| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4-7. ஸெய்யாஸுத்தாதி³வண்ணனா
4-7. Seyyāsuttādivaṇṇanā
246-9. சதுத்தே² பேதாதி பேச்சபா⁴வங் க³தா. தே பன யஸ்மா இத⁴ கதகாலகிரியா காலேன கதஜீவிதுச்சே²தா³ ஹொந்தி, தஸ்மா வுத்தங் ‘‘காலகதா வுச்சந்தீ’’தி, மதாதி அத்தோ². அத² வா பேச்சப⁴வங் க³தா, பேதூபபத்திவஸேன நிப்³ப³த்திங் உபக³தாதி அத்தோ². தேனாஹ ‘‘அத² வா பேதவிஸயே நிப்³ப³த்தா பேதா நாமா’’தி. ஏகேன பஸ்ஸேன ஸயிதுங் ந ஸக்கொந்தி து³க்கு²ப்பத்திதோ.
246-9. Catutthe petāti peccabhāvaṃ gatā. Te pana yasmā idha katakālakiriyā kālena katajīvitucchedā honti, tasmā vuttaṃ ‘‘kālakatā vuccantī’’ti, matāti attho. Atha vā peccabhavaṃ gatā, petūpapattivasena nibbattiṃ upagatāti attho. Tenāha ‘‘atha vā petavisaye nibbattā petā nāmā’’ti. Ekena passena sayituṃ na sakkonti dukkhuppattito.
தேஜுஸ்ஸத³த்தாதி இமினா ஸீஹஸ்ஸ அபீ⁴ருகபா⁴வங் த³ஸ்ஸேதி. பீ⁴ருகா ஸேஸமிகா³ அத்தனோ ஆஸயங் பவிஸித்வா ஸந்தாஸபுப்³ப³கங் யதா² ததா² ஸயந்தி, ஸீஹோ பன அபீ⁴ருகோ ஸபா⁴வதோ ஸதோகாரீ பி⁴க்கு² விய ஸதிங் உபட்ட²பெத்வாவ ஸயதி. தேனாஹ ‘‘த்³வே புரிமபாதே³’’திஆதி³. த³க்கி²ணே புரிமபாதே³ வாமஸ்ஸ புரிமபாத³ஸ்ஸ ட²பனவஸேன த்³வே புரிமபாதே³ ஏகஸ்மிங் டா²னே ட²பெத்வா. பச்சி²மபாதே³ வுத்தனயேனேவ இதா⁴பி ஏகஸ்மிங் டா²னே ட²பனங் வேதி³தப்³ப³ங், டி²தோகாஸஸல்லக்க²ணங் அபீ⁴ருகவஸேனேவ. ஸீஸங் பன உக்கி²பித்வாதிஆதி³னா வுத்தஸீஹகிரியா அனுத்ரஸ்தப்பபு³ஜ்ஜ²னா விய அபீ⁴ருபா⁴வஸித்³த⁴த⁴ம்மதாவஸேனேவாதி வேதி³தப்³பா³. ஸீஹவிஜம்ப⁴னங் அதிவேலங் ஏகாகாரே ட²பிதானங் ஸரீராவயவானங் க³மனாதி³கிரியாஸு யொக்³யபா⁴வாபாத³னத்த²ங். திக்க²த்துங் ஸீஹனாத³னத³னங் அப்பேஸக்க²மிக³ராஜேஹி பரித்தாஸபரிஹரணத்த²ங்.
Tejussadattāti iminā sīhassa abhīrukabhāvaṃ dasseti. Bhīrukā sesamigā attano āsayaṃ pavisitvā santāsapubbakaṃ yathā tathā sayanti, sīho pana abhīruko sabhāvato satokārī bhikkhu viya satiṃ upaṭṭhapetvāva sayati. Tenāha ‘‘dve purimapāde’’tiādi. Dakkhiṇe purimapāde vāmassa purimapādassa ṭhapanavasena dve purimapāde ekasmiṃ ṭhāne ṭhapetvā. Pacchimapāde vuttanayeneva idhāpi ekasmiṃ ṭhāne ṭhapanaṃ veditabbaṃ, ṭhitokāsasallakkhaṇaṃ abhīrukavaseneva. Sīsaṃ pana ukkhipitvātiādinā vuttasīhakiriyā anutrastappabujjhanā viya abhīrubhāvasiddhadhammatāvasenevāti veditabbā. Sīhavijambhanaṃ ativelaṃ ekākāre ṭhapitānaṃ sarīrāvayavānaṃ gamanādikiriyāsu yogyabhāvāpādanatthaṃ. Tikkhattuṃ sīhanādanadanaṃ appesakkhamigarājehi parittāsapariharaṇatthaṃ.
அயங் வுச்சதி, பி⁴க்க²வே, ததா²க³தஸெய்யாதி இமினா சதுத்த²ஜ்ஜா²னஸெய்யா ததா²க³தஸெய்யா நாமாதி த³ஸ்ஸேதி. ஸேதி அப்³யாவடபா⁴வேன பவத்ததி எத்தா²தி ஸெய்யா, சதுத்த²ஜ்ஜா²னமேவ ஸெய்யா சதுத்த²ஜ்ஜா²னஸெய்யா. கிங் பன தங் சதுத்த²ஜ்ஜா²னந்தி? ஆனாபானசதுத்த²ஜ்ஜா²னங். தத்த² ஹி ட²த்வா விபஸ்ஸனங் வட்³டெ⁴த்வா ப⁴க³வா அனுக்கமேன அக்³க³மக்³க³ங் அதி⁴க³ந்த்வா ததா²க³தோ ஜாதோதி. தயித³ங் பத³ட்டா²னங் நாம ந ஸெய்யா, ததா²பி யஸ்மா ‘‘சதுத்த²ஜ்ஜா²னஸமனந்தரா ப⁴க³வா பரினிப்³பா³யீ’’தி மஹாபரினிப்³பா³னே (தீ³॰ நி॰ 2.219) ஆக³தங், தஸ்மா லோகியசதுத்த²ஜ்ஜா²னஸமாபத்தி ஏவ ததா²க³தஸெய்யாதி கேசி. ஏவங் ஸதி பரினிப்³பா³னகாலிகாவ ததா²க³தஸெய்யா ஆபஜ்ஜதி, ந ச ப⁴க³வா லோகியசதுத்த²ஜ்ஜா²னஸமாபஜ்ஜனப³ஹுலோ விஹாஸி. அக்³க³ப²லவஸேன பவத்தங் பனெத்த² சதுத்த²ஜ்ஜா²னங் வேதி³தப்³ப³ங். தத்த² யதா² ஸத்தானங் நித்³தூ³பக³மலக்க²ணா ஸெய்யா ப⁴வங்க³சித்தவஸேன ஹோதி, ஸா பன நேஸங் பட²மஜாதிஸமன்வயா யேபு⁴ய்யவுத்திகா, ஏவங் ப⁴க³வதோ அரியஜாதிஸமன்வயங் யேபு⁴ய்யவுத்திகங் அக்³க³ப²லபூ⁴தங் சதுத்த²ஜ்ஜா²னங் ததா²க³தஸெய்யாதி வேதி³தப்³ப³ங். பஞ்சமாதீ³னி உத்தானத்தா²னி.
Ayaṃvuccati, bhikkhave, tathāgataseyyāti iminā catutthajjhānaseyyā tathāgataseyyā nāmāti dasseti. Seti abyāvaṭabhāvena pavattati etthāti seyyā, catutthajjhānameva seyyā catutthajjhānaseyyā. Kiṃ pana taṃ catutthajjhānanti? Ānāpānacatutthajjhānaṃ. Tattha hi ṭhatvā vipassanaṃ vaḍḍhetvā bhagavā anukkamena aggamaggaṃ adhigantvā tathāgato jātoti. Tayidaṃ padaṭṭhānaṃ nāma na seyyā, tathāpi yasmā ‘‘catutthajjhānasamanantarā bhagavā parinibbāyī’’ti mahāparinibbāne (dī. ni. 2.219) āgataṃ, tasmā lokiyacatutthajjhānasamāpatti eva tathāgataseyyāti keci. Evaṃ sati parinibbānakālikāva tathāgataseyyā āpajjati, na ca bhagavā lokiyacatutthajjhānasamāpajjanabahulo vihāsi. Aggaphalavasena pavattaṃ panettha catutthajjhānaṃ veditabbaṃ. Tattha yathā sattānaṃ niddūpagamalakkhaṇā seyyā bhavaṅgacittavasena hoti, sā pana nesaṃ paṭhamajātisamanvayā yebhuyyavuttikā, evaṃ bhagavato ariyajātisamanvayaṃ yebhuyyavuttikaṃ aggaphalabhūtaṃ catutthajjhānaṃ tathāgataseyyāti veditabbaṃ. Pañcamādīni uttānatthāni.
ஸெய்யாஸுத்தாதி³வண்ணனா நிட்டி²தா.
Seyyāsuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
4. ஸெய்யாஸுத்தங் • 4. Seyyāsuttaṃ
5. தூ²பாரஹஸுத்தங் • 5. Thūpārahasuttaṃ
6. பஞ்ஞாவுத்³தி⁴ஸுத்தங் • 6. Paññāvuddhisuttaṃ
7. ப³ஹுகாரஸுத்தங் • 7. Bahukārasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
4. ஸெய்யாஸுத்தவண்ணனா • 4. Seyyāsuttavaṇṇanā
5. தூ²பாரஹஸுத்தவண்ணனா • 5. Thūpārahasuttavaṇṇanā
