| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๔. สีหเสนาปติสุตฺตวณฺณนา
4. Sīhasenāpatisuttavaṇṇanā
๓๔. จตุเตฺถ สนฺทิฎฺฐิกนฺติ สามํ ปสฺสิตพฺพกํฯ ทายโกติ ทานสูโรฯ น โส สทฺธามตฺตเกเนว ติฎฺฐติ, ปริจฺจชิตุมฺปิ สโกฺกตีติ อโตฺถฯ ทานปตีติ ยํ ทานํ เทติ, ตสฺส ปติ หุตฺวา เทติ, น ทาโส, น สหาโยฯ โย หิ อตฺตนา มธุรํ ภุญฺชติ, ปเรสํ อมธุรํ เทติ, โส ทานสงฺขาตสฺส เทยฺยธมฺมสฺส ทาโส หุตฺวา เทติฯ โย ยํ อตฺตนา ภุญฺชติ, ตเทว เทติ, โส สหาโย หุตฺวา เทติฯ โย ปน อตฺตนา เยน เกนจิ ยาเปติ, ปเรสํ มธุรํ เทติ, โส ปติ เชฎฺฐโก สามี หุตฺวา เทติฯ ตาทิสํ สนฺธาย วุตฺตํ – ‘‘ทานปตี’’ติฯ
34. Catutthe sandiṭṭhikanti sāmaṃ passitabbakaṃ. Dāyakoti dānasūro. Na so saddhāmattakeneva tiṭṭhati, pariccajitumpi sakkotīti attho. Dānapatīti yaṃ dānaṃ deti, tassa pati hutvā deti, na dāso, na sahāyo. Yo hi attanā madhuraṃ bhuñjati, paresaṃ amadhuraṃ deti, so dānasaṅkhātassa deyyadhammassa dāso hutvā deti. Yo yaṃ attanā bhuñjati, tadeva deti, so sahāyo hutvā deti. Yo pana attanā yena kenaci yāpeti, paresaṃ madhuraṃ deti, so pati jeṭṭhako sāmī hutvā deti. Tādisaṃ sandhāya vuttaṃ – ‘‘dānapatī’’ti.
อมงฺกุภูโตติ น นิเตฺตชภูโตฯ วิสารโทติ ญาณโสมนสฺสปฺปโตฺตฯ สหพฺยตํ คตาติ สหภาวํ เอกีภาวํ คตาฯ กตาวกาสาติ เยน กเมฺมน ตตฺถ อวกาโส โหติ, ตสฺส กตตฺตา กตาวกาสาฯ ตํ ปน ยสฺมา กุสลเมว โหติ, ตสฺมา กตกุสลาติ วุตฺตํฯ โมทเรติ โมทนฺติ ปโมทนฺติฯ อสิตสฺสาติ อนิสฺสิตสฺส ตถาคตสฺสฯ ตาทิโนติ ตาทิลกฺขณํ ปตฺตสฺสฯ
Amaṅkubhūtoti na nittejabhūto. Visāradoti ñāṇasomanassappatto. Sahabyataṃ gatāti sahabhāvaṃ ekībhāvaṃ gatā. Katāvakāsāti yena kammena tattha avakāso hoti, tassa katattā katāvakāsā. Taṃ pana yasmā kusalameva hoti, tasmā katakusalāti vuttaṃ. Modareti modanti pamodanti. Asitassāti anissitassa tathāgatassa. Tādinoti tādilakkhaṇaṃ pattassa.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๔. สีหเสนาปติสุตฺตํ • 4. Sīhasenāpatisuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๔-๕. สีหเสนาปติสุตฺตาทิวณฺณนา • 4-5. Sīhasenāpatisuttādivaṇṇanā
