| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৪. সেয্যাসুত্তং
4. Seyyāsuttaṃ
২৪৬. ‘‘চতস্সো ইমা, ভিক্খৰে, সেয্যা। কতমা চতস্সো? পেতসেয্যা, কামভোগিসেয্যা , সীহসেয্যা, তথাগতসেয্যা। কতমা চ, ভিক্খৰে, পেতসেয্যা? যেভুয্যেন, ভিক্খৰে, পেতা উত্তানা সেন্তি; অযং ৰুচ্চতি, ভিক্খৰে, পেতসেয্যা।
246. ‘‘Catasso imā, bhikkhave, seyyā. Katamā catasso? Petaseyyā, kāmabhogiseyyā , sīhaseyyā, tathāgataseyyā. Katamā ca, bhikkhave, petaseyyā? Yebhuyyena, bhikkhave, petā uttānā senti; ayaṃ vuccati, bhikkhave, petaseyyā.
‘‘কতমা চ, ভিক্খৰে, কামভোগিসেয্যা? যেভুয্যেন, ভিক্খৰে, কামভোগী ৰামেন পস্সেন সেন্তি; অযং ৰুচ্চতি, ভিক্খৰে, কামভোগিসেয্যা।
‘‘Katamā ca, bhikkhave, kāmabhogiseyyā? Yebhuyyena, bhikkhave, kāmabhogī vāmena passena senti; ayaṃ vuccati, bhikkhave, kāmabhogiseyyā.
‘‘কতমা চ, ভিক্খৰে, সীহসেয্যা? সীহো , ভিক্খৰে, মিগরাজা দক্খিণেন পস্সেন সেয্যং কপ্পেতি, পাদে পাদং অচ্চাধায, অন্তরসত্থিম্হি নঙ্গুট্ঠং অনুপক্খিপিত্ৰা। সো পটিবুজ্ঝিত্ৰা পুরিমং কাযং অব্ভুন্নামেত্ৰা পচ্ছিমং কাযং অনুৰিলোকেতি। সচে, ভিক্খৰে, সীহো মিগরাজা কিঞ্চি পস্সতি কাযস্স ৰিক্খিত্তং ৰা ৰিসটং ৰা, তেন, ভিক্খৰে, সীহো মিগরাজা অনত্তমনো হোতি। সচে পন, ভিক্খৰে, সীহো মিগরাজা ন কিঞ্চি পস্সতি কাযস্স ৰিক্খিত্তং ৰা ৰিসটং ৰা, তেন , ভিক্খৰে, সীহো মিগরাজা অত্তমনো হোতি। অযং ৰুচ্চতি, ভিক্খৰে, সীহসেয্যা।
‘‘Katamā ca, bhikkhave, sīhaseyyā? Sīho , bhikkhave, migarājā dakkhiṇena passena seyyaṃ kappeti, pāde pādaṃ accādhāya, antarasatthimhi naṅguṭṭhaṃ anupakkhipitvā. So paṭibujjhitvā purimaṃ kāyaṃ abbhunnāmetvā pacchimaṃ kāyaṃ anuviloketi. Sace, bhikkhave, sīho migarājā kiñci passati kāyassa vikkhittaṃ vā visaṭaṃ vā, tena, bhikkhave, sīho migarājā anattamano hoti. Sace pana, bhikkhave, sīho migarājā na kiñci passati kāyassa vikkhittaṃ vā visaṭaṃ vā, tena , bhikkhave, sīho migarājā attamano hoti. Ayaṃ vuccati, bhikkhave, sīhaseyyā.
‘‘কতমা চ, ভিক্খৰে, তথাগতসেয্যা? ইধ, ভিক্খৰে, তথাগতো ৰিৰিচ্চেৰ কামেহি…পে॰… চতুত্থং ঝানং উপসম্পজ্জ ৰিহরতি। অযং ৰুচ্চতি, ভিক্খৰে, তথাগতসেয্যা। ইমা খো, ভিক্খৰে, চতস্সো সেয্যা’’তি। চতুত্থং।
‘‘Katamā ca, bhikkhave, tathāgataseyyā? Idha, bhikkhave, tathāgato vivicceva kāmehi…pe… catutthaṃ jhānaṃ upasampajja viharati. Ayaṃ vuccati, bhikkhave, tathāgataseyyā. Imā kho, bhikkhave, catasso seyyā’’ti. Catutthaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৪. সেয্যাসুত্তৰণ্ণনা • 4. Seyyāsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৪-৭. সেয্যাসুত্তাদিৰণ্ণনা • 4-7. Seyyāsuttādivaṇṇanā
