| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
6. සෙවිතබ්‌බසුත්‌තවණ්‌ණනා
6. Sevitabbasuttavaṇṇanā
26. ඡට්‌ඨෙ සෙවිතබ්‌බොති උපසඞ්‌කමිතබ්‌බො. භජිතබ්‌බොති අල්‌ලීයිතබ්‌බො. පයිරුපාසිතබ්‌බොති සන්‌තිකෙ නිසීදනවසෙන පුනප්‌පුනං උපාසිතබ්‌බො. සක්‌කත්‌වා ගරුං කත්‌වාති සක්‌කාරඤ්‌චෙව ගරුකාරඤ්‌ච කත්‌වා. හීනො හොති සීලෙනාතිආදීසු උපාදායුපාදාය හීනතා වෙදිතබ්‌බා. තත්‌ථ යො හි පඤ්‌ච සීලානි රක්‌ඛති, සො දස සීලානි රක්‌ඛන්‌තෙන න සෙවිතබ්‌බො . යො දස සීලානි රක්‌ඛති, සො චතුපාරිසුද්‌ධිසීලං රක්‌ඛන්‌තෙන න සෙවිතබ්‌බො. අඤ්‌ඤත්‍ර අනුද්‌දයා අඤ්‌ඤත්‍ර අනුකම්‌පාති ඨපෙත්‌වා අනුද්‌දයඤ්‌ච අනුකම්‌පඤ්‌ච. අත්‌තනො අත්‌ථායෙව හි එවරූපො පුග්‌ගලො න සෙවිතබ්‌බො, අනුද්‌දයානුකම්‌පාවසෙන පන තං උපසඞ්‌කමිතුං වට්‌ටති.
26. Chaṭṭhe sevitabboti upasaṅkamitabbo. Bhajitabboti allīyitabbo. Payirupāsitabboti santike nisīdanavasena punappunaṃ upāsitabbo. Sakkatvā garuṃ katvāti sakkārañceva garukārañca katvā. Hīno hoti sīlenātiādīsu upādāyupādāya hīnatā veditabbā. Tattha yo hi pañca sīlāni rakkhati, so dasa sīlāni rakkhantena na sevitabbo . Yo dasa sīlāni rakkhati, so catupārisuddhisīlaṃ rakkhantena na sevitabbo. Aññatra anuddayā aññatra anukampāti ṭhapetvā anuddayañca anukampañca. Attano atthāyeva hi evarūpo puggalo na sevitabbo, anuddayānukampāvasena pana taṃ upasaṅkamituṃ vaṭṭati.
සීලසාමඤ්‌ඤගතානං සතන්‌ති සීලෙන සමානභාවං ගතානං සන්‌තානං. සීලකථා ච නො භවිස්‌සතීති එවං සමානසීලානං අම්‌හාකං සීලමෙව ආරබ්‌භ කථා භවිස්‌සති. සා ච නො පවත්‌තිනී භවිස්‌සතීති සා ච අම්‌හාකං කථා දිවසම්‌පි කථෙන්‌තානං පවත්‌තිස්‌සති න පටිහඤ්‌ඤිස්‌සති. සා ච නො ඵාසු භවිස්‌සතීති සා ච දිවසම්‌පි පවත්‌තමානා සීලකථා අම්‌හාකං ඵාසුවිහාරො සුඛවිහාරො භවිස්‌සති. සමාධිපඤ්‌ඤාකථාසුපි එසෙව නයො.
Sīlasāmaññagatānaṃ satanti sīlena samānabhāvaṃ gatānaṃ santānaṃ. Sīlakathāca no bhavissatīti evaṃ samānasīlānaṃ amhākaṃ sīlameva ārabbha kathā bhavissati. Sā ca no pavattinī bhavissatīti sā ca amhākaṃ kathā divasampi kathentānaṃ pavattissati na paṭihaññissati. Sā ca no phāsu bhavissatīti sā ca divasampi pavattamānā sīlakathā amhākaṃ phāsuvihāro sukhavihāro bhavissati. Samādhipaññākathāsupi eseva nayo.
සීලක්‌ඛන්‌ධන්‌ති සීලරාසිං. තත්‌ථ තත්‌ථ පඤ්‌ඤාය අනුග්‌ගහෙස්‌සාමීති එත්‌ථ සීලස්‌ස අසප්‌පායෙ අනුපකාරධම්‌මෙ වජ්‌ජෙත්‌වා සප්‌පායෙ උපකාරධම්‌මෙ සෙවන්‌තො තස්‌මිං තස්‌මිං ඨානෙ සීලක්‌ඛන්‌ධං පඤ්‌ඤාය අනුග්‌ගණ්‌හාති නාම. සමාධිපඤ්‌ඤාක්‌ඛන්‌ධෙසුපි එසෙව නයො. නිහීයතීති අත්‌තනො හීනතරං පුග්‌ගලං සෙවන්‌තො ඛාරපරිස්‌සාවනෙ ආසිත්‌තඋදකං විය සතතං සමිතං හායති පරිහායති. තුල්‍යසෙවීති අත්‌තනා සමානසෙවී. සෙට්‌ඨමුපනමන්‌ති සෙට්‌ඨං පුග්‌ගලං ඔණමන්‌තො. උදෙති ඛිප්‌පන්‌ති ඛිප්‌පමෙව වඩ්‌ඪති. තස්‌මා අත්‌තනො උත්‌තරිං භජෙථාති යස්‌මා සෙට්‌ඨං පුග්‌ගලං උපනමන්‌තො උදෙති ඛිප්‌පං, තස්‌මා අත්‌තනො උත්‌තරිතරං විසිට්‌ඨතරං භජෙථ.
Sīlakkhandhanti sīlarāsiṃ. Tattha tattha paññāya anuggahessāmīti ettha sīlassa asappāye anupakāradhamme vajjetvā sappāye upakāradhamme sevanto tasmiṃ tasmiṃ ṭhāne sīlakkhandhaṃ paññāya anuggaṇhāti nāma. Samādhipaññākkhandhesupi eseva nayo. Nihīyatīti attano hīnataraṃ puggalaṃ sevanto khāraparissāvane āsittaudakaṃ viya satataṃ samitaṃ hāyati parihāyati. Tulyasevīti attanā samānasevī. Seṭṭhamupanamanti seṭṭhaṃ puggalaṃ oṇamanto. Udeti khippanti khippameva vaḍḍhati. Tasmā attano uttariṃ bhajethāti yasmā seṭṭhaṃ puggalaṃ upanamanto udeti khippaṃ, tasmā attano uttaritaraṃ visiṭṭhataraṃ bhajetha.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 6. සෙවිතබ්‌බසුත්‌තං • 6. Sevitabbasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6. සෙවිතබ්‌බසුත්‌තවණ්‌ණනා • 6. Sevitabbasuttavaṇṇanā
