| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
கு²த்³த³கனிகாயே
Khuddakanikāye
அபதா³ன-அட்ட²கதா²
Apadāna-aṭṭhakathā
(து³தியோ பா⁴கோ³)
(Dutiyo bhāgo)
தே²ராபதா³னங்
Therāpadānaṃ
2. ஸீஹாஸனியவக்³கோ³
2. Sīhāsaniyavaggo
1. ஸீஹாஸனதா³யகத்தே²ரஅபதா³னவண்ணனா
1. Sīhāsanadāyakattheraapadānavaṇṇanā
நிப்³பு³தே லோகனாத²ம்ஹீதிஆதி³கங் ஆயஸ்மதோ ஸீஹாஸனதா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே விப⁴வஸம்பன்னே ஸத்³தா⁴ஸம்பன்னே ஏகஸ்மிங் குலே நிப்³ப³த்தோ, த⁴ரமானே ப⁴க³வதி தே³வலோகே வஸித்வா நிப்³பு³தே ப⁴க³வதி உப்பன்னத்தா விஞ்ஞுதங் பத்தோ ப⁴க³வதோ ஸாரீரிகசேதியங் தி³ஸ்வா ‘‘அஹோ மே அலாபா⁴, ப⁴க³வதோ த⁴ரமானே காலே அஸம்பத்தோ’’தி சிந்தெத்வா சேதியே சித்தங் பஸாதெ³த்வா ஸோமனஸ்ஸஜாதோ ஸப்³ப³ரதனமயங் தே³வதானிம்மிதஸதி³ஸங் த⁴ம்மாஸனே ஸீஹாஸனங் காரெத்வா ஜீவமானகபு³த்³த⁴ஸ்ஸ விய பூஜேஸி. தஸ்ஸுபரி கே³ஹம்பி தி³ப்³ப³விமானமிவ காரேஸி, பாத³ட்ட²பனபாத³பீட²ம்பி காரேஸி. ஏவங் யாவஜீவங் தீ³பதூ⁴பபுப்ப²க³ந்தா⁴தீ³ஹி அனேகவித⁴ங் பூஜங் கத்வா ததோ சுதோ தே³வலோகே நிப்³ப³த்தோ ச² காமஸக்³கே³ அபராபரங் தி³ப்³ப³ஸம்பத்திங் அனுப⁴வித்வா மனுஸ்ஸேஸு சக்கவத்திஸம்பத்திங் அனேகக்க²த்துங் அனுப⁴வித்வா ஸங்க்²யாதிக்கந்தங் பதே³ஸரஜ்ஜஸம்பத்திஞ்ச அனுப⁴வித்வா கஸ்ஸபஸ்ஸ ப⁴க³வதோ ஸாஸனே பப்³ப³ஜித்வா ஸமணத⁴ம்மங் கத்வா எத்த²ந்தரே தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ ஏகஸ்மிங் விப⁴வஸம்பன்னே குலே நிப்³ப³த்தித்வா விஞ்ஞுதங் பத்தோ ஸத்து² த⁴ம்மதே³ஸனங் ஸுத்வா படிலத்³த⁴ஸத்³தோ⁴ பப்³ப³ஜித்வா லத்³தூ⁴பஸம்பதோ³ கம்மட்டா²னங் க³ஹெத்வா க⁴டெந்தோ வாயமந்தோ நசிரஸ்ஸேவ அரஹத்தங் பாபுணி.
Nibbutelokanāthamhītiādikaṃ āyasmato sīhāsanadāyakattherassa apadānaṃ. Ayampi purimabuddhesu katādhikāro tattha tattha bhave puññāni upacinanto siddhatthassa bhagavato kāle vibhavasampanne saddhāsampanne ekasmiṃ kule nibbatto, dharamāne bhagavati devaloke vasitvā nibbute bhagavati uppannattā viññutaṃ patto bhagavato sārīrikacetiyaṃ disvā ‘‘aho me alābhā, bhagavato dharamāne kāle asampatto’’ti cintetvā cetiye cittaṃ pasādetvā somanassajāto sabbaratanamayaṃ devatānimmitasadisaṃ dhammāsane sīhāsanaṃ kāretvā jīvamānakabuddhassa viya pūjesi. Tassupari gehampi dibbavimānamiva kāresi, pādaṭṭhapanapādapīṭhampi kāresi. Evaṃ yāvajīvaṃ dīpadhūpapupphagandhādīhi anekavidhaṃ pūjaṃ katvā tato cuto devaloke nibbatto cha kāmasagge aparāparaṃ dibbasampattiṃ anubhavitvā manussesu cakkavattisampattiṃ anekakkhattuṃ anubhavitvā saṅkhyātikkantaṃ padesarajjasampattiñca anubhavitvā kassapassa bhagavato sāsane pabbajitvā samaṇadhammaṃ katvā etthantare devamanussesu saṃsaranto imasmiṃ buddhuppāde ekasmiṃ vibhavasampanne kule nibbattitvā viññutaṃ patto satthu dhammadesanaṃ sutvā paṭiladdhasaddho pabbajitvā laddhūpasampado kammaṭṭhānaṃ gahetvā ghaṭento vāyamanto nacirasseva arahattaṃ pāpuṇi.
1. ஏவங் பத்தஅரஹத்தப²லோ அத்தனோ புப்³ப³கம்மங் ஸரித்வா ஸோமனஸ்ஸங் உப்பாதெ³த்வா புப்³ப³சரிதாபதா³னங் பகாஸெந்தோ நிப்³பு³தே லோகனாத²ம்ஹீதிஆதி³மாஹ. தத்த² லோகஸ்ஸ நாதோ² பதா⁴னோதி லோகனாதோ², லோகத்தயஸாமீதி அத்தோ². லோகனாதே² ஸித்³த⁴த்த²ம்ஹி நிப்³பு³தேதி ஸம்ப³ந்தோ⁴. வித்தா²ரிதே பாவசனேதி பாவசனே பிடகத்தயே வித்தா²ரிதே பத்த²டே பாகடேதி அத்தோ². பா³ஹுஜஞ்ஞம்ஹி ஸாஸனேதி ஸிக்க²த்தயஸங்க³ஹிதே பு³த்³த⁴ஸாஸனே அனேகஸதஸஹஸ்ஸகோடிகீ²ணாஸவஸங்கா²தேஹி ப³ஹுஜனேஹி ஞாதே அதி⁴க³தேதி அத்தோ².
1. Evaṃ pattaarahattaphalo attano pubbakammaṃ saritvā somanassaṃ uppādetvā pubbacaritāpadānaṃ pakāsento nibbute lokanāthamhītiādimāha. Tattha lokassa nātho padhānoti lokanātho, lokattayasāmīti attho. Lokanāthe siddhatthamhi nibbuteti sambandho. Vitthārite pāvacaneti pāvacane piṭakattaye vitthārite patthaṭe pākaṭeti attho. Bāhujaññamhi sāsaneti sikkhattayasaṅgahite buddhasāsane anekasatasahassakoṭikhīṇāsavasaṅkhātehi bahujanehi ñāte adhigateti attho.
2-3. பஸன்னசித்தோ ஸுமனோதி ததா³ அஹங் பு³த்³த⁴ஸ்ஸ த⁴ரமானகாலே அஸம்பத்தோ நிப்³பு³தே தஸ்மிங் தே³வலோகா சவித்வா மனுஸ்ஸலோகங் உபபன்னோ தஸ்ஸ ப⁴க³வதோ ஸாரீரிகதா⁴துசேதியங் தி³ஸ்வா பஸன்னசித்தோ ஸத்³தா⁴ஸம்பயுத்தமனோ ஸுந்த³ரமனோ ‘‘அஹோ மமாக³மனங் ஸ்வாக³மன’’ந்தி ஸஞ்ஜாதபஸாத³ப³ஹுமானோ ‘‘மயா நிப்³பா³னாதி⁴க³மாய ஏகங் புஞ்ஞங் காதுங் வட்டதீ’’தி சிந்தெத்வா ப⁴க³வதோ சேதியஸமீபே ப⁴க³வந்தங் உத்³தி³ஸ்ஸ ஹிரஞ்ஞஸுவண்ணரதனாதீ³ஹி அலங்கரித்வாவ ஸீஹாஸனங் அகாஸி. தத்ர நிஸின்னஸ்ஸ பாத³ட்ட²பனத்தா²ய பாத³பீட²ஞ்ச காரேஸி. ஸீஹாஸனஸ்ஸ அதேமனத்தா²ய தஸ்ஸுபரி க⁴ரஞ்ச காரேஸி. தேன வுத்தங் – ‘‘ஸீஹாஸனமகாஸஹங்…பே॰… க⁴ரங் தத்த² அகாஸஹ’’ந்தி. தேன சித்தப்பஸாதே³னாதி த⁴ரமானஸ்ஸ விய ப⁴க³வதோ ஸீஹாஸனங் மயா கதங், தேன சித்தப்பஸாதே³ன. துஸிதங் உபபஜ்ஜஹந்தி துஸிதப⁴வனே உபபஜ்ஜிந்தி அத்தோ².
2-3.Pasannacitto sumanoti tadā ahaṃ buddhassa dharamānakāle asampatto nibbute tasmiṃ devalokā cavitvā manussalokaṃ upapanno tassa bhagavato sārīrikadhātucetiyaṃ disvā pasannacitto saddhāsampayuttamano sundaramano ‘‘aho mamāgamanaṃ svāgamana’’nti sañjātapasādabahumāno ‘‘mayā nibbānādhigamāya ekaṃ puññaṃ kātuṃ vaṭṭatī’’ti cintetvā bhagavato cetiyasamīpe bhagavantaṃ uddissa hiraññasuvaṇṇaratanādīhi alaṅkaritvāva sīhāsanaṃ akāsi. Tatra nisinnassa pādaṭṭhapanatthāya pādapīṭhañca kāresi. Sīhāsanassa atemanatthāya tassupari gharañca kāresi. Tena vuttaṃ – ‘‘sīhāsanamakāsahaṃ…pe… gharaṃ tattha akāsaha’’nti. Tena cittappasādenāti dharamānassa viya bhagavato sīhāsanaṃ mayā kataṃ, tena cittappasādena. Tusitaṃ upapajjahanti tusitabhavane upapajjinti attho.
4. ஆயாமேன சதுப்³பீ³ஸாதி தத்ருபபன்னஸ்ஸ தே³வபூ⁴தஸ்ஸ ஸதோ மய்ஹங் ஸுகதங் புஞ்ஞேன நிப்³ப³த்திதங் பாதுபூ⁴தங் ஆயாமேன உச்சதோ சதுப்³பீ³ஸயோஜனங் வித்தா²ரேன திரியதோ சதுத்³த³ஸயோஜனங் தாவதே³வ நிப்³ப³த்திக்க²ணேயேவ ஆஸி அஹோஸீதி அத்தோ². ஸேஸங் ஸுவிஞ்ஞெய்யமேவ.
4.Āyāmena catubbīsāti tatrupapannassa devabhūtassa sato mayhaṃ sukataṃ puññena nibbattitaṃ pātubhūtaṃ āyāmena uccato catubbīsayojanaṃ vitthārena tiriyato catuddasayojanaṃ tāvadeva nibbattikkhaṇeyeva āsi ahosīti attho. Sesaṃ suviññeyyameva.
9. சதுன்னவுதே இதோ கப்பேதி இதோ கப்பதோ சதுனவுதே கப்பே யங் கம்மங் அகரிங் அகாஸிங், ததா³ ததோ பட்டா²ய புஞ்ஞப³லேன கஞ்சி து³க்³க³திங் நாபி⁴ஜானாமி, ந அனுபூ⁴தபுப்³பா³ காசி து³க்³க³தீதி அத்தோ².
9.Catunnavuteito kappeti ito kappato catunavute kappe yaṃ kammaṃ akariṃ akāsiṃ, tadā tato paṭṭhāya puññabalena kañci duggatiṃ nābhijānāmi, na anubhūtapubbā kāci duggatīti attho.
10. தேஸத்ததிம்ஹிதோ கப்பேதி இதோ கப்பதோ தேஸத்ததிகப்பே. இந்த³னாமா தயோ ஜனாதி இந்த³னாமகா தயோ சக்கவத்திராஜானோ ஏகஸ்மிங் கப்பே தீஸு ஜாதீஸு இந்தோ³ நாம சக்கவத்தீ ராஜா அஹோஸிந்தி அத்தோ². த்³வேஸத்ததிம்ஹிதோ கப்பேதி இதோ த்³வேஸத்ததிகப்பே. ஸுமனநாமகா தயோ ஜனா திக்க²த்துங் சக்கவத்திராஜானோ அஹேஸுங்.
10.Tesattatimhito kappeti ito kappato tesattatikappe. Indanāmā tayo janāti indanāmakā tayo cakkavattirājāno ekasmiṃ kappe tīsu jātīsu indo nāma cakkavattī rājā ahosinti attho. Dvesattatimhitokappeti ito dvesattatikappe. Sumananāmakā tayo janā tikkhattuṃ cakkavattirājāno ahesuṃ.
11. ஸமஸத்ததிதோ கப்பேதி இதோ கப்பதோ அனூனாதி⁴கே ஸத்ததிமே கப்பே வருணனாமகா வருணோ சக்கவத்தீதி ஏவங்னாமகா தயோ சக்கவத்திராஜானோ சக்கரதனஸம்பன்னா சதுதீ³பம்ஹி இஸ்ஸரா அஹேஸுந்தி அத்தோ². ஸேஸங் ஸுவிஞ்ஞெய்யமேவாதி.
11.Samasattatito kappeti ito kappato anūnādhike sattatime kappe varuṇanāmakā varuṇo cakkavattīti evaṃnāmakā tayo cakkavattirājāno cakkaratanasampannā catudīpamhi issarā ahesunti attho. Sesaṃ suviññeyyamevāti.
ஸீஹாஸனதா³யகத்தே²ரஅபதா³னவண்ணனா ஸமத்தா.
Sīhāsanadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. ஸீஹாஸனதா³யகத்தே²ரஅபதா³னங் • 1. Sīhāsanadāyakattheraapadānaṃ
