Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya

    ༦. སེཝནཱསུཏྟཾ

    6. Sevanāsuttaṃ

    ༦. ཏཏྲ ཁོ ཨཱཡསྨཱ སཱརིཔུཏྟོ བྷིཀྑཱུ ཨཱམནྟེསི…པེ॰… ཨཱཡསྨཱ སཱརིཔུཏྟོ ཨེཏདཝོཙ –

    6. Tatra kho āyasmā sāriputto bhikkhū āmantesi…pe… āyasmā sāriputto etadavoca –

    ‘‘པུགྒལོཔི , ཨཱཝུསོ, དུཝིདྷེན ཝེདིཏབྦོ – སེཝིཏབྦོཔི ཨསེཝིཏབྦོཔི། ཙཱིཝརམྤི, ཨཱཝུསོ, དུཝིདྷེན ཝེདིཏབྦཾ – སེཝིཏབྦམྤི ཨསེཝིཏབྦམྤི། པིཎྜཔཱཏོཔི, ཨཱཝུསོ, དུཝིདྷེན ཝེདིཏབྦོ – སེཝིཏབྦོཔི ཨསེཝིཏབྦོཔི། སེནཱསནམྤི, ཨཱཝུསོ, དུཝིདྷེན ཝེདིཏབྦཾ – སེཝིཏབྦམྤི ཨསེཝིཏབྦམྤི། གཱམནིགམོཔི, ཨཱཝུསོ, དུཝིདྷེན ཝེདིཏབྦོ – སེཝིཏབྦོཔི ཨསེཝིཏབྦོཔི། ཛནཔདཔདེསོཔི ཨཱཝུསོ, དུཝིདྷེན ཝེདིཏབྦོ – སེཝིཏབྦོཔི ཨསེཝིཏབྦོཔི།

    ‘‘Puggalopi , āvuso, duvidhena veditabbo – sevitabbopi asevitabbopi. Cīvarampi, āvuso, duvidhena veditabbaṃ – sevitabbampi asevitabbampi. Piṇḍapātopi, āvuso, duvidhena veditabbo – sevitabbopi asevitabbopi. Senāsanampi, āvuso, duvidhena veditabbaṃ – sevitabbampi asevitabbampi. Gāmanigamopi, āvuso, duvidhena veditabbo – sevitabbopi asevitabbopi. Janapadapadesopi āvuso, duvidhena veditabbo – sevitabbopi asevitabbopi.

    ‘‘‘པུགྒལོཔི, ཨཱཝུསོ, དུཝིདྷེན ཝེདིཏབྦོ – སེཝིཏབྦོཔི ཨསེཝིཏབྦོཔཱི’ཏི, ཨིཏི ཁོ པནེཏཾ ཝུཏྟཾ། ཀིཉྩེཏཾ པཊིཙྩ ཝུཏྟཾ? ཏཏྠ ཡཾ ཛཉྙཱ པུགྒལཾ – ‘ཨིམཾ ཁོ མེ པུགྒལཾ སེཝཏོ ཨཀུསལཱ དྷམྨཱ ཨབྷིཝཌྜྷནྟི, ཀུསལཱ དྷམྨཱ པརིཧཱཡནྟི; ཡེ ཙ ཁོ མེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱ ཏེ ཙ ཀསིརེན སམུདཱགཙྪནྟི; ཡསྶ ཙམྷི ཨཏྠཱཡ ཨགཱརསྨཱ ཨནགཱརིཡཾ པབྦཛིཏོ སོ ཙ མེ སཱམཉྙཏྠོ ན བྷཱཝནཱཔཱརིཔཱུརིཾ གཙྪཏཱི’ཏི, ཏེནཱཝུསོ, པུགྒལེན སོ པུགྒལོ རཏྟིབྷཱགཾ ཝཱ དིཝསབྷཱགཾ ཝཱ སངྑཱཔི ཨནཱཔུཙྪཱ པཀྐམིཏབྦཾ ནཱནུབནྡྷིཏབྦོ།

    ‘‘‘Puggalopi, āvuso, duvidhena veditabbo – sevitabbopi asevitabbopī’ti, iti kho panetaṃ vuttaṃ. Kiñcetaṃ paṭicca vuttaṃ? Tattha yaṃ jaññā puggalaṃ – ‘imaṃ kho me puggalaṃ sevato akusalā dhammā abhivaḍḍhanti, kusalā dhammā parihāyanti; ye ca kho me pabbajitena jīvitaparikkhārā samudānetabbā cīvarapiṇḍapātasenāsanagilānapaccayabhesajjaparikkhārā te ca kasirena samudāgacchanti; yassa camhi atthāya agārasmā anagāriyaṃ pabbajito so ca me sāmaññattho na bhāvanāpāripūriṃ gacchatī’ti, tenāvuso, puggalena so puggalo rattibhāgaṃ vā divasabhāgaṃ vā saṅkhāpi anāpucchā pakkamitabbaṃ nānubandhitabbo.

    ‘‘ཏཏྠ ཡཾ ཛཉྙཱ པུགྒལཾ – ‘ཨིམཾ ཁོ མེ པུགྒལཾ སེཝཏོ ཨཀུསལཱ དྷམྨཱ ཨབྷིཝཌྜྷནྟི, ཀུསལཱ དྷམྨཱ པརིཧཱཡནྟི; ཡེ ཙ ཁོ མེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱ ཏེ ཙ ཨཔྤཀསིརེན སམུདཱགཙྪནྟི; ཡསྶ ཙམྷི ཨཏྠཱཡ ཨགཱརསྨཱ ཨནགཱརིཡཾ པབྦཛིཏོ སོ ཙ མེ སཱམཉྙཏྠོ ན བྷཱཝནཱཔཱརིཔཱུརིཾ གཙྪཏཱི’ཏི, ཏེནཱཝུསོ, པུགྒལེན སོ པུགྒལོ སངྑཱཔི ཨནཱཔུཙྪཱ པཀྐམིཏབྦཾ ནཱནུབནྡྷིཏབྦོ།

    ‘‘Tattha yaṃ jaññā puggalaṃ – ‘imaṃ kho me puggalaṃ sevato akusalā dhammā abhivaḍḍhanti, kusalā dhammā parihāyanti; ye ca kho me pabbajitena jīvitaparikkhārā samudānetabbā cīvarapiṇḍapātasenāsanagilānapaccayabhesajjaparikkhārā te ca appakasirena samudāgacchanti; yassa camhi atthāya agārasmā anagāriyaṃ pabbajito so ca me sāmaññattho na bhāvanāpāripūriṃ gacchatī’ti, tenāvuso, puggalena so puggalo saṅkhāpi anāpucchā pakkamitabbaṃ nānubandhitabbo.

    ‘‘ཏཏྠ ཡཾ ཛཉྙཱ པུགྒལཾ – ‘ཨིམཾ ཁོ མེ པུགྒལཾ སེཝཏོ ཨཀུསལཱ དྷམྨཱ པརིཧཱཡནྟི, ཀུསལཱ དྷམྨཱ ཨབྷིཝཌྜྷནྟི; ཡེ ཙ ཁོ མེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱ ཏེ ཙ ཀསིརེན སམུདཱགཙྪནྟི; ཡསྶ ཙམྷི ཨཏྠཱཡ ཨགཱརསྨཱ ཨནགཱརིཡཾ པབྦཛིཏོ སོ ཙ མེ སཱམཉྙཏྠོ བྷཱཝནཱཔཱརིཔཱུརིཾ གཙྪཏཱི’ཏི, ཏེནཱཝུསོ, པུགྒལེན སོ པུགྒལོ སངྑཱཔི ཨནུབནྡྷིཏབྦོ ན པཀྐམིཏབྦཾ།

    ‘‘Tattha yaṃ jaññā puggalaṃ – ‘imaṃ kho me puggalaṃ sevato akusalā dhammā parihāyanti, kusalā dhammā abhivaḍḍhanti; ye ca kho me pabbajitena jīvitaparikkhārā samudānetabbā cīvarapiṇḍapātasenāsanagilānapaccayabhesajjaparikkhārā te ca kasirena samudāgacchanti; yassa camhi atthāya agārasmā anagāriyaṃ pabbajito so ca me sāmaññattho bhāvanāpāripūriṃ gacchatī’ti, tenāvuso, puggalena so puggalo saṅkhāpi anubandhitabbo na pakkamitabbaṃ.

    ‘‘ཏཏྠ ཡཾ ཛཉྙཱ པུགྒལཾ – ‘ཨིམཾ ཁོ མེ པུགྒལཾ སེཝཏོ ཨཀུསལཱ དྷམྨཱ པརིཧཱཡནྟི, ཀུསལཱ དྷམྨཱ ཨབྷིཝཌྜྷནྟི; ཡེ ཙ ཁོ མེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱ ཏེ ཙ ཨཔྤཀསིརེན སམུདཱགཙྪནྟི; ཡསྶ ཙམྷི ཨཏྠཱཡ ཨགཱརསྨཱ ཨནགཱརིཡཾ པབྦཛིཏོ སོ ཙ མེ སཱམཉྙཏྠོ བྷཱཝནཱཔཱརིཔཱུརིཾ གཙྪཏཱི’ཏི, ཏེནཱཝུསོ, པུགྒལེན སོ པུགྒལོ ཡཱཝཛཱིཝཾ ཨནུབནྡྷིཏབྦོ ན པཀྐམིཏབྦཾ ཨཔི པནུཛྫམཱནེན 1། ‘པུགྒལོཔི, ཨཱཝུསོ, དུཝིདྷེན ཝེདིཏབྦོ – སེཝིཏབྦོཔི ཨསེཝིཏབྦོཔཱི’ཏི, ཨིཏི ཡཾ ཏཾ ཝུཏྟཾ, ཨིདམེཏཾ པཊིཙྩ ཝུཏྟཾ།

    ‘‘Tattha yaṃ jaññā puggalaṃ – ‘imaṃ kho me puggalaṃ sevato akusalā dhammā parihāyanti, kusalā dhammā abhivaḍḍhanti; ye ca kho me pabbajitena jīvitaparikkhārā samudānetabbā cīvarapiṇḍapātasenāsanagilānapaccayabhesajjaparikkhārā te ca appakasirena samudāgacchanti; yassa camhi atthāya agārasmā anagāriyaṃ pabbajito so ca me sāmaññattho bhāvanāpāripūriṃ gacchatī’ti, tenāvuso, puggalena so puggalo yāvajīvaṃ anubandhitabbo na pakkamitabbaṃ api panujjamānena 2. ‘Puggalopi, āvuso, duvidhena veditabbo – sevitabbopi asevitabbopī’ti, iti yaṃ taṃ vuttaṃ, idametaṃ paṭicca vuttaṃ.

    ‘‘‘ཙཱིཝརམྤི, ཨཱཝུསོ, དུཝིདྷེན ཝེདིཏབྦཾ – སེཝིཏབྦམྤི ཨསེཝིཏབྦམྤཱི’ཏི, ཨིཏི ཁོ པནེཏཾ ཝུཏྟཾ། ཀིཉྩེཏཾ པཊིཙྩ ཝུཏྟཾ? ཏཏྠ ཡཾ ཛཉྙཱ ཙཱིཝརཾ – ‘ཨིདཾ ཁོ མེ ཙཱིཝརཾ སེཝཏོ ཨཀུསལཱ དྷམྨཱ ཨབྷིཝཌྜྷནྟི, ཀུསལཱ དྷམྨཱ པརིཧཱཡནྟཱི’ཏི, ཨེཝརཱུཔཾ ཙཱིཝརཾ ན སེཝིཏབྦཾ ། ཏཏྠ ཡཾ ཛཉྙཱ ཙཱིཝརཾ – ‘ཨིདཾ ཁོ མེ ཙཱིཝརཾ སེཝཏོ ཨཀུསལཱ དྷམྨཱ པརིཧཱཡནྟི, ཀུསལཱ དྷམྨཱ ཨབྷིཝཌྜྷནྟཱི’ཏི, ཨེཝརཱུཔཾ ཙཱིཝརཾ སེཝིཏབྦཾ། ‘ཙཱིཝརམྤི , ཨཱཝུསོ, དུཝིདྷེན ཝེདིཏབྦཾ – སེཝིཏབྦམྤི ཨསེཝིཏབྦམྤཱི’ཏི, ཨིཏི ཡཾ ཏཾ ཝུཏྟཾ, ཨིདམེཏཾ པཊིཙྩ ཝུཏྟཾ།

    ‘‘‘Cīvarampi, āvuso, duvidhena veditabbaṃ – sevitabbampi asevitabbampī’ti, iti kho panetaṃ vuttaṃ. Kiñcetaṃ paṭicca vuttaṃ? Tattha yaṃ jaññā cīvaraṃ – ‘idaṃ kho me cīvaraṃ sevato akusalā dhammā abhivaḍḍhanti, kusalā dhammā parihāyantī’ti, evarūpaṃ cīvaraṃ na sevitabbaṃ . Tattha yaṃ jaññā cīvaraṃ – ‘idaṃ kho me cīvaraṃ sevato akusalā dhammā parihāyanti, kusalā dhammā abhivaḍḍhantī’ti, evarūpaṃ cīvaraṃ sevitabbaṃ. ‘Cīvarampi , āvuso, duvidhena veditabbaṃ – sevitabbampi asevitabbampī’ti, iti yaṃ taṃ vuttaṃ, idametaṃ paṭicca vuttaṃ.

    ‘‘‘པིཎྜཔཱཏོཔི, ཨཱཝུསོ, དུཝིདྷེན ཝེདིཏབྦོ – སེཝིཏབྦོཔི ཨསེཝིཏབྦོཔཱི’ཏི, ཨིཏི ཁོ པནེཏཾ ཝུཏྟཾ། ཀིཉྩེཏཾ པཊིཙྩ ཝུཏྟཾ? ཏཏྠ ཡཾ ཛཉྙཱ པིཎྜཔཱཏཾ – ‘ཨིམཾ ཁོ མེ པིཎྜཔཱཏཾ སེཝཏོ ཨཀུསལཱ དྷམྨཱ ཨབྷིཝཌྜྷནྟི, ཀུསལཱ དྷམྨཱ པརིཧཱཡནྟཱི’ཏི, ཨེཝརཱུཔོ པིཎྜཔཱཏོ ན སེཝིཏབྦོ། ཏཏྠ ཡཾ ཛཉྙཱ པིཎྜཔཱཏཾ – ‘ཨིམཾ ཁོ མེ པིཎྜཔཱཏཾ སེཝཏོ ཨཀུསལཱ དྷམྨཱ པརིཧཱཡནྟི, ཀུསལཱ དྷམྨཱ ཨབྷིཝཌྜྷནྟཱི’ཏི, ཨེཝརཱུཔོ པིཎྜཔཱཏོ སེཝིཏབྦོ། ‘པིཎྜཔཱཏོཔི, ཨཱཝུསོ, དུཝིདྷེན ཝེདིཏབྦོ – སེཝིཏབྦོཔི ཨསེཝིཏབྦོཔཱི’ཏི, ཨིཏི ཡཾ ཏཾ ཝུཏྟཾ, ཨིདམེཏཾ པཊིཙྩ ཝུཏྟཾ།

    ‘‘‘Piṇḍapātopi, āvuso, duvidhena veditabbo – sevitabbopi asevitabbopī’ti, iti kho panetaṃ vuttaṃ. Kiñcetaṃ paṭicca vuttaṃ? Tattha yaṃ jaññā piṇḍapātaṃ – ‘imaṃ kho me piṇḍapātaṃ sevato akusalā dhammā abhivaḍḍhanti, kusalā dhammā parihāyantī’ti, evarūpo piṇḍapāto na sevitabbo. Tattha yaṃ jaññā piṇḍapātaṃ – ‘imaṃ kho me piṇḍapātaṃ sevato akusalā dhammā parihāyanti, kusalā dhammā abhivaḍḍhantī’ti, evarūpo piṇḍapāto sevitabbo. ‘Piṇḍapātopi, āvuso, duvidhena veditabbo – sevitabbopi asevitabbopī’ti, iti yaṃ taṃ vuttaṃ, idametaṃ paṭicca vuttaṃ.

    ‘‘‘སེནཱསནམྤི, ཨཱཝུསོ, དུཝིདྷེན ཝེདིཏབྦཾ – སེཝིཏབྦམྤི ཨསེཝིཏབྦམྤཱི’ཏི, ཨིཏི ཁོ པནེཏཾ ཝུཏྟཾ། ཀིཉྩེཏཾ པཊིཙྩ ཝུཏྟཾ? ཏཏྠ ཡཾ ཛཉྙཱ སེནཱསནཾ – ‘‘ཨིདཾ ཁོ མེ སེནཱསནཾ སེཝཏོ ཨཀུསལཱ དྷམྨཱ ཨབྷིཝཌྜྷནྟི, ཀུསལཱ དྷམྨཱ པརིཧཱཡནྟཱི’ཏི, ཨེཝརཱུཔཾ སེནཱསནཾ ན སེཝིཏབྦཾ། ཏཏྠ ཡཾ ཛཉྙཱ སེནཱསནཾ – ‘ཨིདཾ ཁོ མེ སེནཱསནཾ སེཝཏོ ཨཀུསལཱ དྷམྨཱ པརིཧཱཡནྟི , ཀུསལཱ དྷམྨཱ ཨབྷིཝཌྜྷནྟཱི’ཏི, ཨེཝརཱུཔཾ སེནཱསནཾ སེཝིཏབྦཾ། ‘སེནཱསནམྤི, ཨཱཝུསོ, དུཝིདྷེན ཝེདིཏབྦཾ – སེཝིཏབྦམྤི ཨསེཝིཏབྦམྤཱི’ཏི, ཨིཏི ཡཾ ཏཾ ཝུཏྟཾ, ཨིདམེཏཾ པཊིཙྩ ཝུཏྟཾ།

    ‘‘‘Senāsanampi, āvuso, duvidhena veditabbaṃ – sevitabbampi asevitabbampī’ti, iti kho panetaṃ vuttaṃ. Kiñcetaṃ paṭicca vuttaṃ? Tattha yaṃ jaññā senāsanaṃ – ‘‘idaṃ kho me senāsanaṃ sevato akusalā dhammā abhivaḍḍhanti, kusalā dhammā parihāyantī’ti, evarūpaṃ senāsanaṃ na sevitabbaṃ. Tattha yaṃ jaññā senāsanaṃ – ‘idaṃ kho me senāsanaṃ sevato akusalā dhammā parihāyanti , kusalā dhammā abhivaḍḍhantī’ti, evarūpaṃ senāsanaṃ sevitabbaṃ. ‘Senāsanampi, āvuso, duvidhena veditabbaṃ – sevitabbampi asevitabbampī’ti, iti yaṃ taṃ vuttaṃ, idametaṃ paṭicca vuttaṃ.

    ‘‘‘གཱམནིགམོཔི, ཨཱཝུསོ, དུཝིདྷེན ཝེདིཏབྦོ – སེཝིཏབྦོཔི ཨསེཝིཏབྦོཔཱི’ཏི, ཨིཏི ཁོ པནེཏཾ ཝུཏྟཾ། ཀིཉྩེཏཾ པཊིཙྩ ཝུཏྟཾ? ཏཏྠ ཡཾ ཛཉྙཱ གཱམནིགམཾ – ‘ཨིམཾ ཁོ མེ གཱམནིགམཾ སེཝཏོ ཨཀུསལཱ དྷམྨཱ ཨབྷིཝཌྜྷནྟི, ཀུསལཱ དྷམྨཱ པརིཧཱཡནྟཱི’ཏི, ཨེཝརཱུཔོ གཱམནིགམོ ན སེཝིཏབྦོ། ཏཏྠ ཡཾ ཛཉྙཱ གཱམནིགམཾ – ‘ཨིམཾ ཁོ, མེ གཱམནིགམཾ སེཝཏོ ཨཀུསལཱ དྷམྨཱ པརིཧཱཡནྟི, ཀུསལཱ དྷམྨཱ ཨབྷིཝཌྜྷནྟཱི’ཏི, ཨེཝརཱུཔོ གཱམནིགམོ སེཝིཏབྦོ། ‘གཱམནིགམོཔི, ཨཱཝུསོ, དུཝིདྷེན ཝེདིཏབྦོ – སེཝིཏབྦོཔི ཨསེཝིཏབྦོཔཱི’ཏི, ཨིཏི ཡཾ ཏཾ ཝུཏྟཾ, ཨིདམེཏཾ པཊིཙྩ ཝུཏྟཾ།

    ‘‘‘Gāmanigamopi, āvuso, duvidhena veditabbo – sevitabbopi asevitabbopī’ti, iti kho panetaṃ vuttaṃ. Kiñcetaṃ paṭicca vuttaṃ? Tattha yaṃ jaññā gāmanigamaṃ – ‘imaṃ kho me gāmanigamaṃ sevato akusalā dhammā abhivaḍḍhanti, kusalā dhammā parihāyantī’ti, evarūpo gāmanigamo na sevitabbo. Tattha yaṃ jaññā gāmanigamaṃ – ‘imaṃ kho, me gāmanigamaṃ sevato akusalā dhammā parihāyanti, kusalā dhammā abhivaḍḍhantī’ti, evarūpo gāmanigamo sevitabbo. ‘Gāmanigamopi, āvuso, duvidhena veditabbo – sevitabbopi asevitabbopī’ti, iti yaṃ taṃ vuttaṃ, idametaṃ paṭicca vuttaṃ.

    ‘‘‘ཛནཔདཔདེསོཔི , ཨཱཝུསོ, དུཝིདྷེན ཝེདིཏབྦོ – སེཝིཏབྦོཔི ཨསེཝིཏབྦོཔཱི’ཏི, ཨིཏི ཁོ པནེཏཾ ཝུཏྟཾ། ཀིཉྩེཏཾ པཊིཙྩ ཝུཏྟཾ? ཏཏྠ ཡཾ ཛཉྙཱ ཛནཔདཔདེསཾ – ‘ཨིམཾ ཁོ མེ ཛནཔདཔདེསཾ སེཝཏོ ཨཀུསལཱ དྷམྨཱ ཨབྷིཝཌྜྷནྟི, ཀུསལཱ དྷམྨཱ པརིཧཱཡནྟཱི’ཏི, ཨེཝརཱུཔོ ཛནཔདཔདེསོ ན སེཝིཏབྦོ། ཏཏྠ ཡཾ ཛཉྙཱ ཛནཔདཔདེསཾ – ‘ཨིམཾ ཁོ མེ ཛནཔདཔདེསཾ སེཝཏོ ཨཀུསལཱ དྷམྨཱ པརིཧཱཡནྟི, ཀུསལཱ དྷམྨཱ ཨབྷིཝཌྜྷནྟཱི’ཏི, ཨེཝརཱུཔོ ཛནཔདཔདེསོ སེཝིཏབྦོ། ‘ཛནཔདཔདེསོཔི, ཨཱཝུསོ, དུཝིདྷེན ཝེདིཏབྦོ – སེཝིཏབྦོཔི ཨསེཝིཏབྦོཔཱི’ཏི, ཨིཏི ཡཾ ཏཾ ཝུཏྟཾ, ཨིདམེཏཾ པཊིཙྩ ཝུཏྟ’’ནྟི། ཚཊྛཾ།

    ‘‘‘Janapadapadesopi , āvuso, duvidhena veditabbo – sevitabbopi asevitabbopī’ti, iti kho panetaṃ vuttaṃ. Kiñcetaṃ paṭicca vuttaṃ? Tattha yaṃ jaññā janapadapadesaṃ – ‘imaṃ kho me janapadapadesaṃ sevato akusalā dhammā abhivaḍḍhanti, kusalā dhammā parihāyantī’ti, evarūpo janapadapadeso na sevitabbo. Tattha yaṃ jaññā janapadapadesaṃ – ‘imaṃ kho me janapadapadesaṃ sevato akusalā dhammā parihāyanti, kusalā dhammā abhivaḍḍhantī’ti, evarūpo janapadapadeso sevitabbo. ‘Janapadapadesopi, āvuso, duvidhena veditabbo – sevitabbopi asevitabbopī’ti, iti yaṃ taṃ vuttaṃ, idametaṃ paṭicca vutta’’nti. Chaṭṭhaṃ.




    Next: ༧. སུཏཝཱསུཏྟཾ • 7. Sutavāsuttaṃ




    Footnotes:
    1. པཎུཛྫམཱནེན (?)
    2. paṇujjamānena (?)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. སེཝནཱསུཏྟཝཎྞནཱ • 6. Sevanāsuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༦. སེཝནཱསུཏྟཝཎྞནཱ • 6. Sevanāsuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact