| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. ஸெய்யாஸுத்தவண்ணனா
4. Seyyāsuttavaṇṇanā
246. சதுத்தே² பேதாதி காலகதா வுச்சந்தி. உத்தானா ஸெந்தீதி தே யேபு⁴ய்யேன உத்தானகாவ ஸயந்தி. அத² வா பெத்திவிஸயே நிப்³ப³த்தா பேதா நாம, தே அப்பமங்ஸலோஹிதத்தா அட்டி²ஸங்கா⁴தஜடிதா ஏகேன பஸ்ஸேன ஸயிதுங் ந ஸக்கொந்தி, உத்தானாவ ஸெந்தி. அனத்தமனோ ஹோதீதி தேஜுஸ்ஸத³த்தா ஸீஹோ மிக³ராஜா த்³வே புரிமபாதே³ ஏகஸ்மிங், பச்சி²மபாதே³ ஏகஸ்மிங் டா²னே ட²பெத்வா நங்கு³ட்ட²ங் அந்தரஸத்தி²ம்ஹி பக்கி²பித்வா புரிமபாத³பச்சி²மபாத³னங்கு³ட்டா²னங் டி²தோகாஸங் ஸல்லக்கெ²த்வா த்³வின்னங் புரிமபாதா³னங் மத்த²கே ஸீஸங் ட²பெத்வா ஸயதி. தி³வஸம்பி ஸயித்வா பபு³ஜ்ஜ²மானோ ந உத்தஸந்தோ பபு³ஜ்ஜ²தி, ஸீஸங் பன உக்கி²பித்வா புரிமபாதா³தீ³னங் டி²தோகாஸங் ஸல்லக்கெ²த்வா ஸசே கிஞ்சி டா²னங் விஜஹித்வா டி²தங் ஹோதி, ‘‘நயித³ங் துய்ஹங் ஜாதியா, ந ஸூரபா⁴வஸ்ஸ அனுரூப’’ந்தி அனத்தமனோ ஹுத்வா தத்தே²வ ஸயதி, ந கோ³சராய பக்கமதி. இத³ங் ஸந்தா⁴ய வுத்தங் – ‘‘அனத்தமனோ ஹோதீ’’தி. அவிஜஹித்வா டி²தே பன ‘‘துய்ஹங் ஜாதியா ச ஸூரபா⁴வஸ்ஸ ச அனுரூபமித³’’ந்தி ஹட்ட²துட்டோ² உட்டா²ய ஸீஹவிஜம்ப⁴னங் விஜம்பி⁴த்வா கேஸரபா⁴ரங் விது⁴னித்வா திக்க²த்துங் ஸீஹனாத³ங் நதி³த்வா கோ³சராய பக்கமதி. தேன வுத்தங் – ‘‘அத்தமனோ ஹோதீ’’தி.
246. Catutthe petāti kālakatā vuccanti. Uttānā sentīti te yebhuyyena uttānakāva sayanti. Atha vā pettivisaye nibbattā petā nāma, te appamaṃsalohitattā aṭṭhisaṅghātajaṭitā ekena passena sayituṃ na sakkonti, uttānāva senti. Anattamano hotīti tejussadattā sīho migarājā dve purimapāde ekasmiṃ, pacchimapāde ekasmiṃ ṭhāne ṭhapetvā naṅguṭṭhaṃ antarasatthimhi pakkhipitvā purimapādapacchimapādanaṅguṭṭhānaṃ ṭhitokāsaṃ sallakkhetvā dvinnaṃ purimapādānaṃ matthake sīsaṃ ṭhapetvā sayati. Divasampi sayitvā pabujjhamāno na uttasanto pabujjhati, sīsaṃ pana ukkhipitvā purimapādādīnaṃ ṭhitokāsaṃ sallakkhetvā sace kiñci ṭhānaṃ vijahitvā ṭhitaṃ hoti, ‘‘nayidaṃ tuyhaṃ jātiyā, na sūrabhāvassa anurūpa’’nti anattamano hutvā tattheva sayati, na gocarāya pakkamati. Idaṃ sandhāya vuttaṃ – ‘‘anattamano hotī’’ti. Avijahitvā ṭhite pana ‘‘tuyhaṃ jātiyā ca sūrabhāvassa ca anurūpamida’’nti haṭṭhatuṭṭho uṭṭhāya sīhavijambhanaṃ vijambhitvā kesarabhāraṃ vidhunitvā tikkhattuṃ sīhanādaṃ naditvā gocarāya pakkamati. Tena vuttaṃ – ‘‘attamano hotī’’ti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. ஸெய்யாஸுத்தங் • 4. Seyyāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4-7. ஸெய்யாஸுத்தாதி³வண்ணனா • 4-7. Seyyāsuttādivaṇṇanā
