Library / Tipiṭaka / ติปิฎก • Tipiṭaka / อปทานปาฬิ • Apadānapāḷi

    ๒. สีหาสนิยวโคฺค

    2. Sīhāsaniyavaggo

    ๑. สีหาสนทายกเตฺถรอปทานํ

    1. Sīhāsanadāyakattheraapadānaṃ

    ๑.

    1.

    ‘‘นิพฺพุเต โลกนาถมฺหิ, สิทฺธเตฺถ ทฺวิปทุตฺตเม 1;

    ‘‘Nibbute lokanāthamhi, siddhatthe dvipaduttame 2;

    วิตฺถาริเก ปาวจเน, พาหุชญฺญมฺหิ สาสเนฯ

    Vitthārike pāvacane, bāhujaññamhi sāsane.

    ๒.

    2.

    ‘‘ปสนฺนจิโตฺต สุมโน, สีหาสนมกาสหํ;

    ‘‘Pasannacitto sumano, sīhāsanamakāsahaṃ;

    สีหาสนํ กริตฺวาน, ปาทปีฐมกาสหํฯ

    Sīhāsanaṃ karitvāna, pādapīṭhamakāsahaṃ.

    ๓.

    3.

    ‘‘สีหาสเน จ วสฺสเนฺต, ฆรํ ตตฺถ อกาสหํ;

    ‘‘Sīhāsane ca vassante, gharaṃ tattha akāsahaṃ;

    เตน จิตฺตปฺปสาเทน, ตุสิตํ อุปปชฺชหํฯ

    Tena cittappasādena, tusitaṃ upapajjahaṃ.

    ๔.

    4.

    ‘‘อายาเมน จตุพฺพีส, โยชนํ อาสิ 3 ตาวเท;

    ‘‘Āyāmena catubbīsa, yojanaṃ āsi 4 tāvade;

    วิมานํ สุกตํ มยฺหํ, วิตฺถาเรน จตุทฺทสฯ

    Vimānaṃ sukataṃ mayhaṃ, vitthārena catuddasa.

    ๕.

    5.

    ‘‘สตํ 5 กญฺญาสหสฺสานิ, ปริวาเรนฺติ มํ สทา;

    ‘‘Sataṃ 6 kaññāsahassāni, parivārenti maṃ sadā;

    โสณฺณมยญฺจ ปลฺลงฺกํ, พฺยเมฺห อาสิ สุนิมฺมิตํฯ

    Soṇṇamayañca pallaṅkaṃ, byamhe āsi sunimmitaṃ.

    ๖.

    6.

    ‘‘หตฺถิยานํ อสฺสยานํ, ทิพฺพยานํ อุปฎฺฐิตํ;

    ‘‘Hatthiyānaṃ assayānaṃ, dibbayānaṃ upaṭṭhitaṃ;

    ปาสาทา สิวิกา เจว, นิพฺพตฺตนฺติ ยทิจฺฉกํฯ

    Pāsādā sivikā ceva, nibbattanti yadicchakaṃ.

    ๗.

    7.

    ‘‘มณิมยา จ ปลฺลงฺกา, อเญฺญ สารมยา พหู;

    ‘‘Maṇimayā ca pallaṅkā, aññe sāramayā bahū;

    นิพฺพตฺตนฺติ มมํ สเพฺพ, สีหาสนสฺสิทํ ผลํฯ

    Nibbattanti mamaṃ sabbe, sīhāsanassidaṃ phalaṃ.

    ๘.

    8.

    ‘‘โสณฺณมยา รูปิมยา, ผลิกาเวฬุริยามยา;

    ‘‘Soṇṇamayā rūpimayā, phalikāveḷuriyāmayā;

    ปาทุกา อภิรูหามิ, ปาทปีฐสฺสิทํ ผลํฯ

    Pādukā abhirūhāmi, pādapīṭhassidaṃ phalaṃ.

    ๙.

    9.

    ‘‘จตุนฺนวุติโต 7 กเปฺป, ยํ กมฺมมกริํ ตทา;

    ‘‘Catunnavutito 8 kappe, yaṃ kammamakariṃ tadā;

    ทุคฺคติํ นาภิชานามิ, ปุญฺญกมฺมสฺสิทํ ผลํฯ

    Duggatiṃ nābhijānāmi, puññakammassidaṃ phalaṃ.

    ๑๐.

    10.

    ‘‘เตสตฺตติมฺหิโต กเปฺป, อินฺทนามา ตโย ชนา;

    ‘‘Tesattatimhito kappe, indanāmā tayo janā;

    เทฺวสตฺตติมฺหิโต กเปฺป, ตโย สุมนนามกาฯ

    Dvesattatimhito kappe, tayo sumananāmakā.

    ๑๑.

    11.

    ‘‘สมสตฺตติโต กเปฺป, ตโย วรุณนามกา;

    ‘‘Samasattatito kappe, tayo varuṇanāmakā;

    สตฺตรตนสมฺปนฺนา, จตุทีปมฺหิ อิสฺสราฯ

    Sattaratanasampannā, catudīpamhi issarā.

    ๑๒.

    12.

    ‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;

    ‘‘Paṭisambhidā catasso, vimokkhāpi ca aṭṭhime;

    ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

    Chaḷabhiññā sacchikatā, kataṃ buddhassa sāsanaṃ’’.

    อิตฺถํ สุทํ อายสฺมา สีหาสนทายโก เถโร อิมา คาถาโย อภาสิตฺถาติฯ

    Itthaṃ sudaṃ āyasmā sīhāsanadāyako thero imā gāthāyo abhāsitthāti.

    สีหาสนทายกเตฺถรสฺสาปทานํ ปฐมํฯ

    Sīhāsanadāyakattherassāpadānaṃ paṭhamaṃ.




    Next: ๒. เอกตฺถมฺภิกเตฺถรอปทานํ • 2. Ekatthambhikattheraapadānaṃ




    Footnotes:
    1. ทิปทุตฺตเม (สี. สฺยา.)
    2. dipaduttame (sī. syā.)
    3. โยชนาสิํสุ (สฺยา. ก.)
    4. yojanāsiṃsu (syā. ka.)
    5. สตฺต (สฺยา.)
    6. satta (syā.)
    7. จตุนวุเต อิโต (สี. สฺยา.)
    8. catunavute ito (sī. syā.)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๑. สีหาสนทายกเตฺถรอปทานวณฺณนา • 1. Sīhāsanadāyakattheraapadānavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact