| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
5. සීහවග්‌ගො
5. Sīhavaggo
1. සීහඞ්‌ගපඤ්‌හො
1. Sīhaṅgapañho
1. ‘‘භන්‌තෙ නාගසෙන, ‘සීහස්‌ස සත්‌ත අඞ්‌ගානි ගහෙතබ්‌බානී’ති යං වදෙසි, කතමානි තානි සත්‌ත අඞ්‌ගානි ගහෙතබ්‌බානී’’ති? ‘‘යථා, මහාරාජ, සීහො නාම සෙතවිමලපරිසුද්‌ධපණ්‌ඩරො, එවමෙව ඛො, මහාරාජ, යොගිනා යොගාවචරෙන සෙතවිමලපරිසුද්‌ධපණ්‌ඩරචිත්‌තෙන බ්‍යපගතකුක්‌කුච්‌චෙන භවිතබ්‌බං. ඉදං, මහාරාජ, සීහස්‌ස පඨමං අඞ්‌ගං ගහෙතබ්‌බං.
1. ‘‘Bhante nāgasena, ‘sīhassa satta aṅgāni gahetabbānī’ti yaṃ vadesi, katamāni tāni satta aṅgāni gahetabbānī’’ti? ‘‘Yathā, mahārāja, sīho nāma setavimalaparisuddhapaṇḍaro, evameva kho, mahārāja, yoginā yogāvacarena setavimalaparisuddhapaṇḍaracittena byapagatakukkuccena bhavitabbaṃ. Idaṃ, mahārāja, sīhassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, සීහො චතුචරණො වික්‌කන්‌තචාරී, එවමෙව ඛො, මහාරාජ, යොගිනා යොගාවචරෙන චතුරිද්‌ධිපාදචරණෙන භවිතබ්‌බං. ඉදං, මහාරාජ, සීහස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, sīho catucaraṇo vikkantacārī, evameva kho, mahārāja, yoginā yogāvacarena caturiddhipādacaraṇena bhavitabbaṃ. Idaṃ, mahārāja, sīhassa dutiyaṃ aṅgaṃ gahetabbaṃ.
‘‘පුන චපරං, මහාරාජ, සීහො අභිරූපරුචිරකෙසරී, එවමෙව ඛො, මහාරාජ, යොගිනා යොගාවචරෙන අභිරූපරුචිරසීලකෙසරිනා භවිතබ්‌බං. ඉදං, මහාරාජ, සීහස්‌ස තතියං අඞ්‌ගං ගහෙතබ්‌බං.
‘‘Puna caparaṃ, mahārāja, sīho abhirūparucirakesarī, evameva kho, mahārāja, yoginā yogāvacarena abhirūparucirasīlakesarinā bhavitabbaṃ. Idaṃ, mahārāja, sīhassa tatiyaṃ aṅgaṃ gahetabbaṃ.
‘‘පුන චපරං, මහාරාජ, සීහො ජීවිතපරියාදානෙපි න කස්‌සචි ඔනමති, එවමෙව ඛො, මහාරාජ, යොගිනා යොගාවචරෙන චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරපරියාදානෙපි න කස්‌සචි ඔනමිතබ්‌බං. ඉදං, මහාරාජ, සීහස්‌ස චතුත්‌ථං අඞ්‌ගං ගහෙතබ්‌බං.
‘‘Puna caparaṃ, mahārāja, sīho jīvitapariyādānepi na kassaci onamati, evameva kho, mahārāja, yoginā yogāvacarena cīvarapiṇḍapātasenāsanagilānapaccayabhesajjaparikkhārapariyādānepi na kassaci onamitabbaṃ. Idaṃ, mahārāja, sīhassa catutthaṃ aṅgaṃ gahetabbaṃ.
‘‘පුන චපරං, මහාරාජ, සීහො සපදානභක්‌ඛො යස්‌මිං ඔකාසෙ නිපතති, තත්‌ථෙව යාවදත්‌ථං භක්‌ඛයති, න වරමංසං විචිනාති, එවමෙව ඛො, මහාරාජ, යොගිනා යොගාවචරෙන සපදානභක්‌ඛෙන භවිතබ්‌බං, න කුලානි විචිනිතබ්‌බානි, න පුබ්‌බගෙහං හිත්‌වා කුලානි උපසඞ්‌කමිතබ්‌බානි, න භොජනං විචිනිතබ්‌බං, යස්‌මිං ඔකාසෙ කබළං ආදීයති, තස්‌මිං යෙව ඔකාසෙ භුඤ්‌ජිතබ්‌බං සරීරයාපනත්‌ථං 1, න වරභොජනං විචිනිතබ්‌බං. ඉදං, මහාරාජ, සීහස්‌ස පඤ්‌චමං අඞ්‌ගං ගහෙතබ්‌බං.
‘‘Puna caparaṃ, mahārāja, sīho sapadānabhakkho yasmiṃ okāse nipatati, tattheva yāvadatthaṃ bhakkhayati, na varamaṃsaṃ vicināti, evameva kho, mahārāja, yoginā yogāvacarena sapadānabhakkhena bhavitabbaṃ, na kulāni vicinitabbāni, na pubbagehaṃ hitvā kulāni upasaṅkamitabbāni, na bhojanaṃ vicinitabbaṃ, yasmiṃ okāse kabaḷaṃ ādīyati, tasmiṃ yeva okāse bhuñjitabbaṃ sarīrayāpanatthaṃ 2, na varabhojanaṃ vicinitabbaṃ. Idaṃ, mahārāja, sīhassa pañcamaṃ aṅgaṃ gahetabbaṃ.
‘‘පුන චපරං, මහාරාජ, සීහො අසන්‌නිධිභක්‌ඛො, සකිං ගොචරං භක්‌ඛයිත්‌වා න පුන තං උපගච්‌ඡති, එවමෙව ඛො, මහාරාජ, යොගිනා යොගාවචරෙන අසන්‌නිධිකාරපරිභොගිනා භවිතබ්‌බං. ඉදං, මහාරාජ, සීහස්‌ස ඡට්‌ඨං අඞ්‌ගං ගහෙතබ්‌බං.
‘‘Puna caparaṃ, mahārāja, sīho asannidhibhakkho, sakiṃ gocaraṃ bhakkhayitvā na puna taṃ upagacchati, evameva kho, mahārāja, yoginā yogāvacarena asannidhikāraparibhoginā bhavitabbaṃ. Idaṃ, mahārāja, sīhassa chaṭṭhaṃ aṅgaṃ gahetabbaṃ.
‘‘පුන චපරං , මහාරාජ, සීහො භොජනං අලද්‌ධා න පරිතස්‌සති, ලද්‌ධාපි භොජනං අගධිතො 3 අමුච්‌ඡිතො අනජ්‌ඣොසන්‌නො පරිභුඤ්‌ජති, එවමෙව ඛො, මහාරාජ, යොගිනා යොගාවචරෙන භොජනං අලද්‌ධා න පරිතස්‌සිතබ්‌බං, ලද්‌ධාපි භොජනං අගධිතෙන අමුච්‌ඡිතෙන අනජ්‌ඣොසන්‌නෙන ආදීනවදස්‌සාවිනා නිස්‌සරණපඤ්‌ඤෙන පරිභුඤ්‌ජිතබ්‌බං. ඉදං, මහාරාජ, සීහස්‌ස සත්‌තමං අඞ්‌ගං ගහෙතබ්‌බං. භාසිතම්‌පෙතං, මහාරාජ, භගවතා දෙවාතිදෙවෙන සංයුත්‌තනිකායවරෙ ථෙරං මහාකස්‌සපං පරිකිත්‌තයමානෙන –
‘‘Puna caparaṃ , mahārāja, sīho bhojanaṃ aladdhā na paritassati, laddhāpi bhojanaṃ agadhito 4 amucchito anajjhosanno paribhuñjati, evameva kho, mahārāja, yoginā yogāvacarena bhojanaṃ aladdhā na paritassitabbaṃ, laddhāpi bhojanaṃ agadhitena amucchitena anajjhosannena ādīnavadassāvinā nissaraṇapaññena paribhuñjitabbaṃ. Idaṃ, mahārāja, sīhassa sattamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare theraṃ mahākassapaṃ parikittayamānena –
‘සන්‌තුට්‌ඨොයං, භික්‌ඛවෙ, කස්‌සපො ඉතරීතරෙන පිණ්‌ඩපාතෙන, ඉතරීතරපිණ්‌ඩපාතසන්‌තුට්‌ඨියා ච වණ්‌ණවාදී, න ච පිණ්‌ඩපාතහෙතු අනෙසනං අප්‌පතිරූපං ආපජ්‌ජති, අලද්‌ධා ච පිණ්‌ඩපාතං න පරිතස්‌සති, ලද්‌ධා ච පිණ්‌ඩපාතං අගධිතො අමුච්‌ඡිතො අනජ්‌ඣොසන්‌නො ආදීනවදස්‌සාවී නිස්‌සරණපඤ්‌ඤො පරිභුඤ්‌ජතී’’’ති.
‘Santuṭṭhoyaṃ, bhikkhave, kassapo itarītarena piṇḍapātena, itarītarapiṇḍapātasantuṭṭhiyā ca vaṇṇavādī, na ca piṇḍapātahetu anesanaṃ appatirūpaṃ āpajjati, aladdhā ca piṇḍapātaṃ na paritassati, laddhā ca piṇḍapātaṃ agadhito amucchito anajjhosanno ādīnavadassāvī nissaraṇapañño paribhuñjatī’’’ti.
සීහඞ්‌ගපඤ්‌හො පඨමො.
Sīhaṅgapañho paṭhamo.
Footnotes:
