| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
3. сийхасуд̇д̇аван̣н̣анаа
3. Sīhasuttavaṇṇanā
33. д̇ад̇ияз сийход̇и жад̇д̇ааро сийхаа – д̇ин̣асийхо, гаал̣асийхо, бан̣д̣усийхо, гзсарасийход̇и. д̇зсу д̇ин̣асийхо габод̇аван̣н̣аг̇аависад̣̇исо д̇ин̣абхагко жа ход̇и. гаал̣асийхо гаал̣аг̇аависад̣̇исо д̇ин̣абхагкоязва. бан̣д̣усийхо бан̣д̣убалаасаван̣н̣аг̇аависад̣̇исо мам̣сабхагко. гзсарасийхо лаакаабаригаммагад̇знзва мукзна аг̇г̇анан̇г̇удтзна жад̇уухи жа баад̣̇абарияанд̇зхи саманнааг̇ад̇о, мад̇т̇агад̇обисса бадтааяа лаакаад̇уулигааяа гад̇аа вияа д̇иссо рааж̇ияо бидтимаж̇жхзна г̇анд̇ваа анд̇арасад̇т̇имхи д̣̇агкин̣аавад̇д̇аа худ̇ваа тид̇аа. канд̇хз банасса сад̇асахассаг̇гханигагамб̣алабаригкзбо вияа гзсарабхааро ход̇и, авасзсадтаанам̣ барисуд̣̇д̇хасаалибин̣д̣асан̇кажун̣н̣абин̣д̣аван̣н̣ам̣ ход̇и. имзсу жад̇уусу сийхзсу аяам̣ гзсарасийхо ид̇ха ад̇хиббзд̇о.
33. Tatiye sīhoti cattāro sīhā – tiṇasīho, kāḷasīho, paṇḍusīho, kesarasīhoti. Tesu tiṇasīho kapotavaṇṇagāvisadiso tiṇabhakkho ca hoti. Kāḷasīho kāḷagāvisadiso tiṇabhakkhoyeva. Paṇḍusīho paṇḍupalāsavaṇṇagāvisadiso maṃsabhakkho. Kesarasīho lākhāparikammakateneva mukhena agganaṅguṭṭhena catūhi ca pādapariyantehi samannāgato, matthakatopissa paṭṭhāya lākhātūlikāya katā viya tisso rājiyo piṭṭhimajjhena gantvā antarasatthimhi dakkhiṇāvattā hutvā ṭhitā. Khandhe panassa satasahassagghanikakambalaparikkhepo viya kesarabhāro hoti, avasesaṭṭhānaṃ parisuddhasālipiṇḍasaṅkhacuṇṇapiṇḍavaṇṇaṃ hoti. Imesu catūsu sīhesu ayaṃ kesarasīho idha adhippeto.
миг̇арааж̇аад̇и саб̣б̣амиг̇аг̇ан̣асса рааж̇аа. аасаяаад̇и васанадтаанад̇о, суван̣н̣аг̇ухад̇о ваа раж̇ад̇аман̣ипалигаманосилааг̇ухад̇о ваа нигкамад̇ийд̇и вуд̇д̇ам̣ ход̇и. нигкамамаано банзса жад̇уухи гааран̣зхи нигкамад̇и анд̇хагаарабийл̣ид̇о ваа аалогад̇т̇ааяа, ужжаарабассаавабийл̣ид̇о ваа д̇зсам̣ виссаж̇ж̇анад̇т̇ааяа, ж̇игхажчаабийл̣ид̇о ваа г̇ожарад̇т̇ааяа, самбхавабийл̣ид̇о ваа ассад̣̇д̇хаммабадисзванад̇т̇ааяа. ид̇ха бана г̇ожарад̇т̇ааяа нигкаманд̇о ад̇хиббзд̇о.
Migarājāti sabbamigagaṇassa rājā. Āsayāti vasanaṭṭhānato, suvaṇṇaguhato vā rajatamaṇiphalikamanosilāguhato vā nikkhamatīti vuttaṃ hoti. Nikkhamamāno panesa catūhi kāraṇehi nikkhamati andhakārapīḷito vā ālokatthāya, uccārapassāvapīḷito vā tesaṃ vissajjanatthāya, jighacchāpīḷito vā gocaratthāya, sambhavapīḷito vā assaddhammapaṭisevanatthāya. Idha pana gocaratthāya nikkhamanto adhippeto.
виж̇амбхад̇ийд̇и суван̣н̣ад̇алз ваа раж̇ад̇аман̣ипалигаманосилаад̇алаанам̣ ваа ан̃н̃ад̇арасмим̣ д̣̇вз бажчимабаад̣̇з самам̣ бад̇идтаабзд̇ваа буримабаад̣̇з бурад̇о басаарзд̇ваа сарийрасса бажчаабхааг̇ам̣ аагад̣дхид̇ваа буримабхааг̇ам̣ абхихарид̇ваа бидтим̣ наамзд̇ваа г̇ийвам̣ угкибид̇ваа асанисад̣̇д̣̇ам̣ гаронд̇о вияа наасабудаани бот̇зд̇ваа сарийралаг̇г̇ам̣ раж̇ам̣ вид̇хунанд̇о виж̇амбхад̇и. виж̇амбханабхуумияан̃жа бана д̇арун̣аважчаго вияа абараабарам̣ ж̇авад̇и, ж̇авад̇о банасса сарийрам̣ анд̇хагаарз бариб̣бхаманд̇ам̣ алаад̇ам̣ вияа кааяад̇и.
Vijambhatīti suvaṇṇatale vā rajatamaṇiphalikamanosilātalānaṃ vā aññatarasmiṃ dve pacchimapāde samaṃ patiṭṭhāpetvā purimapāde purato pasāretvā sarīrassa pacchābhāgaṃ ākaḍḍhitvā purimabhāgaṃ abhiharitvā piṭṭhiṃ nāmetvā gīvaṃ ukkhipitvā asanisaddaṃ karonto viya nāsapuṭāni pothetvā sarīralaggaṃ rajaṃ vidhunanto vijambhati. Vijambhanabhūmiyañca pana taruṇavacchako viya aparāparaṃ javati, javato panassa sarīraṃ andhakāre paribbhamantaṃ alātaṃ viya khāyati.
анувилогзд̇ийд̇и гасмаа анувилогзд̇и? бараануд̣̇д̣̇аяад̇ааяа. д̇асмим̣ гира сийханаад̣̇ам̣ над̣̇анд̇з бабаад̇ааваадаад̣̇ийсу висамадтаанзсу жаранд̇аа хад̇т̇иг̇оган̣н̣амахим̣саад̣̇аяо баан̣аа бабаад̇зби ааваадзби бад̇анд̇и, д̇зсам̣ ануд̣̇д̣̇аяааяа анувилогзд̇и. гим̣ банасса луд̣̇д̣̇асса барамам̣сакаад̣̇ино ануд̣̇д̣̇аяаа наама ад̇т̇ийд̇и? аама ад̇т̇и. д̇ат̇аа хи ‘‘гим̣ мз б̣ахуухи гхаад̇ид̇зхий’’д̇и ад̇д̇ано г̇ожарад̇т̇ааяааби куд̣̇д̣̇агз баан̣з на г̇ан̣хаад̇и. звам̣ ануд̣̇д̣̇аяам̣ гарод̇и, вуд̇д̇амби жзд̇ам̣ – ‘‘маахам̣ куд̣̇д̣̇агз баан̣з висамаг̇ад̇з сан̇гхаад̇ам̣ аабаад̣̇зси’’нд̇и (а. ни. 10.21).
Anuviloketīti kasmā anuviloketi? Parānuddayatāya. Tasmiṃ kira sīhanādaṃ nadante papātāvāṭādīsu visamaṭṭhānesu carantā hatthigokaṇṇamahiṃsādayo pāṇā papātepi āvāṭepi patanti, tesaṃ anuddayāya anuviloketi. Kiṃ panassa luddassa paramaṃsakhādino anuddayā nāma atthīti? Āma atthi. Tathā hi ‘‘kiṃ me bahūhi ghātitehī’’ti attano gocaratthāyāpi khuddake pāṇe na gaṇhāti. Evaṃ anuddayaṃ karoti, vuttampi cetaṃ – ‘‘māhaṃ khuddake pāṇe visamagate saṅghātaṃ āpādesi’’nti (a. ni. 10.21).
сийханаад̣̇ам̣ над̣̇ад̇ийд̇и д̇игкад̇д̇ум̣ д̇аава абхийд̇анаад̣̇ам̣ над̣̇ад̇и. зван̃жа банасса виж̇амбханабхуумияам̣ тад̇ваа над̣̇анд̇асса сад̣̇д̣̇о саманд̇аа д̇ияож̇анабад̣̇зсам̣ зганиннаад̣̇ам̣ гарод̇и, д̇амасса ниннаад̣̇ам̣ суд̇ваа д̇ияож̇анаб̣бханд̇араг̇ад̇аа д̣̇вибад̣̇ажад̇уббад̣̇аг̇ан̣аа яат̇аатаанз таад̇ум̣ на саггонд̇и. г̇ожарааяа баггамад̇ийд̇и аахаарад̇т̇ааяа г̇ажчад̇и. гат̇ам̣? со хи виж̇амбханабхуумияам̣ тад̇ваа д̣̇агкин̣ад̇о ваа ваамад̇о ваа уббад̇анд̇о усабхамад̇д̇ам̣ таанам̣ г̇ан̣хаад̇и, уд̣̇д̇хам̣ уббад̇анд̇о жад̇д̇аариби адтаби усабхадтаанаани уббад̇ад̇и, самз таанз уж̇угам̣ багканд̣̇анд̇о сол̣асаусабхамад̇д̇амби вийсад̇иусабхамад̇д̇амби таанам̣ багканд̣̇ад̇и, т̇алаа ваа баб̣б̣ад̇аа ваа багканд̣̇анд̇о садтиусабхамад̇д̇амби асийд̇иусабхамад̇д̇амби таанам̣ багканд̣̇ад̇и, анд̇араамаг̇г̇з ругкам̣ ваа баб̣б̣ад̇ам̣ ваа д̣̇исваа д̇ам̣ барихаранд̇о ваамад̇о ваа д̣̇агкин̣ад̇о ваа уд̣̇д̇хам̣ ваа усабхамад̇д̇ам̣ абаггамад̇и. д̇ад̇ияам̣ бана сийханаад̣̇ам̣ над̣̇ид̇ваа д̇знзва сад̣̇д̇хим̣ д̇ияож̇анз таанз бан̃н̃ааяад̇и, д̇ияож̇анам̣ г̇анд̇ваа нивад̇д̇ид̇ваа тид̇о ад̇д̇анова наад̣̇асса анунаад̣̇ам̣ сун̣аад̇и. звам̣ сийгхзна ж̇авзна баггамад̇и.
Sīhanādaṃ nadatīti tikkhattuṃ tāva abhītanādaṃ nadati. Evañca panassa vijambhanabhūmiyaṃ ṭhatvā nadantassa saddo samantā tiyojanapadesaṃ ekaninnādaṃ karoti, tamassa ninnādaṃ sutvā tiyojanabbhantaragatā dvipadacatuppadagaṇā yathāṭhāne ṭhātuṃ na sakkonti. Gocarāya pakkamatīti āhāratthāya gacchati. Kathaṃ? So hi vijambhanabhūmiyaṃ ṭhatvā dakkhiṇato vā vāmato vā uppatanto usabhamattaṃ ṭhānaṃ gaṇhāti, uddhaṃ uppatanto cattāripi aṭṭhapi usabhaṭṭhānāni uppatati, same ṭhāne ujukaṃ pakkhandanto soḷasausabhamattampi vīsatiusabhamattampi ṭhānaṃ pakkhandati, thalā vā pabbatā vā pakkhandanto saṭṭhiusabhamattampi asītiusabhamattampi ṭhānaṃ pakkhandati, antarāmagge rukkhaṃ vā pabbataṃ vā disvā taṃ pariharanto vāmato vā dakkhiṇato vā uddhaṃ vā usabhamattaṃ apakkamati. Tatiyaṃ pana sīhanādaṃ naditvā teneva saddhiṃ tiyojane ṭhāne paññāyati, tiyojanaṃ gantvā nivattitvā ṭhito attanova nādassa anunādaṃ suṇāti. Evaṃ sīghena javena pakkamati.
язбхуяязнаад̇и бааязна. бхаяам̣ санд̇аасам̣ сам̣взг̇анд̇и саб̣б̣ам̣ жид̇д̇уд̇раасассзва наамам̣. сийхасса хи сад̣̇д̣̇ам̣ суд̇ваа б̣ахуу бхааяанд̇и, аббагаа на бхааяанд̇и. гз бана д̇зд̇и? самасийхо хад̇т̇ааж̇аанийяо ассааж̇аанийяо усабхааж̇аанийяо бурисааж̇аанийяо кийн̣аасавод̇и. гасмаа банзд̇з на бхааяанд̇ийд̇и? самасийхо д̇аава ‘‘ж̇аад̇иг̇од̇д̇агуласуурабхаавзхи самааносмий’’д̇и на бхааяад̇и, хад̇т̇ааж̇аанийяаад̣̇аяо ад̇д̇ано саггааяад̣̇идтиб̣алавад̇ааяа на бхааяанд̇и, кийн̣аасаво саггааяад̣̇идтияаа бахийнад̇д̇аа на бхааяад̇и.
Yebhuyyenāti pāyena. Bhayaṃ santāsaṃ saṃveganti sabbaṃ cittutrāsasseva nāmaṃ. Sīhassa hi saddaṃ sutvā bahū bhāyanti, appakā na bhāyanti. Ke pana teti? Samasīho hatthājānīyo assājānīyo usabhājānīyo purisājānīyo khīṇāsavoti. Kasmā panete na bhāyantīti? Samasīho tāva ‘‘jātigottakulasūrabhāvehi samānosmī’’ti na bhāyati, hatthājānīyādayo attano sakkāyadiṭṭhibalavatāya na bhāyanti, khīṇāsavo sakkāyadiṭṭhiyā pahīnattā na bhāyati.
б̣илаасаяаад̇и б̣илз саяанд̇аа б̣илаваасино ахинагулаг̇од̇хаад̣̇аяо. уд̣̇агаасаяаад̇и уд̣̇агаваасино мажчагажчабаад̣̇аяо. ванаасаяаад̇и ванаваасино хад̇т̇иассаг̇оган̣н̣амиг̇аад̣̇аяо. бависанд̇ийд̇и ‘‘ид̣̇аани ааг̇анд̇ваа г̇ан̣хиссад̇ий’’д̇и маг̇г̇ам̣ ологзд̇ваа бависанд̇и. д̣̇ал̣хзхийд̇и т̇ирзхи. варад̇д̇зхийд̇и жаммараж̇ж̇уухи. махид̣̇д̇хигод̇иаад̣̇ийсу виж̇амбханабхуумияам̣ тад̇ваа д̣̇агкин̣абассаад̣̇ийхи усабхамад̇д̇ам̣, уж̇ум̣ вийсад̇иусабхамад̇д̇аад̣̇илан̇гханавасзна махид̣̇д̇хигад̇аа, сзсамиг̇аанам̣ ад̇хибад̇ибхаавзна махзсагкад̇аа, саманд̇аа д̇ияож̇анадтаанз сад̣̇д̣̇ам̣ суд̇ваа балааяанд̇аанам̣ васзна махаанубхаавад̇аа взд̣̇ид̇аб̣б̣аа.
Bilāsayāti bile sayantā bilavāsino ahinakulagodhādayo. Udakāsayāti udakavāsino macchakacchapādayo. Vanāsayāti vanavāsino hatthiassagokaṇṇamigādayo. Pavisantīti ‘‘idāni āgantvā gaṇhissatī’’ti maggaṃ oloketvā pavisanti. Daḷhehīti thirehi. Varattehīti cammarajjūhi. Mahiddhikotiādīsu vijambhanabhūmiyaṃ ṭhatvā dakkhiṇapassādīhi usabhamattaṃ, ujuṃ vīsatiusabhamattādilaṅghanavasena mahiddhikatā, sesamigānaṃ adhipatibhāvena mahesakkhatā, samantā tiyojanaṭṭhāne saddaṃ sutvā palāyantānaṃ vasena mahānubhāvatā veditabbā.
звамзва код̇и бхаг̇аваа д̇зсу д̇зсу суд̇д̇анд̇зсу д̇ат̇аа д̇ат̇аа ад̇д̇аанам̣ гат̇зси. ‘‘сийход̇и ко, бхигкавз, д̇ат̇ааг̇ад̇ассзд̇ам̣ ад̇хиважанам̣ арахад̇о саммаасамб̣уд̣̇д̇хассаа’’д̇и (а. ни. 5.99; 10.21) имасмим̣ д̇аава суд̇д̇з сийхасад̣̇исам̣ ад̇д̇аанам̣ гат̇зси. ‘‘бхисагго саллагад̇д̇од̇и ко, сунагкад̇д̇а, д̇ат̇ааг̇ад̇ассзд̇ам̣ ад̇хиважана’’нд̇и (ма. ни. 3.65) имасмим̣ взж̇ж̇асад̣̇исам̣, ‘‘б̣раахман̣од̇и ко, бхигкавз, д̇ат̇ааг̇ад̇ассзд̇ам̣ ад̇хиважана’’нд̇и (а. ни. 8.85) имасмим̣ б̣раахман̣асад̣̇исам̣, ‘‘бурисо маг̇г̇агусалод̇и ко, д̇исса, д̇ат̇ааг̇ад̇ассзд̇ам̣ ад̇хиважана’’нд̇и (сам̣. ни. 3.84) имасмим̣ маг̇г̇ад̣̇зсагабурисасад̣̇исам̣, ‘‘рааж̇аахамасми, сзлаа’’д̇и (су. ни. 559; ма. ни. 2.399) имасмим̣ рааж̇асад̣̇исам̣. имасмим̣ бана суд̇д̇з сийхасад̣̇исамзва гад̇ваа ад̇д̇аанам̣ гат̇знд̇о звамааха.
Evameva khoti bhagavā tesu tesu suttantesu tathā tathā attānaṃ kathesi. ‘‘Sīhoti kho, bhikkhave, tathāgatassetaṃ adhivacanaṃ arahato sammāsambuddhassā’’ti (a. ni. 5.99; 10.21) imasmiṃ tāva sutte sīhasadisaṃ attānaṃ kathesi. ‘‘Bhisakko sallakattoti kho, sunakkhatta, tathāgatassetaṃ adhivacana’’nti (ma. ni. 3.65) imasmiṃ vejjasadisaṃ, ‘‘brāhmaṇoti kho, bhikkhave, tathāgatassetaṃ adhivacana’’nti (a. ni. 8.85) imasmiṃ brāhmaṇasadisaṃ, ‘‘puriso maggakusaloti kho, tissa, tathāgatassetaṃ adhivacana’’nti (saṃ. ni. 3.84) imasmiṃ maggadesakapurisasadisaṃ, ‘‘rājāhamasmi, selā’’ti (su. ni. 559; ma. ni. 2.399) imasmiṃ rājasadisaṃ. Imasmiṃ pana sutte sīhasadisameva katvā attānaṃ kathento evamāha.
д̇ад̇рааяам̣ сад̣̇исад̇аа – сийхасса ган̃жанаг̇ухаад̣̇ийсу васанагаало вияа хи д̇ат̇ааг̇ад̇асса д̣̇ийбан̇гарабаад̣̇амуулз гад̇аабхинийхаарасса абаримид̇агаалам̣ баарамияо буурзд̇ваа бажчимабхавз бадисанд̇хиг̇г̇ахан̣зна жзва маад̇угужчид̇о нигкаманзна жа д̣̇асасахассилогад̇хаад̇ум̣ гамбзд̇ваа вуд̣̇д̇химанвааяа д̣̇иб̣б̣асамбад̇д̇исад̣̇исам̣ самбад̇д̇им̣ анубхавамаанасса д̇ийсу баасаад̣̇зсу ниваасагаало д̣̇адтаб̣б̣о. сийхасса ган̃жанаг̇ухаад̣̇ид̇о нигканд̇агаало вияа д̇ат̇ааг̇ад̇асса згуунад̇им̣сасам̣важчарз вивадзна д̣̇ваарзна ган̣д̣агам̣ ааруяха чаннасахааяасса нигкамид̇ваа д̇ийн̣и раж̇ж̇аани ад̇иггамид̇ваа аномаанад̣̇ийд̇ийрз б̣рахмунаа д̣̇иннаани гаасааяаани барид̣̇ахид̇ваа баб̣б̣аж̇ид̇асса сад̇д̇амз д̣̇ивасз рааж̇аг̇ахам̣ г̇анд̇ваа д̇ад̇т̇а бин̣д̣ааяа жарид̇ваа бан̣д̣аваг̇ирибаб̣бхаарз гад̇абхад̇д̇агижжасса саммаасамб̣од̇хим̣ бад̇ваа батамамзва маг̇ад̇харадтам̣ ааг̇аманад̇т̇ааяа яаава ран̃н̃о бадин̃н̃аад̣̇аанагаало.
Tatrāyaṃ sadisatā – sīhassa kañcanaguhādīsu vasanakālo viya hi tathāgatassa dīpaṅkarapādamūle katābhinīhārassa aparimitakālaṃ pāramiyo pūretvā pacchimabhave paṭisandhiggahaṇena ceva mātukucchito nikkhamanena ca dasasahassilokadhātuṃ kampetvā vuddhimanvāya dibbasampattisadisaṃ sampattiṃ anubhavamānassa tīsu pāsādesu nivāsakālo daṭṭhabbo. Sīhassa kañcanaguhādito nikkhantakālo viya tathāgatassa ekūnatiṃsasaṃvacchare vivaṭena dvārena kaṇḍakaṃ āruyha channasahāyassa nikkhamitvā tīṇi rajjāni atikkamitvā anomānadītīre brahmunā dinnāni kāsāyāni paridahitvā pabbajitassa sattame divase rājagahaṃ gantvā tattha piṇḍāya caritvā paṇḍavagiripabbhāre katabhattakiccassa sammāsambodhiṃ patvā paṭhamameva magadharaṭṭhaṃ āgamanatthāya yāva rañño paṭiññādānakālo.
сийхасса виж̇амбханагаало вияа д̇ат̇ааг̇ад̇асса д̣̇иннабадин̃н̃асса аал̣аарагаалаамаубасан̇гаманам̣ аад̣̇им̣ гад̇ваа яаава суж̇аад̇ааяа д̣̇иннабааяаасасса згуунабан̣н̣аасааяа бин̣д̣зхи барибхуд̇д̇агаало взд̣̇ид̇аб̣б̣о. сийхасса сарийравид̇хунанам̣ вияа сааяанхасамаяз сод̇д̇иязна д̣̇иннаа адта д̇ин̣амудтияо г̇ахзд̇ваа д̣̇асасахассажаггаваал̣ад̣̇звад̇аахи т̇омияамаанасса г̇анд̇хаад̣̇ийхи бууж̇ияамаанасса д̇игкад̇д̇ум̣ б̣од̇хим̣ бад̣̇агкин̣ам̣ гад̇ваа б̣од̇химан̣д̣ам̣ ааруяха жуд̣̇д̣̇асахад̇т̇уб̣б̣зд̇хз таанз д̇ин̣асант̇арам̣ ад̇т̇арид̇ваа жад̇уран̇г̇авийрияам̣ ад̇хидтааяа нисиннасса д̇ам̣кан̣ан̃н̃зва маараб̣алам̣ вид̇хамзд̇ваа д̇ийсу яаамзсу д̇иссо виж̇ж̇аа висод̇хзд̇ваа ануломаббадиломам̣ бадижжасамуббаад̣̇амахаасамуд̣̇д̣̇ам̣ яамаган̃аан̣амант̇анзна мант̇знд̇асса саб̣б̣ан̃н̃уд̇ан̃н̃аан̣з бадивид̣̇д̇хз д̇ад̣̇анубхаавзна д̣̇асасахассилогад̇хаад̇угамбанам̣ взд̣̇ид̇аб̣б̣ам̣.
Sīhassa vijambhanakālo viya tathāgatassa dinnapaṭiññassa āḷārakālāmaupasaṅkamanaṃ ādiṃ katvā yāva sujātāya dinnapāyāsassa ekūnapaṇṇāsāya piṇḍehi paribhuttakālo veditabbo. Sīhassa sarīravidhunanaṃ viya sāyanhasamaye sottiyena dinnā aṭṭha tiṇamuṭṭhiyo gahetvā dasasahassacakkavāḷadevatāhi thomiyamānassa gandhādīhi pūjiyamānassa tikkhattuṃ bodhiṃ padakkhiṇaṃ katvā bodhimaṇḍaṃ āruyha cuddasahatthubbedhe ṭhāne tiṇasantharaṃ attharitvā caturaṅgavīriyaṃ adhiṭṭhāya nisinnassa taṃkhaṇaññeva mārabalaṃ vidhametvā tīsu yāmesu tisso vijjā visodhetvā anulomappaṭilomaṃ paṭiccasamuppādamahāsamuddaṃ yamakañāṇamanthanena manthentassa sabbaññutaññāṇe paṭividdhe tadanubhāvena dasasahassilokadhātukampanaṃ veditabbaṃ.
сийхасса жад̇уд̣̇исаавилоганам̣ вияа бадивид̣̇д̇хасаб̣б̣ан̃н̃уд̇ан̃н̃аан̣асса сад̇д̇асад̇д̇аахам̣ б̣од̇химан̣д̣з вихарид̇ваа барибхуд̇д̇амад̇хубин̣д̣игаахаарасса аж̇абааланиг̇род̇хамуулз махааб̣рахмуно д̇хаммад̣̇зсанааяаажанам̣ бадиг̇г̇ахзд̇ваа д̇ад̇т̇а вихаранд̇асса згаад̣̇асамз д̣̇ивасз ‘‘свз аасаал̣хибун̣н̣амаа бхависсад̇ий’’д̇и бажжуусасамаяз ‘‘гасса ну ко ахам̣ батамам̣ д̇хаммам̣ д̣̇зсзяяа’’нд̇и аал̣ааруд̣̇агаанам̣ гаалагад̇абхаавам̣ н̃ад̇ваа д̇хаммад̣̇зсанад̇т̇ааяа бан̃жаваг̇г̇ияаанам̣ ологанам̣ д̣̇адтаб̣б̣ам̣. сийхасса г̇ожарад̇т̇ааяа д̇ияож̇анам̣ г̇аманагаало вияа ад̇д̇ано бад̇д̇ажийварам̣ аад̣̇ааяа ‘‘бан̃жаваг̇г̇ияаанам̣ д̇хаммажаггам̣ бавад̇д̇зссаамий’’д̇и бажчаабхад̇д̇з аж̇абааланиг̇род̇хад̇о вудтид̇асса адтаарасаяож̇анамаг̇г̇ам̣ г̇аманагаало.
Sīhassa catudisāvilokanaṃ viya paṭividdhasabbaññutaññāṇassa sattasattāhaṃ bodhimaṇḍe viharitvā paribhuttamadhupiṇḍikāhārassa ajapālanigrodhamūle mahābrahmuno dhammadesanāyācanaṃ paṭiggahetvā tattha viharantassa ekādasame divase ‘‘sve āsāḷhipuṇṇamā bhavissatī’’ti paccūsasamaye ‘‘kassa nu kho ahaṃ paṭhamaṃ dhammaṃ deseyya’’nti āḷārudakānaṃ kālakatabhāvaṃ ñatvā dhammadesanatthāya pañcavaggiyānaṃ olokanaṃ daṭṭhabbaṃ. Sīhassa gocaratthāya tiyojanaṃ gamanakālo viya attano pattacīvaraṃ ādāya ‘‘pañcavaggiyānaṃ dhammacakkaṃ pavattessāmī’’ti pacchābhatte ajapālanigrodhato vuṭṭhitassa aṭṭhārasayojanamaggaṃ gamanakālo.
сийхасса сийханаад̣̇агаало вияа д̇ат̇ааг̇ад̇асса адтаарасаяож̇анамаг̇г̇ам̣ г̇анд̇ваа бан̃жаваг̇г̇ияз сан̃н̃аабзд̇ваа ажалабаллан̇гз нисиннасса д̣̇асахи жаггаваал̣асахассзхи саннибад̇ид̇зна д̣̇зваг̇ан̣зна баривуд̇асса ‘‘д̣̇взмз, бхигкавз, анд̇аа баб̣б̣аж̇ид̇зна на сзвид̇аб̣б̣аа’’д̇иаад̣̇инаа наязна д̇хаммажаггаббавад̇д̇анагаало взд̣̇ид̇аб̣б̣о. имасмим̣ жа бана бад̣̇з д̣̇зсияамаанз д̇ат̇ааг̇ад̇асийхасса д̇хаммагхосо хздтаа авийжим̣ убари бхаваг̇г̇ам̣ г̇ахзд̇ваа д̣̇асасахассилогад̇хаад̇ум̣ бадижчаад̣̇зси. сийхасса сад̣̇д̣̇зна куд̣̇д̣̇агабаан̣аанам̣ санд̇аасаабаж̇ж̇анагаало вияа д̇ат̇ааг̇ад̇асса д̇ийн̣и лагкан̣аани д̣̇ийбзд̇ваа жад̇д̇аари сажжаани сол̣асахаагаарзхи садтияаа жа наяасахассзхи вибхаж̇ид̇ваа д̇хаммам̣ гат̇знд̇асса д̣̇ийгхааяугаанам̣ д̣̇зваанам̣ н̃аан̣асанд̇аасасса уббад̇д̇игаало взд̣̇ид̇аб̣б̣о.
Sīhassa sīhanādakālo viya tathāgatassa aṭṭhārasayojanamaggaṃ gantvā pañcavaggiye saññāpetvā acalapallaṅke nisinnassa dasahi cakkavāḷasahassehi sannipatitena devagaṇena parivutassa ‘‘dveme, bhikkhave, antā pabbajitena na sevitabbā’’tiādinā nayena dhammacakkappavattanakālo veditabbo. Imasmiṃ ca pana pade desiyamāne tathāgatasīhassa dhammaghoso heṭṭhā avīciṃ upari bhavaggaṃ gahetvā dasasahassilokadhātuṃ paṭicchādesi. Sīhassa saddena khuddakapāṇānaṃ santāsāpajjanakālo viya tathāgatassa tīṇi lakkhaṇāni dīpetvā cattāri saccāni soḷasahākārehi saṭṭhiyā ca nayasahassehi vibhajitvā dhammaṃ kathentassa dīghāyukānaṃ devānaṃ ñāṇasantāsassa uppattikālo veditabbo.
абаро наяо – сийхо вияа саб̣б̣ан̃н̃уд̇ам̣ бад̇д̇о д̇ат̇ааг̇ад̇о, аасаяабхууд̇ааяа ганагаг̇ухааяа нигкаманам̣ вияа г̇анд̇хагудид̇о нигкаманагаало, виж̇амбханам̣ вияа д̇хаммасабхам̣ убасан̇гаманагаало, д̣̇исаавилоганам̣ вияа барисаавилоганам̣, сийханаад̣̇анад̣̇анам̣ вияа д̇хаммад̣̇зсанаагаало, г̇ожарааяа баггаманам̣ вияа бараваад̣̇аниммад̣̇д̣̇анад̇т̇ааяа г̇аманам̣.
Aparo nayo – sīho viya sabbaññutaṃ patto tathāgato, āsayabhūtāya kanakaguhāya nikkhamanaṃ viya gandhakuṭito nikkhamanakālo, vijambhanaṃ viya dhammasabhaṃ upasaṅkamanakālo, disāvilokanaṃ viya parisāvilokanaṃ, sīhanādanadanaṃ viya dhammadesanākālo, gocarāya pakkamanaṃ viya paravādanimmaddanatthāya gamanaṃ.
абаро наяо – сийхо вияа д̇ат̇ааг̇ад̇о, химаванд̇аниссид̇ааяа ган̃жанаг̇ухааяа нигкаманам̣ вияа аарамман̣авасзна ниб̣б̣аананиссид̇ааяа паласамаабад̇д̇ияаа вудтаанам̣, виж̇амбханам̣ вияа бажжавзгкан̣ан̃аан̣ам̣, д̣̇исаавилоганам̣ вияа взнзяяасад̇д̇авилоганам̣, сийханаад̣̇о вияа самбад̇д̇абарисааяа д̇хаммад̣̇зсанаа, г̇ожарааяа баггаманам̣ вияа асамбад̇д̇аанам̣ взнзяяасад̇д̇аанам̣ санд̇игуубасан̇гаманам̣ взд̣̇ид̇аб̣б̣ам̣.
Aparo nayo – sīho viya tathāgato, himavantanissitāya kañcanaguhāya nikkhamanaṃ viya ārammaṇavasena nibbānanissitāya phalasamāpattiyā vuṭṭhānaṃ, vijambhanaṃ viya paccavekkhaṇañāṇaṃ, disāvilokanaṃ viya veneyyasattavilokanaṃ, sīhanādo viya sampattaparisāya dhammadesanā, gocarāya pakkamanaṃ viya asampattānaṃ veneyyasattānaṃ santikūpasaṅkamanaṃ veditabbaṃ.
яад̣̇аад̇и яасмим̣ гаалз. д̇ат̇ааг̇ад̇од̇и хздтаа вуд̇д̇зхи адтахи гааран̣зхи д̇ат̇ааг̇ад̇о. логзд̇и сад̇д̇алогз. уббаж̇ж̇ад̇ийд̇и абхинийхаарад̇о бадтааяа яаава б̣од̇хибаллан̇гаа ваа арахад̇д̇амаг̇г̇ан̃аан̣аа ваа уббаж̇ж̇ад̇и наама, арахад̇д̇апалз бана бад̇д̇з уббанно наама. арахам̣ саммаасамб̣уд̣̇д̇ход̇иаад̣̇ийни висуд̣̇д̇химаг̇г̇з (висуд̣̇д̇хи. 1.124 аад̣̇аяо) б̣уд̣̇д̇хаануссад̇инид̣̇д̣̇зсз вид̇т̇аарид̇аани.
Yadāti yasmiṃ kāle. Tathāgatoti heṭṭhā vuttehi aṭṭhahi kāraṇehi tathāgato. Loketi sattaloke. Uppajjatīti abhinīhārato paṭṭhāya yāva bodhipallaṅkā vā arahattamaggañāṇā vā uppajjati nāma, arahattaphale pana patte uppanno nāma. Arahaṃ sammāsambuddhotiādīni visuddhimagge (visuddhi. 1.124 ādayo) buddhānussatiniddese vitthāritāni.
ид̇и саггааяод̇и аяам̣ саггааяо, зд̇д̇аго саггааяо, на ид̇о бхияяо саггааяо ад̇т̇ийд̇и. зд̇д̇аавад̇аа сабхаавад̇о сарасад̇о барияанд̇ад̇о барижчзд̣̇ад̇о баривадумад̇о саб̣б̣зби бан̃жубаад̣̇аанагканд̇хаа д̣̇ассид̇аа хонд̇и. ид̇и саггааяасамуд̣̇аяод̇и аяам̣ саггааяасса самуд̣̇аяо наама. зд̇д̇аавад̇аа ‘‘аахаарасамуд̣̇аяаа руубасамуд̣̇аяо’’д̇иаад̣̇и саб̣б̣ам̣ д̣̇ассид̇ам̣ ход̇и. ид̇и саггааяасса ад̇т̇ан̇г̇амод̇и аяам̣ саггааяасса ад̇т̇ан̇г̇амо. иминааби ‘‘аахааранирод̇хаа руубанирод̇хо’’д̇иаад̣̇и саб̣б̣ам̣ д̣̇ассид̇ам̣ ход̇и.
Iti sakkāyoti ayaṃ sakkāyo, ettako sakkāyo, na ito bhiyyo sakkāyo atthīti. Ettāvatā sabhāvato sarasato pariyantato paricchedato parivaṭumato sabbepi pañcupādānakkhandhā dassitā honti. Iti sakkāyasamudayoti ayaṃ sakkāyassa samudayo nāma. Ettāvatā ‘‘āhārasamudayā rūpasamudayo’’tiādi sabbaṃ dassitaṃ hoti. Iti sakkāyassa atthaṅgamoti ayaṃ sakkāyassa atthaṅgamo. Imināpi ‘‘āhāranirodhā rūpanirodho’’tiādi sabbaṃ dassitaṃ hoti.
ван̣н̣аванд̇од̇и сарийраван̣н̣зна ван̣н̣аванд̇о. д̇хаммад̣̇зсанам̣ суд̇ваад̇и бан̃жасу канд̇хзсу бан̣н̣аасалагкан̣аббадиман̣д̣ид̇ам̣ д̇ат̇ааг̇ад̇асса д̇хаммад̣̇зсанам̣ суд̇ваа. язбхуяязнаад̇и ид̇ха гз табзд̇и? арияасаавагз д̣̇звз. д̇зсам̣ хи кийн̣аасавад̇д̇аа жид̇д̇уд̇раасабхаяамби на уббаж̇ж̇ад̇и, сам̣виг̇г̇асса яонисо бад̇хаанзна бад̇д̇аб̣б̣ам̣ бад̇д̇ад̇ааяа н̃аан̣асам̣взг̇оби. ид̇араасам̣ бана д̣̇звад̇аанам̣ ‘‘д̇аасо хзсо, бхигкавз, анижжа’’нд̇и манасигаронд̇аанам̣ жид̇д̇уд̇раасабхаяамби, б̣алававибассанаагаалз н̃аан̣абхаяамби уббаж̇ж̇ад̇и. бход̇и д̇хаммаалабанамад̇д̇амзд̇ам̣. саггааяабарияаабаннаад̇и бан̃жагканд̇хабарияаабаннаа. ид̇и д̇зсам̣ саммаасамб̣уд̣̇д̇хз ваддад̣̇осам̣ д̣̇ассзд̇ваа д̇илагкан̣аахад̇ам̣ гад̇ваа д̇хаммам̣ д̣̇зсзнд̇з н̃аан̣абхаяам̣ наама оггамад̇и.
Vaṇṇavantoti sarīravaṇṇena vaṇṇavanto. Dhammadesanaṃ sutvāti pañcasu khandhesu paṇṇāsalakkhaṇappaṭimaṇḍitaṃ tathāgatassa dhammadesanaṃ sutvā. Yebhuyyenāti idha ke ṭhapeti? Ariyasāvake deve. Tesaṃ hi khīṇāsavattā cittutrāsabhayampi na uppajjati, saṃviggassa yoniso padhānena pattabbaṃ pattatāya ñāṇasaṃvegopi. Itarāsaṃ pana devatānaṃ ‘‘tāso heso, bhikkhave, anicca’’nti manasikarontānaṃ cittutrāsabhayampi, balavavipassanākāle ñāṇabhayampi uppajjati. Bhoti dhammālapanamattametaṃ. Sakkāyapariyāpannāti pañcakkhandhapariyāpannā. Iti tesaṃ sammāsambuddhe vaṭṭadosaṃ dassetvā tilakkhaṇāhataṃ katvā dhammaṃ desente ñāṇabhayaṃ nāma okkamati.
абхин̃н̃ааяаад̇и ж̇аанид̇ваа. д̇хаммажагганд̇и бадивзд̇хан̃аан̣амби д̣̇зсанаан̃аан̣амби. бадивзд̇хан̃аан̣ам̣ наама язна н̃аан̣зна б̣од̇хибаллан̇гз нисинно жад̇д̇аари сажжаани сол̣асахаагаарзхи садтияаа жа наяасахассзхи бадивиж̇жхи. д̣̇зсанаан̃аан̣ам̣ наама язна н̃аан̣зна д̇ибариваддам̣ д̣̇ваад̣̇асаагаарам̣ д̇хаммажаггам̣ бавад̇д̇зси. убхаяамбзд̇ам̣ д̣̇асаб̣аласса урз ж̇аад̇ан̃аан̣амзва. д̇зсу д̇хаммад̣̇зсанаан̃аан̣ам̣ г̇ахзд̇аб̣б̣ам̣. д̇ам̣ банзса яаава адтаарасаб̣рахмагодийхи сад̣̇д̇хим̣ ан̃н̃аагон̣д̣ан̃н̃ад̇т̇зрасса сод̇аабад̇д̇ипалам̣ на уббаж̇ж̇ад̇и, д̇аава бавад̇д̇зд̇и наама. д̇асмим̣ уббаннз бавад̇д̇ид̇ам̣ наама ход̇ийд̇и взд̣̇ид̇аб̣б̣ам̣. аббадибуг̇г̇алод̇и сад̣̇исабуг̇г̇аларахид̇о. яасассинод̇и бариваарасамбаннаа. д̇аад̣̇инод̇и лаабхаалаабхаад̣̇ийхи згасад̣̇исасса.
Abhiññāyāti jānitvā. Dhammacakkanti paṭivedhañāṇampi desanāñāṇampi. Paṭivedhañāṇaṃ nāma yena ñāṇena bodhipallaṅke nisinno cattāri saccāni soḷasahākārehi saṭṭhiyā ca nayasahassehi paṭivijjhi. Desanāñāṇaṃ nāma yena ñāṇena tiparivaṭṭaṃ dvādasākāraṃ dhammacakkaṃ pavattesi. Ubhayampetaṃ dasabalassa ure jātañāṇameva. Tesu dhammadesanāñāṇaṃ gahetabbaṃ. Taṃ panesa yāva aṭṭhārasabrahmakoṭīhi saddhiṃ aññākoṇḍaññattherassa sotāpattiphalaṃ na uppajjati, tāva pavatteti nāma. Tasmiṃ uppanne pavattitaṃ nāma hotīti veditabbaṃ. Appaṭipuggaloti sadisapuggalarahito. Yasassinoti parivārasampannā. Tādinoti lābhālābhādīhi ekasadisassa.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 3. сийхасуд̇д̇ам̣ • 3. Sīhasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 3. сийхасуд̇д̇аван̣н̣анаа • 3. Sīhasuttavaṇṇanā
