātā pitā disatā 2 setaketu, ācariyamāhu disataṃ pasatthā.
၉.
9.
အဂာရိနော အန္နဒပာနဝတ္ထဒာ 3၊ အဝ္ဟာယိကာ တမ္ပိ ဒိသံ ဝဒန္တိ။
Agārino annadapānavatthadā 4, avhāyikā tampi disaṃ vadanti;
ဧသာ ဒိသာ ပရမာ သေတကေတု၊ ယံ ပတ္ဝာ ဒုက္ခီ သုခိနော ဘဝန္တိ။
Esā disā paramā setaketu, yaṃ patvā dukkhī sukhino bhavanti.
၁၀.
10.
ခရာဇိနာ ဇဋိလာ ပင္ကဒန္တာ၊ ဒုမ္မက္ခရူပာ 5 ယေမေ ဇပ္ပန္တိ မန္တေ။
Kharājinā jaṭilā paṅkadantā, dummakkharūpā 6 yeme jappanti mante;
ကစ္စိ နု တေ မာနုသကေ ပယောဂေ၊ ဣဒံ ဝိဒူ ပရိမုတ္တာ အပာယာ။
Kacci nu te mānusake payoge, idaṃ vidū parimuttā apāyā.
၁၁.
11.
ပာပာနိ ကမ္မာနိ ကတ္ဝာန ရာဇ၊ ဗဟုသ္သုတော စေ န 7 စရေယ္ယ ဓမ္မံ။
Pāpāni kammāni katvāna rāja, bahussuto ce na 8 careyya dhammaṃ;
သဟသ္သဝေဒောပိ န တံ ပဋိစ္စ၊ ဒုက္ခာ ပမုဉ္စေ စရဏံ အပတ္ဝာ။
Sahassavedopi na taṃ paṭicca, dukkhā pamuñce caraṇaṃ apatvā.
၁၂.
12.
သဟသ္သဝေဒောပိ န တံ ပဋိစ္စ၊ ဒုက္ခာ ပမုဉ္စေ စရဏံ အပတ္ဝာ။
Sahassavedopi na taṃ paṭicca, dukkhā pamuñce caraṇaṃ apatvā;
မညာမိ ဝေဒာ အဖလာ ဘဝန္တိ၊ သသံယမံ စရဏမေဝ 9 သစ္စံ။
Maññāmi vedā aphalā bhavanti, sasaṃyamaṃ caraṇameva 10 saccaṃ.
၁၃.
13.
န ဟေဝ ဝေဒာ အဖလာ ဘဝန္တိ၊ သသံယမံ စရဏမေဝ သစ္စံ။
Na heva vedā aphalā bhavanti, sasaṃyamaṃ caraṇameva saccaṃ;
ကိတ္တိဉ္ဟိ ပပ္ပောတိ အဓိစ္စ ဝေဒေ၊ သန္တိံ ပုဏေတိ 11 စရဏေန ဒန္တောတိ။
Kittiñhi pappoti adhicca vede, santiṃ puṇeti 12 caraṇena dantoti.
သေတကေတုဇာတကံ ဒုတိယံ။
Setaketujātakaṃ dutiyaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ဇာတက-အဋ္ဌကထာ • Jātaka-aṭṭhakathā / [၃၇၇] ၂. သေတကေတုဇာတကဝဏ္ဏနာ • [377] 2. Setaketujātakavaṇṇanā
