| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৬. সেৰিতব্বসুত্তৰণ্ণনা
6. Sevitabbasuttavaṇṇanā
২৬. ছট্ঠে উপসঙ্কমিতব্বোতি কালেন কালং উপসঙ্কমিতব্বো। অল্লীযিতব্বোতি ছাযায ৰিয ৰিনা ভাৰনায নিল্লীযিতব্বো। পুনপ্পুনং উপাসিতব্বোতি অভিণ্হসো উপনিসীদিতব্বো। অনুদ্দযাতি মেত্তাপুব্বভাগো। উপসঙ্কমিতুং ৰট্টতীতি ‘‘এতস্স সীলেন অভিৰুদ্ধি ভৰিস্সতী’’তি উপকারত্থং উপসেৰনাদি ৰট্টতি।
26. Chaṭṭhe upasaṅkamitabboti kālena kālaṃ upasaṅkamitabbo. Allīyitabboti chāyāya viya vinā bhāvanāya nillīyitabbo. Punappunaṃ upāsitabboti abhiṇhaso upanisīditabbo. Anuddayāti mettāpubbabhāgo. Upasaṅkamituṃ vaṭṭatīti ‘‘etassa sīlena abhivuddhi bhavissatī’’ti upakāratthaṃ upasevanādi vaṭṭati.
ন পটিহঞ্ঞিস্সতীতি ‘‘অপেহি, কিং এতেনা’’তি পটিক্খেপাভাৰতো পিযসীলত্তা ন পটিহঞ্ঞিস্সতি। ফাসু ভৰিস্সতীতি দ্ৰীসু হি সীলৰন্তেসু একেন সীলস্স ৰণ্ণে কথিতে ইতরো অনুমোদতি। তেন তেসং কথা ফাসু চেৰ হোতি পৰত্তিনী চ। একস্মিং পন দুস্সীলে সতি দুস্সীলস্স সীলকথা দুক্কথা, নেৰ সীলকথা হোতি, ন ফাসু হোতি, ন পৰত্তিনী। দুস্সীলস্স হি সীলকথা অফাসু ভৰিস্সতি। সীলকথায ৰুত্তমত্থং সমাধিপঞ্ঞাকথাসুপি অতিদিসতি ‘‘সমাধিপঞ্ঞাকথাসুপি এসেৰ নযো’’তি। দ্ৰে হি সমাধিলাভিনো সমাধিকথং সপ্পঞ্ঞা চ পঞ্ঞাকথং কথেন্তা রত্তিং ৰা দিৰসং ৰা অতিক্কমন্তম্পি ন জানন্তি।
Na paṭihaññissatīti ‘‘apehi, kiṃ etenā’’ti paṭikkhepābhāvato piyasīlattā na paṭihaññissati. Phāsu bhavissatīti dvīsu hi sīlavantesu ekena sīlassa vaṇṇe kathite itaro anumodati. Tena tesaṃ kathā phāsu ceva hoti pavattinī ca. Ekasmiṃ pana dussīle sati dussīlassa sīlakathā dukkathā, neva sīlakathā hoti, na phāsu hoti, na pavattinī. Dussīlassa hi sīlakathā aphāsu bhavissati. Sīlakathāya vuttamatthaṃ samādhipaññākathāsupi atidisati ‘‘samādhipaññākathāsupi eseva nayo’’ti. Dve hi samādhilābhino samādhikathaṃ sappaññā ca paññākathaṃ kathentā rattiṃ vā divasaṃ vā atikkamantampi na jānanti.
তত্থ তত্থ পঞ্ঞায অনুগ্গহেস্সামীতি তস্মিং তস্মিং অনুগ্গহেতব্বে পঞ্ঞায সোধেতব্বে ৰড্ঢেতব্বে চ অধিকসীলং নিস্সায উপ্পন্নপঞ্ঞায অনুগ্গহেস্সামীতি অত্থো। তঞ্চ অনুগ্গণ্হনং সীলস্স অসপ্পাযানুপকারধম্মে ৰজ্জেত্ৰা তপ্পটিপক্খসেৰনেন হোতীতি আহ ‘‘সীলস্স অসপ্পাযে’’তিআদি। সীলস্স অসপ্পাযানুপকারধম্মা নাম অনাচারাগোচরাদযো, তপ্পটিপক্খতো উপকারধম্মা ৰেদিতব্বা। তস্মিং তস্মিং ঠানেতি তংতংসিক্খাকোট্ঠাসপদট্ঠানে। অনুগ্গণ্হাতি নামাতি অভিন্নং অসংকিলিট্ঠং কত্ৰা অনুগ্গণ্হাতি নাম। খারপরিস্সাৰনেতি রজকানং ঊসখারাদিখারপরিস্সাৰনপটে। হাযতীতি সীলাদিনা পরিহাযতি। সেট্ঠং পুগ্গলন্তি সীলাদিগুণেহি সেট্ঠং উত্তরিতরং উত্তমং পুগ্গলং।
Tattha tattha paññāya anuggahessāmīti tasmiṃ tasmiṃ anuggahetabbe paññāya sodhetabbe vaḍḍhetabbe ca adhikasīlaṃ nissāya uppannapaññāya anuggahessāmīti attho. Tañca anuggaṇhanaṃ sīlassa asappāyānupakāradhamme vajjetvā tappaṭipakkhasevanena hotīti āha ‘‘sīlassa asappāye’’tiādi. Sīlassa asappāyānupakāradhammā nāma anācārāgocarādayo, tappaṭipakkhato upakāradhammā veditabbā. Tasmiṃ tasmiṃṭhāneti taṃtaṃsikkhākoṭṭhāsapadaṭṭhāne. Anuggaṇhāti nāmāti abhinnaṃ asaṃkiliṭṭhaṃ katvā anuggaṇhāti nāma. Khāraparissāvaneti rajakānaṃ ūsakhārādikhāraparissāvanapaṭe. Hāyatīti sīlādinā parihāyati. Seṭṭhaṃ puggalanti sīlādiguṇehi seṭṭhaṃ uttaritaraṃ uttamaṃ puggalaṃ.
সেৰিতব্বসুত্তৰণ্ণনা নিট্ঠিতা।
Sevitabbasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৬. সেৰিতব্বসুত্তং • 6. Sevitabbasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৬. সেৰিতব্বসুত্তৰণ্ণনা • 6. Sevitabbasuttavaṇṇanā
