| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೧೮. ಸಿದ್ಧತ್ಥಬುದ್ಧವಂಸೋ
18. Siddhatthabuddhavaṃso
೧.
1.
ಧಮ್ಮದಸ್ಸಿಸ್ಸ ಅಪರೇನ, ಸಿದ್ಧತ್ಥೋ ನಾಮ ನಾಯಕೋ।
Dhammadassissa aparena, siddhattho nāma nāyako;
ನಿಹನಿತ್ವಾ ತಮಂ ಸಬ್ಬಂ, ಸೂರಿಯೋ ಅಬ್ಭುಗ್ಗತೋ ಯಥಾ॥
Nihanitvā tamaṃ sabbaṃ, sūriyo abbhuggato yathā.
೨.
2.
ಸೋಪಿ ಪತ್ವಾನ ಸಮ್ಬೋಧಿಂ, ಸನ್ತಾರೇನ್ತೋ ಸದೇವಕಂ।
Sopi patvāna sambodhiṃ, santārento sadevakaṃ;
ಅಭಿವಸ್ಸಿ ಧಮ್ಮಮೇಘೇನ, ನಿಬ್ಬಾಪೇನ್ತೋ ಸದೇವಕಂ॥
Abhivassi dhammameghena, nibbāpento sadevakaṃ.
೩.
3.
ತಸ್ಸಾಪಿ ಅತುಲತೇಜಸ್ಸ, ಅಹೇಸುಂ ಅಭಿಸಮಯಾ ತಯೋ।
Tassāpi atulatejassa, ahesuṃ abhisamayā tayo;
ಕೋಟಿಸತಸಹಸ್ಸಾನಂ, ಪಠಮಾಭಿಸಮಯೋ ಅಹು॥
Koṭisatasahassānaṃ, paṭhamābhisamayo ahu.
೪.
4.
ತದಾ ನವುತಿಕೋಟೀನಂ, ದುತಿಯಾಭಿಸಮಯೋ ಅಹು॥
Tadā navutikoṭīnaṃ, dutiyābhisamayo ahu.
೫.
5.
ಯದಾ ಬುದ್ಧೋ ಧಮ್ಮಂ ದೇಸೇಸಿ, ವೇಭಾರೇ ಸೋ ಪುರುತ್ತಮೇ।
Yadā buddho dhammaṃ desesi, vebhāre so puruttame;
ತದಾ ನವುತಿಕೋಟೀನಂ, ತತಿಯಾಭಿಸಮಯೋ ಅಹು॥
Tadā navutikoṭīnaṃ, tatiyābhisamayo ahu.
೬.
6.
ಸನ್ನಿಪಾತಾ ತಯೋ ಆಸುಂ, ತಸ್ಮಿಮ್ಪಿ ದ್ವಿಪದುತ್ತಮೇ।
Sannipātā tayo āsuṃ, tasmimpi dvipaduttame;
ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ॥
Khīṇāsavānaṃ vimalānaṃ, santacittāna tādinaṃ.
೭.
7.
ಏತೇ ಆಸುಂ ತಯೋ ಠಾನಾ, ವಿಮಲಾನಂ ಸಮಾಗಮೇ॥
Ete āsuṃ tayo ṭhānā, vimalānaṃ samāgame.
೮.
8.
ಅಹಂ ತೇನ ಸಮಯೇನ, ಮಙ್ಗಲೋ ನಾಮ ತಾಪಸೋ।
Ahaṃ tena samayena, maṅgalo nāma tāpaso;
ಉಗ್ಗತೇಜೋ ದುಪ್ಪಸಹೋ, ಅಭಿಞ್ಞಾಬಲಸಮಾಹಿತೋ॥
Uggatejo duppasaho, abhiññābalasamāhito.
೯.
9.
ಪಟಿಗ್ಗಹೇತ್ವಾ ಸಮ್ಬುದ್ಧೋ, ಇದಂ ವಚನಮಬ್ರವಿ॥
Paṭiggahetvā sambuddho, idaṃ vacanamabravi.
೧೦.
10.
‘‘ಪಸ್ಸಥ ಇಮಂ ತಾಪಸಂ, ಜಟಿಲಂ ಉಗ್ಗತಾಪನಂ।
‘‘Passatha imaṃ tāpasaṃ, jaṭilaṃ uggatāpanaṃ;
ಚತುನ್ನವುತಿತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥
Catunnavutito kappe, ayaṃ buddho bhavissati.
೧೧.
11.
‘‘ಪಧಾನಂ ಪದಹಿತ್ವಾನ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥
‘‘Padhānaṃ padahitvāna…pe… hessāma sammukhā imaṃ’’.
೧೨.
12.
ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ।
Tassāpi vacanaṃ sutvā, bhiyyo cittaṃ pasādayiṃ;
ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ॥
Uttariṃ vatamadhiṭṭhāsiṃ, dasapāramipūriyā.
೧೩.
13.
ವೇಭಾರಂ ನಾಮ ನಗರಂ, ಉದೇನೋ ನಾಮ ಖತ್ತಿಯೋ।
Vebhāraṃ nāma nagaraṃ, udeno nāma khattiyo;
ಸುಫಸ್ಸಾ ನಾಮ ಜನಿಕಾ, ಸಿದ್ಧತ್ಥಸ್ಸ ಮಹೇಸಿನೋ॥
Suphassā nāma janikā, siddhatthassa mahesino.
೧೪.
14.
ದಸವಸ್ಸಸಹಸ್ಸಾನಿ , ಅಗಾರಂ ಅಜ್ಝ ಸೋ ವಸಿ।
Dasavassasahassāni , agāraṃ ajjha so vasi;
ಕೋಕಾಸುಪ್ಪಲಕೋಕನದಾ, ತಯೋ ಪಾಸಾದಮುತ್ತಮಾ॥
Kokāsuppalakokanadā, tayo pāsādamuttamā.
೧೫.
15.
ತಿಸೋಳಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ।
Tisoḷasasahassāni, nāriyo samalaṅkatā;
ಸೋಮನಸ್ಸಾ ನಾಮ ಸಾ ನಾರೀ, ಅನುಪಮೋ ನಾಮ ಅತ್ರಜೋ॥
Somanassā nāma sā nārī, anupamo nāma atrajo.
೧೬.
16.
ನಿಮಿತ್ತೇ ಚತುರೋ ದಿಸ್ವಾ, ಸಿವಿಕಾಯಾಭಿನಿಕ್ಖಮಿ।
Nimitte caturo disvā, sivikāyābhinikkhami;
ಅನೂನದಸಮಾಸಾನಿ, ಪಧಾನಂ ಪದಹೀ ಜಿನೋ॥
Anūnadasamāsāni, padhānaṃ padahī jino.
೧೭.
17.
ಬ್ರಹ್ಮುನಾ ಯಾಚಿತೋ ಸನ್ತೋ, ಸಿದ್ಧತ್ಥೋ ಲೋಕನಾಯಕೋ।
Brahmunā yācito santo, siddhattho lokanāyako;
ವತ್ತಿ ಚಕ್ಕಂ ಮಹಾವೀರೋ, ಮಿಗದಾಯೇ ನರುತ್ತಮೋ॥
Vatti cakkaṃ mahāvīro, migadāye naruttamo.
೧೮.
18.
ಸಮ್ಬಲೋ ಚ ಸುಮಿತ್ತೋ ಚ, ಅಹೇಸುಂ ಅಗ್ಗಸಾವಕಾ।
Sambalo ca sumitto ca, ahesuṃ aggasāvakā;
ರೇವತೋ ನಾಮುಪಟ್ಠಾಕೋ, ಸಿದ್ಧತ್ಥಸ್ಸ ಮಹೇಸಿನೋ॥
Revato nāmupaṭṭhāko, siddhatthassa mahesino.
೧೯.
19.
ಸೀವಲಾ ಚ ಸುರಾಮಾ ಚ, ಅಹೇಸುಂ ಅಗ್ಗಸಾವಿಕಾ।
Sīvalā ca surāmā ca, ahesuṃ aggasāvikā;
ಬೋಧಿ ತಸ್ಸ ಭಗವತೋ, ಕಣಿಕಾರೋತಿ ವುಚ್ಚತಿ॥
Bodhi tassa bhagavato, kaṇikāroti vuccati.
೨೦.
20.
ಸುಪ್ಪಿಯೋ ಚ ಸಮುದ್ದೋ ಚ, ಅಹೇಸುಂ ಅಗ್ಗುಪಟ್ಠಕಾ।
Suppiyo ca samuddo ca, ahesuṃ aggupaṭṭhakā;
ರಮ್ಮಾ ಚೇವ ಸುರಮ್ಮಾ ಚ, ಅಹೇಸುಂ ಅಗ್ಗುಪಟ್ಠಿಕಾ॥
Rammā ceva surammā ca, ahesuṃ aggupaṭṭhikā.
೨೧.
21.
ಸೋ ಬುದ್ಧೋ ಸಟ್ಠಿರತನಂ, ಅಹೋಸಿ ನಭಮುಗ್ಗತೋ।
So buddho saṭṭhiratanaṃ, ahosi nabhamuggato;
ಕಞ್ಚನಗ್ಘಿಯಸಙ್ಕಾಸೋ, ದಸಸಹಸ್ಸೀ ವಿರೋಚತಿ॥
Kañcanagghiyasaṅkāso, dasasahassī virocati.
೨೨.
22.
ಸೋಪಿ ಬುದ್ಧೋ ಅಸಮಸಮೋ, ಅತುಲೋ ಅಪ್ಪಟಿಪುಗ್ಗಲೋ।
Sopi buddho asamasamo, atulo appaṭipuggalo;
ವಸ್ಸಸತಸಹಸ್ಸಾನಿ, ಲೋಕೇ ಅಟ್ಠಾಸಿ ಚಕ್ಖುಮಾ॥
Vassasatasahassāni, loke aṭṭhāsi cakkhumā.
೨೩.
23.
ವಿಪುಲಂ ಪಭಂ ದಸ್ಸಯಿತ್ವಾ, ಪುಪ್ಫಾಪೇತ್ವಾನ ಸಾವಕೇ।
Vipulaṃ pabhaṃ dassayitvā, pupphāpetvāna sāvake;
ವಿಲಾಸೇತ್ವಾ ಸಮಾಪತ್ಯಾ, ನಿಬ್ಬುತೋ ಸೋ ಸಸಾವಕೋ॥
Vilāsetvā samāpatyā, nibbuto so sasāvako.
೨೪.
24.
ಸಿದ್ಧತ್ಥೋ ಮುನಿವರೋ ಬುದ್ಧೋ, ಅನೋಮಾರಾಮಮ್ಹಿ ನಿಬ್ಬುತೋ।
Siddhattho munivaro buddho, anomārāmamhi nibbuto;
ತತ್ಥೇವಸ್ಸ ಥೂಪವರೋ, ಚತುಯೋಜನಮುಗ್ಗತೋತಿ॥
Tatthevassa thūpavaro, catuyojanamuggatoti.
ಸಿದ್ಧತ್ಥಸ್ಸ ಭಗವತೋ ವಂಸೋ ಸೋಳಸಮೋ।
Siddhatthassa bhagavato vaṃso soḷasamo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೧೮. ಸಿದ್ಧತ್ಥಬುದ್ಧವಂಸವಣ್ಣನಾ • 18. Siddhatthabuddhavaṃsavaṇṇanā
