| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
4. ஸேவிதப்³பா³ஸேவிதப்³ப³ஸுத்தவண்ணனா
4. Sevitabbāsevitabbasuttavaṇṇanā
109. அஞ்ஞமஞ்ஞந்தி அஞ்ஞங் அஞ்ஞங். தேனாஹ ‘‘அஞ்ஞங் ஸேவிதப்³ப³’’ந்திஆதி³. ஸத்தஹி பதே³ஹீதி ஸத்தஹி வாக்யேஹி. பஜ்ஜதி ஏதேன யதா²தி⁴ப்பேதோ அத்தோ²தி பத³ங், வாக்யங். ஸாரிபுத்தத்தே²ரஸ்ஸ ஓகாஸகரணங் த⁴ம்மதா³யாதே³ (ம॰ நி॰ 1.31) வுத்தனயேன வேதி³தப்³ப³ங்.
109.Aññamaññanti aññaṃ aññaṃ. Tenāha ‘‘aññaṃ sevitabba’’ntiādi. Sattahi padehīti sattahi vākyehi. Pajjati etena yathādhippeto atthoti padaṃ, vākyaṃ. Sāriputtattherassa okāsakaraṇaṃ dhammadāyāde (ma. ni. 1.31) vuttanayena veditabbaṃ.
113. தி³ட்டி²யேவ பச்சயவஸேன படிலத்³த⁴தாய தி³ட்டி²படிலாபோ⁴. ஸஞ்ஞாபடிலாபே⁴பி ஏஸேவ நயோ. மிச்சா²தி³ட்டி²ஸம்மாதி³ட்டி²யோ…பே॰… ந க³ஹிதா கம்மபத²ப்பத்தானங் தேஸங் மனோஸமாசாரபா⁴வேன க³ஹிதத்தா. யதி³ ஏவங் கஸ்மா தி³ட்டி² சித்துப்பாத³வாரே ந க³ஹிதாதி? காமங் மிச்சா²தி³ட்டி²யா அவயவிபா⁴வோ லப்³ப⁴தி, ததா²பி சித்துப்பாத³க்க²ணே லோகியலோகுத்தரசித்துப்பாதே³ஸு கம்மபத²கொட்டா²ஸோ ந உத்³த⁴டோ.
113. Diṭṭhiyeva paccayavasena paṭiladdhatāya diṭṭhipaṭilābho. Saññāpaṭilābhepi eseva nayo. Micchādiṭṭhisammādiṭṭhiyo…pe… na gahitā kammapathappattānaṃ tesaṃ manosamācārabhāvena gahitattā. Yadi evaṃ kasmā diṭṭhi cittuppādavāre na gahitāti? Kāmaṃ micchādiṭṭhiyā avayavibhāvo labbhati, tathāpi cittuppādakkhaṇe lokiyalokuttaracittuppādesu kammapathakoṭṭhāso na uddhaṭo.
115. காமஸஞ்ஞாதீ³னந்தி எத்த² ஆதி³-ஸத்³தே³ன யதா² ப்³யாபாத³விஹிங்ஸாஸஞ்ஞா ஸங்க³ஹிதா, ஏவங் அனபி⁴ஜ்ஜா²அப்³யாபாத³அவிஹிங்ஸாஸஞ்ஞா ஸங்க³ஹிதா பட²மேன ஆதி³ஸத்³தே³ன ‘‘அனபி⁴ஜ்ஜா²ஸஹக³தாய ஸஞ்ஞாயா’’திஆதி³பாட²ஸ்ஸ ஸங்க³ஹிதத்தா.
115.Kāmasaññādīnanti ettha ādi-saddena yathā byāpādavihiṃsāsaññā saṅgahitā, evaṃ anabhijjhāabyāpādaavihiṃsāsaññā saṅgahitā paṭhamena ādisaddena ‘‘anabhijjhāsahagatāya saññāyā’’tiādipāṭhassa saṅgahitattā.
117. தி காமப⁴வாதீ³னங் அபரியோஸானாய பரியோஸானங் இச்ச²தோபி தாதி³ஸஸ்ஸ ப⁴வானங் அபரியோஸானமேவ ஹோதி . சத்தாரோ ஹொந்தி புக்³க³லவஸேன. தேனாஹ ‘‘புது²ஜ்ஜனோபி ஹீ’’திஆதி³. அகுஸலா த⁴ம்மா வட்³ட⁴ந்தீதி தேஸங் பஹானாய அப்படிபஜ்ஜமானஸ்ஸாதி அதி⁴ப்பாயோ, ததோ ஏவ குஸலா த⁴ம்மா பரிஹாயந்தி. தேனஸ்ஸ கிலேஸது³க்கே²ன விபாகது³க்கே²ன ச ஸது³க்க²மேவ அத்தபா⁴வங் அபி⁴னிப்³ப³த்தேதி. ஓரம்பா⁴கி³யஸங்யோஜனானி பஹாய ஸுத்³தா⁴வாஸேஸு நிப்³ப³த்தனாரஹோ அனாகா³மீ கத²ங்…பே॰… அபி⁴வட்³ட⁴ந்தீதி ஆஹ ‘‘அனாகா³மீபீ’’திஆதி³. ஸது³க்க²மேவ அத்தபா⁴வங் அபி⁴னிப்³ப³த்தேதி, யாய லப்³ப⁴மானஅகுஸலாபி⁴வுத்³தி⁴ங் குஸலபரிஹானிஞ்ச க³ஹெத்வா அனாகா³மினோபி ஸப்³யாப³ஜ்ஜ²அத்தபா⁴வாபி⁴னிப்³ப³த்தனங் வுத்தங். ஏவங் யதா²லப்³ப⁴மானங் அகுஸலபரிஹானிங் குஸலாபி⁴வுத்³தி⁴ஞ்ச க³ஹெத்வா புது²ஜ்ஜனஸ்ஸபி அந்திமப⁴விகஸ்ஸ அப்³யாப³ஜ்ஜ²அத்தபா⁴வாபி⁴னிப்³ப³த்தனங் வுத்தந்தி த³ட்ட²ப்³ப³ங். தேனாஹ ‘‘புது²ஜ்ஜனோபீ’’திஆதி³. அகுஸலமேவ ஹாயதி,ந குஸலங் தஸ்ஸ பு³த்³தி⁴பக்கே² டி²தத்தா. தத்தா²பி விபஸ்ஸனமேவ க³ப்³ப⁴ங் க³ண்ஹாபேதி, ந வட்டக³ப்³ப⁴ங் அந்திமப⁴விகதாய விவட்டூபனிஸ்ஸிதத்தா அஜ்ஜா²ஸயஸ்ஸ, ஞாணஸ்ஸ ச பாகக³மனதோ.
117. Ti kāmabhavādīnaṃ apariyosānāya pariyosānaṃ icchatopi tādisassa bhavānaṃ apariyosānameva hoti . Cattāro honti puggalavasena. Tenāha ‘‘puthujjanopi hī’’tiādi. Akusalā dhammā vaḍḍhantīti tesaṃ pahānāya appaṭipajjamānassāti adhippāyo, tato eva kusalā dhammā parihāyanti. Tenassa kilesadukkhena vipākadukkhena ca sadukkhameva attabhāvaṃ abhinibbatteti. Orambhāgiyasaṃyojanāni pahāya suddhāvāsesu nibbattanāraho anāgāmī kathaṃ…pe… abhivaḍḍhantīti āha ‘‘anāgāmīpī’’tiādi. Sadukkhameva attabhāvaṃ abhinibbatteti, yāya labbhamānaakusalābhivuddhiṃ kusalaparihāniñca gahetvā anāgāminopi sabyābajjhaattabhāvābhinibbattanaṃ vuttaṃ. Evaṃ yathālabbhamānaṃ akusalaparihāniṃ kusalābhivuddhiñca gahetvā puthujjanassapi antimabhavikassa abyābajjhaattabhāvābhinibbattanaṃ vuttanti daṭṭhabbaṃ. Tenāha ‘‘puthujjanopī’’tiādi. Akusalameva hāyati,na kusalaṃ tassa buddhipakkhe ṭhitattā. Tatthāpi vipassanameva gabbhaṃ gaṇhāpeti, na vaṭṭagabbhaṃ antimabhavikatāya vivaṭṭūpanissitattā ajjhāsayassa, ñāṇassa ca pākagamanato.
119. ஏகச்சஸ்ஸாதி ஸாமிவசனங் ‘‘அபி⁴னந்த³தீ’’திஆதீ³ஸு பச்சத்தவஸேன பரிணாமேதப்³ப³ங், ததா² ‘‘நிப்³பி³ந்த³தீ’’திஆதீ³ஸுபி. உக்³க³ண்ஹித்வாபீதி பி-ஸத்³தோ³ லுத்தனித்³தி³ட்டோ². ப⁴க³வதோ பா⁴ஸிதஸ்ஸ அத்த²ங் அஜானந்தா தாவ தீ³க⁴ரத்தங் ஹிதஸுக²தோ பரிபா³ஹிரா ஹொந்து ஜானந்தானம்பி ஸப்³பே³ஸங் தீ³க⁴ரத்தங் ஹிதாய ஸுகா²ய ஹோதீதி அனேகங்ஸிகதங் சோதெ³ந்தோ ‘‘ஏவங் ஸந்தேபீ’’திஆதி³மாஹ. இதரோ ஸப்³பே³ஸம்பி தீ³க⁴ரத்தங் ஹிதாய ஸுகா²ய ஹோதியேவாதி, ‘‘அப்படிஸந்தி⁴கா’’திஆதி³னா அனேகங்ஸிகதங் பரிஹரதி. ஸேஸங் ஸுவிஞ்ஞெய்யமேவ.
119.Ekaccassāti sāmivacanaṃ ‘‘abhinandatī’’tiādīsu paccattavasena pariṇāmetabbaṃ, tathā ‘‘nibbindatī’’tiādīsupi. Uggaṇhitvāpīti pi-saddo luttaniddiṭṭho. Bhagavato bhāsitassa atthaṃ ajānantā tāva dīgharattaṃ hitasukhato paribāhirā hontu jānantānampi sabbesaṃ dīgharattaṃ hitāya sukhāya hotīti anekaṃsikataṃ codento ‘‘evaṃ santepī’’tiādimāha. Itaro sabbesampi dīgharattaṃ hitāya sukhāya hotiyevāti, ‘‘appaṭisandhikā’’tiādinā anekaṃsikataṃ pariharati. Sesaṃ suviññeyyameva.
ஸேவிதப்³பா³ஸேவிதப்³ப³ஸுத்தவண்ணனாய லீனத்த²ப்பகாஸனா ஸமத்தா.
Sevitabbāsevitabbasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. ஸேவிதப்³பா³ஸேவிதப்³ப³ஸுத்தங் • 4. Sevitabbāsevitabbasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 4. ஸேவிதப்³பா³ஸேவிதப்³ப³ஸுத்தவண்ணனா • 4. Sevitabbāsevitabbasuttavaṇṇanā
