| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៦. សេវិតព្ពសុត្តវណ្ណនា
6. Sevitabbasuttavaṇṇanā
២៦. ឆដ្ឋេ ឧបសង្កមិតព្ពោតិ កាលេន កាលំ ឧបសង្កមិតព្ពោ។ អល្លីយិតព្ពោតិ ឆាយាយ វិយ វិនា ភាវនាយ និល្លីយិតព្ពោ។ បុនប្បុនំ ឧបាសិតព្ពោតិ អភិណ្ហសោ ឧបនិសីទិតព្ពោ។ អនុទ្ទយាតិ មេត្តាបុព្ពភាគោ។ ឧបសង្កមិតុំ វដ្ដតីតិ ‘‘ឯតស្ស សីលេន អភិវុទ្ធិ ភវិស្សតី’’តិ ឧបការត្ថំ ឧបសេវនាទិ វដ្ដតិ។
26. Chaṭṭhe upasaṅkamitabboti kālena kālaṃ upasaṅkamitabbo. Allīyitabboti chāyāya viya vinā bhāvanāya nillīyitabbo. Punappunaṃ upāsitabboti abhiṇhaso upanisīditabbo. Anuddayāti mettāpubbabhāgo. Upasaṅkamituṃ vaṭṭatīti ‘‘etassa sīlena abhivuddhi bhavissatī’’ti upakāratthaṃ upasevanādi vaṭṭati.
ន បដិហញ្ញិស្សតីតិ ‘‘អបេហិ, កិំ ឯតេនា’’តិ បដិក្ខេបាភាវតោ បិយសីលត្តា ន បដិហញ្ញិស្សតិ។ ផាសុ ភវិស្សតីតិ ទ្វីសុ ហិ សីលវន្តេសុ ឯកេន សីលស្ស វណ្ណេ កថិតេ ឥតរោ អនុមោទតិ។ តេន តេសំ កថា ផាសុ ចេវ ហោតិ បវត្តិនី ច។ ឯកស្មិំ បន ទុស្សីលេ សតិ ទុស្សីលស្ស សីលកថា ទុក្កថា, នេវ សីលកថា ហោតិ, ន ផាសុ ហោតិ, ន បវត្តិនី។ ទុស្សីលស្ស ហិ សីលកថា អផាសុ ភវិស្សតិ។ សីលកថាយ វុត្តមត្ថំ សមាធិបញ្ញាកថាសុបិ អតិទិសតិ ‘‘សមាធិបញ្ញាកថាសុបិ ឯសេវ នយោ’’តិ។ ទ្វេ ហិ សមាធិលាភិនោ សមាធិកថំ សប្បញ្ញា ច បញ្ញាកថំ កថេន្តា រត្តិំ វា ទិវសំ វា អតិក្កមន្តម្បិ ន ជានន្តិ។
Na paṭihaññissatīti ‘‘apehi, kiṃ etenā’’ti paṭikkhepābhāvato piyasīlattā na paṭihaññissati. Phāsu bhavissatīti dvīsu hi sīlavantesu ekena sīlassa vaṇṇe kathite itaro anumodati. Tena tesaṃ kathā phāsu ceva hoti pavattinī ca. Ekasmiṃ pana dussīle sati dussīlassa sīlakathā dukkathā, neva sīlakathā hoti, na phāsu hoti, na pavattinī. Dussīlassa hi sīlakathā aphāsu bhavissati. Sīlakathāya vuttamatthaṃ samādhipaññākathāsupi atidisati ‘‘samādhipaññākathāsupi eseva nayo’’ti. Dve hi samādhilābhino samādhikathaṃ sappaññā ca paññākathaṃ kathentā rattiṃ vā divasaṃ vā atikkamantampi na jānanti.
តត្ថ តត្ថ បញ្ញាយ អនុគ្គហេស្សាមីតិ តស្មិំ តស្មិំ អនុគ្គហេតព្ពេ បញ្ញាយ សោធេតព្ពេ វឌ្ឍេតព្ពេ ច អធិកសីលំ និស្សាយ ឧប្បន្នបញ្ញាយ អនុគ្គហេស្សាមីតិ អត្ថោ។ តញ្ច អនុគ្គណ្ហនំ សីលស្ស អសប្បាយានុបការធម្មេ វជ្ជេត្វា តប្បដិបក្ខសេវនេន ហោតីតិ អាហ ‘‘សីលស្ស អសប្បាយេ’’តិអាទិ។ សីលស្ស អសប្បាយានុបការធម្មា នាម អនាចារាគោចរាទយោ, តប្បដិបក្ខតោ ឧបការធម្មា វេទិតព្ពា។ តស្មិំ តស្មិំ ឋានេតិ តំតំសិក្ខាកោដ្ឋាសបទដ្ឋានេ។ អនុគ្គណ្ហាតិ នាមាតិ អភិន្នំ អសំកិលិដ្ឋំ កត្វា អនុគ្គណ្ហាតិ នាម។ ខារបរិស្សាវនេតិ រជកានំ ឩសខារាទិខារបរិស្សាវនបដេ។ ហាយតីតិ សីលាទិនា បរិហាយតិ។ សេដ្ឋំ បុគ្គលន្តិ សីលាទិគុណេហិ សេដ្ឋំ ឧត្តរិតរំ ឧត្តមំ បុគ្គលំ។
Tattha tattha paññāya anuggahessāmīti tasmiṃ tasmiṃ anuggahetabbe paññāya sodhetabbe vaḍḍhetabbe ca adhikasīlaṃ nissāya uppannapaññāya anuggahessāmīti attho. Tañca anuggaṇhanaṃ sīlassa asappāyānupakāradhamme vajjetvā tappaṭipakkhasevanena hotīti āha ‘‘sīlassa asappāye’’tiādi. Sīlassa asappāyānupakāradhammā nāma anācārāgocarādayo, tappaṭipakkhato upakāradhammā veditabbā. Tasmiṃ tasmiṃṭhāneti taṃtaṃsikkhākoṭṭhāsapadaṭṭhāne. Anuggaṇhāti nāmāti abhinnaṃ asaṃkiliṭṭhaṃ katvā anuggaṇhāti nāma. Khāraparissāvaneti rajakānaṃ ūsakhārādikhāraparissāvanapaṭe. Hāyatīti sīlādinā parihāyati. Seṭṭhaṃ puggalanti sīlādiguṇehi seṭṭhaṃ uttaritaraṃ uttamaṃ puggalaṃ.
សេវិតព្ពសុត្តវណ្ណនា និដ្ឋិតា។
Sevitabbasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៦. សេវិតព្ពសុត្តំ • 6. Sevitabbasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៦. សេវិតព្ពសុត្តវណ្ណនា • 6. Sevitabbasuttavaṇṇanā
