| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. ஸீஹனாத³ஸுத்தவண்ணனா
10. Sīhanādasuttavaṇṇanā
64. த³ஸமே ததா²க³தப³லானீதி அஞ்ஞேஹி அஸாதா⁴ரணானி ததா²க³தஸ்ஸேவ ப³லானி. நனு சேதானி ஸாவகானம்பி ஏகச்சானி உப்பஜ்ஜந்தீதி? காமங் உப்பஜ்ஜந்தி, யாதி³ஸானி பன பு³த்³தா⁴னங் டா²னாட்டா²னஞாணாதீ³னி, ந தாதி³ஸானி தத³ஞ்ஞேஸங் கதா³சி உப்பஜ்ஜந்தீதி அஞ்ஞேஹி அஸாதா⁴ரணானி. இமமேவ ஹி யதா²வுத்தங் லேஸங் அபெக்கி²த்வா ஸாதா⁴ரணபா⁴வதோ ஆஸயானுஸயஞாணாதீ³ஸு ஏவ அஸாதா⁴ரணஸமஞ்ஞா நிருள்ஹா. யதா² புப்³ப³பு³த்³தா⁴னங் ப³லானி புஞ்ஞஸ்ஸ ஸம்பத்தியா ஆக³தானி, ததா² ஆக³தப³லானீதி வா ததா²க³தப³லானி. உஸப⁴ஸ்ஸ இத³ங் ஆஸப⁴ங், ஸெட்ட²ட்டா²னங். பமுக²னாத³ந்தி ஸெட்ட²னாத³ங் . படிவேத⁴ஞாணஞ்சேவ தே³ஸனாஞாணஞ்சாதி எத்த² பஞ்ஞாய பபா⁴விதங் அத்தனோ அரியப²லாவஹங் படிவேத⁴ஞாணங். கருணாய பபா⁴விதங் ஸாவகானங் அரியப²லாவஹங் தே³ஸனாஞாணங். தத்த² படிவேத⁴ஞாணங் உப்பஜ்ஜமானங் உப்பன்னந்தி து³வித⁴ங். தஞ்ஹி அபி⁴னிக்க²மனதோ யாவ அரஹத்தமக்³கா³ உப்பஜ்ஜமானங், ப²லக்க²ணே உப்பன்னங் நாம. துஸிதப⁴வனதோ யாவ மஹாபோ³தி⁴பல்லங்கே அரஹத்தமக்³கா³ உப்பஜ்ஜமானங், ப²லக்க²ணே உப்பன்னங் நாம. தீ³பங்கரதோ பட்டா²ய யாவ அரஹத்தமக்³கா³ உப்பஜ்ஜமானங், ப²லக்க²ணே உப்பன்னங் நாம. தே³ஸனாஞாணம்பி பவத்தமானங் பவத்தந்தி து³வித⁴ங். தஞ்ஹி யாவ அஞ்ஞாதகொண்ட³ஞ்ஞஸ்ஸ ஸோதாபத்திமக்³கா³ பவத்தமானங், ப²லக்க²ணே பவத்தங் நாம. தேஸு படிவேத⁴ஞாணங் லோகுத்தரங், தே³ஸனாஞாணங் லோகியங். உப⁴யம்பி பனேதங் அஞ்ஞேஹி அஸாதா⁴ரணங், பு³த்³தா⁴னஞ்ஞேவ ஓரஸஞாணங்.
64. Dasame tathāgatabalānīti aññehi asādhāraṇāni tathāgatasseva balāni. Nanu cetāni sāvakānampi ekaccāni uppajjantīti? Kāmaṃ uppajjanti, yādisāni pana buddhānaṃ ṭhānāṭṭhānañāṇādīni, na tādisāni tadaññesaṃ kadāci uppajjantīti aññehi asādhāraṇāni. Imameva hi yathāvuttaṃ lesaṃ apekkhitvā sādhāraṇabhāvato āsayānusayañāṇādīsu eva asādhāraṇasamaññā niruḷhā. Yathā pubbabuddhānaṃ balāni puññassa sampattiyā āgatāni, tathā āgatabalānīti vā tathāgatabalāni. Usabhassa idaṃ āsabhaṃ, seṭṭhaṭṭhānaṃ. Pamukhanādanti seṭṭhanādaṃ . Paṭivedhañāṇañceva desanāñāṇañcāti ettha paññāya pabhāvitaṃ attano ariyaphalāvahaṃ paṭivedhañāṇaṃ. Karuṇāya pabhāvitaṃ sāvakānaṃ ariyaphalāvahaṃ desanāñāṇaṃ. Tattha paṭivedhañāṇaṃ uppajjamānaṃ uppannanti duvidhaṃ. Tañhi abhinikkhamanato yāva arahattamaggā uppajjamānaṃ, phalakkhaṇe uppannaṃ nāma. Tusitabhavanato yāva mahābodhipallaṅke arahattamaggā uppajjamānaṃ, phalakkhaṇe uppannaṃ nāma. Dīpaṅkarato paṭṭhāya yāva arahattamaggā uppajjamānaṃ, phalakkhaṇe uppannaṃ nāma. Desanāñāṇampi pavattamānaṃ pavattanti duvidhaṃ. Tañhi yāva aññātakoṇḍaññassa sotāpattimaggā pavattamānaṃ, phalakkhaṇe pavattaṃ nāma. Tesu paṭivedhañāṇaṃ lokuttaraṃ, desanāñāṇaṃ lokiyaṃ. Ubhayampi panetaṃ aññehi asādhāraṇaṃ, buddhānaññeva orasañāṇaṃ.
டா²னஞ்ச டா²னதோ பஜானாதீதி காரணஞ்ச காரணதோ பஜானாதி. யஸ்மா தத்த² ப²லங் திட்ட²தி ததா³யத்தவுத்திதாய உப்பஜ்ஜதி சேவ பவத்ததி ச, தஸ்மா டா²னந்தி வுச்சதி. ப⁴க³வா ‘‘யே யே த⁴ம்மா யேஸங் யேஸங் த⁴ம்மானங் ஹேதூ பச்சயா உப்பாதா³ய, தங் தங் டா²னங், யே யே த⁴ம்மா யேயங் யேயங் த⁴ம்மானங் ந ஹேதூ ந பச்சயா உப்பாதா³ய, தங் தங் அட்டா²ன’’ந்தி பஜானந்தோ டா²னதோ அட்டா²னதோ யதா²பூ⁴தங் பஜானாதி.
Ṭhānañca ṭhānato pajānātīti kāraṇañca kāraṇato pajānāti. Yasmā tattha phalaṃ tiṭṭhati tadāyattavuttitāya uppajjati ceva pavattati ca, tasmā ṭhānanti vuccati. Bhagavā ‘‘ye ye dhammā yesaṃ yesaṃ dhammānaṃ hetū paccayā uppādāya, taṃ taṃ ṭhānaṃ, ye ye dhammā yeyaṃ yeyaṃ dhammānaṃ na hetū na paccayā uppādāya, taṃ taṃ aṭṭhāna’’nti pajānanto ṭhānato aṭṭhānato yathābhūtaṃ pajānāti.
ஸமாதி³யந்தீதி ஸமாதா³னானி, தானி பன ஸமாதி³யித்வா கதானி ஹொந்தீதி ஆஹ ‘‘ஸமாதி³யித்வா கதான’’ந்தி. கம்மமேவ வா கம்மஸமாதா³னந்தி ஏதேன ‘‘ஸமாதா³ன’’ந்தி ஸத்³த³ஸ்ஸ அபுப்³ப³த்தா²பா⁴வங் த³ஸ்ஸேதி முத்தக³தஸத்³தே³ க³தஸத்³த³ஸ்ஸ விய. க³தீதி நிரயாதி³க³தியோ. உபதீ⁴தி அத்தபா⁴வோ. காலோதி கம்மஸ்ஸ விபச்சனாரஹகாலோ. பயோகோ³தி விபாகுப்பத்தியா பச்சயபூ⁴தா கிரியா.
Samādiyantīti samādānāni, tāni pana samādiyitvā katāni hontīti āha ‘‘samādiyitvā katāna’’nti. Kammameva vā kammasamādānanti etena ‘‘samādāna’’nti saddassa apubbatthābhāvaṃ dasseti muttagatasadde gatasaddassa viya. Gatīti nirayādigatiyo. Upadhīti attabhāvo. Kāloti kammassa vipaccanārahakālo. Payogoti vipākuppattiyā paccayabhūtā kiriyā.
சதுன்னங் ஜா²னானந்தி பச்சனீகஜ்ஜா²பனட்டே²ன ஆரம்மணூபனிஜ்ஜா²னட்டே²ன ச சதுன்னங் ரூபாவசரஜ்ஜா²னானங். சதுக்கனயேன ஹேதங் வுத்தங். அட்ட²ன்னங் விமொக்கா²னந்தி ‘‘ரூபீ ரூபானி பஸ்ஸதீ’’திஆதீ³னங் (ம॰ நி॰ 2.248; 3.312; த⁴॰ ஸ॰ 248; படி॰ ம॰ 1.209) அட்ட²ன்னங் விமொக்கா²னங். திண்ணங் ஸமாதீ⁴னந்தி ஸவிதக்கஸவிசாராதீ³னங் திண்ணங் ஸமாதீ⁴னங். நவன்னங் அனுபுப்³ப³ஸமாபத்தீனந்தி பட²மஜ்ஜா²னஸமாபத்திஆதீ³னங் நவன்னங் அனுபுப்³ப³ஸமாபத்தீனங். எத்த² ச படிபாடியா அட்ட²ன்னங் ஸமாதீ⁴திபி நாமங், ஸமாபத்தீதிபி சித்தேகக்³க³தாஸப்³பா⁴வதோ, நிரோத⁴ஸமாபத்தியா தத³பா⁴வதோ ந ஸமாதீ⁴தி நாமங். ஹானபா⁴கி³யங் த⁴ம்மந்தி அப்பகு³ணேஹி பட²மஜ்ஜா²னாதீ³ஹி வுட்டி²தஸ்ஸ ஸஞ்ஞாமனஸிகாரானங் காமாதி³பக்க²ந்த³னங். விஸேஸபா⁴கி³யங் த⁴ம்மந்தி பகு³ணேஹி பட²மஜ்ஜா²னாதீ³ஹி வுட்டி²தஸ்ஸ ஸஞ்ஞாமனஸிகாரானங் து³தியஜ்ஜா²னாதி³பக்க²ந்த³னங். இதி ஸஞ்ஞாமனஸிகாரானங் காமாதி³து³தியஜ்ஜா²னாதி³பக்க²ந்த³னானி ஹானபா⁴கி³யவிஸேஸபா⁴கி³யத⁴ம்மாதி த³ஸ்ஸிதானி. தேஹி பன ஜா²னானங் தங்ஸபா⁴வதா த⁴ம்மஸத்³தே³ன வுத்தா. தஸ்மாதி வுத்தமேவத்த²ங் ஹேதுபா⁴வேன பச்சாமஸதி. வோதா³னந்தி பகு³ணதாஸங்கா²தங் வோதா³னங். தஞ்ஹி பட²மஜ்ஜா²னாதீ³ஹி வுட்ட²ஹித்வா து³தியஜ்ஜா²னாதீ³னங் அதி⁴க³மஸ்ஸ பச்சயத்தா ‘‘வுட்டா²ன’’ந்தி வுத்தங். யே பன ‘‘நிரோத⁴தோ ப²லஸமாபத்தியா வுட்டா²னந்தி பாளி நத்தீ²’’தி வத³ந்தி. தே ‘‘நிரோதா⁴ வுட்ட²ஹந்தஸ்ஸ நேவஸஞ்ஞானாஸஞ்ஞாயதனங் ப²லஸமாபத்தியா அனந்தரபச்சயேன பச்சயோ’’தி இமாய பாளியங் (பட்டா²॰ 1.1.417) படிஸேதே⁴தப்³பா³.
Catunnaṃ jhānānanti paccanīkajjhāpanaṭṭhena ārammaṇūpanijjhānaṭṭhena ca catunnaṃ rūpāvacarajjhānānaṃ. Catukkanayena hetaṃ vuttaṃ. Aṭṭhannaṃ vimokkhānanti ‘‘rūpī rūpāni passatī’’tiādīnaṃ (ma. ni. 2.248; 3.312; dha. sa. 248; paṭi. ma. 1.209) aṭṭhannaṃ vimokkhānaṃ. Tiṇṇaṃ samādhīnanti savitakkasavicārādīnaṃ tiṇṇaṃ samādhīnaṃ. Navannaṃ anupubbasamāpattīnanti paṭhamajjhānasamāpattiādīnaṃ navannaṃ anupubbasamāpattīnaṃ. Ettha ca paṭipāṭiyā aṭṭhannaṃ samādhītipi nāmaṃ, samāpattītipi cittekaggatāsabbhāvato, nirodhasamāpattiyā tadabhāvato na samādhīti nāmaṃ. Hānabhāgiyaṃ dhammanti appaguṇehi paṭhamajjhānādīhi vuṭṭhitassa saññāmanasikārānaṃ kāmādipakkhandanaṃ. Visesabhāgiyaṃ dhammanti paguṇehi paṭhamajjhānādīhi vuṭṭhitassa saññāmanasikārānaṃ dutiyajjhānādipakkhandanaṃ. Iti saññāmanasikārānaṃ kāmādidutiyajjhānādipakkhandanāni hānabhāgiyavisesabhāgiyadhammāti dassitāni. Tehi pana jhānānaṃ taṃsabhāvatā dhammasaddena vuttā. Tasmāti vuttamevatthaṃ hetubhāvena paccāmasati. Vodānanti paguṇatāsaṅkhātaṃ vodānaṃ. Tañhi paṭhamajjhānādīhi vuṭṭhahitvā dutiyajjhānādīnaṃ adhigamassa paccayattā ‘‘vuṭṭhāna’’nti vuttaṃ. Ye pana ‘‘nirodhato phalasamāpattiyā vuṭṭhānanti pāḷi natthī’’ti vadanti. Te ‘‘nirodhā vuṭṭhahantassa nevasaññānāsaññāyatanaṃ phalasamāpattiyā anantarapaccayena paccayo’’ti imāya pāḷiyaṃ (paṭṭhā. 1.1.417) paṭisedhetabbā.
ஸீஹனாத³ஸுத்தவண்ணனா நிட்டி²தா.
Sīhanādasuttavaṇṇanā niṭṭhitā.
மஹாவக்³க³வண்ணனா நிட்டி²தா.
Mahāvaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. ஸீஹனாத³ஸுத்தங் • 10. Sīhanādasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. ஸீஹனாத³ஸுத்தவண்ணனா • 10. Sīhanādasuttavaṇṇanā
