| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៤. សេយ្យាសុត្តំ
4. Seyyāsuttaṃ
២៤៦. ‘‘ចតស្សោ ឥមា, ភិក្ខវេ, សេយ្យា។ កតមា ចតស្សោ? បេតសេយ្យា, កាមភោគិសេយ្យា , សីហសេយ្យា, តថាគតសេយ្យា។ កតមា ច, ភិក្ខវេ, បេតសេយ្យា? យេភុយ្យេន, ភិក្ខវេ, បេតា ឧត្តានា សេន្តិ; អយំ វុច្ចតិ, ភិក្ខវេ, បេតសេយ្យា។
246. ‘‘Catasso imā, bhikkhave, seyyā. Katamā catasso? Petaseyyā, kāmabhogiseyyā , sīhaseyyā, tathāgataseyyā. Katamā ca, bhikkhave, petaseyyā? Yebhuyyena, bhikkhave, petā uttānā senti; ayaṃ vuccati, bhikkhave, petaseyyā.
‘‘កតមា ច, ភិក្ខវេ, កាមភោគិសេយ្យា? យេភុយ្យេន, ភិក្ខវេ, កាមភោគី វាមេន បស្សេន សេន្តិ; អយំ វុច្ចតិ, ភិក្ខវេ, កាមភោគិសេយ្យា។
‘‘Katamā ca, bhikkhave, kāmabhogiseyyā? Yebhuyyena, bhikkhave, kāmabhogī vāmena passena senti; ayaṃ vuccati, bhikkhave, kāmabhogiseyyā.
‘‘កតមា ច, ភិក្ខវេ, សីហសេយ្យា? សីហោ , ភិក្ខវេ, មិគរាជា ទក្ខិណេន បស្សេន សេយ្យំ កប្បេតិ, បាទេ បាទំ អច្ចាធាយ, អន្តរសត្ថិម្ហិ នង្គុដ្ឋំ អនុបក្ខិបិត្វា។ សោ បដិពុជ្ឈិត្វា បុរិមំ កាយំ អព្ភុន្នាមេត្វា បច្ឆិមំ កាយំ អនុវិលោកេតិ។ សចេ, ភិក្ខវេ, សីហោ មិគរាជា កិញ្ចិ បស្សតិ កាយស្ស វិក្ខិត្តំ វា វិសដំ វា, តេន, ភិក្ខវេ, សីហោ មិគរាជា អនត្តមនោ ហោតិ។ សចេ បន, ភិក្ខវេ, សីហោ មិគរាជា ន កិញ្ចិ បស្សតិ កាយស្ស វិក្ខិត្តំ វា វិសដំ វា, តេន , ភិក្ខវេ, សីហោ មិគរាជា អត្តមនោ ហោតិ។ អយំ វុច្ចតិ, ភិក្ខវេ, សីហសេយ្យា។
‘‘Katamā ca, bhikkhave, sīhaseyyā? Sīho , bhikkhave, migarājā dakkhiṇena passena seyyaṃ kappeti, pāde pādaṃ accādhāya, antarasatthimhi naṅguṭṭhaṃ anupakkhipitvā. So paṭibujjhitvā purimaṃ kāyaṃ abbhunnāmetvā pacchimaṃ kāyaṃ anuviloketi. Sace, bhikkhave, sīho migarājā kiñci passati kāyassa vikkhittaṃ vā visaṭaṃ vā, tena, bhikkhave, sīho migarājā anattamano hoti. Sace pana, bhikkhave, sīho migarājā na kiñci passati kāyassa vikkhittaṃ vā visaṭaṃ vā, tena , bhikkhave, sīho migarājā attamano hoti. Ayaṃ vuccati, bhikkhave, sīhaseyyā.
‘‘កតមា ច, ភិក្ខវេ, តថាគតសេយ្យា? ឥធ, ភិក្ខវេ, តថាគតោ វិវិច្ចេវ កាមេហិ…បេ.… ចតុត្ថំ ឈានំ ឧបសម្បជ្ជ វិហរតិ។ អយំ វុច្ចតិ, ភិក្ខវេ, តថាគតសេយ្យា។ ឥមា ខោ, ភិក្ខវេ, ចតស្សោ សេយ្យា’’តិ។ ចតុត្ថំ។
‘‘Katamā ca, bhikkhave, tathāgataseyyā? Idha, bhikkhave, tathāgato vivicceva kāmehi…pe… catutthaṃ jhānaṃ upasampajja viharati. Ayaṃ vuccati, bhikkhave, tathāgataseyyā. Imā kho, bhikkhave, catasso seyyā’’ti. Catutthaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៤. សេយ្យាសុត្តវណ្ណនា • 4. Seyyāsuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៤-៧. សេយ្យាសុត្តាទិវណ្ណនា • 4-7. Seyyāsuttādivaṇṇanā
