| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4-5. ஸீஹஸேனாபதிஸுத்தாதி³வண்ணனா
4-5. Sīhasenāpatisuttādivaṇṇanā
34-35. சதுத்தே² ஸந்தி³ட்டி²கந்தி அஸம்பராயிகதாய ஸாமங் த³ட்ட²ப்³ப³ங். ஸயங் அனுப⁴விதப்³ப³ங் அத்தபச்சக்க²ங் தி³ட்ட²த⁴ம்மிகந்தி அத்தோ². ந ஸத்³தா⁴மத்தகேனேவ திட்ட²தீதி ‘‘தா³னங் நாம ஸாது⁴ ஸுந்த³ரங், பு³த்³தா⁴தீ³ஹி பண்டி³தேஹி பஸத்த²’’ந்தி ஏவங் ஸத்³தா⁴மத்தகேனேவ ந திட்ட²தி. யங் தா³னங் தே³தீதி யங் தெ³ய்யத⁴ம்மங் பரஸ்ஸ தே³தி. தஸ்ஸ பதி ஹுத்வாதி தப்³பி³ஸயங் லோப⁴ங் ஸுட்டு² அபி⁴ப⁴வந்தோ தஸ்ஸ அதி⁴பதி ஹுத்வா தே³தி. தேன அனதி⁴ப⁴வனீயத்தா ந தா³ஸோ ந ஸஹாயோதி. தத்த² தது³ப⁴யங் அன்வயதோ ப்³யதிரேகதோ ச த³ஸ்ஸேதுங் ‘‘யோ ஹீ’’திஆதி³ வுத்தங். தா³ஸோ ஹுத்வா தே³தி தண்ஹாதா³ஸப்³யஸ்ஸ உபக³தத்தா. ஸஹாயோ ஹுத்வா தே³தி தஸ்ஸ பியபா⁴வாவிஸ்ஸஜ்ஜனதோ. ஸாமீ ஹுத்வா தே³தி தத்த² தண்ஹாதா³ஸப்³யதோ அத்தானங் மோசெத்வா அபி⁴பு⁴ய்ய பவத்தனதோ. அத² வா யோ தா³னஸீலதாய தா³யகோ புக்³க³லோ, ஸோ தா³னே பவத்திபே⁴தே³ன தா³னதா³ஸோ, தா³னஸஹாயோ, தா³னபதீதி திப்பகாரோ ஹோதி. தத³ஸ்ஸ திப்பகாரதங் விப⁴ஜித்வா த³ஸ்ஸேதுங் ‘‘யோ ஹீ’’திஆதி³ வுத்தங். தா³தப்³ப³ட்டே²ன தா³னங், அன்னபானாதி³.
34-35. Catutthe sandiṭṭhikanti asamparāyikatāya sāmaṃ daṭṭhabbaṃ. Sayaṃ anubhavitabbaṃ attapaccakkhaṃ diṭṭhadhammikanti attho. Na saddhāmattakeneva tiṭṭhatīti ‘‘dānaṃ nāma sādhu sundaraṃ, buddhādīhi paṇḍitehi pasattha’’nti evaṃ saddhāmattakeneva na tiṭṭhati. Yaṃ dānaṃ detīti yaṃ deyyadhammaṃ parassa deti. Tassa pati hutvāti tabbisayaṃ lobhaṃ suṭṭhu abhibhavanto tassa adhipati hutvā deti. Tena anadhibhavanīyattā na dāso na sahāyoti. Tattha tadubhayaṃ anvayato byatirekato ca dassetuṃ ‘‘yo hī’’tiādi vuttaṃ. Dāso hutvā deti taṇhādāsabyassa upagatattā. Sahāyo hutvā deti tassa piyabhāvāvissajjanato. Sāmī hutvā deti tattha taṇhādāsabyato attānaṃ mocetvā abhibhuyya pavattanato. Atha vā yo dānasīlatāya dāyako puggalo, so dāne pavattibhedena dānadāso, dānasahāyo, dānapatīti tippakāro hoti. Tadassa tippakārataṃ vibhajitvā dassetuṃ ‘‘yo hī’’tiādi vuttaṃ. Dātabbaṭṭhena dānaṃ, annapānādi.
தத்த² யங் அத்தனா பரிபு⁴ஞ்ஜதி, தண்ஹாதி⁴பன்னதாய தஸ்ஸ வஸேன வத்தனதோ தா³ஸோ விய ஹோதி. யங் பரேஸங் தீ³யதி, தத்தா²பி அன்னபானஸாமஞ்ஞேன இத³ங் வுத்தங் ‘‘தா³னஸங்கா²தஸ்ஸ தெ³ய்யத⁴ம்மஸ்ஸ தா³ஸோ ஹுத்வா’’தி. ஸஹாயோ ஹுத்வா தே³தி அத்தனா பரிபு⁴ஞ்ஜிதப்³ப³ஸ்ஸ பரேஸங் தா³தப்³ப³ஸ்ஸ ச ஸமஸமங் ட²பனதோ. பதி ஹுத்வா தே³தி ஸயங் தெ³ய்யத⁴ம்மஸ்ஸ வஸே அவத்தித்வா தஸ்ஸ அத்தனோ வஸே வத்தாபனதோ. அபரோ நயோ – யோ அத்தனா பணீதங் பரிபு⁴ஞ்ஜித்வா பரேஸங் நிஹீனங் தே³தி, ஸோ தா³னதா³ஸோ நாம தன்னிமித்தனிஹீனபா⁴வாபத்திதோ. யோ யாதி³ஸங் அத்தனா பரிபு⁴ஞ்ஜதி, தாதி³ஸமேவ பரேஸங் தே³தி, ஸோ தா³னஸஹாயோ நாம தன்னிமித்தஹீனாதி⁴கபா⁴வவிவஜ்ஜனேன ஸதி³ஸபா⁴வாபத்திதோ. யோ அத்தனா நிஹீனங் பரிபு⁴ஞ்ஜித்வா பரேஸங் பணீதங் தே³தி, ஸோ தா³னபதி நாம தன்னிமித்தஸெட்ட²பா⁴வாபத்திதோ.
Tattha yaṃ attanā paribhuñjati, taṇhādhipannatāya tassa vasena vattanato dāso viya hoti. Yaṃ paresaṃ dīyati, tatthāpi annapānasāmaññena idaṃ vuttaṃ ‘‘dānasaṅkhātassa deyyadhammassa dāso hutvā’’ti. Sahāyo hutvā deti attanā paribhuñjitabbassa paresaṃ dātabbassa ca samasamaṃ ṭhapanato. Pati hutvā deti sayaṃ deyyadhammassa vase avattitvā tassa attano vase vattāpanato. Aparo nayo – yo attanā paṇītaṃ paribhuñjitvā paresaṃ nihīnaṃ deti, so dānadāso nāma tannimittanihīnabhāvāpattito. Yo yādisaṃ attanā paribhuñjati, tādisameva paresaṃ deti, so dānasahāyo nāma tannimittahīnādhikabhāvavivajjanena sadisabhāvāpattito. Yo attanā nihīnaṃ paribhuñjitvā paresaṃ paṇītaṃ deti, so dānapati nāma tannimittaseṭṭhabhāvāpattito.
நித்தேஜபூ⁴தோ தேஜஹானிப்பத்தியா. ஸஹ ப்³யதி க³ச்ச²தீதி ஸஹப்³யோ, ஸஹபவத்தனகோ, தஸ்ஸ பா⁴வோ ஸஹப்³யதா, ஸஹபவத்தீதி ஆஹ ‘‘ஸஹபா⁴வங் ஏகீபா⁴வங் க³தா’’தி. அஸிதஸ்ஸாதி வா அப³ந்த⁴ஸ்ஸ, தண்ஹாப³ந்த⁴னேன அப³ந்த⁴ஸ்ஸாதி அத்தோ². பஞ்சமங் உத்தானமேவ.
Nittejabhūto tejahānippattiyā. Saha byati gacchatīti sahabyo, sahapavattanako, tassa bhāvo sahabyatā, sahapavattīti āha ‘‘sahabhāvaṃ ekībhāvaṃ gatā’’ti. Asitassāti vā abandhassa, taṇhābandhanena abandhassāti attho. Pañcamaṃ uttānameva.
ஸீஹஸேனாபதிஸுத்தாதி³வண்ணனா நிட்டி²தா.
Sīhasenāpatisuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
4. ஸீஹஸேனாபதிஸுத்தங் • 4. Sīhasenāpatisuttaṃ
5. தா³னானிஸங்ஸஸுத்தங் • 5. Dānānisaṃsasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
4. ஸீஹஸேனாபதிஸுத்தவண்ணனா • 4. Sīhasenāpatisuttavaṇṇanā
5. தா³னானிஸங்ஸஸுத்தவண்ணனா • 5. Dānānisaṃsasuttavaṇṇanā
