| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
5. ஸீஹாஸனதா³யகத்தே²ரஅபதா³னவண்ணனா
5. Sīhāsanadāyakattheraapadānavaṇṇanā
நிப்³பு³தே லோகனாத²ம்ஹீதிஆதி³கங் ஆயஸ்மதோ ஸீஹாஸனதா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே நிப்³பா³னாதி⁴க³மத்தா²ய கதபுஞ்ஞூபசயோ பது³முத்தரஸ்ஸ ப⁴க³வதோ காலே க³ஹபதிகுலே நிப்³ப³த்தோ விஞ்ஞுதங் பத்தோ ஸத்து² த⁴ம்மதே³ஸனங் ஸுத்வா ரதனத்தயே பஸன்னோ தஸ்மிங் ப⁴க³வதி பரினிப்³பு³தே ஸத்தஹி ரதனேஹி க²சிதங் ஸீஹாஸனங் காராபெத்வா போ³தி⁴ருக்க²ங் பூஜேஸி, ப³ஹூஹி மாலாக³ந்த⁴தூ⁴பேஹி ச பூஜேஸி.
Nibbutelokanāthamhītiādikaṃ āyasmato sīhāsanadāyakattherassa apadānaṃ. Ayampi purimabuddhesu katādhikāro tattha tattha bhave nibbānādhigamatthāya katapuññūpacayo padumuttarassa bhagavato kāle gahapatikule nibbatto viññutaṃ patto satthu dhammadesanaṃ sutvā ratanattaye pasanno tasmiṃ bhagavati parinibbute sattahi ratanehi khacitaṃ sīhāsanaṃ kārāpetvā bodhirukkhaṃ pūjesi, bahūhi mālāgandhadhūpehi ca pūjesi.
21. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா ஸப்³ப³த்த² பூஜிதோ இமஸ்மிங் பு³த்³து⁴ப்பாதே³ ஸாவத்தி²யங் குலகே³ஹே நிப்³ப³த்தோ வுத்³தி⁴ப்பத்தோ க⁴ராவாஸங் வஸந்தோ ஸத்து² த⁴ம்மதே³ஸனங் ஸுத்வா பஸன்னமானஸோ ஞாதிவக்³க³ங் பஹாய பப்³ப³ஜிதோ நசிரஸ்ஸேவ அரஹா ஹுத்வா புப்³பூ³பசிதகுஸலஸம்பா⁴ரங் ஸரித்வா ஸஞ்ஜாதஸோமனஸ்ஸோ புப்³ப³சரிதாபதா³னங் பகாஸெந்தோ நிப்³பு³தே லோகனாத²ம்ஹீதிஆதி³மாஹ. தத்த² ஸீஹாஸனமதா³ஸஹந்தி ஸீஹரூபஹிரஞ்ஞஸுவண்ணரதனேஹி க²சிதங் ஆஸனங் ஸீஹாஸனங், ஸீஹஸ்ஸ வா அபீ⁴தஸ்ஸ ப⁴க³வதோ நிஸின்னாரஹங், ஸீஹங் வா ஸெட்ட²ங் உத்தமங் ஆஸனந்தி ஸீஹாஸனங், தங் அஹங் அதா³ஸிங், போ³தி⁴ருக்க²ங் பூஜேஸிந்தி அத்தோ². ஸேஸங் ஸுவிஞ்ஞெய்யமேவாதி.
21. So tena puññena devamanussesu saṃsaranto ubhayasampattiyo anubhavitvā sabbattha pūjito imasmiṃ buddhuppāde sāvatthiyaṃ kulagehe nibbatto vuddhippatto gharāvāsaṃ vasanto satthu dhammadesanaṃ sutvā pasannamānaso ñātivaggaṃ pahāya pabbajito nacirasseva arahā hutvā pubbūpacitakusalasambhāraṃ saritvā sañjātasomanasso pubbacaritāpadānaṃ pakāsento nibbute lokanāthamhītiādimāha. Tattha sīhāsanamadāsahanti sīharūpahiraññasuvaṇṇaratanehi khacitaṃ āsanaṃ sīhāsanaṃ, sīhassa vā abhītassa bhagavato nisinnārahaṃ, sīhaṃ vā seṭṭhaṃ uttamaṃ āsananti sīhāsanaṃ, taṃ ahaṃ adāsiṃ, bodhirukkhaṃ pūjesinti attho. Sesaṃ suviññeyyamevāti.
ஸீஹாஸனதா³யகத்தே²ரஅபதா³னவண்ணனா ஸமத்தா.
Sīhāsanadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 5. ஸீஹாஸனதா³யகத்தே²ரஅபதா³னங் • 5. Sīhāsanadāyakattheraapadānaṃ
