| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
සීහසෙනාපතිවත්‌ථුආදිකථාවණ්‌ණනා
Sīhasenāpativatthuādikathāvaṇṇanā
290. සන්‌ධාගාරෙති රාජකිච්‌චස්‌ස සන්‌ධාරණත්‌ථාය නිච්‌ඡිද්‌දං කත්‌වා විචාරණත්‌ථාය කතමහාසභාය. ගමිකාභිසඞ්‌ඛාරොති ගමනෙ වායාමො. ධම්‌මස්‌ස ච අනුධම්‌මන්‌ති තුම්‌හෙහි වුත්‌තස්‌ස කාරණස්‌ස අනුකාරණං, තුම්‌හෙහි වුත්‌තස්‌ස අත්‌ථස්‌ස අනුරූපමෙවාති අධිප්‌පායො. සහධම්‌මිකො වාදානුවාදොති පරෙහි වුත්‌තකාරණෙන සකාරණො හුත්‌වා තුම්‌හාකං වාදො වා ඉතො පරං තස්‌ස අනුවාදො වා. කොචි අප්‌පමත්‌තකොපි ගාරය්‌හං ඨානං න ආගච්‌ඡතීති කිං තව වාදෙ ගාරය්‌හකාරණං නත්‌ථීති වුත්‌තං හොති.
290.Sandhāgāreti rājakiccassa sandhāraṇatthāya nicchiddaṃ katvā vicāraṇatthāya katamahāsabhāya. Gamikābhisaṅkhāroti gamane vāyāmo. Dhammassa ca anudhammanti tumhehi vuttassa kāraṇassa anukāraṇaṃ, tumhehi vuttassa atthassa anurūpamevāti adhippāyo. Sahadhammiko vādānuvādoti parehi vuttakāraṇena sakāraṇo hutvā tumhākaṃ vādo vā ito paraṃ tassa anuvādo vā. Koci appamattakopi gārayhaṃ ṭhānaṃ na āgacchatīti kiṃ tava vāde gārayhakāraṇaṃ natthīti vuttaṃ hoti.
293. අනුවිච්‌චකාරන්‌ති අනුවිදිතාකාරං. රතනත්‌තයස්‌ස සරණගමනාදිකිරියං කරොති. සහසා කත්‌වා මා පච්‌ඡා විප්‌පටිසාරී අහොසීති අත්‌ථො. පටාකං පරිහරෙය්‍යුන්‌ති ධජපටාකං උක්‌ඛිපිත්‌වා ‘‘ඊදිසො අම්‌හාකං සරණං ගතො සාවකො ජාතො’’ති නගරෙ ඝොසෙන්‌තා ආහිණ්‌ඩන්‌ති.
293.Anuviccakāranti anuviditākāraṃ. Ratanattayassa saraṇagamanādikiriyaṃ karoti. Sahasā katvā mā pacchā vippaṭisārī ahosīti attho. Paṭākaṃ parihareyyunti dhajapaṭākaṃ ukkhipitvā ‘‘īdiso amhākaṃ saraṇaṃ gato sāvako jāto’’ti nagare ghosentā āhiṇḍanti.
294. නිමිත්‌තකම්‌මස්‌සාති මංසඛාදනනිමිත්‌තෙන උප්‌පන්‌නපාණාතිපාතකම්‌මස්‌ස.
294.Nimittakammassāti maṃsakhādananimittena uppannapāṇātipātakammassa.
සීහසෙනාපතිවත්‌ථුආදිකථාවණ්‌ණනා නිට්‌ඨිතා.
Sīhasenāpativatthuādikathāvaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 178. සීහසෙනාපතිවත්‌ථු • 178. Sīhasenāpativatthu
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / සීහසෙනාපතිවත්‌ථුආදිකථා • Sīhasenāpativatthuādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සීහසෙනාපතිවත්‌ථුකථාවණ්‌ණනා • Sīhasenāpativatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 178. සීහසෙනාපතිවත්‌ථුකථා • 178. Sīhasenāpativatthukathā
