| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༢. སཱིཧསུཏྟཝཎྞནཱ
2. Sīhasuttavaṇṇanā
༡༢. དུཏིཡེ ཨབྷིཉྙཱཏཱཏི ཉཱཏཱ པཉྙཱཏཱ པཱཀཊཱ། སནྠཱགཱརེཏི མཧཱཛནསྶ ཝིསྶམནཏྠཱཡ ཀཏེ ཨགཱརེ། སཱ ཀིར སནྠཱགཱརསཱལཱ ནགརམཛ྄ཛྷེ ཨཧོསི, ཙཏཱུསུ ཋཱནེསུ ཋིཏཱནཾ པཉྙཱཡཏི, ཙཏཱུཧི དིསཱཧི ཨཱགཏམནུསྶཱ པཋམཾ ཏཏྠ ཝིསྶམིཏྭཱ པཙྪཱ ཨཏྟནོ ཨཏྟནོ ཕཱསུཀཊྛཱནཾ གཙྪནྟི། རཱཛཀུལཱནཾ རཛྫཀིཙྩསནྠརཎཏྠཱཡ ཀཏཾ ཨགཱརནྟིཔི ཝདནྟིཡེཝ། ཏཏྠ ཧི ནིསཱིདིཏྭཱ ལིཙྪཝིརཱཛཱནོ རཛྫཀིཙྩཾ སནྠརནྟི ཀརོནྟི ཝིཙཱརེནྟི། སནྣིསིནྣཱཏི ཏེསཾ ནིསཱིདནཏྠཉྙེཝ པཉྙཏྟེསུ མཧཱརཧཝརཔཙྩཏྠརཎེསུ སམུསྶིཏསེཏཙྪཏྟེསུ ཨཱསནེསུ སནྣིསིནྣཱ། ཨནེཀཔརིཡཱཡེན བུདྡྷསྶ ཝཎྞཾ བྷཱསནྟཱིཏི རཱཛཀུལེ ཀིཙྩཉྩེཝ ལོཀཏྠཙརིཡཉྩ ཝིཙཱརེཏྭཱ ཨནེཀེཧི ཀཱརཎེཧི བུདྡྷསྶ ཝཎྞཾ བྷཱསནྟི ཀཐེནྟི དཱིཔེནྟི། པཎྜིཏཱ ཧི ཏེ རཱཛཱནོ སདྡྷཱ པསནྣཱ སོཏཱཔནྣཱཔི སཀདཱགཱམིནོཔི ཨནཱགཱམིནོཔི ཨརིཡསཱཝཀཱ, ཏེ སབྦེཔི ལོཀིཡཛཊཾ ཚིནྡིཏྭཱ བུདྡྷཱདཱིནཾ ཏིཎྞཾ རཏནཱནཾ ཝཎྞཾ བྷཱསནྟི། ཏཏྠ ཏིཝིདྷོ བུདྡྷཝཎྞོ ནཱམ ཙརིཡཝཎྞོ, སརཱིརཝཎྞོ, གུཎཝཎྞོཏི། ཏཏྲིམེ རཱཛཱནོ ཙརིཡཱཡ ཝཎྞཾ ཨཱརབྷིཾསུ – ‘‘དུཀྐརཾ ཝཏ ཀཏཾ སམྨཱསམྦུདྡྷེན ཀཔྤསཏསཧསྶཱདྷིཀཱནི ཙཏྟཱརི ཨསངྑེཡྻཱནི དས པཱརམིཡོ, དས ཨུཔཔཱརམིཡོ, དས པརམཏྠཔཱརམིཡོཏི སམཏྟིཾས པཱརམིཡོ པཱུརེནྟེན, ཉཱཏཏྠཙརིཡཾ, ལོཀཏྠཙརིཡཾ, བུདྡྷཙརིཡཾ མཏྠཀཾ པཱཔེཏྭཱ པཉྩ མཧཱཔརིཙྩཱགེ པརིཙྩཛནྟེནཱ’’ཏི ཨཌྜྷཙྪཀྐེཧི ཛཱཏཀསཏེཧི བུདྡྷཝཎྞཾ ཀཐེནྟཱ ཏུསིཏབྷཝནཾ པཱཔེཏྭཱ ཋཔཡིཾསུ།
12. Dutiye abhiññātāti ñātā paññātā pākaṭā. Santhāgāreti mahājanassa vissamanatthāya kate agāre. Sā kira santhāgārasālā nagaramajjhe ahosi, catūsu ṭhānesu ṭhitānaṃ paññāyati, catūhi disāhi āgatamanussā paṭhamaṃ tattha vissamitvā pacchā attano attano phāsukaṭṭhānaṃ gacchanti. Rājakulānaṃ rajjakiccasantharaṇatthāya kataṃ agārantipi vadantiyeva. Tattha hi nisīditvā licchavirājāno rajjakiccaṃ santharanti karonti vicārenti. Sannisinnāti tesaṃ nisīdanatthaññeva paññattesu mahārahavarapaccattharaṇesu samussitasetacchattesu āsanesu sannisinnā. Anekapariyāyena buddhassa vaṇṇaṃ bhāsantīti rājakule kiccañceva lokatthacariyañca vicāretvā anekehi kāraṇehi buddhassa vaṇṇaṃ bhāsanti kathenti dīpenti. Paṇḍitā hi te rājāno saddhā pasannā sotāpannāpi sakadāgāminopi anāgāminopi ariyasāvakā, te sabbepi lokiyajaṭaṃ chinditvā buddhādīnaṃ tiṇṇaṃ ratanānaṃ vaṇṇaṃ bhāsanti. Tattha tividho buddhavaṇṇo nāma cariyavaṇṇo, sarīravaṇṇo, guṇavaṇṇoti. Tatrime rājāno cariyāya vaṇṇaṃ ārabhiṃsu – ‘‘dukkaraṃ vata kataṃ sammāsambuddhena kappasatasahassādhikāni cattāri asaṅkheyyāni dasa pāramiyo, dasa upapāramiyo, dasa paramatthapāramiyoti samattiṃsa pāramiyo pūrentena, ñātatthacariyaṃ, lokatthacariyaṃ, buddhacariyaṃ matthakaṃ pāpetvā pañca mahāpariccāge pariccajantenā’’ti aḍḍhacchakkehi jātakasatehi buddhavaṇṇaṃ kathentā tusitabhavanaṃ pāpetvā ṭhapayiṃsu.
དྷམྨསྶ ཝཎྞཾ བྷཱསནྟཱ པན ‘‘ཏེན བྷགཝཏཱ དྷམྨོ དེསིཏོ, ནིཀཱཡཏོ པཉྩ ནིཀཱཡཱ, པིཊཀཏོ ཏཱིཎི པིཊཀཱནི, ཨངྒཏོ ནཝ ཨངྒཱནི, ཁནྡྷཏོ ཙཏུརཱསཱིཏིདྷམྨཀྑནྡྷསཧསྶཱནཱི’’ཏི ཀོཊྛཱསཝསེན དྷམྨགུཎཾ ཀཐཡིཾསུ།
Dhammassavaṇṇaṃ bhāsantā pana ‘‘tena bhagavatā dhammo desito, nikāyato pañca nikāyā, piṭakato tīṇi piṭakāni, aṅgato nava aṅgāni, khandhato caturāsītidhammakkhandhasahassānī’’ti koṭṭhāsavasena dhammaguṇaṃ kathayiṃsu.
སངྒྷསྶ ཝཎྞཾ བྷཱསནྟཱ སཏྠུ དྷམྨདེསནཾ སུཏྭཱ ‘‘པཊིལདྡྷསདྡྷཱ ཀུལཔུཏྟཱ བྷོགཀྑནྡྷཉྩེཝ ཉཱཏིཔརིཝཊྚཉྩ པཧཱཡ སེཏཙྪཏྟཾ ཨོཔརཛྫཾ སེནཱཔཏིསེཊྛིབྷཎྜཱགཱརིཀཊྛཱནནྟརཱདཱིནི ཨགཎེཏྭཱ ནིཀྑམྨ སཏྠུ ཝརསཱསནེ པབྦཛནྟི། སེཏཙྪཏྟཾ པཧཱཡ པབྦཛིཏཱནཾ བྷདྡིཡརཱཛམཧཱཀཔྤིནཔུཀྐུསཱཏིཨཱདཱིནཾ རཱཛཔབྦཛིཏཱནཾཡེཝ བུདྡྷཀཱལེ ཨསཱིཏིསཧསྶཱནི ཨཧེསུཾ། ཨནེཀཀོཊིསཏཾ དྷནཾ པཧཱཡ པབྦཛིཏཱནཾ པན ཡསཀུལཔུཏྟསོཎསེཊྛིཔུཏྟརཊྛཔཱལཀུལཔུཏྟཱདཱིནཾ པརིཙྪེདོ ནཏྠི། ཨེཝརཱུཔཱ ཙ ཨེཝརཱུཔཱ ཙ ཀུལཔུཏྟཱ སཏྠུ སཱསནེ པབྦཛནྟཱི’’ཏི པབྦཛྫཱསངྑེཔཝསེན སངྒྷགུཎེ ཀཐཡིཾསུ།
Saṅghassa vaṇṇaṃ bhāsantā satthu dhammadesanaṃ sutvā ‘‘paṭiladdhasaddhā kulaputtā bhogakkhandhañceva ñātiparivaṭṭañca pahāya setacchattaṃ oparajjaṃ senāpatiseṭṭhibhaṇḍāgārikaṭṭhānantarādīni agaṇetvā nikkhamma satthu varasāsane pabbajanti. Setacchattaṃ pahāya pabbajitānaṃ bhaddiyarājamahākappinapukkusātiādīnaṃ rājapabbajitānaṃyeva buddhakāle asītisahassāni ahesuṃ. Anekakoṭisataṃ dhanaṃ pahāya pabbajitānaṃ pana yasakulaputtasoṇaseṭṭhiputtaraṭṭhapālakulaputtādīnaṃ paricchedo natthi. Evarūpā ca evarūpā ca kulaputtā satthu sāsane pabbajantī’’ti pabbajjāsaṅkhepavasena saṅghaguṇe kathayiṃsu.
སཱིཧོ སེནཱཔཏཱིཏི ཨེཝཾནཱམཀོ སེནཱཡ ཨདྷིཔཏི། ཝེསཱལིཡཉྷི སཏྟ སཧསྶཱནི སཏྟ སཏཱནི སཏྟ ཙ རཱཛཱནོ། ཏེ སབྦེཔི སནྣིཔཏིཏྭཱ སབྦེསཾ མནཾ གཧེཏྭཱ ‘‘རཊྛཾ ཝིཙཱརེཏུཾ སམཏྠཾ ཨེཀཾ ཝིཙིནཐཱ’’ཏི ཝིཙིནནྟཱ སཱིཧཾ རཱཛཀུམཱརཾ དིསྭཱ ‘‘ཨཡཾ སཀྑིསྶཏཱི’’ཏི སནྣིཊྛཱནཾ ཀཏྭཱ ཏསྶ རཏྟམཎིཝཎྞཾ ཀམྦལཔརིཡོནདྡྷཾ སེནཱཔཏིཙྪཏྟཾ ཨདཾསུ། ཏཾ སནྡྷཱཡ ཝུཏྟཾ – ‘‘སཱིཧོ སེནཱཔཏཱི’’ཏི། ནིགཎྛསཱཝཀོཏི ནིགཎྛསྶ ནཱཊཔུཏྟསྶ པཙྩཡདཱཡཀོ ཨུཔཊྛཱཀོ། ཛམྦུདཱིཔཏལསྨིཉྷི ཏཡོ ཛནཱ ནིགཎྛཱནཾ ཨགྒུཔཊྛཱཀཱ – ནཱལ༹ནྡཱཡཾ, ཨུཔཱལི གཧཔཏི, ཀཔིལཔུརེ ཝཔྤོ སཀྐོ, ཝེསཱལིཡཾ ཨཡཾ སཱིཧོ སེནཱཔཏཱིཏི། ནིསིནྣོ ཧོཏཱིཏི སེསརཱཛཱུནཾ པརིསཱཡ ཨནྟརནྟརེ ཨཱསནཱནི པཉྙཱཔཡིཾསུ, སཱིཧསྶ པན མཛ྄ཛྷེ ཋཱནེཏི ཏསྨིཾ པཉྙཏྟེ མཧཱརཧེ རཱཛཱསནེ ནིསིནྣོ ཧོཏི། ནིསྶཾསཡནྟི ནིབྦིཙིཀིཙྪཾ ཨདྡྷཱ ཨེཀཾསེན, ན ཧེཏེ ཡསྶ ཝཱ ཏསྶ ཝཱ ཨཔྤེསཀྑསྶ ཨེཝཾ ཨནེཀསཏེཧི ཀཱརཎེཧི ཝཎྞཾ བྷཱསནྟི།
Sīhosenāpatīti evaṃnāmako senāya adhipati. Vesāliyañhi satta sahassāni satta satāni satta ca rājāno. Te sabbepi sannipatitvā sabbesaṃ manaṃ gahetvā ‘‘raṭṭhaṃ vicāretuṃ samatthaṃ ekaṃ vicinathā’’ti vicinantā sīhaṃ rājakumāraṃ disvā ‘‘ayaṃ sakkhissatī’’ti sanniṭṭhānaṃ katvā tassa rattamaṇivaṇṇaṃ kambalapariyonaddhaṃ senāpaticchattaṃ adaṃsu. Taṃ sandhāya vuttaṃ – ‘‘sīho senāpatī’’ti. Nigaṇṭhasāvakoti nigaṇṭhassa nāṭaputtassa paccayadāyako upaṭṭhāko. Jambudīpatalasmiñhi tayo janā nigaṇṭhānaṃ aggupaṭṭhākā – nāḷandāyaṃ, upāli gahapati, kapilapure vappo sakko, vesāliyaṃ ayaṃ sīho senāpatīti. Nisinnohotīti sesarājūnaṃ parisāya antarantare āsanāni paññāpayiṃsu, sīhassa pana majjhe ṭhāneti tasmiṃ paññatte mahārahe rājāsane nisinno hoti. Nissaṃsayanti nibbicikicchaṃ addhā ekaṃsena, na hete yassa vā tassa vā appesakkhassa evaṃ anekasatehi kāraṇehi vaṇṇaṃ bhāsanti.
ཡེན ནིགཎྛོ ནཱཊཔུཏྟོ ཏེནུཔསངྐམཱིཏི ནིགཎྛོ ཀིར ནཱཊཔུཏྟོ ‘‘སཙཱཡཾ སཱིཧོ ཀསྶཙིདེཝ སམཎསྶ གོཏམསྶ ཝཎྞཾ ཀཐེནྟསྶ སུཏྭཱ སམཎཾ གོཏམཾ དསྶནཱཡ ཨུཔསངྐམིསྶཏི, མཡ྄ཧཾ པརིཧཱནི བྷཝིསྶཏཱི’’ཏི ཙིནྟེཏྭཱ པཋམཏརཾཡེཝ སཱིཧཾ སེནཱཔཏིཾ ཨེཏདཝོཙ – ‘‘སེནཱཔཏི ཨིམསྨིཾ ལོཀེ ‘ཨཧཾ བུདྡྷོ ཨཧཾ བུདྡྷོ’ཏི བཧཱུ ཝིཙརནྟི། སཙེ ཏྭཾ ཀསྶཙི དསྶནཱཡ ཨུཔསངྐམིཏུཀཱམོ ཨཧོསི, མཾ པུཙྪེཡྻཱསི། ཨཧཾ ཏེ ཡུཏྟཊྛཱནཾ པེསེསྶཱམི, ཨཡུཏྟཊྛཱནཏོ ནིཝཱརེསྶཱམཱི’’ཏི། སོ ཏཾ ཀཐཾ ཨནུསྶརིཏྭཱ ‘‘སཙེ མཾ པེསེསྶཏི, གམིསྶཱམི། ནོ ཙེ, ན གམིསྶཱམཱི’’ཏི ཙིནྟེཏྭཱ ཡེན ནིགཎྛོ ནཱཊཔུཏྟོ, ཏེནུཔསངྐམི།
Yena nigaṇṭho nāṭaputto tenupasaṅkamīti nigaṇṭho kira nāṭaputto ‘‘sacāyaṃ sīho kassacideva samaṇassa gotamassa vaṇṇaṃ kathentassa sutvā samaṇaṃ gotamaṃ dassanāya upasaṅkamissati, mayhaṃ parihāni bhavissatī’’ti cintetvā paṭhamataraṃyeva sīhaṃ senāpatiṃ etadavoca – ‘‘senāpati imasmiṃ loke ‘ahaṃ buddho ahaṃ buddho’ti bahū vicaranti. Sace tvaṃ kassaci dassanāya upasaṅkamitukāmo ahosi, maṃ puccheyyāsi. Ahaṃ te yuttaṭṭhānaṃ pesessāmi, ayuttaṭṭhānato nivāressāmī’’ti. So taṃ kathaṃ anussaritvā ‘‘sace maṃ pesessati, gamissāmi. No ce, na gamissāmī’’ti cintetvā yena nigaṇṭho nāṭaputto, tenupasaṅkami.
ཨཐསྶ ཝཙནཾ སུཏྭཱ ནིགཎྛོ མཧཱཔབྦཏེན ཝིཡ བལཝསོཀེན ཨོཏྠཊོ ‘‘ཡཏྠ དཱནིསྶཱཧཾ གམནཾ ན ཨིཙྪཱམི, ཏཏྠེཝ གནྟུཀཱམོ ཛཱཏོ, ཧཏོཧམསྨཱི’’ཏི ཨནཏྟམནོ ཧུཏྭཱ ‘‘པཊིབཱཧནུཔཱཡམསྶ ཀརིསྶཱམཱི’’ཏི ཙིནྟེཏྭཱ ཀིཾ པན ཏྭནྟིཨཱདིམཱཧ། ཨེཝཾ ཝདནྟོ ཝིཙརནྟཾ གོཎཾ དཎྜེན པཧརནྟོ ཝིཡ ཛལམཱནཾ པདཱིཔཾ ནིབྦཱཔེནྟོ ཝིཡ བྷཏྟབྷརིཏཾ པཏྟཾ ནིཀྐུཛྫནྟོ ཝིཡ ཙ སཱིཧསྶ ཨུཔྤནྣཔཱིཏིཾ ཝིནཱསེསི། གམིཡཱབྷིསངྑཱརོཏི ཧཏྠིཡཱནཱདཱིནཾ ཡོཛཱཔནགནྡྷམཱལཱདིགྒཧཎཝསེན པཝཏྟོ པཡོགོ། སོ པཊིཔྤསྶམྦྷཱིཏི སོ ཝཱུཔསནྟོ།
Athassa vacanaṃ sutvā nigaṇṭho mahāpabbatena viya balavasokena otthaṭo ‘‘yattha dānissāhaṃ gamanaṃ na icchāmi, tattheva gantukāmo jāto, hatohamasmī’’ti anattamano hutvā ‘‘paṭibāhanupāyamassa karissāmī’’ti cintetvā kiṃ pana tvantiādimāha. Evaṃ vadanto vicarantaṃ goṇaṃ daṇḍena paharanto viya jalamānaṃ padīpaṃ nibbāpento viya bhattabharitaṃ pattaṃ nikkujjanto viya ca sīhassa uppannapītiṃ vināsesi. Gamiyābhisaṅkhāroti hatthiyānādīnaṃ yojāpanagandhamālādiggahaṇavasena pavatto payogo. So paṭippassambhīti so vūpasanto.
དུཏིཡམྤི ཁོཏི དུཏིཡཝཱརམྤི། ཨིམསྨིཉྩ ཝཱརེ བུདྡྷསྶ ཝཎྞཾ བྷཱསནྟཱ ཏུསིཏབྷཝནཏོ པཊྛཱཡ ཡཱཝ མཧཱབོདྷིཔལླངྐཱ དསབལསྶ ཧེཊྛཱ པཱདཏལེཧི ཨུཔརི ཀེསགྒེཧི པརིཙྪིནྡིཏྭཱ དྭཏྟིཾསམཧཱཔུརིསལཀྑཎཨསཱིཏིཨནུབྱཉྫནབྱཱམཔྤབྷཱནཾ ཝསེན སརཱིརཝཎྞཾ ཀཐཡིཾསུ། དྷམྨསྶ ཝཎྞཾ བྷཱསནྟཱ ‘‘ཨེཀཔདེཔི ཨེཀབྱཉྫནེཔི ཨཝཁལིཏཾ ནཱམ ནཏྠཱི’’ཏི སུཀཐིཏཝསེནེཝ དྷམྨགུཎཾ ཀཐཡིཾསུ། སངྒྷསྶ ཝཎྞཾ བྷཱསནྟཱ ‘‘ཨེཝརཱུཔཾ ཡསསིརིཝིབྷཝཾ པཧཱཡ སཏྠུ སཱསནེ པབྦཛིཏཱ ན ཀོསཛྫཔཀཏིཀཱ ཧོནྟི, ཏེརསསུ པན དྷུཏངྒགུཎེསུ པརིཔཱུརཀཱརིནོ ཧུཏྭཱ སཏྟསུ ཨནུཔསྶནཱསུ ཀམྨཾ ཀརོནྟི, ཨཊྛཏིཾསཱརམྨཎཝིབྷཏྟིཡོ ཝལ༹ཉྫེནྟཱི’’ཏི པཊིཔདཱཝསེན སངྒྷགུཎེ ཀཐཡིཾསུ།
Dutiyampi khoti dutiyavārampi. Imasmiñca vāre buddhassa vaṇṇaṃ bhāsantā tusitabhavanato paṭṭhāya yāva mahābodhipallaṅkā dasabalassa heṭṭhā pādatalehi upari kesaggehi paricchinditvā dvattiṃsamahāpurisalakkhaṇaasītianubyañjanabyāmappabhānaṃ vasena sarīravaṇṇaṃ kathayiṃsu. Dhammassa vaṇṇaṃ bhāsantā ‘‘ekapadepi ekabyañjanepi avakhalitaṃ nāma natthī’’ti sukathitavaseneva dhammaguṇaṃ kathayiṃsu. Saṅghassa vaṇṇaṃ bhāsantā ‘‘evarūpaṃ yasasirivibhavaṃ pahāya satthu sāsane pabbajitā na kosajjapakatikā honti, terasasu pana dhutaṅgaguṇesu paripūrakārino hutvā sattasu anupassanāsu kammaṃ karonti, aṭṭhatiṃsārammaṇavibhattiyo vaḷañjentī’’ti paṭipadāvasena saṅghaguṇe kathayiṃsu.
ཏཏིཡཝཱརེ པན བུདྡྷསྶ ཝཎྞཾ བྷཱསམཱནཱ ‘‘ཨིཏིཔི སོ བྷགཝཱ’’ཏི སུཏྟནྟཔརིཡཱཡེནེཝ བུདྡྷགུཎེ ཀཐཡིཾསུ, ‘‘སྭཱཀྑཱཏོ བྷགཝཏཱ དྷམྨོ’’ཏིཨཱདིནཱ སུཏྟནྟཔརིཡཱཡེནེཝ དྷམྨགུཎེ, ‘‘སུཔྤཊིཔནྣོ བྷགཝཏོ སཱཝཀསངྒྷོ’’ཏིཨཱདིནཱ སུཏྟནྟཔརིཡཱཡེནེཝ སངྒྷགུཎེ ཙ ཀཐཡིཾསུ། ཏཏོ སཱིཧོ ཙིནྟེསི – ‘‘ཨིམེསཉྩ ལིཙྪཝིརཱཛཀུམཱརཱནཾ ཏཏིཡདིཝསཏོ པཊྛཱཡ བུདྡྷདྷམྨསངྒྷགུཎེ ཀཐེནྟཱནཾ མུཁཾ ནཔྤཧོཏི, ཨདྡྷཱ ཨནོམགུཎེན སམནྣཱགཏཱ སོ བྷགཝཱ, ཨིམཾ དཱནི ཨུཔྤནྣཾ པཱིཏིཾ ཨཝིཛཧིཏྭཱཝ ཨཧཾ ཨཛྫ སམྨཱསམྦུདྡྷཾ པསྶིསྶཱམཱི’’ཏི། ཨཐསྶ ‘‘ཀིཾ ཧི མེ ཀརིསྶནྟི ནིགཎྛཱ’’ཏི ཝིཏཀྐོ ཨུདཔཱདི། ཏཏྠ ཀིཾ ཧི མེ ཀརིསྶནྟཱིཏི ཀིཾ ནཱམ མཡ྄ཧཾ ནིགཎྛཱ ཀརིསྶནྟི། ཨཔལོཀིཏཱ ཝཱ ཨནཔལོཀིཏཱ ཝཱཏི ཨཱཔུཙྪིཏཱ ཝཱ ཨནཱཔུཙྪིཏཱ ཝཱ། ན ཧི མེ ཏེ ཨཱཔུཙྪིཏཱ ཡཱནཝཱཧནསམྤཏྟིཾ, ན ཙ ཨིསྶརིཡཝིསེསཾ དསྶནྟི, ནཱཔི ཨནཱཔུཙྪིཏཱ ཧརིསྶནྟི, ཨཕལཾ ཨེཏེསཾ ཨཱཔུཙྪནནྟི ཨདྷིཔྤཱཡོ།
Tatiyavāre pana buddhassa vaṇṇaṃ bhāsamānā ‘‘itipi so bhagavā’’ti suttantapariyāyeneva buddhaguṇe kathayiṃsu, ‘‘svākkhāto bhagavatā dhammo’’tiādinā suttantapariyāyeneva dhammaguṇe, ‘‘suppaṭipanno bhagavato sāvakasaṅgho’’tiādinā suttantapariyāyeneva saṅghaguṇe ca kathayiṃsu. Tato sīho cintesi – ‘‘imesañca licchavirājakumārānaṃ tatiyadivasato paṭṭhāya buddhadhammasaṅghaguṇe kathentānaṃ mukhaṃ nappahoti, addhā anomaguṇena samannāgatā so bhagavā, imaṃ dāni uppannaṃ pītiṃ avijahitvāva ahaṃ ajja sammāsambuddhaṃ passissāmī’’ti. Athassa ‘‘kiṃ hi me karissanti nigaṇṭhā’’ti vitakko udapādi. Tattha kiṃ hi me karissantīti kiṃ nāma mayhaṃ nigaṇṭhā karissanti. Apalokitā vā anapalokitā vāti āpucchitā vā anāpucchitā vā. Na hi me te āpucchitā yānavāhanasampattiṃ, na ca issariyavisesaṃ dassanti, nāpi anāpucchitā harissanti, aphalaṃ etesaṃ āpucchananti adhippāyo.
ཝེསཱལིཡཱ ནིཡྻཱསཱིཏི ཡཐཱ ཧི གིམྷཀཱལེ དེཝེ ཝུཊྛེ ཨུདཀཾ སནྡམཱནཾ ནདིཾ ཨོཏརིཏྭཱ ཐོཀམེཝ གནྟྭཱ ཏིཊྛཏི ནཔྤཝཏྟཏི, ཨེཝཾ སཱིཧསྶ པཋམདིཝསེ ‘‘དསབལཾ པསྶིསྶཱམཱི’’ཏི ཨུཔྤནྣཱཡ པཱིཏིཡཱ ནིགཎྛེན པཊིབཱཧིཏཀཱལོ། ཡཐཱཔི དུཏིཡདིཝསེ དེཝེ ཝུཊྛེ ཨུདཀཾ སནྡམཱནཾ ནདིཾ ཨོཏརིཏྭཱ ཐོཀཾ གནྟྭཱ ཝཱལིཀཱཔུཉྫཾ པཧརིཏྭཱ ཨཔྤཝཏྟཾ ཧོཏི, ཨེཝཾ སཱིཧསྶ དུཏིཡདིཝསེ ‘‘དསབལཾ པསྶིསྶཱམཱི’’ཏི ཨུཔྤནྣཱཡ པཱིཏིཡཱ ནིགཎྛེན པཊིབཱཧིཏཀཱལོ། ཡཐཱ ཏཏིཡདིཝསེ དེཝེ ཝུཊྛེ ཨུདཀཾ སནྡམཱནཾ ནདིཾ ཨོཏརིཏྭཱ པུརཱཎཔཎྞསུཀྑདཎྜཀཊྛཀཙཝརཱདཱིནི པརིཀཌྜྷནྟཾ ཝཱལིཀཱཔུཉྫཾ བྷིནྡིཏྭཱ སམུདྡནིནྣམེཝ ཧོཏི, ཨེཝཾ སཱིཧོ ཏཏིཡདིཝསེ ཏིཎྞཾ ཝཏྠཱུནཾ གུཎཀཐཾ སུཏྭཱ ཨུཔྤནྣེ པཱིཏིཔཱམོཛྫེ ‘‘ཨཕལཱ ནིགཎྛཱ ནིཔྥལཱ ནིགཎྛཱ, ཀིཾ མེ ཨིམེ ཀརིསྶནྟི, གམིསྶཱམཧཾ སཏྠུསནྟིཀ’’ནྟི མནཾ ཨབྷིནཱིཧརིཏྭཱ ཝེསཱལིཡཱ ནིཡྻཱསི། ནིཡྻནྟོ ཙ ‘‘ཙིརསྶཱཧཾ དསབལསྶ སནྟིཀཾ གནྟུཀཱམོ ཛཱཏོ, ན ཁོ པན མེ ཡུཏྟཾ ཨཉྙཱཏཀཝེསེན གནྟུ’’ནྟི ‘‘ཡེཀེཙི དསབལསྶ སནྟིཀཾ གནྟུཀཱམཱ, སབྦེ ནིཀྑམནྟཱུ’’ཏི གྷོསནཾ ཀཱརེཏྭཱ པཉྩརཐསཏཱནི ཡོཛཱཔེཏྭཱ ཨུཏྟམརཐེ ཋིཏོ ཏེཧི ཙེཝ པཉྩཧི རཐསཏེཧི མཧཏིཡཱ ཙ པརིསཱཡ པརིཝུཏོ གནྡྷཔུཔྥཙུཎྞཝཱསཱདཱིནི གཱཧཱཔེཏྭཱ ནིཡྻཱསི། དིཝཱ དིཝསྶཱཏི དིཝསསྶ ཙ དིཝཱ, མཛ྄ཛྷནྷིཀེ ཨཏིཀྐནྟམཏྟེ།
Vesāliyā niyyāsīti yathā hi gimhakāle deve vuṭṭhe udakaṃ sandamānaṃ nadiṃ otaritvā thokameva gantvā tiṭṭhati nappavattati, evaṃ sīhassa paṭhamadivase ‘‘dasabalaṃ passissāmī’’ti uppannāya pītiyā nigaṇṭhena paṭibāhitakālo. Yathāpi dutiyadivase deve vuṭṭhe udakaṃ sandamānaṃ nadiṃ otaritvā thokaṃ gantvā vālikāpuñjaṃ paharitvā appavattaṃ hoti, evaṃ sīhassa dutiyadivase ‘‘dasabalaṃ passissāmī’’ti uppannāya pītiyā nigaṇṭhena paṭibāhitakālo. Yathā tatiyadivase deve vuṭṭhe udakaṃ sandamānaṃ nadiṃ otaritvā purāṇapaṇṇasukkhadaṇḍakaṭṭhakacavarādīni parikaḍḍhantaṃ vālikāpuñjaṃ bhinditvā samuddaninnameva hoti, evaṃ sīho tatiyadivase tiṇṇaṃ vatthūnaṃ guṇakathaṃ sutvā uppanne pītipāmojje ‘‘aphalā nigaṇṭhā nipphalā nigaṇṭhā, kiṃ me ime karissanti, gamissāmahaṃ satthusantika’’nti manaṃ abhinīharitvā vesāliyā niyyāsi. Niyyanto ca ‘‘cirassāhaṃ dasabalassa santikaṃ gantukāmo jāto, na kho pana me yuttaṃ aññātakavesena gantu’’nti ‘‘yekeci dasabalassa santikaṃ gantukāmā, sabbe nikkhamantū’’ti ghosanaṃ kāretvā pañcarathasatāni yojāpetvā uttamarathe ṭhito tehi ceva pañcahi rathasatehi mahatiyā ca parisāya parivuto gandhapupphacuṇṇavāsādīni gāhāpetvā niyyāsi. Divā divassāti divasassa ca divā, majjhanhike atikkantamatte.
ཡེན བྷགཝཱ ཏེནུཔསངྐམཱིཏི ཨཱརཱམཾ པཝིསནྟོ དཱུརཏོཝ ཨསཱིཏི-ཨནུབྱཉྫན-བྱཱམཔྤབྷཱ-དྭཏྟིཾས-མཧཱཔུརིསལཀྑཎཱནི ཚབྦཎྞགྷནབུདྡྷརསྨིཡོ ཙ དིསྭཱ ‘‘ཨེཝརཱུཔཾ ནཱམ པུརིསཾ ཨེཝཾ ཨཱསནྣེ ཝསནྟཾ ཨེཏྟཀཾ ཀཱལཾ ནཱདྡསཾ, ཝཉྩིཏོ ཝཏམྷི, ཨལཱབྷཱ ཝཏ མེ’’ཏི ཙིནྟེཏྭཱ མཧཱནིདྷིཾ དིསྭཱ དལིདྡཔུརིསོ ཝིཡ སཉྫཱཏཔཱིཏིཔཱམོཛྫོ ཡེན བྷགཝཱ ཏེནུཔསངྐམི། དྷམྨསྶ ཙཱནུདྷམྨཾ བྱཱཀརོནྟཱིཏི བྷོཏཱ གོཏམེན ཝུཏྟཀཱརཎསྶ ཨནུཀཱརཎཾ ཀཐེནྟི། ཀཱརཎཝཙནོ ཧེཏྠ དྷམྨསདྡོ ‘‘ཧེཏུམྷི ཉཱཎཾ དྷམྨཔཊིསམྦྷིདཱ’’ཏིཨཱདཱིསུ (ཝིབྷ॰ ༧༢༠) ཝིཡ། ཀཱརཎནྟི ཙེཏྠ ཏཐཱཔཝཏྟསྶ སདྡསྶ ཨཏྠོ ཨདྷིཔྤེཏོ ཏསྶ པཝཏྟིཧེཏུབྷཱཝཏོ། ཨཏྠཔྤཡུཏྟོ ཧི སདྡཔྤཡོགོ། ཨནུཀཱརཎནྟི ཨེསོ ཨེཝ པརེཧི ཏཐཱ ཝུཙྩམཱནོ། སཧདྷམྨིཀོ ཝཱདཱནུཝཱདོཏི། པརེཧི ཝུཏྟཀཱརཎེཧི སཀཱརཎོ ཧུཏྭཱ ཏུམྷཱཀཾ ཝཱདོ ཝཱ ཏཏོ པརཾ ཏསྶ ཨནུཝཱདོ ཝཱ ཀོཙི ཨཔྤམཏྟཀོཔི ཝིཉྙཱུཧི གརཧིཏབྦཾ ཋཱནཾ ཀཱརཎཾ ན ཨཱགཙྪཏི། ཨིདཾ ཝུཏྟཾ ཧོཏི – ཀིཾ སབྦཱཀཱརེནཔི ཏཝ ཝཱདེ གཱརཡ྄ཧཾ ཀཱརཎཾ ནཏྠཱིཏི། ཨནབྦྷཀྑཱཏུཀཱམཱཏི ན ཨབྷཱུཏེན ཝཏྟུཀཱམཱ། ཨཏྠི སཱིཧཔརིཡཱཡོཏིཨཱདཱིནཾ ཨཏྠོ ཝེརཉྫཀཎྜེ ཨཱགཏནཡེནེཝ ཝེདིཏབྦོ། པརམེན ཨསྶཱསེནཱཏི ཙཏུམགྒཙཏུཕལསངྑཱཏེན ཨུཏྟམེན། ཨསྶཱསཱཡ དྷམྨཾ དེསེམཱིཏི ཨསྶཱསནཏྠཱཡ སནྠམྦྷནཏྠཱཡ དྷམྨཾ དེསེམི། ཨིཏི བྷགཝཱ ཨཊྛཧངྒེཧི སཱིཧསྶ སེནཱཔཏིསྶ དྷམྨཾ དེསེསི།
Yena bhagavā tenupasaṅkamīti ārāmaṃ pavisanto dūratova asīti-anubyañjana-byāmappabhā-dvattiṃsa-mahāpurisalakkhaṇāni chabbaṇṇaghanabuddharasmiyo ca disvā ‘‘evarūpaṃ nāma purisaṃ evaṃ āsanne vasantaṃ ettakaṃ kālaṃ nāddasaṃ, vañcito vatamhi, alābhā vata me’’ti cintetvā mahānidhiṃ disvā daliddapuriso viya sañjātapītipāmojjo yena bhagavā tenupasaṅkami. Dhammassa cānudhammaṃ byākarontīti bhotā gotamena vuttakāraṇassa anukāraṇaṃ kathenti. Kāraṇavacano hettha dhammasaddo ‘‘hetumhi ñāṇaṃ dhammapaṭisambhidā’’tiādīsu (vibha. 720) viya. Kāraṇanti cettha tathāpavattassa saddassa attho adhippeto tassa pavattihetubhāvato. Atthappayutto hi saddappayogo. Anukāraṇanti eso eva parehi tathā vuccamāno. Sahadhammiko vādānuvādoti. Parehi vuttakāraṇehi sakāraṇo hutvā tumhākaṃ vādo vā tato paraṃ tassa anuvādo vā koci appamattakopi viññūhi garahitabbaṃ ṭhānaṃ kāraṇaṃ na āgacchati. Idaṃ vuttaṃ hoti – kiṃ sabbākārenapi tava vāde gārayhaṃ kāraṇaṃ natthīti. Anabbhakkhātukāmāti na abhūtena vattukāmā. Atthi sīhapariyāyotiādīnaṃ attho verañjakaṇḍe āgatanayeneva veditabbo. Paramenaassāsenāti catumaggacatuphalasaṅkhātena uttamena. Assāsāya dhammaṃ desemīti assāsanatthāya santhambhanatthāya dhammaṃ desemi. Iti bhagavā aṭṭhahaṅgehi sīhassa senāpatissa dhammaṃ desesi.
ཨནུཝིཙྩཀཱརནྟི ཨནུཝིདིཏྭཱ ཙིནྟེཏྭཱ ཏུལཡིཏྭཱ ཀཏྟབྦཾ ཀརོཧཱིཏི ཝུཏྟཾ ཧོཏི། སཱདྷུ ཧོཏཱིཏི སུནྡརོ ཧོཏི། ཏུམྷཱདིསསྨིཉྷི མཾ དིསྭཱ མཾ སརཎཾ གཙྪནྟེ ནིགཎྛཾ དིསྭཱ ནིགཎྛཾ སརཎཾ གཙྪནྟེ ‘‘ཀིཾ ཨཡཾ སཱིཧོ དིཊྛདིཊྛམེཝ སརཎཾ གཙྪཏཱི’’ཏི གརཧཱ ཨུཔྤཛྫཏི, ཏསྨཱ ཨནུཝིཙྩཀཱརོ ཏུམྷཱདིསཱནཾ སཱདྷཱུཏི དསྶེཏི། པཊཱཀཾ པརིཧརེཡྻུནྟི ཏེ ཀིར ཨེཝརཱུཔཾ སཱཝཀཾ ལབྷིཏྭཱ ‘‘ཨསུཀོ ནཱམ རཱཛཱ ཝཱ རཱཛམཧཱམཏྟོ ཝཱ སེཊྛི ཝཱ ཨམྷཱཀཾ སརཎཾ གཏོ སཱཝཀོ ཛཱཏོ’’ཏི པཊཱཀཾ ཨུཀྑིཔིཏྭཱ ནགརེ གྷོསེནྟཱ ཨཱཧིཎྜནྟི། ཀསྨཱ? ཨེཝཾ ནོ མཧནྟབྷཱཝོ ཨཱཝིབྷཝིསྶཏཱིཏི ཙ། སཙེ པནསྶ ‘‘ཀིམཧཾ ཨེཏེསཾ སརཎཾ གཏོ’’ཏི ཝིཔྤཊིསཱརོ ཨུཔྤཛྫེཡྻ, ཏམྤི སོ ‘‘ཨེཏེསཾ མེ སརཎགཏབྷཱཝཾ བཧཱུ ཛཱནནྟི, དུཀྑཾ ཨིདཱནི པཊིནིཝཏྟིཏུ’’ནྟི ཝིནོདེཏྭཱ ན པཊིཀྐམིསྶཏཱིཏི ཙ། ཏེནཱཧ – ‘‘པཊཱཀཾ པརིཧརེཡྻུ’’ནྟི། ཨོཔཱནབྷཱུཏནྟི པཊིཡཏྟཨུདཔཱནོ ཝིཡ ཋིཏཾ། ཀུལནྟི ཏཝ ནིཝེསནཾ། དཱཏབྦཾ མཉྙེཡྻཱསཱིཏི པུབྦེ དསཔི ཝཱིསཏིཔི སཊྛིཔི ཛནེ ཨཱགཏེ དིསྭཱ ནཏྠཱིཏི ཨཝཏྭཱ དེསི, ཨིདཱནི མཾ སརཎཾ གཏཀཱརཎམཏྟེནེཝ མཱ ཨིམེསཾ དེཡྻདྷམྨཾ ཨུཔཙྪིནྡི། སམྤཏྟཱནཉྷི དཱཏབྦམེཝཱཏི ཨོཝདི། སུཏཾ མེཏཾ, བྷནྟེཏི ཀུཏོ སུཏནྟི? ནིགཎྛཱནཾ སནྟིཀཱ། ཏེ ཀིར ཀུལགྷརེསུ ཨེཝཾ པཀཱསེནྟི ‘‘མཡཾ ཡསྶ ཀསྶཙི སམྤཏྟསྶ དཱཏབྦནྟི ཝདཱམ, སམཎོ པན གོཏམོ ‘མཡ྄ཧམེཝ དཱནཾ དཱཏབྦཾ ནཱཉྙེསཾ, མཡ྄ཧམེཝ སཱཝཀཱནཾ དཱནཾ དཱཏབྦཾ, ནཱཉྙེསཾ སཱཝཀཱནཾ, མཡ྄ཧམེཝ དིནྣཾ དཱནཾ མཧཔྥལཾ, ནཱཉྙེསཾ, མཡ྄ཧམེཝ སཱཝཀཱནཾ དིནྣཾ མཧཔྥལཾ, ནཱཉྙེས’ནྟི ཨེཝཾ ཝདཏཱི’’ཏི། ཏཾ སནྡྷཱཡ ཨཡཾ ‘‘སུཏཾ མེཏ’’ནྟི ཨཱཧ།
Anuviccakāranti anuviditvā cintetvā tulayitvā kattabbaṃ karohīti vuttaṃ hoti. Sādhu hotīti sundaro hoti. Tumhādisasmiñhi maṃ disvā maṃ saraṇaṃ gacchante nigaṇṭhaṃ disvā nigaṇṭhaṃ saraṇaṃ gacchante ‘‘kiṃ ayaṃ sīho diṭṭhadiṭṭhameva saraṇaṃ gacchatī’’ti garahā uppajjati, tasmā anuviccakāro tumhādisānaṃ sādhūti dasseti. Paṭākaṃ parihareyyunti te kira evarūpaṃ sāvakaṃ labhitvā ‘‘asuko nāma rājā vā rājamahāmatto vā seṭṭhi vā amhākaṃ saraṇaṃ gato sāvako jāto’’ti paṭākaṃ ukkhipitvā nagare ghosentā āhiṇḍanti. Kasmā? Evaṃ no mahantabhāvo āvibhavissatīti ca. Sace panassa ‘‘kimahaṃ etesaṃ saraṇaṃ gato’’ti vippaṭisāro uppajjeyya, tampi so ‘‘etesaṃ me saraṇagatabhāvaṃ bahū jānanti, dukkhaṃ idāni paṭinivattitu’’nti vinodetvā na paṭikkamissatīti ca. Tenāha – ‘‘paṭākaṃ parihareyyu’’nti. Opānabhūtanti paṭiyattaudapāno viya ṭhitaṃ. Kulanti tava nivesanaṃ. Dātabbaṃ maññeyyāsīti pubbe dasapi vīsatipi saṭṭhipi jane āgate disvā natthīti avatvā desi, idāni maṃ saraṇaṃ gatakāraṇamatteneva mā imesaṃ deyyadhammaṃ upacchindi. Sampattānañhi dātabbamevāti ovadi. Sutaṃ metaṃ, bhanteti kuto sutanti? Nigaṇṭhānaṃ santikā. Te kira kulagharesu evaṃ pakāsenti ‘‘mayaṃ yassa kassaci sampattassa dātabbanti vadāma, samaṇo pana gotamo ‘mayhameva dānaṃ dātabbaṃ nāññesaṃ, mayhameva sāvakānaṃ dānaṃ dātabbaṃ, nāññesaṃ sāvakānaṃ, mayhameva dinnaṃ dānaṃ mahapphalaṃ, nāññesaṃ, mayhameva sāvakānaṃ dinnaṃ mahapphalaṃ, nāññesa’nti evaṃ vadatī’’ti. Taṃ sandhāya ayaṃ ‘‘sutaṃ meta’’nti āha.
ཨནུཔུབྦིཾ ཀཐནྟི དཱནཱནནྟརཾ སཱིལཾ, སཱིལཱནནྟརཾ སགྒཾ, སགྒཱནནྟརཾ མགྒནྟི ཨེཝཾ ཨནུཔཊིཔཱཊིཀཐཾ། ཏཏྠ དཱནཀཐནྟི ཨིདཾ དཱནཾ ནཱམ སུཁཱནཾ ནིདཱནཾ, སམྤཏྟཱིནཾ མཱུལཾ, བྷོགཱནཾ པཏིཊྛཱ, ཝིསམགཏསྶ ཏཱཎཾ ལེཎཾ གཏི པརཱཡཎཾ, ཨིདྷལོཀཔརལོཀེསུ དཱནསདིསོ ཨཝསྶཡོ པཏིཊྛཱ ཨཱརམྨཎཾ ཏཱཎཾ ལེཎཾ གཏི པརཱཡཎཾ ནཏྠི། ཨིདཉྷི ཨཝསྶཡཊྛེན རཏནམཡསཱིཧཱསནསདིསཾ, པཏིཊྛཱནཊྛེན མཧཱཔཐཝཱིསདིསཾ, ཨཱརམྨཎཊྛེན ཨཱལམྦནརཛྫུསདིསཾ། ཨིདཉྷི དུཀྑནིཏྠརཎཊྛེན ནཱཝཱ, སམསྶཱསནཊྛེན སངྒཱམསཱུརོ, བྷཡཔརིཏྟཱཎཊྛེན སུསངྑཏནགརཾ, མཙྪེརམལཱདཱིཧི ཨནུཔལིཏྟཊྛེན པདུམཾ, ཏེསཾ ནིདཧནཊྛེན ཨགྒི, དུརཱསདཊྛེན ཨཱསིཝིསོ, ཨསནྟཱསནཊྛེན སཱིཧོ, བལཝནྟཊྛེན ཧཏྠཱི, ཨབྷིམངྒལསམྨཏཊྛེན སེཏཝསབྷོ, ཁེམནྟབྷཱུམིསམྤཱཔནཊྛེན ཝལཱཧཀོ ཨསྶརཱཛཱ། དཱནཾ ནཱམེཏཾ མཡཱ གཏམགྒོ, མཡ྄ཧེསོ ཝཾསོ, མཡཱ དས པཱརམིཡོ པཱུརེནྟེན ཝེལཱམམཧཱཡཉྙོ, མཧཱགོཝིནྡམཧཱཡཉྙོ, མཧཱསུདསྶནམཧཱཡཉྙོ, ཝེསྶནྟརམཧཱཡཉྙོཏི, ཨནེཀམཧཱཡཉྙཱ པཝཏྟིཏཱ, སསབྷཱུཏེན ཛལིཏཨགྒིཀྑནྡྷེ ཨཏྟཱནཾ ནིཡྻཱདེནྟེན སམྤཏྟཡཱཙཀཱནཾ ཙིཏྟཾ གཧིཏཾ། དཱནཉྷི ལོཀེ སཀྐསམྤཏྟིཾ དེཏི མཱརསམྤཏྟིཾ བྲཧྨསམྤཏྟིཾ, ཙཀྐཝཏྟིསམྤཏྟིཾ, སཱཝཀཔཱརམཱིཉཱཎཾ, པཙྩེཀབོདྷིཉཱཎཾ, ཨབྷིསམྦོདྷིཉཱཎཾ དེཏཱིཏི ཨེཝམཱདིདཱནགུཎཔྤཊིསཾཡུཏྟཾ ཀཐཾ།
Anupubbiṃ kathanti dānānantaraṃ sīlaṃ, sīlānantaraṃ saggaṃ, saggānantaraṃ magganti evaṃ anupaṭipāṭikathaṃ. Tattha dānakathanti idaṃ dānaṃ nāma sukhānaṃ nidānaṃ, sampattīnaṃ mūlaṃ, bhogānaṃ patiṭṭhā, visamagatassa tāṇaṃ leṇaṃ gati parāyaṇaṃ, idhalokaparalokesu dānasadiso avassayo patiṭṭhā ārammaṇaṃ tāṇaṃ leṇaṃ gati parāyaṇaṃ natthi. Idañhi avassayaṭṭhena ratanamayasīhāsanasadisaṃ, patiṭṭhānaṭṭhena mahāpathavīsadisaṃ, ārammaṇaṭṭhena ālambanarajjusadisaṃ. Idañhi dukkhanittharaṇaṭṭhena nāvā, samassāsanaṭṭhena saṅgāmasūro, bhayaparittāṇaṭṭhena susaṅkhatanagaraṃ, maccheramalādīhi anupalittaṭṭhena padumaṃ, tesaṃ nidahanaṭṭhena aggi, durāsadaṭṭhena āsiviso, asantāsanaṭṭhena sīho, balavantaṭṭhena hatthī, abhimaṅgalasammataṭṭhena setavasabho, khemantabhūmisampāpanaṭṭhena valāhako assarājā. Dānaṃ nāmetaṃ mayā gatamaggo, mayheso vaṃso, mayā dasa pāramiyo pūrentena velāmamahāyañño, mahāgovindamahāyañño, mahāsudassanamahāyañño, vessantaramahāyaññoti, anekamahāyaññā pavattitā, sasabhūtena jalitaaggikkhandhe attānaṃ niyyādentena sampattayācakānaṃ cittaṃ gahitaṃ. Dānañhi loke sakkasampattiṃ deti mārasampattiṃ brahmasampattiṃ, cakkavattisampattiṃ, sāvakapāramīñāṇaṃ, paccekabodhiñāṇaṃ, abhisambodhiñāṇaṃ detīti evamādidānaguṇappaṭisaṃyuttaṃ kathaṃ.
ཡསྨཱ པན དཱནཾ དེནྟོ སཱིལཾ སམཱདཱཏུཾ སཀྐོཏི, ཏསྨཱ ཏདནནྟརཾ སཱིལཀཐཾ ཀཐེསི། སཱིལཀཐནྟི སཱིལཾ ནཱམེཏཾ ཨཝསྶཡོ པཏིཊྛཱ ཨཱརམྨཎཾ ཏཱཎཾ ལེཎཾ གཏི པརཱཡཎཾ། སཱིལཾ ནཱམེཏཾ མམ ཝཾསོ , ཨཧཾ སངྑཔཱལནཱགརཱཛཀཱལེ བྷཱུརིདཏྟནཱགརཱཛཀཱལེ ཙམྤེཡྻནཱགརཱཛཀཱལེ སཱིལཝརཱཛཀཱལེ མཱཏུཔོསཀཧཏྠིརཱཛཀཱལེ ཚདྡནྟཧཏྠིརཱཛཀཱལེཏི ཨནནྟེསུ ཨཏྟབྷཱཝེསུ སཱིལཾ པརིཔཱུརེསིཾ། ཨིདྷལོཀཔརལོཀསམྤཏྟཱིནཉྷི སཱིལསདིསོ ཨཝསྶཡོ པཏིཊྛཱ ཨཱརམྨཎཾ ཏཱཎཾ ལེཎཾ གཏི པརཱཡཎཾ ནཏྠི, སཱིལཱལངྐཱརསདིསོ ཨལངྐཱརོ ནཏྠི, སཱིལཔུཔྥསདིསཾ པུཔྥཾ ནཏྠི, སཱིལགནྡྷསདིསོ གནྡྷོ ནཏྠི། སཱིལཱལངྐཱརེན ཧི ཨལངྐཏཾ སཱིལགནྡྷཱནུལིཏྟཾ སདེཝཀོཔི ལོཀོ ཨོལོཀེནྟོ ཏིཏྟིཾ ན གཙྪཏཱིཏི ཨེཝམཱདིསཱིལགུཎཔྤཊིསཾཡུཏྟཾ ཀཐཾ།
Yasmā pana dānaṃ dento sīlaṃ samādātuṃ sakkoti, tasmā tadanantaraṃ sīlakathaṃ kathesi. Sīlakathanti sīlaṃ nāmetaṃ avassayo patiṭṭhā ārammaṇaṃ tāṇaṃ leṇaṃ gati parāyaṇaṃ. Sīlaṃ nāmetaṃ mama vaṃso , ahaṃ saṅkhapālanāgarājakāle bhūridattanāgarājakāle campeyyanāgarājakāle sīlavarājakāle mātuposakahatthirājakāle chaddantahatthirājakāleti anantesu attabhāvesu sīlaṃ paripūresiṃ. Idhalokaparalokasampattīnañhi sīlasadiso avassayo patiṭṭhā ārammaṇaṃ tāṇaṃ leṇaṃ gati parāyaṇaṃ natthi, sīlālaṅkārasadiso alaṅkāro natthi, sīlapupphasadisaṃ pupphaṃ natthi, sīlagandhasadiso gandho natthi. Sīlālaṅkārena hi alaṅkataṃ sīlagandhānulittaṃ sadevakopi loko olokento tittiṃ na gacchatīti evamādisīlaguṇappaṭisaṃyuttaṃ kathaṃ.
‘‘ཨིདཾ པན སཱིལཾ ནིསྶཱཡ ཨཡཾ སགྒོ ལབྦྷཏཱི’’ཏི དསྶེཏུཾ སཱིལཱནནྟརཾ སགྒཀཐཾ ཀཐེསི། སགྒཀཐནྟི ‘‘ཨཡཾ སགྒོ ནཱམ ཨིཊྛོ ཀནྟོ མནཱཔོ, ནིཙྩམེཏྠ ཀཱིལཱ༹, ནིཙྩཾ སམྤཏྟིཡོ ལབྦྷནྟི, ཙཱཏུམཧཱརཱཛིཀཱ དེཝཱ ནཝུཏིཝསྶསཏསཧསྶཱནི དིབྦསུཁཾ དིབྦསམྤཏྟིཾ ཨནུབྷཝནྟི, ཏཱཝཏིཾསཱ ཏིསྶོ ཙ ཝསྶཀོཊིཡོ སཊྛི ཙ ཝསྶསཏསཧསྶཱནཱི’’ཏི ཨེཝམཱདིསགྒགུཎཔྤཊིསཾཡུཏྟཾ ཀཐཾ། སགྒསམྤཏྟིཾ ཀཐཡནྟཱནཉྷི བུདྡྷཱནཾ མུཁཾ ནཔྤཧོཏི། ཝུཏྟམྤི ཙེཏཾ – ‘‘ཨནེཀཔརིཡཱཡེན ཁྭཱཧཾ, བྷིཀྑཝེ, སགྒཀཐཾ ཀཐེཡྻ’’ནྟིཨཱདི (མ॰ ནི॰ ༣.༢༥༥)།
‘‘Idaṃ pana sīlaṃ nissāya ayaṃ saggo labbhatī’’ti dassetuṃ sīlānantaraṃ saggakathaṃ kathesi. Saggakathanti ‘‘ayaṃ saggo nāma iṭṭho kanto manāpo, niccamettha kīḷā, niccaṃ sampattiyo labbhanti, cātumahārājikā devā navutivassasatasahassāni dibbasukhaṃ dibbasampattiṃ anubhavanti, tāvatiṃsā tisso ca vassakoṭiyo saṭṭhi ca vassasatasahassānī’’ti evamādisaggaguṇappaṭisaṃyuttaṃ kathaṃ. Saggasampattiṃ kathayantānañhi buddhānaṃ mukhaṃ nappahoti. Vuttampi cetaṃ – ‘‘anekapariyāyena khvāhaṃ, bhikkhave, saggakathaṃ katheyya’’ntiādi (ma. ni. 3.255).
ཨེཝཾ སགྒཀཐཱཡ པལོབྷེཏྭཱ པན ཧཏྠིཾ ཨལངྐརིཏྭཱ ཏསྶ སོཎྜཾ ཚིནྡནྟོ ཝིཡ ‘‘ཨཡམྤི སགྒོ ཨནིཙྩོ ཨདྡྷུཝོ, ན ཨེཏྠ ཚནྡརཱགོ ཀཏྟབྦོ’’ཏི དསྶནཏྠཾ ‘‘ཨཔྤསྶཱདཱ ཀཱམཱ བཧུདུཀྑཱ བཧུཔཱཡཱསཱ, ཨཱདཱིནཝོ ཨེཏྠ བྷིཡྻོ’’ཏིཨཱདིནཱ (མ॰ ནི॰ ༡.༢༣༥-༢༣༦; ༢.༤༢) ནཡེན ཀཱམཱནཾ ཨཱདཱིནཝཾ ཨོཀཱརཾ སཾཀིལེསཾ ཀཐེསི། ཏཏྠ ཨཱདཱིནཝོཏི དོསོ། ཨོཀཱརོཏི ཨཝཀཱརོ ལཱམཀབྷཱཝོ། སཾཀིལེསོཏི ཏེཧི སཏྟཱནཾ སཾསཱརེ སཾཀིལིསྶནཾ། ཡཐཱཧ – ‘‘སཾཀིལིསྶནྟི ཝཏ, བྷོ, སཏྟཱ’’ཏི (མ॰ ནི॰ ༢.༣༥༡)།
Evaṃ saggakathāya palobhetvā pana hatthiṃ alaṅkaritvā tassa soṇḍaṃ chindanto viya ‘‘ayampi saggo anicco addhuvo, na ettha chandarāgo kattabbo’’ti dassanatthaṃ ‘‘appassādā kāmā bahudukkhā bahupāyāsā, ādīnavo ettha bhiyyo’’tiādinā (ma. ni. 1.235-236; 2.42) nayena kāmānaṃ ādīnavaṃ okāraṃ saṃkilesaṃ kathesi. Tattha ādīnavoti doso. Okāroti avakāro lāmakabhāvo. Saṃkilesoti tehi sattānaṃ saṃsāre saṃkilissanaṃ. Yathāha – ‘‘saṃkilissanti vata, bho, sattā’’ti (ma. ni. 2.351).
ཨེཝཾ ཀཱམཱདཱིནཝེན ཏཛྫེཏྭཱ ནེཀྑམྨེ ཨཱནིསཾསཾ པཀཱསེསི། ཀལླཙིཏྟནྟི ཨརོགཙིཏྟཾ། སཱམུཀྐཾསིཀཱཏི སཱམཾ ཨུཀྐཾསིཀཱ ཨཏྟནཱཡེཝ ཨུདྡྷརིཏྭཱ གཧིཏཱ, སཡམྦྷུཉཱཎེན དིཊྛཱ ཨསཱདྷཱརཎཱ ཨཉྙེསནྟི ཨཏྠོ། ཀཱ པན སཱཏི? ཨརིཡསཙྩདེསནཱ། ཏེནེཝཱཧ – དུཀྑཾ སམུདཡཾ ནིརོདྷཾ མགྒནྟི། ཝིརཛཾ ཝཱིཏམལནྟི རཱགརཛཱདཱིནཾ ཨབྷཱཝཱ ཝིརཛཾ, རཱགམལཱདཱིནཾ ཝིགཏཏྟཱ ཝཱིཏམལཾ། དྷམྨཙཀྑུནྟི ཨིདྷ སོཏཱཔཏྟིམགྒོ ཨདྷིཔྤེཏོ། ཏསྶ ཨུཔྤཏྟིཨཱཀཱརདསྶནཏྠཾ ཡཾཀིཉྩི སམུདཡདྷམྨཾ སབྦཾ ཏཾ ནིརོདྷདྷམྨནྟི ཨཱཧ། ཏཉྷི ནིརོདྷཾ ཨཱརམྨཎཾ ཀཏྭཱ ཀིཙྩཝསེན ཨེཝཾ སབྦསངྑཏཾ པཊིཝིཛ྄ཛྷནྟཾ ཨུཔྤཛྫཏི། དིཊྛོ ཨརིཡསཙྩདྷམྨོ ཨེཏེནཱཏི དིཊྛདྷམྨོ། ཨེས ནཡོ སེསེསུཔི། ཏིཎྞཱ ཝིཙིཀིཙྪཱ ཨནེནཱཏི ཏིཎྞཝིཙིཀིཙྪོ། ཝིགཏཱ ཀཐཾཀཐཱ ཨསྶཱཏི ཝིགཏཀཐཾཀཐོ། ཝིསཱརཛྫཾ པཏྟོཏི ཝེསཱརཛྫཔྤཏྟོ། ཀཏྠ? སཏྠུསཱསནེ། ནཱསྶ པརོ པཙྩཡོ, ན པརཾ སདྡྷཱཡ ཨེཏྠ ཝཏྟཏཱིཏི ཨཔརཔྤཙྩཡོ།
Evaṃ kāmādīnavena tajjetvā nekkhamme ānisaṃsaṃ pakāsesi. Kallacittanti arogacittaṃ. Sāmukkaṃsikāti sāmaṃ ukkaṃsikā attanāyeva uddharitvā gahitā, sayambhuñāṇena diṭṭhā asādhāraṇā aññesanti attho. Kā pana sāti? Ariyasaccadesanā. Tenevāha – dukkhaṃ samudayaṃ nirodhaṃ magganti. Virajaṃ vītamalanti rāgarajādīnaṃ abhāvā virajaṃ, rāgamalādīnaṃ vigatattā vītamalaṃ. Dhammacakkhunti idha sotāpattimaggo adhippeto. Tassa uppattiākāradassanatthaṃ yaṃkiñci samudayadhammaṃ sabbaṃ taṃ nirodhadhammanti āha. Tañhi nirodhaṃ ārammaṇaṃ katvā kiccavasena evaṃ sabbasaṅkhataṃ paṭivijjhantaṃ uppajjati. Diṭṭho ariyasaccadhammo etenāti diṭṭhadhammo. Esa nayo sesesupi. Tiṇṇā vicikicchā anenāti tiṇṇavicikiccho. Vigatā kathaṃkathā assāti vigatakathaṃkatho. Visārajjaṃ pattoti vesārajjappatto. Kattha? Satthusāsane. Nāssa paro paccayo, na paraṃ saddhāya ettha vattatīti aparappaccayo.
པཝཏྟམཾསནྟི པཀཏིཡཱ པཝཏྟཾ ཀཔྤིཡམཾསཾ མཱུལཾ གཧེཏྭཱ ཨནྟརཱཔཎེ པརིཡེསཱཧཱིཏི ཨདྷིཔྤཱཡོ། སམྦཧུལཱ ནིགཎྛཱཏི པཉྩསཏམཏྟཱ ནིགཎྛཱ། ཐཱུལཾ པསུནྟི ཐཱུལཾ མཧཱསརཱིརཾ གོཀཎྞམཧིཾསསཱུཀརསངྑཱཏཾ པསུཾ། ཨུདྡིསྶཀཏནྟི ཨཏྟཱནཾ ཨུདྡིསིཏྭཱ ཀཏཾ, མཱརིཏནྟི ཨཏྠོ། པཊིཙྩཀམྨནྟི སྭཱཡཾ ཏཾ མཾསཾ པཊིཙྩ ཏཾ པཱཎཝདྷཀམྨཾ ཕུསཏི། ཏཉྷི ཨཀུསལཾ ཨུཔཌྜྷཾ དཱཡཀསྶ, ཨུཔཌྜྷཾ པཊིགྒཱཧཀསྶ ཧོཏཱིཏི ནེསཾ ལདྡྷི། ཨཔརོ ནཡོ – པཊིཙྩཀམྨནྟི ཨཏྟཱནཾ པཊིཙྩཀཏཾ། ཨཐ ཝཱ པཊིཙྩཀམྨནྟི ནིམིཏྟཀམྨསྶེཏཾ ཨདྷིཝཙནཾ, ཏཾ པཊིཙྩཀམྨཾ ཨེཏྠ ཨཏྠཱིཏི མཾསམྤི པཊིཙྩཀམྨནྟི ཝུཏྟཾ། ཨུཔཀཎྞཀེཏི ཀཎྞམཱུལེ། ཨལནྟི པཊིཀྑེཔཝཙནཾ, ཀིཾ ཨིམིནཱཏི ཨཏྠོ། ན ཙ པནེཏེཏི ཨེཏེ ཨཱཡསྨནྟོ དཱིགྷརཏྟཾ ཨཝཎྞཀཱམཱ ཧུཏྭཱ ཨཝཎྞཾ བྷཱསནྟཱཔི ཨབྦྷཱཙིཀྑནྟཱ ན ཛིརིདནྟི, ཨབྦྷཀྑཱནསྶ ཨནྟཾ ན གཙྪནྟཱིཏི ཨཏྠོ། ཨཐ ཝཱ ལཛྫནཏྠེ ཨིདཾ ཛིརིདནྟཱིཏི པདཾ དཊྛབྦཾ, ན ལཛྫནྟཱིཏི ཨཏྠོ།
Pavattamaṃsanti pakatiyā pavattaṃ kappiyamaṃsaṃ mūlaṃ gahetvā antarāpaṇe pariyesāhīti adhippāyo. Sambahulā nigaṇṭhāti pañcasatamattā nigaṇṭhā. Thūlaṃ pasunti thūlaṃ mahāsarīraṃ gokaṇṇamahiṃsasūkarasaṅkhātaṃ pasuṃ. Uddissakatanti attānaṃ uddisitvā kataṃ, māritanti attho. Paṭiccakammanti svāyaṃ taṃ maṃsaṃ paṭicca taṃ pāṇavadhakammaṃ phusati. Tañhi akusalaṃ upaḍḍhaṃ dāyakassa, upaḍḍhaṃ paṭiggāhakassa hotīti nesaṃ laddhi. Aparo nayo – paṭiccakammanti attānaṃ paṭiccakataṃ. Atha vā paṭiccakammanti nimittakammassetaṃ adhivacanaṃ, taṃ paṭiccakammaṃ ettha atthīti maṃsampi paṭiccakammanti vuttaṃ. Upakaṇṇaketi kaṇṇamūle. Alanti paṭikkhepavacanaṃ, kiṃ imināti attho. Na ca paneteti ete āyasmanto dīgharattaṃ avaṇṇakāmā hutvā avaṇṇaṃ bhāsantāpi abbhācikkhantā na jiridanti, abbhakkhānassa antaṃ na gacchantīti attho. Atha vā lajjanatthe idaṃ jiridantīti padaṃ daṭṭhabbaṃ, na lajjantīti attho.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༢. སཱིཧསུཏྟཾ • 2. Sīhasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༢. སཱིཧསུཏྟཝཎྞནཱ • 2. Sīhasuttavaṇṇanā
