| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. ஸேவிதப்³ப³ஸுத்தவண்ணனா
6. Sevitabbasuttavaṇṇanā
26. ச²ட்டே² உபஸங்கமிதப்³போ³தி காலேன காலங் உபஸங்கமிதப்³போ³. அல்லீயிதப்³போ³தி சா²யாய விய வினா பா⁴வனாய நில்லீயிதப்³போ³. புனப்புனங் உபாஸிதப்³போ³தி அபி⁴ண்ஹஸோ உபனிஸீதி³தப்³போ³. அனுத்³த³யாதி மெத்தாபுப்³ப³பா⁴கோ³. உபஸங்கமிதுங் வட்டதீதி ‘‘ஏதஸ்ஸ ஸீலேன அபி⁴வுத்³தி⁴ ப⁴விஸ்ஸதீ’’தி உபகாரத்த²ங் உபஸேவனாதி³ வட்டதி.
26. Chaṭṭhe upasaṅkamitabboti kālena kālaṃ upasaṅkamitabbo. Allīyitabboti chāyāya viya vinā bhāvanāya nillīyitabbo. Punappunaṃ upāsitabboti abhiṇhaso upanisīditabbo. Anuddayāti mettāpubbabhāgo. Upasaṅkamituṃ vaṭṭatīti ‘‘etassa sīlena abhivuddhi bhavissatī’’ti upakāratthaṃ upasevanādi vaṭṭati.
ந படிஹஞ்ஞிஸ்ஸதீதி ‘‘அபேஹி, கிங் ஏதேனா’’தி படிக்கே²பாபா⁴வதோ பியஸீலத்தா ந படிஹஞ்ஞிஸ்ஸதி. பா²ஸு ப⁴விஸ்ஸதீதி த்³வீஸு ஹி ஸீலவந்தேஸு ஏகேன ஸீலஸ்ஸ வண்ணே கதி²தே இதரோ அனுமோத³தி. தேன தேஸங் கதா² பா²ஸு சேவ ஹோதி பவத்தினீ ச. ஏகஸ்மிங் பன து³ஸ்ஸீலே ஸதி து³ஸ்ஸீலஸ்ஸ ஸீலகதா² து³க்கதா², நேவ ஸீலகதா² ஹோதி, ந பா²ஸு ஹோதி, ந பவத்தினீ. து³ஸ்ஸீலஸ்ஸ ஹி ஸீலகதா² அபா²ஸு ப⁴விஸ்ஸதி. ஸீலகதா²ய வுத்தமத்த²ங் ஸமாதி⁴பஞ்ஞாகதா²ஸுபி அதிதி³ஸதி ‘‘ஸமாதி⁴பஞ்ஞாகதா²ஸுபி ஏஸேவ நயோ’’தி. த்³வே ஹி ஸமாதி⁴லாபி⁴னோ ஸமாதி⁴கத²ங் ஸப்பஞ்ஞா ச பஞ்ஞாகத²ங் கதெ²ந்தா ரத்திங் வா தி³வஸங் வா அதிக்கமந்தம்பி ந ஜானந்தி.
Na paṭihaññissatīti ‘‘apehi, kiṃ etenā’’ti paṭikkhepābhāvato piyasīlattā na paṭihaññissati. Phāsu bhavissatīti dvīsu hi sīlavantesu ekena sīlassa vaṇṇe kathite itaro anumodati. Tena tesaṃ kathā phāsu ceva hoti pavattinī ca. Ekasmiṃ pana dussīle sati dussīlassa sīlakathā dukkathā, neva sīlakathā hoti, na phāsu hoti, na pavattinī. Dussīlassa hi sīlakathā aphāsu bhavissati. Sīlakathāya vuttamatthaṃ samādhipaññākathāsupi atidisati ‘‘samādhipaññākathāsupi eseva nayo’’ti. Dve hi samādhilābhino samādhikathaṃ sappaññā ca paññākathaṃ kathentā rattiṃ vā divasaṃ vā atikkamantampi na jānanti.
தத்த² தத்த² பஞ்ஞாய அனுக்³க³ஹெஸ்ஸாமீதி தஸ்மிங் தஸ்மிங் அனுக்³க³ஹேதப்³பே³ பஞ்ஞாய ஸோதே⁴தப்³பே³ வட்³டே⁴தப்³பே³ ச அதி⁴கஸீலங் நிஸ்ஸாய உப்பன்னபஞ்ஞாய அனுக்³க³ஹெஸ்ஸாமீதி அத்தோ². தஞ்ச அனுக்³க³ண்ஹனங் ஸீலஸ்ஸ அஸப்பாயானுபகாரத⁴ம்மே வஜ்ஜெத்வா தப்படிபக்க²ஸேவனேன ஹோதீதி ஆஹ ‘‘ஸீலஸ்ஸ அஸப்பாயே’’திஆதி³. ஸீலஸ்ஸ அஸப்பாயானுபகாரத⁴ம்மா நாம அனாசாராகோ³சராத³யோ, தப்படிபக்க²தோ உபகாரத⁴ம்மா வேதி³தப்³பா³. தஸ்மிங் தஸ்மிங் டா²னேதி தங்தங்ஸிக்கா²கொட்டா²ஸபத³ட்டா²னே. அனுக்³க³ண்ஹாதி நாமாதி அபி⁴ன்னங் அஸங்கிலிட்ட²ங் கத்வா அனுக்³க³ண்ஹாதி நாம. கா²ரபரிஸ்ஸாவனேதி ரஜகானங் ஊஸகா²ராதி³கா²ரபரிஸ்ஸாவனபடே. ஹாயதீதி ஸீலாதி³னா பரிஹாயதி. ஸெட்ட²ங் புக்³க³லந்தி ஸீலாதி³கு³ணேஹி ஸெட்ட²ங் உத்தரிதரங் உத்தமங் புக்³க³லங்.
Tattha tattha paññāya anuggahessāmīti tasmiṃ tasmiṃ anuggahetabbe paññāya sodhetabbe vaḍḍhetabbe ca adhikasīlaṃ nissāya uppannapaññāya anuggahessāmīti attho. Tañca anuggaṇhanaṃ sīlassa asappāyānupakāradhamme vajjetvā tappaṭipakkhasevanena hotīti āha ‘‘sīlassa asappāye’’tiādi. Sīlassa asappāyānupakāradhammā nāma anācārāgocarādayo, tappaṭipakkhato upakāradhammā veditabbā. Tasmiṃ tasmiṃṭhāneti taṃtaṃsikkhākoṭṭhāsapadaṭṭhāne. Anuggaṇhāti nāmāti abhinnaṃ asaṃkiliṭṭhaṃ katvā anuggaṇhāti nāma. Khāraparissāvaneti rajakānaṃ ūsakhārādikhāraparissāvanapaṭe. Hāyatīti sīlādinā parihāyati. Seṭṭhaṃ puggalanti sīlādiguṇehi seṭṭhaṃ uttaritaraṃ uttamaṃ puggalaṃ.
ஸேவிதப்³ப³ஸுத்தவண்ணனா நிட்டி²தா.
Sevitabbasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. ஸேவிதப்³ப³ஸுத்தங் • 6. Sevitabbasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. ஸேவிதப்³ப³ஸுத்தவண்ணனா • 6. Sevitabbasuttavaṇṇanā
