| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༤. སེཝིཏབྦཱསེཝིཏབྦསུཏྟཝཎྞནཱ
4. Sevitabbāsevitabbasuttavaṇṇanā
༡༠༩. ཨཉྙམཉྙནྟི ཨཉྙཾ ཨཉྙཾ། ཏེནཱཧ ‘‘ཨཉྙཾ སེཝིཏབྦ’’ནྟིཨཱདི། སཏྟཧི པདེཧཱིཏི སཏྟཧི ཝཱཀྱེཧི། པཛྫཏི ཨེཏེན ཡཐཱདྷིཔྤེཏོ ཨཏྠོཏི པདཾ, ཝཱཀྱཾ། སཱརིཔུཏྟཏྠེརསྶ ཨོཀཱསཀརཎཾ དྷམྨདཱཡཱདེ (མ॰ ནི॰ ༡.༣༡) ཝུཏྟནཡེན ཝེདིཏབྦཾ།
109.Aññamaññanti aññaṃ aññaṃ. Tenāha ‘‘aññaṃ sevitabba’’ntiādi. Sattahi padehīti sattahi vākyehi. Pajjati etena yathādhippeto atthoti padaṃ, vākyaṃ. Sāriputtattherassa okāsakaraṇaṃ dhammadāyāde (ma. ni. 1.31) vuttanayena veditabbaṃ.
༡༡༣. དིཊྛིཡེཝ པཙྩཡཝསེན པཊིལདྡྷཏཱཡ དིཊྛིཔཊིལཱབྷོ། སཉྙཱཔཊིལཱབྷེཔི ཨེསེཝ ནཡོ། མིཙྪཱདིཊྛིསམྨཱདིཊྛིཡོ…པེ॰… ན གཧིཏཱ ཀམྨཔཐཔྤཏྟཱནཾ ཏེསཾ མནོསམཱཙཱརབྷཱཝེན གཧིཏཏྟཱ། ཡདི ཨེཝཾ ཀསྨཱ དིཊྛི ཙིཏྟུཔྤཱདཝཱརེ ན གཧིཏཱཏི? ཀཱམཾ མིཙྪཱདིཊྛིཡཱ ཨཝཡཝིབྷཱཝོ ལབྦྷཏི, ཏཐཱཔི ཙིཏྟུཔྤཱདཀྑཎེ ལོཀིཡལོཀུཏྟརཙིཏྟུཔྤཱདེསུ ཀམྨཔཐཀོཊྛཱསོ ན ཨུདྡྷཊོ།
113. Diṭṭhiyeva paccayavasena paṭiladdhatāya diṭṭhipaṭilābho. Saññāpaṭilābhepi eseva nayo. Micchādiṭṭhisammādiṭṭhiyo…pe… na gahitā kammapathappattānaṃ tesaṃ manosamācārabhāvena gahitattā. Yadi evaṃ kasmā diṭṭhi cittuppādavāre na gahitāti? Kāmaṃ micchādiṭṭhiyā avayavibhāvo labbhati, tathāpi cittuppādakkhaṇe lokiyalokuttaracittuppādesu kammapathakoṭṭhāso na uddhaṭo.
༡༡༥. ཀཱམསཉྙཱདཱིནནྟི ཨེཏྠ ཨཱདི-སདྡེན ཡཐཱ བྱཱཔཱདཝིཧིཾསཱསཉྙཱ སངྒཧིཏཱ, ཨེཝཾ ཨནབྷིཛ྄ཛྷཱཨབྱཱཔཱདཨཝིཧིཾསཱསཉྙཱ སངྒཧིཏཱ པཋམེན ཨཱདིསདྡེན ‘‘ཨནབྷིཛ྄ཛྷཱསཧགཏཱཡ སཉྙཱཡཱ’’ཏིཨཱདིཔཱཋསྶ སངྒཧིཏཏྟཱ།
115.Kāmasaññādīnanti ettha ādi-saddena yathā byāpādavihiṃsāsaññā saṅgahitā, evaṃ anabhijjhāabyāpādaavihiṃsāsaññā saṅgahitā paṭhamena ādisaddena ‘‘anabhijjhāsahagatāya saññāyā’’tiādipāṭhassa saṅgahitattā.
༡༡༧. ཏི ཀཱམབྷཝཱདཱིནཾ ཨཔརིཡོསཱནཱཡ པརིཡོསཱནཾ ཨིཙྪཏོཔི ཏཱདིསསྶ བྷཝཱནཾ ཨཔརིཡོསཱནམེཝ ཧོཏི ། ཙཏྟཱརོ ཧོནྟི པུགྒལཝསེན། ཏེནཱཧ ‘‘པུཐུཛྫནོཔི ཧཱི’’ཏིཨཱདི། ཨཀུསལཱ དྷམྨཱ ཝཌྜྷནྟཱིཏི ཏེསཾ པཧཱནཱཡ ཨཔྤཊིཔཛྫམཱནསྶཱཏི ཨདྷིཔྤཱཡོ, ཏཏོ ཨེཝ ཀུསལཱ དྷམྨཱ པརིཧཱཡནྟི། ཏེནསྶ ཀིལེསདུཀྑེན ཝིཔཱཀདུཀྑེན ཙ སདུཀྑམེཝ ཨཏྟབྷཱཝཾ ཨབྷིནིབྦཏྟེཏི། ཨོརམྦྷཱགིཡསཾཡོཛནཱནི པཧཱཡ སུདྡྷཱཝཱསེསུ ནིབྦཏྟནཱརཧོ ཨནཱགཱམཱི ཀཐཾ…པེ॰… ཨབྷིཝཌྜྷནྟཱིཏི ཨཱཧ ‘‘ཨནཱགཱམཱིཔཱི’’ཏིཨཱདི། སདུཀྑམེཝ ཨཏྟབྷཱཝཾ ཨབྷིནིབྦཏྟེཏི, ཡཱཡ ལབྦྷམཱནཨཀུསལཱབྷིཝུདྡྷིཾ ཀུསལཔརིཧཱནིཉྩ གཧེཏྭཱ ཨནཱགཱམིནོཔི སབྱཱབཛ྄ཛྷཨཏྟབྷཱཝཱབྷིནིབྦཏྟནཾ ཝུཏྟཾ། ཨེཝཾ ཡཐཱལབྦྷམཱནཾ ཨཀུསལཔརིཧཱནིཾ ཀུསལཱབྷིཝུདྡྷིཉྩ གཧེཏྭཱ པུཐུཛྫནསྶཔི ཨནྟིམབྷཝིཀསྶ ཨབྱཱབཛ྄ཛྷཨཏྟབྷཱཝཱབྷིནིབྦཏྟནཾ ཝུཏྟནྟི དཊྛབྦཾ། ཏེནཱཧ ‘‘པུཐུཛྫནོཔཱི’’ཏིཨཱདི། ཨཀུསལམེཝ ཧཱཡཏི,ན ཀུསལཾ ཏསྶ བུདྡྷིཔཀྑེ ཋིཏཏྟཱ། ཏཏྠཱཔི ཝིཔསྶནམེཝ གབྦྷཾ གཎྷཱཔེཏི, ན ཝཊྚགབྦྷཾ ཨནྟིམབྷཝིཀཏཱཡ ཝིཝཊྚཱུཔནིསྶིཏཏྟཱ ཨཛ྄ཛྷཱསཡསྶ, ཉཱཎསྶ ཙ པཱཀགམནཏོ།
117. Ti kāmabhavādīnaṃ apariyosānāya pariyosānaṃ icchatopi tādisassa bhavānaṃ apariyosānameva hoti . Cattāro honti puggalavasena. Tenāha ‘‘puthujjanopi hī’’tiādi. Akusalā dhammā vaḍḍhantīti tesaṃ pahānāya appaṭipajjamānassāti adhippāyo, tato eva kusalā dhammā parihāyanti. Tenassa kilesadukkhena vipākadukkhena ca sadukkhameva attabhāvaṃ abhinibbatteti. Orambhāgiyasaṃyojanāni pahāya suddhāvāsesu nibbattanāraho anāgāmī kathaṃ…pe… abhivaḍḍhantīti āha ‘‘anāgāmīpī’’tiādi. Sadukkhameva attabhāvaṃ abhinibbatteti, yāya labbhamānaakusalābhivuddhiṃ kusalaparihāniñca gahetvā anāgāminopi sabyābajjhaattabhāvābhinibbattanaṃ vuttaṃ. Evaṃ yathālabbhamānaṃ akusalaparihāniṃ kusalābhivuddhiñca gahetvā puthujjanassapi antimabhavikassa abyābajjhaattabhāvābhinibbattanaṃ vuttanti daṭṭhabbaṃ. Tenāha ‘‘puthujjanopī’’tiādi. Akusalameva hāyati,na kusalaṃ tassa buddhipakkhe ṭhitattā. Tatthāpi vipassanameva gabbhaṃ gaṇhāpeti, na vaṭṭagabbhaṃ antimabhavikatāya vivaṭṭūpanissitattā ajjhāsayassa, ñāṇassa ca pākagamanato.
༡༡༩. ཨེཀཙྩསྶཱཏི སཱམིཝཙནཾ ‘‘ཨབྷིནནྡཏཱི’’ཏིཨཱདཱིསུ པཙྩཏྟཝསེན པརིཎཱམེཏབྦཾ, ཏཐཱ ‘‘ནིབྦིནྡཏཱི’’ཏིཨཱདཱིསུཔི། ཨུགྒཎྷིཏྭཱཔཱིཏི པི-སདྡོ ལུཏྟནིདྡིཊྛོ། བྷགཝཏོ བྷཱསིཏསྶ ཨཏྠཾ ཨཛཱནནྟཱ ཏཱཝ དཱིགྷརཏྟཾ ཧིཏསུཁཏོ པརིབཱཧིརཱ ཧོནྟུ ཛཱནནྟཱནམྤི སབྦེསཾ དཱིགྷརཏྟཾ ཧིཏཱཡ སུཁཱཡ ཧོཏཱིཏི ཨནེཀཾསིཀཏཾ ཙོདེནྟོ ‘‘ཨེཝཾ སནྟེཔཱི’’ཏིཨཱདིམཱཧ། ཨིཏརོ སབྦེསམྤི དཱིགྷརཏྟཾ ཧིཏཱཡ སུཁཱཡ ཧོཏིཡེཝཱཏི, ‘‘ཨཔྤཊིསནྡྷིཀཱ’’ཏིཨཱདིནཱ ཨནེཀཾསིཀཏཾ པརིཧརཏི། སེསཾ སུཝིཉྙེཡྻམེཝ།
119.Ekaccassāti sāmivacanaṃ ‘‘abhinandatī’’tiādīsu paccattavasena pariṇāmetabbaṃ, tathā ‘‘nibbindatī’’tiādīsupi. Uggaṇhitvāpīti pi-saddo luttaniddiṭṭho. Bhagavato bhāsitassa atthaṃ ajānantā tāva dīgharattaṃ hitasukhato paribāhirā hontu jānantānampi sabbesaṃ dīgharattaṃ hitāya sukhāya hotīti anekaṃsikataṃ codento ‘‘evaṃ santepī’’tiādimāha. Itaro sabbesampi dīgharattaṃ hitāya sukhāya hotiyevāti, ‘‘appaṭisandhikā’’tiādinā anekaṃsikataṃ pariharati. Sesaṃ suviññeyyameva.
སེཝིཏབྦཱསེཝིཏབྦསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Sevitabbāsevitabbasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༤. སེཝིཏབྦཱསེཝིཏབྦསུཏྟཾ • 4. Sevitabbāsevitabbasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༤. སེཝིཏབྦཱསེཝིཏབྦསུཏྟཝཎྞནཱ • 4. Sevitabbāsevitabbasuttavaṇṇanā
