| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
5. සීහාසනදායකත්‌ථෙරඅපදානවණ්‌ණනා
5. Sīhāsanadāyakattheraapadānavaṇṇanā
නිබ්‌බුතෙ ලොකනාථම්‌හීතිආදිකං ආයස්‌මතො සීහාසනදායකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ නිබ්‌බානාධිගමත්‌ථාය කතපුඤ්‌ඤූපචයො පදුමුත්‌තරස්‌ස භගවතො කාලෙ ගහපතිකුලෙ නිබ්‌බත්‌තො විඤ්‌ඤුතං පත්‌තො සත්‌ථු ධම්‌මදෙසනං සුත්‌වා රතනත්‌තයෙ පසන්‌නො තස්‌මිං භගවති පරිනිබ්‌බුතෙ සත්‌තහි රතනෙහි ඛචිතං සීහාසනං කාරාපෙත්‌වා බොධිරුක්‌ඛං පූජෙසි, බහූහි මාලාගන්‌ධධූපෙහි ච පූජෙසි.
Nibbutelokanāthamhītiādikaṃ āyasmato sīhāsanadāyakattherassa apadānaṃ. Ayampi purimabuddhesu katādhikāro tattha tattha bhave nibbānādhigamatthāya katapuññūpacayo padumuttarassa bhagavato kāle gahapatikule nibbatto viññutaṃ patto satthu dhammadesanaṃ sutvā ratanattaye pasanno tasmiṃ bhagavati parinibbute sattahi ratanehi khacitaṃ sīhāsanaṃ kārāpetvā bodhirukkhaṃ pūjesi, bahūhi mālāgandhadhūpehi ca pūjesi.
21. සො තෙන පුඤ්‌ඤෙන දෙවමනුස්‌සෙසු සංසරන්‌තො උභයසම්‌පත්‌තියො අනුභවිත්‌වා සබ්‌බත්‌ථ පූජිතො ඉමස්‌මිං බුද්‌ධුප්‌පාදෙ සාවත්‌ථියං කුලගෙහෙ නිබ්‌බත්‌තො වුද්‌ධිප්‌පත්‌තො ඝරාවාසං වසන්‌තො සත්‌ථු ධම්‌මදෙසනං සුත්‌වා පසන්‌නමානසො ඤාතිවග්‌ගං පහාය පබ්‌බජිතො නචිරස්‌සෙව අරහා හුත්‌වා පුබ්‌බූපචිතකුසලසම්‌භාරං සරිත්‌වා සඤ්‌ජාතසොමනස්‌සො පුබ්‌බචරිතාපදානං පකාසෙන්‌තො නිබ්‌බුතෙ ලොකනාථම්‌හීතිආදිමාහ. තත්‌ථ සීහාසනමදාසහන්‌ති සීහරූපහිරඤ්‌ඤසුවණ්‌ණරතනෙහි ඛචිතං ආසනං සීහාසනං, සීහස්‌ස වා අභීතස්‌ස භගවතො නිසින්‌නාරහං, සීහං වා සෙට්‌ඨං උත්‌තමං ආසනන්‌ති සීහාසනං, තං අහං අදාසිං, බොධිරුක්‌ඛං පූජෙසින්‌ති අත්‌ථො. සෙසං සුවිඤ්‌ඤෙය්‍යමෙවාති.
21. So tena puññena devamanussesu saṃsaranto ubhayasampattiyo anubhavitvā sabbattha pūjito imasmiṃ buddhuppāde sāvatthiyaṃ kulagehe nibbatto vuddhippatto gharāvāsaṃ vasanto satthu dhammadesanaṃ sutvā pasannamānaso ñātivaggaṃ pahāya pabbajito nacirasseva arahā hutvā pubbūpacitakusalasambhāraṃ saritvā sañjātasomanasso pubbacaritāpadānaṃ pakāsento nibbute lokanāthamhītiādimāha. Tattha sīhāsanamadāsahanti sīharūpahiraññasuvaṇṇaratanehi khacitaṃ āsanaṃ sīhāsanaṃ, sīhassa vā abhītassa bhagavato nisinnārahaṃ, sīhaṃ vā seṭṭhaṃ uttamaṃ āsananti sīhāsanaṃ, taṃ ahaṃ adāsiṃ, bodhirukkhaṃ pūjesinti attho. Sesaṃ suviññeyyamevāti.
සීහාසනදායකත්‌ථෙරඅපදානවණ්‌ණනා සමත්‌තා.
Sīhāsanadāyakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 5. සීහාසනදායකත්‌ථෙරඅපදානං • 5. Sīhāsanadāyakattheraapadānaṃ
