| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၆. သေဝိတဗ္ဗသုတ္တံ
6. Sevitabbasuttaṃ
၂၆. ‘‘တယောမေ , ဘိက္ခဝေ, ပုဂ္ဂလာ သန္တော သံဝိဇ္ဇမာနာ လောကသ္မိံ။ ကတမေ တယော? အတ္ထိ, ဘိက္ခဝေ, ပုဂ္ဂလော န သေဝိတဗ္ဗော န ဘဇိတဗ္ဗော န ပယိရုပာသိတဗ္ဗော။ အတ္ထိ, ဘိက္ခဝေ, ပုဂ္ဂလော သေဝိတဗ္ဗော ဘဇိတဗ္ဗော ပယိရုပာသိတဗ္ဗော။ အတ္ထိ, ဘိက္ခဝေ, ပုဂ္ဂလော သက္ကတ္ဝာ ဂရုံ ကတ္ဝာ သေဝိတဗ္ဗော ဘဇိတဗ္ဗော ပယိရုပာသိတဗ္ဗော။ ကတမော စ, ဘိက္ခဝေ, ပုဂ္ဂလော န သေဝိတဗ္ဗော န ဘဇိတဗ္ဗော န ပယိရုပာသိတဗ္ဗော? ဣဓ, ဘိက္ခဝေ, ဧကစ္စော ပုဂ္ဂလော ဟီနော ဟောတိ သီလေန သမာဓိနာ ပညာယ။ ဧဝရူပော, ဘိက္ခဝေ, ပုဂ္ဂလော န သေဝိတဗ္ဗော န ဘဇိတဗ္ဗော န ပယိရုပာသိတဗ္ဗော အညတ္ရ အနုဒ္ဒယာ အညတ္ရ အနုကမ္ပာ။
26. ‘‘Tayome , bhikkhave, puggalā santo saṃvijjamānā lokasmiṃ. Katame tayo? Atthi, bhikkhave, puggalo na sevitabbo na bhajitabbo na payirupāsitabbo. Atthi, bhikkhave, puggalo sevitabbo bhajitabbo payirupāsitabbo. Atthi, bhikkhave, puggalo sakkatvā garuṃ katvā sevitabbo bhajitabbo payirupāsitabbo. Katamo ca, bhikkhave, puggalo na sevitabbo na bhajitabbo na payirupāsitabbo? Idha, bhikkhave, ekacco puggalo hīno hoti sīlena samādhinā paññāya. Evarūpo, bhikkhave, puggalo na sevitabbo na bhajitabbo na payirupāsitabbo aññatra anuddayā aññatra anukampā.
‘‘ကတမော စ, ဘိက္ခဝေ, ပုဂ္ဂလော သေဝိတဗ္ဗော ဘဇိတဗ္ဗော ပယိရုပာသိတဗ္ဗော? ဣဓ, ဘိက္ခဝေ, ဧကစ္စော ပုဂ္ဂလော သဒိသော ဟောတိ သီလေန သမာဓိနာ ပညာယ။ ဧဝရူပော, ဘိက္ခဝေ, ပုဂ္ဂလော သေဝိတဗ္ဗော ဘဇိတဗ္ဗော ပယိရုပာသိတဗ္ဗော။ တံ ကိသ္သ ဟေတု? သီလသာမညဂတာနံ သတံ သီလကထာ စ နော ဘဝိသ္သတိ, သာ စ နော ပဝတ္တိနီ 1 ဘဝိသ္သတိ, သာ စ နော ဖာသု ဘဝိသ္သတိ။ သမာဓိသာမညဂတာနံ သတံ သမာဓိကထာ စ နော ဘဝိသ္သတိ, သာ စ နော ပဝတ္တိနီ ဘဝိသ္သတိ, သာ စ နော ဖာသု ဘဝိသ္သတိ။ ပညာသာမညဂတာနံ သတံ ပညာကထာ စ နော ဘဝိသ္သတိ, သာ စ နော ပဝတ္တိနီ ဘဝိသ္သတိ, သာ စ နော ဖာသု ဘဝိသ္သတီတိ။ တသ္မာ ဧဝရူပော ပုဂ္ဂလော သေဝိတဗ္ဗော ဘဇိတဗ္ဗော ပယိရုပာသိတဗ္ဗော။
‘‘Katamo ca, bhikkhave, puggalo sevitabbo bhajitabbo payirupāsitabbo? Idha, bhikkhave, ekacco puggalo sadiso hoti sīlena samādhinā paññāya. Evarūpo, bhikkhave, puggalo sevitabbo bhajitabbo payirupāsitabbo. Taṃ kissa hetu? Sīlasāmaññagatānaṃ sataṃ sīlakathā ca no bhavissati, sā ca no pavattinī 2 bhavissati, sā ca no phāsu bhavissati. Samādhisāmaññagatānaṃ sataṃ samādhikathā ca no bhavissati, sā ca no pavattinī bhavissati, sā ca no phāsu bhavissati. Paññāsāmaññagatānaṃ sataṃ paññākathā ca no bhavissati, sā ca no pavattinī bhavissati, sā ca no phāsu bhavissatīti. Tasmā evarūpo puggalo sevitabbo bhajitabbo payirupāsitabbo.
‘‘ကတမော စ, ဘိက္ခဝေ, ပုဂ္ဂလော သက္ကတ္ဝာ ဂရုံ ကတ္ဝာ သေဝိတဗ္ဗော ဘဇိတဗ္ဗော ပယိရုပာသိတဗ္ဗော? ဣဓ, ဘိက္ခဝေ , ဧကစ္စော ပုဂ္ဂလော အဓိကော ဟောတိ သီလေန သမာဓိနာ ပညာယ။ ဧဝရူပော, ဘိက္ခဝေ, ပုဂ္ဂလော သက္ကတ္ဝာ ဂရုံ ကတ္ဝာ သေဝိတဗ္ဗော ဘဇိတဗ္ဗော ပယိရုပာသိတဗ္ဗော။ တံ ကိသ္သ ဟေတု? ဣတိ အပရိပူရံ ဝာ သီလက္ခန္ဓံ ပရိပူရေသ္သာမိ, ပရိပူရံ ဝာ သီလက္ခန္ဓံ တတ္ထ တတ္ထ ပညာယ အနုဂ္ဂဟေသ္သာမိ; အပရိပူရံ ဝာ သမာဓိက္ခန္ဓံ ပရိပူရေသ္သာမိ, ပရိပူရံ ဝာ သမာဓိက္ခန္ဓံ တတ္ထ တတ္ထ ပညာယ အနုဂ္ဂဟေသ္သာမိ; အပရိပူရံ ဝာ ပညာက္ခန္ဓံ ပရိပူရေသ္သာမိ, ပရိပူရံ ဝာ ပညာက္ခန္ဓံ တတ္ထ တတ္ထ ပညာယ အနုဂ္ဂဟေသ္သာမီတိ။ တသ္မာ ဧဝရူပော ပုဂ္ဂလော သက္ကတ္ဝာ ဂရုံ ကတ္ဝာ သေဝိတဗ္ဗော ဘဇိတဗ္ဗော ပယိရုပာသိတဗ္ဗော။ ဣမေ ခော, ဘိက္ခဝေ, တယော ပုဂ္ဂလာ သန္တော သံဝိဇ္ဇမာနာ လောကသ္မိ’’န္တိ။
‘‘Katamo ca, bhikkhave, puggalo sakkatvā garuṃ katvā sevitabbo bhajitabbo payirupāsitabbo? Idha, bhikkhave , ekacco puggalo adhiko hoti sīlena samādhinā paññāya. Evarūpo, bhikkhave, puggalo sakkatvā garuṃ katvā sevitabbo bhajitabbo payirupāsitabbo. Taṃ kissa hetu? Iti aparipūraṃ vā sīlakkhandhaṃ paripūressāmi, paripūraṃ vā sīlakkhandhaṃ tattha tattha paññāya anuggahessāmi; aparipūraṃ vā samādhikkhandhaṃ paripūressāmi, paripūraṃ vā samādhikkhandhaṃ tattha tattha paññāya anuggahessāmi; aparipūraṃ vā paññākkhandhaṃ paripūressāmi, paripūraṃ vā paññākkhandhaṃ tattha tattha paññāya anuggahessāmīti. Tasmā evarūpo puggalo sakkatvā garuṃ katvā sevitabbo bhajitabbo payirupāsitabbo. Ime kho, bhikkhave, tayo puggalā santo saṃvijjamānā lokasmi’’nti.
‘‘နိဟီယတိ ပုရိသော နိဟီနသေဝီ၊
‘‘Nihīyati puriso nihīnasevī,
န စ ဟာယေထ ကဒာစိ တုလ္ယသေဝီ။
Na ca hāyetha kadāci tulyasevī;
သေဋ္ဌမုပနမံ ဥဒေတိ ခိပ္ပံ၊
Seṭṭhamupanamaṃ udeti khippaṃ,
တသ္မာ အတ္တနော ဥတ္တရိံ ဘဇေထာ’’တိ။ ဆဋ္ဌံ။
Tasmā attano uttariṃ bhajethā’’ti. chaṭṭhaṃ;
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၆. သေဝိတဗ္ဗသုတ္တဝဏ္ဏနာ • 6. Sevitabbasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. သေဝိတဗ္ဗသုတ္တဝဏ္ဏနာ • 6. Sevitabbasuttavaṇṇanā
