| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[188] 8. сийхагод̇т̇уж̇аад̇агаван̣н̣анаа
[188] 8. Sīhakotthujātakavaṇṇanā
сийхан̇г̇улий сийханакод̇и ид̣̇ам̣ сад̇т̇аа ж̇зд̇аванз вихаранд̇о гогаалигам̣ аараб̣бха гат̇зси. згад̣̇ивасам̣ гира гогаалиго ан̃н̃зсу б̣ахуссуд̇зсу д̇хаммам̣ гат̇знд̇зсу саяамби гат̇зд̇угаамо ахосийд̇и саб̣б̣ам̣ хздтаа вуд̇д̇анаязнзва вид̇т̇аарзд̇аб̣б̣ам̣. д̇ам̣ бана бавад̇д̇им̣ суд̇ваа сад̇т̇аа ‘‘на, бхигкавз, гогаалиго ид̣̇аанзва ад̇д̇ано сад̣̇д̣̇зна баагадо ж̇аад̇о, буб̣б̣зби баагадо ахосий’’д̇и вад̇ваа ад̇ийд̇ам̣ аахари.
Sīhaṅgulī sīhanakhoti idaṃ satthā jetavane viharanto kokālikaṃ ārabbha kathesi. Ekadivasaṃ kira kokāliko aññesu bahussutesu dhammaṃ kathentesu sayampi kathetukāmo ahosīti sabbaṃ heṭṭhā vuttanayeneva vitthāretabbaṃ. Taṃ pana pavattiṃ sutvā satthā ‘‘na, bhikkhave, kokāliko idāneva attano saddena pākaṭo jāto, pubbepi pākaṭo ahosī’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о химаванд̇абад̣̇зсз сийхо худ̇ваа згааяа син̇г̇аалияаа сад̣̇д̇хим̣ сам̣ваасаманвааяа буд̇д̇ам̣ бадилабхи. со ан̇г̇улийхи накзхи гзсарзна ван̣н̣зна сан̣таанзнаад̇и имзхи аагаарзхи бид̇усад̣̇исо ахоси, сад̣̇д̣̇зна маад̇усад̣̇исо. ат̇згад̣̇ивасам̣ д̣̇звз вассид̇ваа виг̇ад̇з сийхзсу над̣̇ид̇ваа сийхагийл̣ам̣ гийл̣анд̇зсу соби д̇зсам̣ анд̇арз над̣̇ид̇угаамо худ̇ваа син̇г̇аалигам̣ наад̣̇ам̣ над̣̇и. ат̇асса сад̣̇д̣̇ам̣ суд̇ваа сийхаа д̇ун̣хий ахзсум̣. д̇асса сад̣̇д̣̇ам̣ суд̇ваа абаро б̣од̇хисад̇д̇асса саж̇аад̇ибуд̇д̇о ‘‘д̇аад̇а, аяам̣ сийхо ван̣н̣аад̣̇ийхи амхзхи самаано, сад̣̇д̣̇о банасса ан̃н̃аад̣̇исо, го наамзсо’’д̇и бужчанд̇о батамам̣ г̇аат̇амааха –
Atīte bārāṇasiyaṃ brahmadatte rajjaṃ kārente bodhisatto himavantapadese sīho hutvā ekāya siṅgāliyā saddhiṃ saṃvāsamanvāya puttaṃ paṭilabhi. So aṅgulīhi nakhehi kesarena vaṇṇena saṇṭhānenāti imehi ākārehi pitusadiso ahosi, saddena mātusadiso. Athekadivasaṃ deve vassitvā vigate sīhesu naditvā sīhakīḷaṃ kīḷantesu sopi tesaṃ antare naditukāmo hutvā siṅgālikaṃ nādaṃ nadi. Athassa saddaṃ sutvā sīhā tuṇhī ahesuṃ. Tassa saddaṃ sutvā aparo bodhisattassa sajātiputto ‘‘tāta, ayaṃ sīho vaṇṇādīhi amhehi samāno, saddo panassa aññādiso, ko nāmeso’’ti pucchanto paṭhamaṃ gāthamāha –
75.
75.
‘‘сийхан̇г̇улий сийханако, сийхабаад̣̇абад̇идтид̇о;
‘‘Sīhaṅgulī sīhanakho, sīhapādapatiṭṭhito;
со сийхо сийхасан̇гхамхи, зго над̣̇ад̇и ан̃н̃ат̇аа’’д̇и.
So sīho sīhasaṅghamhi, eko nadati aññathā’’ti.
д̇ад̇т̇а сийхабаад̣̇абад̇идтид̇од̇и сийхабаад̣̇зхзва бад̇идтид̇о. зго над̣̇ад̇и ан̃н̃ат̇аад̇и згова авасзсасийхзхи асад̣̇исзна син̇г̇ааласад̣̇д̣̇зна над̣̇анд̇о ан̃н̃ат̇аа над̣̇ад̇и.
Tattha sīhapādapatiṭṭhitoti sīhapādeheva patiṭṭhito. Eko nadati aññathāti ekova avasesasīhehi asadisena siṅgālasaddena nadanto aññathā nadati.
д̇ам̣ суд̇ваа б̣од̇хисад̇д̇о ‘‘д̇аад̇а, зса д̇ава бхаад̇аа син̇г̇аалияаа буд̇д̇о, руубзна маяаа сад̣̇исо, сад̣̇д̣̇зна маад̇араа сад̣̇исо’’д̇и вад̇ваа син̇г̇аалибуд̇д̇ам̣ ааманд̇зд̇ваа ‘‘д̇аад̇а, д̇вам̣ ид̇о бадтааяа ид̇ха васанд̇о аббасад̣̇д̣̇о васа, сажз буна над̣̇иссаси, син̇г̇аалабхаавам̣ д̇з ж̇ааниссанд̇ий’’д̇и овад̣̇анд̇о д̣̇уд̇ияам̣ г̇аат̇амааха –
Taṃ sutvā bodhisatto ‘‘tāta, esa tava bhātā siṅgāliyā putto, rūpena mayā sadiso, saddena mātarā sadiso’’ti vatvā siṅgāliputtaṃ āmantetvā ‘‘tāta, tvaṃ ito paṭṭhāya idha vasanto appasaddo vasa, sace puna nadissasi, siṅgālabhāvaṃ te jānissantī’’ti ovadanto dutiyaṃ gāthamāha –
76.
76.
‘‘маа д̇вам̣ над̣̇и рааж̇абуд̇д̇а, аббасад̣̇д̣̇о ванз васа;
‘‘Mā tvaṃ nadi rājaputta, appasaddo vane vasa;
сарзна ко д̇ам̣ ж̇аанзяяум̣, на хи д̇з бзд̇д̇иго саро’’д̇и.
Sarena kho taṃ jāneyyuṃ, na hi te pettiko saro’’ti.
д̇ад̇т̇а рааж̇абуд̇д̇аад̇и сийхасса миг̇аран̃н̃о буд̇д̇а. иман̃жа бана оваад̣̇ам̣ суд̇ваа буна со над̣̇ид̇ум̣ наама на уссахи.
Tattha rājaputtāti sīhassa migarañño putta. Imañca pana ovādaṃ sutvā puna so nadituṃ nāma na ussahi.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа син̇г̇аало гогаалиго ахоси, саж̇аад̇ибуд̇д̇о раахуло, миг̇арааж̇аа бана ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi – ‘‘tadā siṅgālo kokāliko ahosi, sajātiputto rāhulo, migarājā pana ahameva ahosi’’nti.
сийхагод̇т̇уж̇аад̇агаван̣н̣анаа адтамаа.
Sīhakotthujātakavaṇṇanā aṭṭhamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 188. сийхагод̇т̇уж̇аад̇агам̣ • 188. Sīhakotthujātakaṃ
