| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. ஸீஹஸேனாபதிஸுத்தவண்ணனா
4. Sīhasenāpatisuttavaṇṇanā
34. சதுத்தே² ஸந்தி³ட்டி²கந்தி ஸாமங் பஸ்ஸிதப்³ப³கங். தா³யகோதி தா³னஸூரோ. ந ஸோ ஸத்³தா⁴மத்தகேனேவ திட்ட²தி, பரிச்சஜிதும்பி ஸக்கோதீதி அத்தோ². தா³னபதீதி யங் தா³னங் தே³தி, தஸ்ஸ பதி ஹுத்வா தே³தி, ந தா³ஸோ, ந ஸஹாயோ. யோ ஹி அத்தனா மது⁴ரங் பு⁴ஞ்ஜதி, பரேஸங் அமது⁴ரங் தே³தி, ஸோ தா³னஸங்கா²தஸ்ஸ தெ³ய்யத⁴ம்மஸ்ஸ தா³ஸோ ஹுத்வா தே³தி. யோ யங் அத்தனா பு⁴ஞ்ஜதி, ததே³வ தே³தி, ஸோ ஸஹாயோ ஹுத்வா தே³தி. யோ பன அத்தனா யேன கேனசி யாபேதி, பரேஸங் மது⁴ரங் தே³தி, ஸோ பதி ஜெட்ட²கோ ஸாமீ ஹுத்வா தே³தி. தாதி³ஸங் ஸந்தா⁴ய வுத்தங் – ‘‘தா³னபதீ’’தி.
34. Catutthe sandiṭṭhikanti sāmaṃ passitabbakaṃ. Dāyakoti dānasūro. Na so saddhāmattakeneva tiṭṭhati, pariccajitumpi sakkotīti attho. Dānapatīti yaṃ dānaṃ deti, tassa pati hutvā deti, na dāso, na sahāyo. Yo hi attanā madhuraṃ bhuñjati, paresaṃ amadhuraṃ deti, so dānasaṅkhātassa deyyadhammassa dāso hutvā deti. Yo yaṃ attanā bhuñjati, tadeva deti, so sahāyo hutvā deti. Yo pana attanā yena kenaci yāpeti, paresaṃ madhuraṃ deti, so pati jeṭṭhako sāmī hutvā deti. Tādisaṃ sandhāya vuttaṃ – ‘‘dānapatī’’ti.
அமங்குபூ⁴தோதி ந நித்தேஜபூ⁴தோ. விஸாரதோ³தி ஞாணஸோமனஸ்ஸப்பத்தோ. ஸஹப்³யதங் க³தாதி ஸஹபா⁴வங் ஏகீபா⁴வங் க³தா. கதாவகாஸாதி யேன கம்மேன தத்த² அவகாஸோ ஹோதி, தஸ்ஸ கதத்தா கதாவகாஸா. தங் பன யஸ்மா குஸலமேவ ஹோதி, தஸ்மா கதகுஸலாதி வுத்தங். மோத³ரேதி மோத³ந்தி பமோத³ந்தி. அஸிதஸ்ஸாதி அனிஸ்ஸிதஸ்ஸ ததா²க³தஸ்ஸ. தாதி³னோதி தாதி³லக்க²ணங் பத்தஸ்ஸ.
Amaṅkubhūtoti na nittejabhūto. Visāradoti ñāṇasomanassappatto. Sahabyataṃ gatāti sahabhāvaṃ ekībhāvaṃ gatā. Katāvakāsāti yena kammena tattha avakāso hoti, tassa katattā katāvakāsā. Taṃ pana yasmā kusalameva hoti, tasmā katakusalāti vuttaṃ. Modareti modanti pamodanti. Asitassāti anissitassa tathāgatassa. Tādinoti tādilakkhaṇaṃ pattassa.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. ஸீஹஸேனாபதிஸுத்தங் • 4. Sīhasenāpatisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4-5. ஸீஹஸேனாபதிஸுத்தாதி³வண்ணனா • 4-5. Sīhasenāpatisuttādivaṇṇanā
