| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
৪. সেৰিতব্বাসেৰিতব্বসুত্তং
4. Sevitabbāsevitabbasuttaṃ
১০৯. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তত্র খো ভগৰা ভিক্খূ আমন্তেসি – ‘‘ভিক্খৰো’’তি। ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ – ‘‘সেৰিতব্বাসেৰিতব্বং ৰো, ভিক্খৰে, ধম্মপরিযাযং দেসেস্সামি। তং সুণাথ, সাধুকং মনসি করোথ; ভাসিস্সামী’’তি। ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং। ভগৰা এতদৰোচ –
109. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘sevitabbāsevitabbaṃ vo, bhikkhave, dhammapariyāyaṃ desessāmi. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘কাযসমাচারংপাহং 1, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং কাযসমাচারং। ৰচীসমাচারংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং ৰচীসমাচারং। মনোসমাচারংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং মনোসমাচারং। চিত্তুপ্পাদংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং চিত্তুপ্পাদং। সঞ্ঞাপটিলাভংপাহং, ভিক্খৰে, দুৰিধেন ৰদামি – সেৰিতব্বম্পি , অসেৰিতব্বম্পি; তঞ্চ অঞ্ঞমঞ্ঞং সঞ্ঞাপটিলাভং। দিট্ঠিপটিলাভংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং দিট্ঠিপটিলাভং। অত্তভাৰপটিলাভংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং অত্তভাৰপটিলাভ’’ন্তি।
‘‘Kāyasamācāraṃpāhaṃ 2, bhikkhave, duvidhena vadāmi – sevitabbampi, asevitabbampi; tañca aññamaññaṃ kāyasamācāraṃ. Vacīsamācāraṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ vacīsamācāraṃ. Manosamācāraṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ manosamācāraṃ. Cittuppādaṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ cittuppādaṃ. Saññāpaṭilābhaṃpāhaṃ, bhikkhave, duvidhena vadāmi – sevitabbampi , asevitabbampi; tañca aññamaññaṃ saññāpaṭilābhaṃ. Diṭṭhipaṭilābhaṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ diṭṭhipaṭilābhaṃ. Attabhāvapaṭilābhaṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ attabhāvapaṭilābha’’nti.
এৰং ৰুত্তে আযস্মা সারিপুত্তো ভগৰন্তং এতদৰোচ – ‘‘ইমস্স খো অহং, ভন্তে, ভগৰতা সংখিত্তেন ভাসিতস্স, ৰিত্থারেন অত্থং অৰিভত্তস্স, এৰং ৰিত্থারেন অত্থং আজানামি।
Evaṃ vutte āyasmā sāriputto bhagavantaṃ etadavoca – ‘‘imassa kho ahaṃ, bhante, bhagavatā saṃkhittena bhāsitassa, vitthārena atthaṃ avibhattassa, evaṃ vitthārena atthaṃ ājānāmi.
১১০. ‘‘‘কাযসমাচারংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং কাযসমাচার’ন্তি – ইতি খো পনেতং ৰুত্তং ভগৰতা। কিঞ্চেতং পটিচ্চ ৰুত্তং? যথারূপং, ভন্তে, কাযসমাচারং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি, এৰরূপো কাযসমাচারো ন সেৰিতব্বো; যথারূপঞ্চ খো, ভন্তে, কাযসমাচারং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি, এৰরূপো কাযসমাচারো সেৰিতব্বো।
110. ‘‘‘Kāyasamācāraṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ kāyasamācāra’nti – iti kho panetaṃ vuttaṃ bhagavatā. Kiñcetaṃ paṭicca vuttaṃ? Yathārūpaṃ, bhante, kāyasamācāraṃ sevato akusalā dhammā abhivaḍḍhanti, kusalā dhammā parihāyanti, evarūpo kāyasamācāro na sevitabbo; yathārūpañca kho, bhante, kāyasamācāraṃ sevato akusalā dhammā parihāyanti, kusalā dhammā abhivaḍḍhanti, evarūpo kāyasamācāro sevitabbo.
১১১. ‘‘কথংরূপং, ভন্তে, কাযসমাচারং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি? ইধ, ভন্তে, একচ্চো পাণাতিপাতী হোতি লুদ্দো লোহিতপাণি হতপ্পহতে নিৰিট্ঠো অদযাপন্নো পাণভূতেসু; অদিন্নাদাযী খো পন হোতি, যং তং পরস্স পরৰিত্তূপকরণং গামগতং ৰা অরঞ্ঞগতং ৰা তং অদিন্নং থেয্যসঙ্খাতং আদাতা হোতি; কামেসুমিচ্ছাচারী খো পন হোতি, যা তা মাতুরক্খিতা পিতুরক্খিতা মাতাপিতুরক্খিতা ভাতুরক্খিতা ভগিনিরক্খিতা ঞাতিরক্খিতা গোত্তরক্খিতা ধম্মরক্খিতা সস্সামিকা সপরিদণ্ডা অন্তমসো মালাগুল়পরিক্খিত্তাপি তথারূপাসু চারিত্তং আপজ্জিতা হোতি – এৰরূপং, ভন্তে, কাযসমাচারং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি।
111. ‘‘Kathaṃrūpaṃ, bhante, kāyasamācāraṃ sevato akusalā dhammā abhivaḍḍhanti, kusalā dhammā parihāyanti? Idha, bhante, ekacco pāṇātipātī hoti luddo lohitapāṇi hatappahate niviṭṭho adayāpanno pāṇabhūtesu; adinnādāyī kho pana hoti, yaṃ taṃ parassa paravittūpakaraṇaṃ gāmagataṃ vā araññagataṃ vā taṃ adinnaṃ theyyasaṅkhātaṃ ādātā hoti; kāmesumicchācārī kho pana hoti, yā tā māturakkhitā piturakkhitā mātāpiturakkhitā bhāturakkhitā bhaginirakkhitā ñātirakkhitā gottarakkhitā dhammarakkhitā sassāmikā saparidaṇḍā antamaso mālāguḷaparikkhittāpi tathārūpāsu cārittaṃ āpajjitā hoti – evarūpaṃ, bhante, kāyasamācāraṃ sevato akusalā dhammā abhivaḍḍhanti, kusalā dhammā parihāyanti.
‘‘কথংরূপং , ভন্তে, কাযসমাচারং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি? ইধ, ভন্তে, একচ্চো পাণাতিপাতং পহায পাণাতিপাতা পটিৰিরতো হোতি নিহিতদণ্ডো নিহিতসত্থো, লজ্জী দযাপন্নো সব্বপাণভূতহিতানুকম্পী ৰিহরতি; অদিন্নাদানং পহায অদিন্নাদানা পটিৰিরতো হোতি, যং তং পরস্স পরৰিত্তূপকরণং গামগতং ৰা অরঞ্ঞগতং ৰা তং নাদিন্নং থেয্যসঙ্খাতং আদাতা হোতি; কামেসুমিচ্ছাচারং পহায কামেসুমিচ্ছাচারা পটিৰিরতো হোতি, যা তা মাতুরক্খিতা পিতুরক্খিতা মাতাপিতুরক্খিতা ভাতুরক্খিতা ভগিনিরক্খিতা ঞাতিরক্খিতা গোত্তরক্খিতা ধম্মরক্খিতা সস্সামিকা সপরিদণ্ডা অন্তমসো মালাগুল়পরিক্খিত্তাপি তথারূপাসু ন চারিত্তং আপজ্জিতা হোতি – এৰরূপং, ভন্তে, কাযসমাচারং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি। ‘কাযসমাচারংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং কাযসমাচার’ন্তি – ইতি যং তং ৰুত্তং ভগৰতা ইদমেতং পটিচ্চ ৰুত্তং।
‘‘Kathaṃrūpaṃ , bhante, kāyasamācāraṃ sevato akusalā dhammā parihāyanti, kusalā dhammā abhivaḍḍhanti? Idha, bhante, ekacco pāṇātipātaṃ pahāya pāṇātipātā paṭivirato hoti nihitadaṇḍo nihitasattho, lajjī dayāpanno sabbapāṇabhūtahitānukampī viharati; adinnādānaṃ pahāya adinnādānā paṭivirato hoti, yaṃ taṃ parassa paravittūpakaraṇaṃ gāmagataṃ vā araññagataṃ vā taṃ nādinnaṃ theyyasaṅkhātaṃ ādātā hoti; kāmesumicchācāraṃ pahāya kāmesumicchācārā paṭivirato hoti, yā tā māturakkhitā piturakkhitā mātāpiturakkhitā bhāturakkhitā bhaginirakkhitā ñātirakkhitā gottarakkhitā dhammarakkhitā sassāmikā saparidaṇḍā antamaso mālāguḷaparikkhittāpi tathārūpāsu na cārittaṃ āpajjitā hoti – evarūpaṃ, bhante, kāyasamācāraṃ sevato akusalā dhammā parihāyanti, kusalā dhammā abhivaḍḍhanti. ‘Kāyasamācāraṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ kāyasamācāra’nti – iti yaṃ taṃ vuttaṃ bhagavatā idametaṃ paṭicca vuttaṃ.
‘‘‘ৰচীসমাচারংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং ৰচীসমাচার’ন্তি – ইতি খো পনেতং ৰুত্তং ভগৰতা। কিঞ্চেতং পটিচ্চ ৰুত্তং ? যথারূপং, ভন্তে, ৰচীসমাচারং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি, এৰরূপো ৰচীসমাচারো ন সেৰিতব্বো; যথারূপঞ্চ খো, ভন্তে, ৰচীসমাচারং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি এৰরূপো ৰচীসমাচারো সেৰিতব্বো।
‘‘‘Vacīsamācāraṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ vacīsamācāra’nti – iti kho panetaṃ vuttaṃ bhagavatā. Kiñcetaṃ paṭicca vuttaṃ ? Yathārūpaṃ, bhante, vacīsamācāraṃ sevato akusalā dhammā abhivaḍḍhanti, kusalā dhammā parihāyanti, evarūpo vacīsamācāro na sevitabbo; yathārūpañca kho, bhante, vacīsamācāraṃ sevato akusalā dhammā parihāyanti, kusalā dhammā abhivaḍḍhanti evarūpo vacīsamācāro sevitabbo.
১১২. ‘‘কথংরূপং, ভন্তে, ৰচীসমাচারং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি? ইধ, ভন্তে, একচ্চো মুসাৰাদী হোতি, সভাগতো 3 ৰা পরিসাগতো 4 ৰা ঞাতিমজ্ঝগতো ৰা পূগমজ্ঝগতো ৰা রাজকুলমজ্ঝগতো ৰা অভিনীতো সক্খিপুট্ঠো – ‘এহম্ভো পুরিস, যং জানাসি তং ৰদেহী’তি সো অজানং ৰা আহ – ‘জানামী’তি, জানং ৰা আহ – ‘ন জানামী’তি; অপস্সং ৰা আহ – ‘পস্সামী’তি, পস্সং ৰা আহ – ‘ন পস্সামী’তি – ইতি 5 অত্তহেতু ৰা পরহেতু ৰা আমিসকিঞ্চিক্খহেতু 6 ৰা সম্পজানমুসা ভাসিতা হোতি; পিসুণৰাচো খো পন হোতি, ইতো সুত্ৰা অমুত্র অক্খাতা ইমেসং ভেদায, অমুত্র ৰা সুত্ৰা ইমেসং অক্খাতা অমূসং ভেদায – ইতি সমগ্গানং ৰা ভেত্তা, ভিন্নানং ৰা অনুপ্পদাতা, ৰগ্গারামো, ৰগ্গরতো, ৰগ্গনন্দী, ৰগ্গকরণিং ৰাচং ভাসিতা হোতি; ফরুসৰাচো খো পন হোতি, যা সা ৰাচা কণ্ডকা কক্কসা ফরুসা পরকটুকা পরাভিসজ্জনী কোধসামন্তা অসমাধিসংৰত্তনিকা, তথারূপিং ৰাচং ভাসিতা হোতি; সম্ফপ্পলাপী খো পন হোতি অকালৰাদী অভূতৰাদী অনত্থৰাদী অধম্মৰাদী অৰিনযৰাদী, অনিধানৰতিং ৰাচং ভাসিতা হোতি অকালেন অনপদেসং অপরিযন্তৰতিং অনত্থসংহিতং – এৰরূপং, ভন্তে, ৰচীসমাচারং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি।
112. ‘‘Kathaṃrūpaṃ, bhante, vacīsamācāraṃ sevato akusalā dhammā abhivaḍḍhanti, kusalā dhammā parihāyanti? Idha, bhante, ekacco musāvādī hoti, sabhāgato 7 vā parisāgato 8 vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho – ‘ehambho purisa, yaṃ jānāsi taṃ vadehī’ti so ajānaṃ vā āha – ‘jānāmī’ti, jānaṃ vā āha – ‘na jānāmī’ti; apassaṃ vā āha – ‘passāmī’ti, passaṃ vā āha – ‘na passāmī’ti – iti 9 attahetu vā parahetu vā āmisakiñcikkhahetu 10 vā sampajānamusā bhāsitā hoti; pisuṇavāco kho pana hoti, ito sutvā amutra akkhātā imesaṃ bhedāya, amutra vā sutvā imesaṃ akkhātā amūsaṃ bhedāya – iti samaggānaṃ vā bhettā, bhinnānaṃ vā anuppadātā, vaggārāmo, vaggarato, vagganandī, vaggakaraṇiṃ vācaṃ bhāsitā hoti; pharusavāco kho pana hoti, yā sā vācā kaṇḍakā kakkasā pharusā parakaṭukā parābhisajjanī kodhasāmantā asamādhisaṃvattanikā, tathārūpiṃ vācaṃ bhāsitā hoti; samphappalāpī kho pana hoti akālavādī abhūtavādī anatthavādī adhammavādī avinayavādī, anidhānavatiṃ vācaṃ bhāsitā hoti akālena anapadesaṃ apariyantavatiṃ anatthasaṃhitaṃ – evarūpaṃ, bhante, vacīsamācāraṃ sevato akusalā dhammā abhivaḍḍhanti, kusalā dhammā parihāyanti.
‘‘কথংরূপং, ভন্তে, ৰচীসমাচারং সেৰতো অকুসলা ধম্মা পরিহাযন্তি , কুসলা ধম্মা অভিৰড্ঢন্তি? ইধ, ভন্তে, একচ্চো মুসাৰাদং পহায মুসাৰাদা পটিৰিরতো হোতি সভাগতো ৰা পরিসাগতো ৰা ঞাতিমজ্ঝগতো ৰা পূগমজ্ঝগতো ৰা রাজকুলমজ্ঝগতো ৰা অভিনীতো সক্খিপুট্ঠো – ‘এহম্ভো পুরিস, যং জানাসি তং ৰদেহী’তি সো অজানং ৰা আহ – ‘ন জানামী’তি, জানং ৰা আহ – ‘জানামী’তি, অপস্সং ৰা আহ – ‘ন পস্সামী’তি, পস্সং ৰা আহ – ‘পস্সামী’তি – ইতি অত্তহেতু ৰা পরহেতু ৰা আমিসকিঞ্চিক্খহেতু ৰা ন সম্পজানমুসা ভাসিতা হোতি; পিসুণং ৰাচং পহায পিসুণায ৰাচায পটিৰিরতো হোতি, ইতো সুত্ৰা ন অমুত্র অক্খাতা ইমেসং ভেদায, অমুত্র ৰা সুত্ৰা ন ইমেসং অক্খাতা অমূসং ভেদায – ইতি ভিন্নানং ৰা সন্ধাতা সহিতানং ৰা অনুপ্পদাতা সমগ্গারামো সমগ্গরতো সমগ্গনন্দী সমগ্গকরণিং ৰাচং ভাসিতা হোতি; ফরুসং ৰাচং পহায ফরুসায ৰাচায পটিৰিরতো হোতি, যা সা ৰাচা নেলা কণ্ণসুখা পেমনীযা হদযঙ্গমা পোরী বহুজনকন্তা বহুজনমনাপা তথারূপিং ৰাচং ভাসিতা হোতি; সম্ফপ্পলাপং পহায সম্ফপ্পলাপা পটিৰিরতো হোতি কালৰাদী ভূতৰাদী অত্থৰাদী ধম্মৰাদী ৰিনযৰাদী, নিধানৰতিং ৰাচং ভাসিতা হোতি কালেন সাপদেসং পরিযন্তৰতিং অত্থসংহিতং – এৰরূপং, ভন্তে, ৰচীসমাচারং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি। ‘ৰচীসমাচারংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং ৰচীসমাচার’ন্তি – ইতি যং তং ৰুত্তং ভগৰতা ইদমেতং পটিচ্চ ৰুত্তং।
‘‘Kathaṃrūpaṃ, bhante, vacīsamācāraṃ sevato akusalā dhammā parihāyanti , kusalā dhammā abhivaḍḍhanti? Idha, bhante, ekacco musāvādaṃ pahāya musāvādā paṭivirato hoti sabhāgato vā parisāgato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho – ‘ehambho purisa, yaṃ jānāsi taṃ vadehī’ti so ajānaṃ vā āha – ‘na jānāmī’ti, jānaṃ vā āha – ‘jānāmī’ti, apassaṃ vā āha – ‘na passāmī’ti, passaṃ vā āha – ‘passāmī’ti – iti attahetu vā parahetu vā āmisakiñcikkhahetu vā na sampajānamusā bhāsitā hoti; pisuṇaṃ vācaṃ pahāya pisuṇāya vācāya paṭivirato hoti, ito sutvā na amutra akkhātā imesaṃ bhedāya, amutra vā sutvā na imesaṃ akkhātā amūsaṃ bhedāya – iti bhinnānaṃ vā sandhātā sahitānaṃ vā anuppadātā samaggārāmo samaggarato samagganandī samaggakaraṇiṃ vācaṃ bhāsitā hoti; pharusaṃ vācaṃ pahāya pharusāya vācāya paṭivirato hoti, yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā tathārūpiṃ vācaṃ bhāsitā hoti; samphappalāpaṃ pahāya samphappalāpā paṭivirato hoti kālavādī bhūtavādī atthavādī dhammavādī vinayavādī, nidhānavatiṃ vācaṃ bhāsitā hoti kālena sāpadesaṃ pariyantavatiṃ atthasaṃhitaṃ – evarūpaṃ, bhante, vacīsamācāraṃ sevato akusalā dhammā parihāyanti, kusalā dhammā abhivaḍḍhanti. ‘Vacīsamācāraṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ vacīsamācāra’nti – iti yaṃ taṃ vuttaṃ bhagavatā idametaṃ paṭicca vuttaṃ.
‘‘‘মনোসমাচারংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং মনোসমাচার’ন্তি – ইতি খো পনেতং ৰুত্তং ভগৰতা। কিঞ্চেতং পটিচ্চ ৰুত্তং? যথারূপং, ভন্তে, মনোসমাচারং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি এৰরূপো মনোসমাচারো ন সেৰিতব্বো; যথারূপঞ্চ খো, ভন্তে, মনোসমাচারং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি এৰরূপো মনোসমাচারো সেৰিতব্বো।
‘‘‘Manosamācāraṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ manosamācāra’nti – iti kho panetaṃ vuttaṃ bhagavatā. Kiñcetaṃ paṭicca vuttaṃ? Yathārūpaṃ, bhante, manosamācāraṃ sevato akusalā dhammā abhivaḍḍhanti, kusalā dhammā parihāyanti evarūpo manosamācāro na sevitabbo; yathārūpañca kho, bhante, manosamācāraṃ sevato akusalā dhammā parihāyanti, kusalā dhammā abhivaḍḍhanti evarūpo manosamācāro sevitabbo.
১১৩. ‘‘কথংরূপং, ভন্তে, মনোসমাচারং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি? ইধ, ভন্তে, একচ্চো অভিজ্ঝালু হোতি, যং তং পরস্স পরৰিত্তূপকরণং তং অভিজ্ঝাতা হোতি – ‘অহো ৰত যং পরস্স তং মমস্সা’তি; ব্যাপন্নচিত্তো খো পন হোতি পদুট্ঠমনসঙ্কপ্পো – ‘ইমে সত্তা হঞ্ঞন্তু ৰা ৰজ্ঝন্তু ৰা উচ্ছিজ্জন্তু ৰা ৰিনস্সন্তু ৰা মা ৰা অহেসু’ন্তি – এৰরূপং, ভন্তে, মনোসমাচারং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি।
113. ‘‘Kathaṃrūpaṃ, bhante, manosamācāraṃ sevato akusalā dhammā abhivaḍḍhanti, kusalā dhammā parihāyanti? Idha, bhante, ekacco abhijjhālu hoti, yaṃ taṃ parassa paravittūpakaraṇaṃ taṃ abhijjhātā hoti – ‘aho vata yaṃ parassa taṃ mamassā’ti; byāpannacitto kho pana hoti paduṭṭhamanasaṅkappo – ‘ime sattā haññantu vā vajjhantu vā ucchijjantu vā vinassantu vā mā vā ahesu’nti – evarūpaṃ, bhante, manosamācāraṃ sevato akusalā dhammā abhivaḍḍhanti, kusalā dhammā parihāyanti.
‘‘কথংরূপং, ভন্তে, মনোসমাচারং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি? ইধ, ভন্তে, একচ্চো অনভিজ্ঝালু হোতি, যং তং পরস্স পরৰিত্তূপকরণং তং নাভিজ্ঝাতা হোতি – ‘অহো ৰত যং পরস্স তং মমস্সা’তি; অব্যাপন্নচিত্তো খো পন হোতি অপ্পদুট্ঠমনসঙ্কপ্পো – ‘ইমে সত্তা অৰেরা অব্যাবজ্ঝা 11 অনীঘা সুখী অত্তানং পরিহরন্তূ’তি – এৰরূপং, ভন্তে, মনোসমাচারং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি। ‘মনোসমাচারংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং মনোসমাচার’ন্তি – ইতি যং তং ৰুত্তং ভগৰতা ইদমেতং পটিচ্চ ৰুত্তং।
‘‘Kathaṃrūpaṃ, bhante, manosamācāraṃ sevato akusalā dhammā parihāyanti, kusalā dhammā abhivaḍḍhanti? Idha, bhante, ekacco anabhijjhālu hoti, yaṃ taṃ parassa paravittūpakaraṇaṃ taṃ nābhijjhātā hoti – ‘aho vata yaṃ parassa taṃ mamassā’ti; abyāpannacitto kho pana hoti appaduṭṭhamanasaṅkappo – ‘ime sattā averā abyābajjhā 12 anīghā sukhī attānaṃ pariharantū’ti – evarūpaṃ, bhante, manosamācāraṃ sevato akusalā dhammā parihāyanti, kusalā dhammā abhivaḍḍhanti. ‘Manosamācāraṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ manosamācāra’nti – iti yaṃ taṃ vuttaṃ bhagavatā idametaṃ paṭicca vuttaṃ.
১১৪. ‘‘‘চিত্তুপ্পাদংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং চিত্তুপ্পাদ’ন্তি – ইতি খো পনেতং ৰুত্তং ভগৰতা। কিঞ্চেতং পটিচ্চ ৰুত্তং? যথারূপং, ভন্তে, চিত্তুপ্পাদং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি এৰরূপো চিত্তুপ্পাদো ন সেৰিতব্বো; যথারূপঞ্চ খো, ভন্তে, চিত্তুপ্পাদং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি এৰরূপো চিত্তুপ্পাদো সেৰিতব্বো।
114. ‘‘‘Cittuppādaṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ cittuppāda’nti – iti kho panetaṃ vuttaṃ bhagavatā. Kiñcetaṃ paṭicca vuttaṃ? Yathārūpaṃ, bhante, cittuppādaṃ sevato akusalā dhammā abhivaḍḍhanti, kusalā dhammā parihāyanti evarūpo cittuppādo na sevitabbo; yathārūpañca kho, bhante, cittuppādaṃ sevato akusalā dhammā parihāyanti, kusalā dhammā abhivaḍḍhanti evarūpo cittuppādo sevitabbo.
‘‘কথংরূপং, ভন্তে, চিত্তুপ্পাদং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি? ইধ, ভন্তে, একচ্চো অভিজ্ঝালু হোতি, অভিজ্ঝাসহগতেন চেতসা ৰিহরতি; ব্যাপাদৰা হোতি, ব্যাপাদসহগতেন চেতসা ৰিহরতি; ৰিহেসৰা হোতি, ৰিহেসাসহগতেন চেতসা ৰিহরতি – এৰরূপং, ভন্তে, চিত্তুপ্পাদং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি।
‘‘Kathaṃrūpaṃ, bhante, cittuppādaṃ sevato akusalā dhammā abhivaḍḍhanti, kusalā dhammā parihāyanti? Idha, bhante, ekacco abhijjhālu hoti, abhijjhāsahagatena cetasā viharati; byāpādavā hoti, byāpādasahagatena cetasā viharati; vihesavā hoti, vihesāsahagatena cetasā viharati – evarūpaṃ, bhante, cittuppādaṃ sevato akusalā dhammā abhivaḍḍhanti, kusalā dhammā parihāyanti.
‘‘কথংরূপং, ভন্তে, চিত্তুপ্পাদং সেৰতো অকুসলা ধম্মা পরিহাযন্তি , কুসলা ধম্মা অভিৰড্ঢন্তি? ইধ, ভন্তে, একচ্চো অনভিজ্ঝালু হোতি, অনভিজ্ঝাসহগতেন চেতসা ৰিহরতি; অব্যাপাদৰা হোতি, অব্যাপাদসহগতেন চেতসা ৰিহরতি; অৰিহেসৰা হোতি, অৰিহেসাসহগতেন চেতসা ৰিহরতি – এৰরূপং, ভন্তে, চিত্তুপ্পাদং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি। ‘চিত্তুপ্পাদংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং চিত্তুপ্পাদ’ন্তি – ইতি যং তং ৰুত্তং ভগৰতা ইদমেতং পটিচ্চ ৰুত্তং।
‘‘Kathaṃrūpaṃ, bhante, cittuppādaṃ sevato akusalā dhammā parihāyanti , kusalā dhammā abhivaḍḍhanti? Idha, bhante, ekacco anabhijjhālu hoti, anabhijjhāsahagatena cetasā viharati; abyāpādavā hoti, abyāpādasahagatena cetasā viharati; avihesavā hoti, avihesāsahagatena cetasā viharati – evarūpaṃ, bhante, cittuppādaṃ sevato akusalā dhammā parihāyanti, kusalā dhammā abhivaḍḍhanti. ‘Cittuppādaṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ cittuppāda’nti – iti yaṃ taṃ vuttaṃ bhagavatā idametaṃ paṭicca vuttaṃ.
১১৫. ‘‘‘সঞ্ঞাপটিলাভংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং সঞ্ঞাপটিলাভ’ন্তি – ইতি খো পনেতং ৰুত্তং ভগৰতা। কিঞ্চেতং পটিচ্চ ৰুত্তং? যথারূপং, ভন্তে, সঞ্ঞাপটিলাভং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি এৰরূপো সঞ্ঞাপটিলাভো ন সেৰিতব্বো; যথারূপঞ্চ খো, ভন্তে, সঞ্ঞাপটিলাভং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি এৰরূপো সঞ্ঞাপটিলাভো সেৰিতব্বো।
115. ‘‘‘Saññāpaṭilābhaṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ saññāpaṭilābha’nti – iti kho panetaṃ vuttaṃ bhagavatā. Kiñcetaṃ paṭicca vuttaṃ? Yathārūpaṃ, bhante, saññāpaṭilābhaṃ sevato akusalā dhammā abhivaḍḍhanti, kusalā dhammā parihāyanti evarūpo saññāpaṭilābho na sevitabbo; yathārūpañca kho, bhante, saññāpaṭilābhaṃ sevato akusalā dhammā parihāyanti, kusalā dhammā abhivaḍḍhanti evarūpo saññāpaṭilābho sevitabbo.
‘‘কথংরূপং, ভন্তে, সঞ্ঞাপটিলাভং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি? ইধ, ভন্তে, একচ্চো অভিজ্ঝালু হোতি, অভিজ্ঝাসহগতায সঞ্ঞায ৰিহরতি; ব্যাপাদৰা হোতি, ব্যাপাদসহগতায সঞ্ঞায ৰিহরতি; ৰিহেসৰা হোতি, ৰিহেসাসহগতায সঞ্ঞায ৰিহরতি – এৰরূপং, ভন্তে, সঞ্ঞাপটিলাভং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি।
‘‘Kathaṃrūpaṃ, bhante, saññāpaṭilābhaṃ sevato akusalā dhammā abhivaḍḍhanti, kusalā dhammā parihāyanti? Idha, bhante, ekacco abhijjhālu hoti, abhijjhāsahagatāya saññāya viharati; byāpādavā hoti, byāpādasahagatāya saññāya viharati; vihesavā hoti, vihesāsahagatāya saññāya viharati – evarūpaṃ, bhante, saññāpaṭilābhaṃ sevato akusalā dhammā abhivaḍḍhanti, kusalā dhammā parihāyanti.
‘‘কথংরূপং, ভন্তে, সঞ্ঞাপটিলাভং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি? ইধ, ভন্তে, একচ্চো অনভিজ্ঝালু হোতি, অনভিজ্ঝাসহগতায সঞ্ঞায ৰিহরতি; অব্যাপাদৰা হোতি, অব্যাপাদসহগতায সঞ্ঞায ৰিহরতি; অৰিহেসৰা হোতি, অৰিহেসাসহগতায সঞ্ঞায ৰিহরতি – এৰরূপং, ভন্তে, সঞ্ঞাপটিলাভং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি। ‘সঞ্ঞাপটিলাভংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং সঞ্ঞাপটিলাভ’ন্তি – ইতি যং তং ৰুত্তং ভগৰতা ইদমেতং পটিচ্চ ৰুত্তং।
‘‘Kathaṃrūpaṃ, bhante, saññāpaṭilābhaṃ sevato akusalā dhammā parihāyanti, kusalā dhammā abhivaḍḍhanti? Idha, bhante, ekacco anabhijjhālu hoti, anabhijjhāsahagatāya saññāya viharati; abyāpādavā hoti, abyāpādasahagatāya saññāya viharati; avihesavā hoti, avihesāsahagatāya saññāya viharati – evarūpaṃ, bhante, saññāpaṭilābhaṃ sevato akusalā dhammā parihāyanti, kusalā dhammā abhivaḍḍhanti. ‘Saññāpaṭilābhaṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ saññāpaṭilābha’nti – iti yaṃ taṃ vuttaṃ bhagavatā idametaṃ paṭicca vuttaṃ.
১১৬. ‘‘‘দিট্ঠিপটিলাভংপাহং , ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং দিট্ঠিপটিলাভ’ন্তি – ইতি খো পনেতং ৰুত্তং ভগৰতা। কিঞ্চেতং পটিচ্চ ৰুত্তং? যথারূপং, ভন্তে, দিট্ঠিপটিলাভং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি এৰরূপো দিট্ঠিপটিলাভো ন সেৰিতব্বো; যথারূপঞ্চ খো, ভন্তে, দিট্ঠিপটিলাভং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি – এৰরূপো দিট্ঠিপটিলাভো সেৰিতব্বো।
116. ‘‘‘Diṭṭhipaṭilābhaṃpāhaṃ , bhikkhave, duvidhena vadāmi – sevitabbampi, asevitabbampi; tañca aññamaññaṃ diṭṭhipaṭilābha’nti – iti kho panetaṃ vuttaṃ bhagavatā. Kiñcetaṃ paṭicca vuttaṃ? Yathārūpaṃ, bhante, diṭṭhipaṭilābhaṃ sevato akusalā dhammā abhivaḍḍhanti, kusalā dhammā parihāyanti evarūpo diṭṭhipaṭilābho na sevitabbo; yathārūpañca kho, bhante, diṭṭhipaṭilābhaṃ sevato akusalā dhammā parihāyanti, kusalā dhammā abhivaḍḍhanti – evarūpo diṭṭhipaṭilābho sevitabbo.
‘‘কথংরূপং, ভন্তে, দিট্ঠিপটিলাভং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি? ইধ, ভন্তে, একচ্চো এৰংদিট্ঠিকো হোতি – ‘নত্থি দিন্নং, নত্থি যিট্ঠং, নত্থি হুতং , নত্থি সুকতদুক্কটানং কম্মানং ফলং ৰিপাকো, নত্থি অযং লোকো, নত্থি পরো লোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্রাহ্মণা সম্মগ্গতা সম্মাপটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’তি – এৰরূপং, ভন্তে, দিট্ঠিপটিলাভং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি।
‘‘Kathaṃrūpaṃ, bhante, diṭṭhipaṭilābhaṃ sevato akusalā dhammā abhivaḍḍhanti, kusalā dhammā parihāyanti? Idha, bhante, ekacco evaṃdiṭṭhiko hoti – ‘natthi dinnaṃ, natthi yiṭṭhaṃ, natthi hutaṃ , natthi sukatadukkaṭānaṃ kammānaṃ phalaṃ vipāko, natthi ayaṃ loko, natthi paro loko, natthi mātā, natthi pitā, natthi sattā opapātikā, natthi loke samaṇabrāhmaṇā sammaggatā sammāpaṭipannā ye imañca lokaṃ parañca lokaṃ sayaṃ abhiññā sacchikatvā pavedentī’ti – evarūpaṃ, bhante, diṭṭhipaṭilābhaṃ sevato akusalā dhammā abhivaḍḍhanti, kusalā dhammā parihāyanti.
‘‘কথংরূপং, ভন্তে, দিট্ঠিপটিলাভং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি? ইধ, ভন্তে, একচ্চো এৰংদিট্ঠিকো হোতি – ‘অত্থি দিন্নং, অত্থি যিট্ঠং, অত্থি হুতং, অত্থি সুকতদুক্কটানং কম্মানং ফলং ৰিপাকো, অত্থি অযং লোকো, অত্থি পরো লোকো, অত্থি মাতা, অত্থি পিতা, অত্থি সত্তা ওপপাতিকা, অত্থি লোকে সমণব্রাহ্মণা সম্মগ্গতা সম্মাপটিপন্না যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’তি – এৰরূপং, ভন্তে, দিট্ঠিপটিলাভং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি। ‘দিট্ঠিপটিলাভংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং দিট্ঠিপটিলাভ’ন্তি – ইতি যং তং ৰুত্তং ভগৰতা ইদমেতং পটিচ্চ ৰুত্তং।
‘‘Kathaṃrūpaṃ, bhante, diṭṭhipaṭilābhaṃ sevato akusalā dhammā parihāyanti, kusalā dhammā abhivaḍḍhanti? Idha, bhante, ekacco evaṃdiṭṭhiko hoti – ‘atthi dinnaṃ, atthi yiṭṭhaṃ, atthi hutaṃ, atthi sukatadukkaṭānaṃ kammānaṃ phalaṃ vipāko, atthi ayaṃ loko, atthi paro loko, atthi mātā, atthi pitā, atthi sattā opapātikā, atthi loke samaṇabrāhmaṇā sammaggatā sammāpaṭipannā ye imañca lokaṃ parañca lokaṃ sayaṃ abhiññā sacchikatvā pavedentī’ti – evarūpaṃ, bhante, diṭṭhipaṭilābhaṃ sevato akusalā dhammā parihāyanti, kusalā dhammā abhivaḍḍhanti. ‘Diṭṭhipaṭilābhaṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ diṭṭhipaṭilābha’nti – iti yaṃ taṃ vuttaṃ bhagavatā idametaṃ paṭicca vuttaṃ.
১১৭. ‘‘‘অত্তভাৰপটিলাভংপাহং , ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং অত্তভাৰপটিলাভ’ন্তি – ইতি খো পনেতং ৰুত্তং ভগৰতা। কিঞ্চেতং পটিচ্চ ৰুত্তং? যথারূপং, ভন্তে, অত্তভাৰপটিলাভং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি – এৰরূপো অত্তভাৰপটিলাভো ন সেৰিতব্বো; যথারূপঞ্চ খো, ভন্তে, অত্তভাৰপটিলাভং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি – এৰরূপো অত্তভাৰপটিলাভো সেৰিতব্বো।
117. ‘‘‘Attabhāvapaṭilābhaṃpāhaṃ , bhikkhave, duvidhena vadāmi – sevitabbampi, asevitabbampi; tañca aññamaññaṃ attabhāvapaṭilābha’nti – iti kho panetaṃ vuttaṃ bhagavatā. Kiñcetaṃ paṭicca vuttaṃ? Yathārūpaṃ, bhante, attabhāvapaṭilābhaṃ sevato akusalā dhammā abhivaḍḍhanti, kusalā dhammā parihāyanti – evarūpo attabhāvapaṭilābho na sevitabbo; yathārūpañca kho, bhante, attabhāvapaṭilābhaṃ sevato akusalā dhammā parihāyanti, kusalā dhammā abhivaḍḍhanti – evarūpo attabhāvapaṭilābho sevitabbo.
‘‘কথংরূপং, ভন্তে, অত্তভাৰপটিলাভং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি? সব্যাবজ্ঝং 13, ভন্তে, অত্তভাৰপটিলাভং অভিনিব্বত্তযতো অপরিনিট্ঠিতভাৰায অকুসলা ধম্মা অভিৰড্ঢন্তি, কুসলা ধম্মা পরিহাযন্তি; অব্যাবজ্ঝং, ভন্তে, অত্তভাৰপটিলাভং অভিনিব্বত্তযতো পরিনিট্ঠিতভাৰায অকুসলা ধম্মা পরিহাযন্তি, কুসলা ধম্মা অভিৰড্ঢন্তি। ‘অত্তভাৰপটিলাভংপাহং, ভিক্খৰে, দুৰিধেন ৰদামি – সেৰিতব্বম্পি , অসেৰিতব্বম্পি; তঞ্চ অঞ্ঞমঞ্ঞং অত্তভাৰপটিলাভ’ন্তি – ইতি যং তং ৰুত্তং ভগৰতা ইদমেতং পটিচ্চ ৰুত্তং।
‘‘Kathaṃrūpaṃ, bhante, attabhāvapaṭilābhaṃ sevato akusalā dhammā abhivaḍḍhanti, kusalā dhammā parihāyanti? Sabyābajjhaṃ 14, bhante, attabhāvapaṭilābhaṃ abhinibbattayato apariniṭṭhitabhāvāya akusalā dhammā abhivaḍḍhanti, kusalā dhammā parihāyanti; abyābajjhaṃ, bhante, attabhāvapaṭilābhaṃ abhinibbattayato pariniṭṭhitabhāvāya akusalā dhammā parihāyanti, kusalā dhammā abhivaḍḍhanti. ‘Attabhāvapaṭilābhaṃpāhaṃ, bhikkhave, duvidhena vadāmi – sevitabbampi , asevitabbampi; tañca aññamaññaṃ attabhāvapaṭilābha’nti – iti yaṃ taṃ vuttaṃ bhagavatā idametaṃ paṭicca vuttaṃ.
‘‘ইমস্স খো অহং, ভন্তে, ভগৰতা সংখিত্তেন ভাসিতস্স, ৰিত্থারেন অত্থং অৰিভত্তস্স, এৰং ৰিত্থারেন অত্থং আজানামী’’তি।
‘‘Imassa kho ahaṃ, bhante, bhagavatā saṃkhittena bhāsitassa, vitthārena atthaṃ avibhattassa, evaṃ vitthārena atthaṃ ājānāmī’’ti.
১১৮. ‘‘সাধু সাধু, সারিপুত্ত! সাধু খো ত্ৰং, সারিপুত্ত, ইমস্স মযা সংখিত্তেন ভাসিতস্স, ৰিত্থারেন অত্থং অৰিভত্তস্স, এৰং ৰিত্থারেন অত্থং আজানাসি।
118. ‘‘Sādhu sādhu, sāriputta! Sādhu kho tvaṃ, sāriputta, imassa mayā saṃkhittena bhāsitassa, vitthārena atthaṃ avibhattassa, evaṃ vitthārena atthaṃ ājānāsi.
‘‘‘কাযসমাচারংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং কাযসমাচার’ন্তি – ইতি খো পনেতং ৰুত্তং মযা। কিঞ্চেতং পটিচ্চ ৰুত্তং? যথারূপং, সারিপুত্ত, কাযসমাচারং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি এৰরূপো কাযসমাচারো ন সেৰিতব্বো; যথারূপঞ্চ খো, সারিপুত্ত, কাযসমাচারং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি – এৰরূপো কাযসমাচারো সেৰিতব্বো।
‘‘‘Kāyasamācāraṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ kāyasamācāra’nti – iti kho panetaṃ vuttaṃ mayā. Kiñcetaṃ paṭicca vuttaṃ? Yathārūpaṃ, sāriputta, kāyasamācāraṃ sevato akusalā dhammā abhivaḍḍhanti, kusalā dhammā parihāyanti evarūpo kāyasamācāro na sevitabbo; yathārūpañca kho, sāriputta, kāyasamācāraṃ sevato akusalā dhammā parihāyanti, kusalā dhammā abhivaḍḍhanti – evarūpo kāyasamācāro sevitabbo.
‘‘কথংরূপং , সারিপুত্ত, কাযসমাচারং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি? ইধ, সারিপুত্ত, একচ্চো পাণাতিপাতী হোতি লুদ্দো লোহিতপাণি হতপ্পহতে নিৰিট্ঠো অদযাপন্নো পাণভূতেসু; অদিন্নাদাযী খো পন হোতি, যং তং পরস্স পরৰিত্তূপকরণং গামগতং ৰা অরঞ্ঞগতং ৰা তং অদিন্নং থেয্যসঙ্খাতং আদাতা হোতি; কামেসুমিচ্ছাচারী খো পন হোতি, যা তা মাতুরক্খিতা পিতুরক্খিতা মাতাপিতুরক্খিতা ভাতুরক্খিতা ভগিনিরক্খিতা ঞাতিরক্খিতা গোত্তরক্খিতা ধম্মরক্খিতা সস্সামিকা সপরিদণ্ডা অন্তমসো মালাগুল়পরিক্খিত্তাপি তথারূপাসু চারিত্তং আপজ্জিতা হোতি – এৰরূপং, সারিপুত্ত, কাযসমাচারং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি।
‘‘Kathaṃrūpaṃ , sāriputta, kāyasamācāraṃ sevato akusalā dhammā abhivaḍḍhanti, kusalā dhammā parihāyanti? Idha, sāriputta, ekacco pāṇātipātī hoti luddo lohitapāṇi hatappahate niviṭṭho adayāpanno pāṇabhūtesu; adinnādāyī kho pana hoti, yaṃ taṃ parassa paravittūpakaraṇaṃ gāmagataṃ vā araññagataṃ vā taṃ adinnaṃ theyyasaṅkhātaṃ ādātā hoti; kāmesumicchācārī kho pana hoti, yā tā māturakkhitā piturakkhitā mātāpiturakkhitā bhāturakkhitā bhaginirakkhitā ñātirakkhitā gottarakkhitā dhammarakkhitā sassāmikā saparidaṇḍā antamaso mālāguḷaparikkhittāpi tathārūpāsu cārittaṃ āpajjitā hoti – evarūpaṃ, sāriputta, kāyasamācāraṃ sevato akusalā dhammā abhivaḍḍhanti, kusalā dhammā parihāyanti.
‘‘কথংরূপং, সারিপুত্ত, কাযসমাচারং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি? ইধ, সারিপুত্ত, একচ্চো পাণাতিপাতং পহায পাণাতিপাতা পটিৰিরতো হোতি নিহিতদণ্ডো নিহিতসত্থো, লজ্জী দযাপন্নো সব্বপাণভূতহিতানুকম্পী ৰিহরতি; অদিন্নাদানং পহায অদিন্নাদানা পটিৰিরতো হোতি, যং তং পরস্স পরৰিত্তূপকরণং গামগতং ৰা অরঞ্ঞগতং ৰা তং নাদিন্নং থেয্যসঙ্খাতং আদাতা হোতি; কামেসুমিচ্ছাচারং পহায কামেসুমিচ্ছাচারা পটিৰিরতো হোতি, যা তা মাতুরক্খিতা পিতুরক্খিতা মাতাপিতুরক্খিতা ভাতুরক্খিতা ভগিনিরক্খিতা ঞাতিরক্খিতা গোত্তরক্খিতা ধম্মরক্খিতা সস্সামিকা সপরিদণ্ডা অন্তমসো মালাগুল়পরিক্খিত্তাপি তথারূপাসু ন চারিত্তং আপজ্জিতা হোতি – এৰরূপং, সারিপুত্ত, কাযসমাচারং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি। ‘কাযসমাচারংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং কাযসমাচার’ন্তি – ইতি যং তং ৰুত্তং মযা ইদমেতং পটিচ্চ ৰুত্তং।
‘‘Kathaṃrūpaṃ, sāriputta, kāyasamācāraṃ sevato akusalā dhammā parihāyanti, kusalā dhammā abhivaḍḍhanti? Idha, sāriputta, ekacco pāṇātipātaṃ pahāya pāṇātipātā paṭivirato hoti nihitadaṇḍo nihitasattho, lajjī dayāpanno sabbapāṇabhūtahitānukampī viharati; adinnādānaṃ pahāya adinnādānā paṭivirato hoti, yaṃ taṃ parassa paravittūpakaraṇaṃ gāmagataṃ vā araññagataṃ vā taṃ nādinnaṃ theyyasaṅkhātaṃ ādātā hoti; kāmesumicchācāraṃ pahāya kāmesumicchācārā paṭivirato hoti, yā tā māturakkhitā piturakkhitā mātāpiturakkhitā bhāturakkhitā bhaginirakkhitā ñātirakkhitā gottarakkhitā dhammarakkhitā sassāmikā saparidaṇḍā antamaso mālāguḷaparikkhittāpi tathārūpāsu na cārittaṃ āpajjitā hoti – evarūpaṃ, sāriputta, kāyasamācāraṃ sevato akusalā dhammā parihāyanti, kusalā dhammā abhivaḍḍhanti. ‘Kāyasamācāraṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ kāyasamācāra’nti – iti yaṃ taṃ vuttaṃ mayā idametaṃ paṭicca vuttaṃ.
‘‘ৰচীসমাচারংপাহং, ভিক্খৰে, দুৰিধেন ৰদামি …পে॰… মনোসমাচারংপাহং, ভিক্খৰে, দুৰিধেন ৰদামি…পে॰… চিত্তুপ্পাদংপাহং, ভিক্খৰে, দুৰিধেন ৰদামি…পে॰… সঞ্ঞাপটিলাভংপাহং, ভিক্খৰে, দুৰিধেন ৰদামি…পে॰… দিট্ঠিপটিলাভংপাহং, ভিক্খৰে, দুৰিধেন ৰদামি…পে॰…।
‘‘Vacīsamācāraṃpāhaṃ, bhikkhave, duvidhena vadāmi …pe… manosamācāraṃpāhaṃ, bhikkhave, duvidhena vadāmi…pe… cittuppādaṃpāhaṃ, bhikkhave, duvidhena vadāmi…pe… saññāpaṭilābhaṃpāhaṃ, bhikkhave, duvidhena vadāmi…pe… diṭṭhipaṭilābhaṃpāhaṃ, bhikkhave, duvidhena vadāmi…pe….
‘‘‘অত্তভাৰপটিলাভংপাহং, ভিক্খৰে, দুৰিধেন ৰদামি – সেৰিতব্বম্পি, অসেৰিতব্বম্পি; তঞ্চ অঞ্ঞমঞ্ঞং অত্তভাৰপটিলাভ’ন্তি – ইতি খো পনেতং ৰুত্তং মযা। কিঞ্চেতং পটিচ্চ ৰুত্তং? যথারূপং, সারিপুত্ত, অত্তভাৰপটিলাভং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি এৰরূপো অত্তভাৰপটিলাভো ন সেৰিতব্বো; যথারূপঞ্চ খো, সারিপুত্ত, অত্তভাৰপটিলাভং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি – এৰরূপো অত্তভাৰপটিলাভো সেৰিতব্বো।
‘‘‘Attabhāvapaṭilābhaṃpāhaṃ, bhikkhave, duvidhena vadāmi – sevitabbampi, asevitabbampi; tañca aññamaññaṃ attabhāvapaṭilābha’nti – iti kho panetaṃ vuttaṃ mayā. Kiñcetaṃ paṭicca vuttaṃ? Yathārūpaṃ, sāriputta, attabhāvapaṭilābhaṃ sevato akusalā dhammā abhivaḍḍhanti, kusalā dhammā parihāyanti evarūpo attabhāvapaṭilābho na sevitabbo; yathārūpañca kho, sāriputta, attabhāvapaṭilābhaṃ sevato akusalā dhammā parihāyanti, kusalā dhammā abhivaḍḍhanti – evarūpo attabhāvapaṭilābho sevitabbo.
‘‘কথংরূপং, সারিপুত্ত, অত্তভাৰপটিলাভং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি? সব্যাবজ্ঝং, সারিপুত্ত, অত্তভাৰপটিলাভং অভিনিব্বত্তযতো অপরিনিট্ঠিতভাৰায অকুসলা ধম্মা অভিৰড্ঢন্তি, কুসলা ধম্মা পরিহাযন্তি; অব্যাবজ্ঝং, সারিপুত্ত, অত্তভাৰপটিলাভং অভিনিব্বত্তযতো পরিনিট্ঠিতভাৰায অকুসলা ধম্মা পরিহাযন্তি, কুসলা ধম্মা অভিৰড্ঢন্তি। ‘অত্তভাৰপটিলাভংপাহং, ভিক্খৰে, দুৰিধেন ৰদামি – সেৰিতব্বম্পি , অসেৰিতব্বম্পি; তঞ্চ অঞ্ঞমঞ্ঞং অত্তভাৰপটিলাভ’ন্তি – ইতি যং তং ৰুত্তং মযা ইদমেতং পটিচ্চ ৰুত্তং। ইমস্স খো, সারিপুত্ত, মযা সংখিত্তেন ভাসিতস্স এৰং ৰিত্থারেন অত্থো দট্ঠব্বো।
‘‘Kathaṃrūpaṃ, sāriputta, attabhāvapaṭilābhaṃ sevato akusalā dhammā abhivaḍḍhanti, kusalā dhammā parihāyanti? Sabyābajjhaṃ, sāriputta, attabhāvapaṭilābhaṃ abhinibbattayato apariniṭṭhitabhāvāya akusalā dhammā abhivaḍḍhanti, kusalā dhammā parihāyanti; abyābajjhaṃ, sāriputta, attabhāvapaṭilābhaṃ abhinibbattayato pariniṭṭhitabhāvāya akusalā dhammā parihāyanti, kusalā dhammā abhivaḍḍhanti. ‘Attabhāvapaṭilābhaṃpāhaṃ, bhikkhave, duvidhena vadāmi – sevitabbampi , asevitabbampi; tañca aññamaññaṃ attabhāvapaṭilābha’nti – iti yaṃ taṃ vuttaṃ mayā idametaṃ paṭicca vuttaṃ. Imassa kho, sāriputta, mayā saṃkhittena bhāsitassa evaṃ vitthārena attho daṭṭhabbo.
১১৯. ‘‘চক্খুৰিঞ্ঞেয্যং রূপংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পি; সোতৰিঞ্ঞেয্যং সদ্দংপাহং, সারিপুত্ত, দুৰিধেন ৰদামি – সেৰিতব্বম্পি অসেৰিতব্বম্পি; ঘানৰিঞ্ঞেয্যং গন্ধংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পি; জিৰ্হাৰিঞ্ঞেয্যং রসংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পি; কাযৰিঞ্ঞেয্যং ফোট্ঠব্বংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পি; মনোৰিঞ্ঞেয্যং ধম্মংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’’তি।
119. ‘‘Cakkhuviññeyyaṃ rūpaṃpāhaṃ, sāriputta, duvidhena vadāmi – sevitabbampi, asevitabbampi; sotaviññeyyaṃ saddaṃpāhaṃ, sāriputta, duvidhena vadāmi – sevitabbampi asevitabbampi; ghānaviññeyyaṃ gandhaṃpāhaṃ, sāriputta, duvidhena vadāmi – sevitabbampi, asevitabbampi; jivhāviññeyyaṃ rasaṃpāhaṃ, sāriputta, duvidhena vadāmi – sevitabbampi, asevitabbampi; kāyaviññeyyaṃ phoṭṭhabbaṃpāhaṃ, sāriputta, duvidhena vadāmi – sevitabbampi, asevitabbampi; manoviññeyyaṃ dhammaṃpāhaṃ, sāriputta, duvidhena vadāmi – sevitabbampi, asevitabbampī’’ti.
এৰং ৰুত্তে, আযস্মা সারিপুত্তো ভগৰন্তং এতদৰোচ – ‘‘ইমস্স খো অহং, ভন্তে, ভগৰতা সংখিত্তেন ভাসিতস্স, ৰিত্থারেন অত্থং অৰিভত্তস্স, এৰং ৰিত্থারেন অত্থং আজানামি। ‘চক্খুৰিঞ্ঞেয্যং রূপংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি খো পনেতং ৰুত্তং ভগৰতা। কিঞ্চেতং পটিচ্চ ৰুত্তং? যথারূপং, ভন্তে, চক্খুৰিঞ্ঞেয্যং রূপং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি এৰরূপং চক্খুৰিঞ্ঞেয্যং রূপং ন সেৰিতব্বং; যথারূপঞ্চ খো, ভন্তে, চক্খুৰিঞ্ঞেয্যং রূপং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি এৰরূপং চক্খুৰিঞ্ঞেয্যং রূপং সেৰিতব্বং। ‘চক্খুৰিঞ্ঞেয্যং রূপংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি যং তং ৰুত্তং ভগৰতা ইদমেতং পটিচ্চ ৰুত্তং।
Evaṃ vutte, āyasmā sāriputto bhagavantaṃ etadavoca – ‘‘imassa kho ahaṃ, bhante, bhagavatā saṃkhittena bhāsitassa, vitthārena atthaṃ avibhattassa, evaṃ vitthārena atthaṃ ājānāmi. ‘Cakkhuviññeyyaṃ rūpaṃpāhaṃ, sāriputta, duvidhena vadāmi – sevitabbampi, asevitabbampī’ti – iti kho panetaṃ vuttaṃ bhagavatā. Kiñcetaṃ paṭicca vuttaṃ? Yathārūpaṃ, bhante, cakkhuviññeyyaṃ rūpaṃ sevato akusalā dhammā abhivaḍḍhanti, kusalā dhammā parihāyanti evarūpaṃ cakkhuviññeyyaṃ rūpaṃ na sevitabbaṃ; yathārūpañca kho, bhante, cakkhuviññeyyaṃ rūpaṃ sevato akusalā dhammā parihāyanti, kusalā dhammā abhivaḍḍhanti evarūpaṃ cakkhuviññeyyaṃ rūpaṃ sevitabbaṃ. ‘Cakkhuviññeyyaṃ rūpaṃpāhaṃ, sāriputta, duvidhena vadāmi – sevitabbampi, asevitabbampī’ti – iti yaṃ taṃ vuttaṃ bhagavatā idametaṃ paṭicca vuttaṃ.
‘‘সোতৰিঞ্ঞেয্যং সদ্দংপাহং, সারিপুত্ত…পে॰… এৰরূপো সোতৰিঞ্ঞেয্যো সদ্দো ন সেৰিতব্বো… এৰরূপো সোতৰিঞ্ঞেয্যো সদ্দো সেৰিতব্বো… এৰরূপো ঘানৰিঞ্ঞেয্যো গন্ধো ন সেৰিতব্বো… এৰরূপো ঘানৰিঞ্ঞেয্যো গন্ধো সেৰিতব্বো… এৰরূপো জিৰ্হাৰিঞ্ঞেয্যো রসো ন সেৰিতব্বো… এৰরূপো জিৰ্হাৰিঞ্ঞেয্যো রসো সেৰিতব্বো… কাযৰিঞ্ঞেয্যং ফোট্ঠব্বংপাহং, সারিপুত্ত … এৰরূপো কাযৰিঞ্ঞেয্যো ফোট্ঠব্বো ন সেৰিতব্বো… এৰরূপো কাযৰিঞ্ঞেয্যো ফোট্ঠব্বো সেৰিতব্বো।
‘‘Sotaviññeyyaṃ saddaṃpāhaṃ, sāriputta…pe… evarūpo sotaviññeyyo saddo na sevitabbo… evarūpo sotaviññeyyo saddo sevitabbo… evarūpo ghānaviññeyyo gandho na sevitabbo… evarūpo ghānaviññeyyo gandho sevitabbo… evarūpo jivhāviññeyyo raso na sevitabbo… evarūpo jivhāviññeyyo raso sevitabbo… kāyaviññeyyaṃ phoṭṭhabbaṃpāhaṃ, sāriputta … evarūpo kāyaviññeyyo phoṭṭhabbo na sevitabbo… evarūpo kāyaviññeyyo phoṭṭhabbo sevitabbo.
‘‘‘মনোৰিঞ্ঞেয্যং ধম্মংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি খো পনেতং ৰুত্তং ভগৰতা। কিঞ্চেতং পটিচ্চ ৰুত্তং? যথারূপং, ভন্তে, মনোৰিঞ্ঞেয্যং ধম্মং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি এৰরূপো মনোৰিঞ্ঞেয্যো ধম্মো ন সেৰিতব্বো; যথারূপঞ্চ খো, ভন্তে, মনোৰিঞ্ঞেয্যং ধম্মং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি এৰরূপো মনোৰিঞ্ঞেয্যো ধম্মো সেৰিতব্বো। ‘মনোৰিঞ্ঞেয্যং ধম্মংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি যং তং ৰুত্তং ভগৰতা ইদমেতং পটিচ্চ ৰুত্তং। ইমস্স খো অহং, ভন্তে, ভগৰতা সংখিত্তেন ভাসিতস্স, ৰিত্থারেন অত্থং অৰিভত্তস্স, এৰং ৰিত্থারেন অত্থং আজানামী’’তি।
‘‘‘Manoviññeyyaṃ dhammaṃpāhaṃ, sāriputta, duvidhena vadāmi – sevitabbampi, asevitabbampī’ti – iti kho panetaṃ vuttaṃ bhagavatā. Kiñcetaṃ paṭicca vuttaṃ? Yathārūpaṃ, bhante, manoviññeyyaṃ dhammaṃ sevato akusalā dhammā abhivaḍḍhanti, kusalā dhammā parihāyanti evarūpo manoviññeyyo dhammo na sevitabbo; yathārūpañca kho, bhante, manoviññeyyaṃ dhammaṃ sevato akusalā dhammā parihāyanti, kusalā dhammā abhivaḍḍhanti evarūpo manoviññeyyo dhammo sevitabbo. ‘Manoviññeyyaṃ dhammaṃpāhaṃ, sāriputta, duvidhena vadāmi – sevitabbampi, asevitabbampī’ti – iti yaṃ taṃ vuttaṃ bhagavatā idametaṃ paṭicca vuttaṃ. Imassa kho ahaṃ, bhante, bhagavatā saṃkhittena bhāsitassa, vitthārena atthaṃ avibhattassa, evaṃ vitthārena atthaṃ ājānāmī’’ti.
১২০. ‘‘সাধু সাধু, সারিপুত্ত! সাধু খো ত্ৰং, সারিপুত্ত, ইমস্স মযা সংখিত্তেন ভাসিতস্স, ৰিত্থারেন অত্থং অৰিভত্তস্স, এৰং ৰিত্থারেন অত্থং আজানাসি। ‘চক্খুৰিঞ্ঞেয্যং রূপংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি খো পনেতং ৰুত্তং মযা। কিঞ্চেতং পটিচ্চ ৰুত্তং? যথারূপং, সারিপুত্ত, চক্খুৰিঞ্ঞেয্যং রূপং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি এৰরূপং চক্খুৰিঞ্ঞেয্যং রূপং ন সেৰিতব্বং; যথারূপঞ্চ খো, সারিপুত্ত, চক্খুৰিঞ্ঞেয্যং রূপং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি এৰরূপং চক্খুৰিঞ্ঞেয্যং রূপং সেৰিতব্বং। ‘চক্খুৰিঞ্ঞেয্যং রূপংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি যং তং ৰুত্তং মযা ইদমেতং পটিচ্চ ৰুত্তং।
120. ‘‘Sādhu sādhu, sāriputta! Sādhu kho tvaṃ, sāriputta, imassa mayā saṃkhittena bhāsitassa, vitthārena atthaṃ avibhattassa, evaṃ vitthārena atthaṃ ājānāsi. ‘Cakkhuviññeyyaṃ rūpaṃpāhaṃ, sāriputta, duvidhena vadāmi – sevitabbampi, asevitabbampī’ti – iti kho panetaṃ vuttaṃ mayā. Kiñcetaṃ paṭicca vuttaṃ? Yathārūpaṃ, sāriputta, cakkhuviññeyyaṃ rūpaṃ sevato akusalā dhammā abhivaḍḍhanti, kusalā dhammā parihāyanti evarūpaṃ cakkhuviññeyyaṃ rūpaṃ na sevitabbaṃ; yathārūpañca kho, sāriputta, cakkhuviññeyyaṃ rūpaṃ sevato akusalā dhammā parihāyanti, kusalā dhammā abhivaḍḍhanti evarūpaṃ cakkhuviññeyyaṃ rūpaṃ sevitabbaṃ. ‘Cakkhuviññeyyaṃ rūpaṃpāhaṃ, sāriputta, duvidhena vadāmi – sevitabbampi, asevitabbampī’ti – iti yaṃ taṃ vuttaṃ mayā idametaṃ paṭicca vuttaṃ.
‘‘সোতৰিঞ্ঞেয্যং সদ্দংপাহং, সারিপুত্ত…পে॰… এৰরূপো সোতৰিঞ্ঞেয্যো সদ্দো ন সেৰিতব্বো… এৰরূপো সোতৰিঞ্ঞেয্যো সদ্দো সেৰিতব্বো… এৰরূপো ঘানৰিঞ্ঞেয্যো গন্ধো ন সেৰিতব্বো… এৰরূপো ঘানৰিঞ্ঞেয্যো গন্ধো সেৰিতব্বো… এৰরূপো জিৰ্হাৰিঞ্ঞেয্যো রসো ন সেৰিতব্বো… এৰরূপো জিৰ্হাৰিঞ্ঞেয্যো রসো সেৰিতব্বো… এৰরূপো কাযৰিঞ্ঞেয্যো ফোট্ঠব্বো ন সেৰিতব্বো… এৰরূপো কাযৰিঞ্ঞেয্যো ফোট্ঠব্বো সেৰিতব্বো।
‘‘Sotaviññeyyaṃ saddaṃpāhaṃ, sāriputta…pe… evarūpo sotaviññeyyo saddo na sevitabbo… evarūpo sotaviññeyyo saddo sevitabbo… evarūpo ghānaviññeyyo gandho na sevitabbo… evarūpo ghānaviññeyyo gandho sevitabbo… evarūpo jivhāviññeyyo raso na sevitabbo… evarūpo jivhāviññeyyo raso sevitabbo… evarūpo kāyaviññeyyo phoṭṭhabbo na sevitabbo… evarūpo kāyaviññeyyo phoṭṭhabbo sevitabbo.
‘‘মনোৰিঞ্ঞেয্যং ধম্মংপাহং, সারিপুত্ত…পে॰… এৰরূপো মনোৰিঞ্ঞেয্যো ধম্মো ন সেৰিতব্বো… এৰরূপো মনোৰিঞ্ঞেয্যো ধম্মো সেৰিতব্বো। ‘মনোৰিঞ্ঞেয্যং ধম্মংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি যং তং ৰুত্তং মযা ইদমেতং পটিচ্চ ৰুত্তং। ইমস্স খো, সারিপুত্ত, মযা সংখিত্তেন ভাসিতস্স এৰং ৰিত্থারেন অত্থো দট্ঠব্বো।
‘‘Manoviññeyyaṃ dhammaṃpāhaṃ, sāriputta…pe… evarūpo manoviññeyyo dhammo na sevitabbo… evarūpo manoviññeyyo dhammo sevitabbo. ‘Manoviññeyyaṃ dhammaṃpāhaṃ, sāriputta, duvidhena vadāmi – sevitabbampi, asevitabbampī’ti – iti yaṃ taṃ vuttaṃ mayā idametaṃ paṭicca vuttaṃ. Imassa kho, sāriputta, mayā saṃkhittena bhāsitassa evaṃ vitthārena attho daṭṭhabbo.
১২১. ‘‘চীৰরংপাহং , সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পি…পে॰… পিণ্ডপাতংপাহং, সারিপুত্ত… সেনাসনংপাহং, সারিপুত্ত… গামংপাহং, সারিপুত্ত… নিগমংপাহং, সারিপুত্ত… নগরংপাহং, সারিপুত্ত… জনপদংপাহং, সারিপুত্ত… পুগ্গলংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’’তি।
121. ‘‘Cīvaraṃpāhaṃ , sāriputta, duvidhena vadāmi – sevitabbampi, asevitabbampi…pe… piṇḍapātaṃpāhaṃ, sāriputta… senāsanaṃpāhaṃ, sāriputta… gāmaṃpāhaṃ, sāriputta… nigamaṃpāhaṃ, sāriputta… nagaraṃpāhaṃ, sāriputta… janapadaṃpāhaṃ, sāriputta… puggalaṃpāhaṃ, sāriputta, duvidhena vadāmi – sevitabbampi, asevitabbampī’’ti.
এৰং ৰুত্তে, আযস্মা সারিপুত্তো ভগৰন্তং এতদৰোচ – ‘‘ইমস্স খো অহং, ভন্তে, ভগৰতা সংখিত্তেন ভাসিতস্স, ৰিত্থারেন অত্থং অৰিভত্তস্স, এৰং ৰিত্থারেন অত্থং আজানামি। ‘চীৰরংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি খো পনেতং ৰুত্তং ভগৰতা। কিঞ্চেতং পটিচ্চ ৰুত্তং? যথারূপং, ভন্তে, চীৰরং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি এৰরূপং চীৰরং ন সেৰিতব্বং; যথারূপঞ্চ খো, ভন্তে, চীৰরং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি এৰরূপং চীৰরং সেৰিতব্বং। ‘চীৰরংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি যং তং ৰুত্তং ভগৰতা ইদমেতং পটিচ্চ ৰুত্তং।
Evaṃ vutte, āyasmā sāriputto bhagavantaṃ etadavoca – ‘‘imassa kho ahaṃ, bhante, bhagavatā saṃkhittena bhāsitassa, vitthārena atthaṃ avibhattassa, evaṃ vitthārena atthaṃ ājānāmi. ‘Cīvaraṃpāhaṃ, sāriputta, duvidhena vadāmi – sevitabbampi, asevitabbampī’ti – iti kho panetaṃ vuttaṃ bhagavatā. Kiñcetaṃ paṭicca vuttaṃ? Yathārūpaṃ, bhante, cīvaraṃ sevato akusalā dhammā abhivaḍḍhanti, kusalā dhammā parihāyanti evarūpaṃ cīvaraṃ na sevitabbaṃ; yathārūpañca kho, bhante, cīvaraṃ sevato akusalā dhammā parihāyanti, kusalā dhammā abhivaḍḍhanti evarūpaṃ cīvaraṃ sevitabbaṃ. ‘Cīvaraṃpāhaṃ, sāriputta, duvidhena vadāmi – sevitabbampi, asevitabbampī’ti – iti yaṃ taṃ vuttaṃ bhagavatā idametaṃ paṭicca vuttaṃ.
‘‘পিণ্ডপাতংপাহং, সারিপুত্ত…পে॰… এৰরূপো পিণ্ডপাতো ন সেৰিতব্বো… এৰরূপো পিণ্ডপাতো সেৰিতব্বো… সেনাসনংপাহং, সারিপুত্ত…পে॰… এৰরূপং সেনাসনং ন সেৰিতব্বং… এৰরূপং সেনাসনং সেৰিতব্বং… গামংপাহং, সারিপুত্ত …পে॰… এৰরূপো গামো ন সেৰিতব্বো… এৰরূপো গামো সেৰিতব্বো… এৰরূপো নিগমো ন সেৰিতব্বো… এৰরূপো নিগমো সেৰিতব্বো… এৰরূপং নগরং ন সেৰিতব্বং… এৰরূপং নগরং সেৰিতব্বং… এৰরূপো জনপদো ন সেৰিতব্বো… এৰরূপো জনপদো সেৰিতব্বো।
‘‘Piṇḍapātaṃpāhaṃ, sāriputta…pe… evarūpo piṇḍapāto na sevitabbo… evarūpo piṇḍapāto sevitabbo… senāsanaṃpāhaṃ, sāriputta…pe… evarūpaṃ senāsanaṃ na sevitabbaṃ… evarūpaṃ senāsanaṃ sevitabbaṃ… gāmaṃpāhaṃ, sāriputta …pe… evarūpo gāmo na sevitabbo… evarūpo gāmo sevitabbo… evarūpo nigamo na sevitabbo… evarūpo nigamo sevitabbo… evarūpaṃ nagaraṃ na sevitabbaṃ… evarūpaṃ nagaraṃ sevitabbaṃ… evarūpo janapado na sevitabbo… evarūpo janapado sevitabbo.
‘‘‘পুগ্গলংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি খো পনেতং ৰুত্তং ভগৰতা। কিঞ্চেতং পটিচ্চ ৰুত্তং? যথারূপং, ভন্তে, পুগ্গলং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি এৰরূপো পুগ্গলো ন সেৰিতব্বো; যথারূপঞ্চ খো, ভন্তে, পুগ্গলং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি এৰরূপো পুগ্গলো সেৰিতব্বো। ‘পুগ্গলংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি যং তং ৰুত্তং ভগৰতা ইদমেতং পটিচ্চ ৰুত্তন্তি। ইমস্স খো অহং, ভন্তে, ভগৰতা সংখিত্তেন ভাসিতস্স, ৰিত্থারেন অত্থং অৰিভত্তস্স এৰং ৰিত্থারেন অত্থং আজানামী’’তি।
‘‘‘Puggalaṃpāhaṃ, sāriputta, duvidhena vadāmi – sevitabbampi, asevitabbampī’ti – iti kho panetaṃ vuttaṃ bhagavatā. Kiñcetaṃ paṭicca vuttaṃ? Yathārūpaṃ, bhante, puggalaṃ sevato akusalā dhammā abhivaḍḍhanti, kusalā dhammā parihāyanti evarūpo puggalo na sevitabbo; yathārūpañca kho, bhante, puggalaṃ sevato akusalā dhammā parihāyanti, kusalā dhammā abhivaḍḍhanti evarūpo puggalo sevitabbo. ‘Puggalaṃpāhaṃ, sāriputta, duvidhena vadāmi – sevitabbampi, asevitabbampī’ti – iti yaṃ taṃ vuttaṃ bhagavatā idametaṃ paṭicca vuttanti. Imassa kho ahaṃ, bhante, bhagavatā saṃkhittena bhāsitassa, vitthārena atthaṃ avibhattassa evaṃ vitthārena atthaṃ ājānāmī’’ti.
১২২. ‘‘সাধু সাধু, সারিপুত্ত! সাধু খো ত্ৰং, সারিপুত্ত, ইমস্স মযা সংখিত্তেন ভাসিতস্স, ৰিত্থারেন অত্থং অৰিভত্তস্স এৰং ৰিত্থারেন অত্থং আজানাসি। ‘চীৰরংপাহং, সারিপুত্ত, দুৰিধেন ৰদামি – সেৰিতব্বম্পি , অসেৰিতব্বম্পী’তি – ইতি খো পনেতং ৰুত্তং মযা। কিঞ্চেতং পটিচ্চ ৰুত্তং? যথারূপং, সারিপুত্ত, চীৰরং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি এৰরূপং চীৰরং ন সেৰিতব্বং; যথারূপঞ্চ খো, সারিপুত্ত, চীৰরং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি এৰরূপং চীৰরং সেৰিতব্বং। ‘চীৰরংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি যং তং ৰুত্তং মযা ইদমেতং পটিচ্চ ৰুত্তং। (যথা পঠমং তথা ৰিত্থারেতব্বং) এৰরূপো পিণ্ডপাতো… এৰরূপং সেনাসনং… এৰরূপো গামো… এৰরূপো নিগমো… এৰরূপং নগরং… এৰরূপো জনপদো।
122. ‘‘Sādhu sādhu, sāriputta! Sādhu kho tvaṃ, sāriputta, imassa mayā saṃkhittena bhāsitassa, vitthārena atthaṃ avibhattassa evaṃ vitthārena atthaṃ ājānāsi. ‘Cīvaraṃpāhaṃ, sāriputta, duvidhena vadāmi – sevitabbampi , asevitabbampī’ti – iti kho panetaṃ vuttaṃ mayā. Kiñcetaṃ paṭicca vuttaṃ? Yathārūpaṃ, sāriputta, cīvaraṃ sevato akusalā dhammā abhivaḍḍhanti, kusalā dhammā parihāyanti evarūpaṃ cīvaraṃ na sevitabbaṃ; yathārūpañca kho, sāriputta, cīvaraṃ sevato akusalā dhammā parihāyanti, kusalā dhammā abhivaḍḍhanti evarūpaṃ cīvaraṃ sevitabbaṃ. ‘Cīvaraṃpāhaṃ, sāriputta, duvidhena vadāmi – sevitabbampi, asevitabbampī’ti – iti yaṃ taṃ vuttaṃ mayā idametaṃ paṭicca vuttaṃ. (Yathā paṭhamaṃ tathā vitthāretabbaṃ) evarūpo piṇḍapāto… evarūpaṃ senāsanaṃ… evarūpo gāmo… evarūpo nigamo… evarūpaṃ nagaraṃ… evarūpo janapado.
‘‘‘পুগ্গলংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি খো পনেতং ৰুত্তং মযা। কিঞ্চেতং পটিচ্চ ৰুত্তং? যথারূপং, সারিপুত্ত, পুগ্গলং সেৰতো অকুসলা ধম্মা অভিৰড্ঢন্তি, কুসলা ধম্মা পরিহাযন্তি এৰরূপো পুগ্গলো ন সেৰিতব্বো; যথারূপঞ্চ খো, সারিপুত্ত, পুগ্গলং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি এৰরূপো পুগ্গলো সেৰিতব্বো। ‘পুগ্গলংপাহং, সারিপুত্ত, দুৰিধেন ৰদামি – সেৰিতব্বম্পি, অসেৰিতব্বম্পী’তি – ইতি যং তং ৰুত্তং মযা ইদমেতং পটিচ্চ ৰুত্তং। ইমস্স খো, সারিপুত্ত, মযা সংখিত্তেন ভাসিতস্স এৰং ৰিত্থারেন অত্থো দট্ঠব্বো।
‘‘‘Puggalaṃpāhaṃ, sāriputta, duvidhena vadāmi – sevitabbampi, asevitabbampī’ti – iti kho panetaṃ vuttaṃ mayā. Kiñcetaṃ paṭicca vuttaṃ? Yathārūpaṃ, sāriputta, puggalaṃ sevato akusalā dhammā abhivaḍḍhanti, kusalā dhammā parihāyanti evarūpo puggalo na sevitabbo; yathārūpañca kho, sāriputta, puggalaṃ sevato akusalā dhammā parihāyanti, kusalā dhammā abhivaḍḍhanti evarūpo puggalo sevitabbo. ‘Puggalaṃpāhaṃ, sāriputta, duvidhena vadāmi – sevitabbampi, asevitabbampī’ti – iti yaṃ taṃ vuttaṃ mayā idametaṃ paṭicca vuttaṃ. Imassa kho, sāriputta, mayā saṃkhittena bhāsitassa evaṃ vitthārena attho daṭṭhabbo.
১২৩. ‘‘সব্বেপি চে, সারিপুত্ত, খত্তিযা ইমস্স মযা সংখিত্তেন ভাসিতস্স এৰং ৰিত্থারেন অত্থং আজানেয্যুং, সব্বেসানম্পিস্স খত্তিযানং দীঘরত্তং হিতায সুখায। সব্বেপি চে , সারিপুত্ত, ব্রাহ্মণা…পে॰… সব্বেপি চে, সারিপুত্ত, ৰেস্সা… সব্বেপি চে, সারিপুত্ত, সুদ্দা ইমস্স মযা সংখিত্তেন ভাসিতস্স এৰং ৰিত্থারেন অত্থং আজানেয্যুং, সব্বেসানম্পিস্স সুদ্দানং দীঘরত্তং হিতায সুখায। সদেৰকোপি চে, সারিপুত্ত, লোকো সমারকো সব্রহ্মকো সস্সমণব্রাহ্মণী পজা সদেৰমনুস্সা ইমস্স মযা সংখিত্তেন ভাসিতস্স এৰং ৰিত্থারেন অত্থং আজানেয্য, সদেৰকস্সপিস্স লোকস্স সমারকস্স সব্রহ্মকস্স সস্সমণব্রাহ্মণিযা পজায সদেৰমনুস্সায দীঘরত্তং হিতায সুখাযা’’তি।
123. ‘‘Sabbepi ce, sāriputta, khattiyā imassa mayā saṃkhittena bhāsitassa evaṃ vitthārena atthaṃ ājāneyyuṃ, sabbesānampissa khattiyānaṃ dīgharattaṃ hitāya sukhāya. Sabbepi ce , sāriputta, brāhmaṇā…pe… sabbepi ce, sāriputta, vessā… sabbepi ce, sāriputta, suddā imassa mayā saṃkhittena bhāsitassa evaṃ vitthārena atthaṃ ājāneyyuṃ, sabbesānampissa suddānaṃ dīgharattaṃ hitāya sukhāya. Sadevakopi ce, sāriputta, loko samārako sabrahmako sassamaṇabrāhmaṇī pajā sadevamanussā imassa mayā saṃkhittena bhāsitassa evaṃ vitthārena atthaṃ ājāneyya, sadevakassapissa lokassa samārakassa sabrahmakassa sassamaṇabrāhmaṇiyā pajāya sadevamanussāya dīgharattaṃ hitāya sukhāyā’’ti.
ইদমৰোচ ভগৰা। অত্তমনো আযস্মা সারিপুত্তো ভগৰতো ভাসিতং অভিনন্দীতি।
Idamavoca bhagavā. Attamano āyasmā sāriputto bhagavato bhāsitaṃ abhinandīti.
সেৰিতব্বাসেৰিতব্বসুত্তং নিট্ঠিতং চতুত্থং।
Sevitabbāsevitabbasuttaṃ niṭṭhitaṃ catutthaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৪. সেৰিতব্বাসেৰিতব্বসুত্তৰণ্ণনা • 4. Sevitabbāsevitabbasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৪. সেৰিতব্বাসেৰিতব্বসুত্তৰণ্ণনা • 4. Sevitabbāsevitabbasuttavaṇṇanā
