| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
206. ஸெட்டி²புத்தவத்து²
206. Seṭṭhiputtavatthu
333. தேன கோ² பன ஸமயேன பா³ராணஸெய்யகஸ்ஸ ஸெட்டி²புத்தஸ்ஸ மொக்க²சிகாய கீளந்தஸ்ஸ அந்தக³ண்டா²பா³தோ⁴ ஹோதி, யேன யாகு³பி பீதா ந ஸம்மா பரிணாமங் க³ச்ச²தி, ப⁴த்தம்பி பு⁴த்தங் ந ஸம்மா பரிணாமங் க³ச்ச²தி, உச்சாரோபி பஸ்ஸாவோபி ந பகு³ணோ. ஸோ தேன கிஸோ ஹோதி லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ. அத² கோ² பா³ராணஸெய்யகஸ்ஸ ஸெட்டி²ஸ்ஸ ஏதத³ஹோஸி – ‘‘மய்ஹங் கோ² புத்தஸ்ஸ தாதி³ஸோ ஆபா³தோ⁴, யேன யாகு³பி பீதா ந ஸம்மா பரிணாமங் க³ச்ச²தி, ப⁴த்தம்பி பு⁴த்தங் ந ஸம்மா பரிணாமங் க³ச்ச²தி, உச்சாரோபி பஸ்ஸாவோபி ந பகு³ணோ. ஸோ தேன கிஸோ லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ. யங்னூனாஹங் ராஜக³ஹங் க³ந்த்வா ராஜானங் ஜீவகங் வேஜ்ஜங் யாசெய்யங் புத்தங் மே திகிச்சி²து’’ந்தி. அத² கோ² பா³ராணஸெய்யகோ ஸெட்டி² ராஜக³ஹங் க³ந்த்வா யேன ராஜா மாக³தோ⁴ ஸேனியோ பி³ம்பி³ஸாரோ தேனுபஸங்கமி, உபஸங்கமித்வா ராஜானங் மாக³த⁴ங் ஸேனியங் பி³ம்பி³ஸாரங் ஏதத³வோச – ‘‘மய்ஹங் கோ², தே³வ, புத்தஸ்ஸ தாதி³ஸோ ஆபா³தோ⁴, யேன யாகு³பி பீதா ந ஸம்மா பரிணாமங் க³ச்ச²தி, ப⁴த்தம்பி பு⁴த்தங் ந ஸம்மா பரிணாமங் க³ச்ச²தி, உச்சாரோபி பஸ்ஸாவோபி ந பகு³ணோ. ஸோ தேன கிஸோ லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ. ஸாது⁴ தே³வோ ஜீவகங் வேஜ்ஜங் ஆணாபேது புத்தங் மே திகிச்சி²து’’ந்தி.
333. Tena kho pana samayena bārāṇaseyyakassa seṭṭhiputtassa mokkhacikāya kīḷantassa antagaṇṭhābādho hoti, yena yāgupi pītā na sammā pariṇāmaṃ gacchati, bhattampi bhuttaṃ na sammā pariṇāmaṃ gacchati, uccāropi passāvopi na paguṇo. So tena kiso hoti lūkho dubbaṇṇo uppaṇḍuppaṇḍukajāto dhamanisanthatagatto. Atha kho bārāṇaseyyakassa seṭṭhissa etadahosi – ‘‘mayhaṃ kho puttassa tādiso ābādho, yena yāgupi pītā na sammā pariṇāmaṃ gacchati, bhattampi bhuttaṃ na sammā pariṇāmaṃ gacchati, uccāropi passāvopi na paguṇo. So tena kiso lūkho dubbaṇṇo uppaṇḍuppaṇḍukajāto dhamanisanthatagatto. Yaṃnūnāhaṃ rājagahaṃ gantvā rājānaṃ jīvakaṃ vejjaṃ yāceyyaṃ puttaṃ me tikicchitu’’nti. Atha kho bārāṇaseyyako seṭṭhi rājagahaṃ gantvā yena rājā māgadho seniyo bimbisāro tenupasaṅkami, upasaṅkamitvā rājānaṃ māgadhaṃ seniyaṃ bimbisāraṃ etadavoca – ‘‘mayhaṃ kho, deva, puttassa tādiso ābādho, yena yāgupi pītā na sammā pariṇāmaṃ gacchati, bhattampi bhuttaṃ na sammā pariṇāmaṃ gacchati, uccāropi passāvopi na paguṇo. So tena kiso lūkho dubbaṇṇo uppaṇḍuppaṇḍukajāto dhamanisanthatagatto. Sādhu devo jīvakaṃ vejjaṃ āṇāpetu puttaṃ me tikicchitu’’nti.
அத² கோ² ராஜா மாக³தோ⁴ ஸேனியோ பி³ம்பி³ஸாரோ ஜீவகங் கோமாரப⁴ச்சங் ஆணாபேஸி – ‘‘க³ச்ச², ப⁴ணே ஜீவக, பா³ராணஸிங் க³ந்த்வா பா³ராணஸெய்யகங் ஸெட்டி²புத்தங் திகிச்சா²ஹீ’’தி. ‘‘ஏவங், தே³வா’’தி கோ² ஜீவகோ கோமாரப⁴ச்சோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ படிஸ்ஸுத்வா பா³ராணஸிங் க³ந்த்வா யேன பா³ராணஸெய்யகோ ஸெட்டி²புத்தோ தேனுபஸங்கமி, உபஸங்கமித்வா பா³ராணஸெய்யகஸ்ஸ ஸெட்டி²புத்தஸ்ஸ விகாரங் ஸல்லக்கெ²த்வா ஜனங் உஸ்ஸாரெத்வா திரோகரணியங் பரிக்கி²பித்வா த²ம்பே⁴ உப்³ப³ந்தி⁴த்வா 1 ப⁴ரியங் புரதோ ட²பெத்வா உத³ரச்ச²விங் உப்பாடெத்வா அந்தக³ண்டி²ங் நீஹரித்வா ப⁴ரியாய த³ஸ்ஸேஸி – ‘‘பஸ்ஸ தே ஸாமிகஸ்ஸ ஆபா³த⁴ங், இமினா யாகு³பி பீதா ந ஸம்மா பரிணாமங் க³ச்ச²தி, ப⁴த்தம்பி பு⁴த்தங் ந ஸம்மா பரிணாமங் க³ச்ச²தி, உச்சாரோபி பஸ்ஸாவோபி ந பகு³ணோ; இமினாயங் கிஸோ லூகோ² து³ப்³ப³ண்ணோ உப்பண்டு³ப்பண்டு³கஜாதோ த⁴மனிஸந்த²தக³த்தோ’’தி. அந்தக³ண்டி²ங் வினிவேடெ²த்வா அந்தானி படிபவேஸெத்வா உத³ரச்ச²விங் ஸிப்³பி³த்வா ஆலேபங் அதா³ஸி. அத² கோ² பா³ராணஸெய்யகோ ஸெட்டி²புத்தோ நசிரஸ்ஸேவ அரோகோ³ அஹோஸி. அத² கோ² பா³ராணஸெய்யகோ ஸெட்டி² ‘புத்தோ மே அரோகோ³ டி²தோ’தி 2 ஜீவகஸ்ஸ கோமாரப⁴ச்சஸ்ஸ ஸோளஸஸஹஸ்ஸானி பாதா³ஸி. அத² கோ² ஜீவகோ கோமாரப⁴ச்சோ தானி ஸோளஸஸஹஸ்ஸானி ஆதா³ய புனதே³வ ராஜக³ஹங் பச்சாக³ஞ்சி² .
Atha kho rājā māgadho seniyo bimbisāro jīvakaṃ komārabhaccaṃ āṇāpesi – ‘‘gaccha, bhaṇe jīvaka, bārāṇasiṃ gantvā bārāṇaseyyakaṃ seṭṭhiputtaṃ tikicchāhī’’ti. ‘‘Evaṃ, devā’’ti kho jīvako komārabhacco rañño māgadhassa seniyassa bimbisārassa paṭissutvā bārāṇasiṃ gantvā yena bārāṇaseyyako seṭṭhiputto tenupasaṅkami, upasaṅkamitvā bārāṇaseyyakassa seṭṭhiputtassa vikāraṃ sallakkhetvā janaṃ ussāretvā tirokaraṇiyaṃ parikkhipitvā thambhe ubbandhitvā 3 bhariyaṃ purato ṭhapetvā udaracchaviṃ uppāṭetvā antagaṇṭhiṃ nīharitvā bhariyāya dassesi – ‘‘passa te sāmikassa ābādhaṃ, iminā yāgupi pītā na sammā pariṇāmaṃ gacchati, bhattampi bhuttaṃ na sammā pariṇāmaṃ gacchati, uccāropi passāvopi na paguṇo; imināyaṃ kiso lūkho dubbaṇṇo uppaṇḍuppaṇḍukajāto dhamanisanthatagatto’’ti. Antagaṇṭhiṃ viniveṭhetvā antāni paṭipavesetvā udaracchaviṃ sibbitvā ālepaṃ adāsi. Atha kho bārāṇaseyyako seṭṭhiputto nacirasseva arogo ahosi. Atha kho bārāṇaseyyako seṭṭhi ‘putto me arogo ṭhito’ti 4 jīvakassa komārabhaccassa soḷasasahassāni pādāsi. Atha kho jīvako komārabhacco tāni soḷasasahassāni ādāya punadeva rājagahaṃ paccāgañchi .
ஸெட்டி²புத்தவத்து² நிட்டி²தங்.
Seṭṭhiputtavatthu niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ராஜக³ஹஸெட்டி²வத்து²கதா² • Rājagahaseṭṭhivatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 205. ராஜக³ஹஸெட்டி²வத்து²கதா² • 205. Rājagahaseṭṭhivatthukathā
