| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༥. སཱིཧཝགྒོ
5. Sīhavaggo
༡. སཱིཧངྒཔཉྷོ
1. Sīhaṅgapañho
༡. ‘‘བྷནྟེ ནཱགསེན, ‘སཱིཧསྶ སཏྟ ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི སཏྟ ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, སཱིཧོ ནཱམ སེཏཝིམལཔརིསུདྡྷཔཎྜརོ, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སེཏཝིམལཔརིསུདྡྷཔཎྜརཙིཏྟེན བྱཔགཏཀུཀྐུཙྩེན བྷཝིཏབྦཾ། ཨིདཾ, མཧཱརཱཛ, སཱིཧསྶ པཋམཾ ཨངྒཾ གཧེཏབྦཾ།
1. ‘‘Bhante nāgasena, ‘sīhassa satta aṅgāni gahetabbānī’ti yaṃ vadesi, katamāni tāni satta aṅgāni gahetabbānī’’ti? ‘‘Yathā, mahārāja, sīho nāma setavimalaparisuddhapaṇḍaro, evameva kho, mahārāja, yoginā yogāvacarena setavimalaparisuddhapaṇḍaracittena byapagatakukkuccena bhavitabbaṃ. Idaṃ, mahārāja, sīhassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, སཱིཧོ ཙཏུཙརཎོ ཝིཀྐནྟཙཱརཱི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཙཏུརིདྡྷིཔཱདཙརཎེན བྷཝིཏབྦཾ། ཨིདཾ, མཧཱརཱཛ, སཱིཧསྶ དུཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, sīho catucaraṇo vikkantacārī, evameva kho, mahārāja, yoginā yogāvacarena caturiddhipādacaraṇena bhavitabbaṃ. Idaṃ, mahārāja, sīhassa dutiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, སཱིཧོ ཨབྷིརཱུཔརུཙིརཀེསརཱི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨབྷིརཱུཔརུཙིརསཱིལཀེསརིནཱ བྷཝིཏབྦཾ། ཨིདཾ, མཧཱརཱཛ, སཱིཧསྶ ཏཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, sīho abhirūparucirakesarī, evameva kho, mahārāja, yoginā yogāvacarena abhirūparucirasīlakesarinā bhavitabbaṃ. Idaṃ, mahārāja, sīhassa tatiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, སཱིཧོ ཛཱིཝིཏཔརིཡཱདཱནེཔི ན ཀསྶཙི ཨོནམཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཔརིཡཱདཱནེཔི ན ཀསྶཙི ཨོནམིཏབྦཾ། ཨིདཾ, མཧཱརཱཛ, སཱིཧསྶ ཙཏུཏྠཾ ཨངྒཾ གཧེཏབྦཾ།
‘‘Puna caparaṃ, mahārāja, sīho jīvitapariyādānepi na kassaci onamati, evameva kho, mahārāja, yoginā yogāvacarena cīvarapiṇḍapātasenāsanagilānapaccayabhesajjaparikkhārapariyādānepi na kassaci onamitabbaṃ. Idaṃ, mahārāja, sīhassa catutthaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, སཱིཧོ སཔདཱནབྷཀྑོ ཡསྨིཾ ཨོཀཱསེ ནིཔཏཏི, ཏཏྠེཝ ཡཱཝདཏྠཾ བྷཀྑཡཏི, ན ཝརམཾསཾ ཝིཙིནཱཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སཔདཱནབྷཀྑེན བྷཝིཏབྦཾ, ན ཀུལཱནི ཝིཙིནིཏབྦཱནི, ན པུབྦགེཧཾ ཧིཏྭཱ ཀུལཱནི ཨུཔསངྐམིཏབྦཱནི, ན བྷོཛནཾ ཝིཙིནིཏབྦཾ, ཡསྨིཾ ཨོཀཱསེ ཀབལ༹ཾ ཨཱདཱིཡཏི, ཏསྨིཾ ཡེཝ ཨོཀཱསེ བྷུཉྫིཏབྦཾ སརཱིརཡཱཔནཏྠཾ 1, ན ཝརབྷོཛནཾ ཝིཙིནིཏབྦཾ། ཨིདཾ, མཧཱརཱཛ, སཱིཧསྶ པཉྩམཾ ཨངྒཾ གཧེཏབྦཾ།
‘‘Puna caparaṃ, mahārāja, sīho sapadānabhakkho yasmiṃ okāse nipatati, tattheva yāvadatthaṃ bhakkhayati, na varamaṃsaṃ vicināti, evameva kho, mahārāja, yoginā yogāvacarena sapadānabhakkhena bhavitabbaṃ, na kulāni vicinitabbāni, na pubbagehaṃ hitvā kulāni upasaṅkamitabbāni, na bhojanaṃ vicinitabbaṃ, yasmiṃ okāse kabaḷaṃ ādīyati, tasmiṃ yeva okāse bhuñjitabbaṃ sarīrayāpanatthaṃ 2, na varabhojanaṃ vicinitabbaṃ. Idaṃ, mahārāja, sīhassa pañcamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, སཱིཧོ ཨསནྣིདྷིབྷཀྑོ, སཀིཾ གོཙརཾ བྷཀྑཡིཏྭཱ ན པུན ཏཾ ཨུཔགཙྪཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨསནྣིདྷིཀཱརཔརིབྷོགིནཱ བྷཝིཏབྦཾ། ཨིདཾ, མཧཱརཱཛ, སཱིཧསྶ ཚཊྛཾ ཨངྒཾ གཧེཏབྦཾ།
‘‘Puna caparaṃ, mahārāja, sīho asannidhibhakkho, sakiṃ gocaraṃ bhakkhayitvā na puna taṃ upagacchati, evameva kho, mahārāja, yoginā yogāvacarena asannidhikāraparibhoginā bhavitabbaṃ. Idaṃ, mahārāja, sīhassa chaṭṭhaṃ aṅgaṃ gahetabbaṃ.
‘‘པུན ཙཔརཾ , མཧཱརཱཛ, སཱིཧོ བྷོཛནཾ ཨལདྡྷཱ ན པརིཏསྶཏི, ལདྡྷཱཔི བྷོཛནཾ ཨགདྷིཏོ 3 ཨམུཙྪིཏོ ཨནཛ྄ཛྷོསནྣོ པརིབྷུཉྫཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན བྷོཛནཾ ཨལདྡྷཱ ན པརིཏསྶིཏབྦཾ, ལདྡྷཱཔི བྷོཛནཾ ཨགདྷིཏེན ཨམུཙྪིཏེན ཨནཛ྄ཛྷོསནྣེན ཨཱདཱིནཝདསྶཱཝིནཱ ནིསྶརཎཔཉྙེན པརིབྷུཉྫིཏབྦཾ། ཨིདཾ, མཧཱརཱཛ, སཱིཧསྶ སཏྟམཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, བྷགཝཏཱ དེཝཱཏིདེཝེན སཾཡུཏྟནིཀཱཡཝརེ ཐེརཾ མཧཱཀསྶཔཾ པརིཀིཏྟཡམཱནེན –
‘‘Puna caparaṃ , mahārāja, sīho bhojanaṃ aladdhā na paritassati, laddhāpi bhojanaṃ agadhito 4 amucchito anajjhosanno paribhuñjati, evameva kho, mahārāja, yoginā yogāvacarena bhojanaṃ aladdhā na paritassitabbaṃ, laddhāpi bhojanaṃ agadhitena amucchitena anajjhosannena ādīnavadassāvinā nissaraṇapaññena paribhuñjitabbaṃ. Idaṃ, mahārāja, sīhassa sattamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare theraṃ mahākassapaṃ parikittayamānena –
‘སནྟུཊྛོཡཾ, བྷིཀྑཝེ, ཀསྶཔོ ཨིཏརཱིཏརེན པིཎྜཔཱཏེན, ཨིཏརཱིཏརཔིཎྜཔཱཏསནྟུཊྛིཡཱ ཙ ཝཎྞཝཱདཱི, ན ཙ པིཎྜཔཱཏཧེཏུ ཨནེསནཾ ཨཔྤཏིརཱུཔཾ ཨཱཔཛྫཏི, ཨལདྡྷཱ ཙ པིཎྜཔཱཏཾ ན པརིཏསྶཏི, ལདྡྷཱ ཙ པིཎྜཔཱཏཾ ཨགདྷིཏོ ཨམུཙྪིཏོ ཨནཛ྄ཛྷོསནྣོ ཨཱདཱིནཝདསྶཱཝཱི ནིསྶརཎཔཉྙོ པརིབྷུཉྫཏཱི’’’ཏི།
‘Santuṭṭhoyaṃ, bhikkhave, kassapo itarītarena piṇḍapātena, itarītarapiṇḍapātasantuṭṭhiyā ca vaṇṇavādī, na ca piṇḍapātahetu anesanaṃ appatirūpaṃ āpajjati, aladdhā ca piṇḍapātaṃ na paritassati, laddhā ca piṇḍapātaṃ agadhito amucchito anajjhosanno ādīnavadassāvī nissaraṇapañño paribhuñjatī’’’ti.
སཱིཧངྒཔཉྷོ པཋམོ།
Sīhaṅgapañho paṭhamo.
Footnotes:
