| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
២២. សិខីពុទ្ធវំសោ
22. Sikhībuddhavaṃso
១.
1.
វិបស្សិស្ស អបរេន, សម្ពុទ្ធោ ទ្វិបទុត្តមោ;
Vipassissa aparena, sambuddho dvipaduttamo;
សិខិវ្ហយោ អាសិ ជិនោ, អសមោ អប្បដិបុគ្គលោ។
Sikhivhayo āsi jino, asamo appaṭipuggalo.
២.
2.
មារសេនំ បមទ្ទិត្វា, បត្តោ សម្ពោធិមុត្តមំ;
Mārasenaṃ pamadditvā, patto sambodhimuttamaṃ;
ធម្មចក្កំ បវត្តេសិ, អនុកម្បាយ បាណិនំ។
Dhammacakkaṃ pavattesi, anukampāya pāṇinaṃ.
៣.
3.
កោដិសតសហស្សានំ, បឋមាភិសមយោ អហុ។
Koṭisatasahassānaṃ, paṭhamābhisamayo ahu.
៤.
4.
អបរម្បិ ធម្មំ ទេសេន្តេ, គណសេដ្ឋេ នរុត្តមេ;
Aparampi dhammaṃ desente, gaṇaseṭṭhe naruttame;
នវុតិកោដិសហស្សានំ, ទុតិយាភិសមយោ អហុ។
Navutikoṭisahassānaṃ, dutiyābhisamayo ahu.
៥.
5.
អសីតិកោដិសហស្សានំ, តតិយាភិសមយោ អហុ។
Asītikoṭisahassānaṃ, tatiyābhisamayo ahu.
៦.
6.
សន្និបាតា តយោ អាសុំ, សិខិស្សាបិ មហេសិនោ;
Sannipātā tayo āsuṃ, sikhissāpi mahesino;
ខីណាសវានំ វិមលានំ, សន្តចិត្តាន តាទិនំ។
Khīṇāsavānaṃ vimalānaṃ, santacittāna tādinaṃ.
៧.
7.
ភិក្ខុសតសហស្សានំ, បឋមោ អាសិ សមាគមោ;
Bhikkhusatasahassānaṃ, paṭhamo āsi samāgamo;
អសីតិភិក្ខុសហស្សានំ, ទុតិយោ អាសិ សមាគមោ។
Asītibhikkhusahassānaṃ, dutiyo āsi samāgamo.
៨.
8.
សត្តតិភិក្ខុសហស្សានំ, តតិយោ អាសិ សមាគមោ;
Sattatibhikkhusahassānaṃ, tatiyo āsi samāgamo;
អនុបលិត្តោ បទុមំវ, តោយម្ហិ សម្បវឌ្ឍិតំ។
Anupalitto padumaṃva, toyamhi sampavaḍḍhitaṃ.
៩.
9.
អហំ តេន សមយេន, អរិន្ទមោ នាម ខត្តិយោ;
Ahaṃ tena samayena, arindamo nāma khattiyo;
សម្ពុទ្ធប្បមុខំ សង្ឃំ, អន្នបានេន តប្បយិំ។
Sambuddhappamukhaṃ saṅghaṃ, annapānena tappayiṃ.
១០.
10.
ពហុំ ទុស្សវរំ ទត្វា, ទុស្សកោដិំ អនប្បកំ;
Bahuṃ dussavaraṃ datvā, dussakoṭiṃ anappakaṃ;
អលង្កតំ ហត្ថិយានំ, សម្ពុទ្ធស្ស អទាសហំ។
Alaṅkataṃ hatthiyānaṃ, sambuddhassa adāsahaṃ.
១១.
11.
ហត្ថិយានំ និម្មិនិត្វា, កប្បិយំ ឧបនាមយិំ;
Hatthiyānaṃ nimminitvā, kappiyaṃ upanāmayiṃ;
បូរយិំ មានសំ មយ្ហំ, និច្ចំ ទឡ្ហមុបដ្ឋិតំ។
Pūrayiṃ mānasaṃ mayhaṃ, niccaṃ daḷhamupaṭṭhitaṃ.
១២.
12.
សោបិ មំ ពុទ្ធោ ព្យាកាសិ, សិខី លោកគ្គនាយកោ;
Sopi maṃ buddho byākāsi, sikhī lokagganāyako;
‘‘ឯកតិំសេ ឥតោ កប្បេ, អយំ ពុទ្ធោ ភវិស្សតិ។
‘‘Ekatiṃse ito kappe, ayaṃ buddho bhavissati.
១៣.
13.
‘‘អហុ កបិលវ្ហយា រម្មា…បេ.… ហេស្សាម សម្មុខា ឥមំ’’។
‘‘Ahu kapilavhayā rammā…pe… hessāma sammukhā imaṃ’’.
១៤.
14.
តស្សាហំ វចនំ សុត្វា, ភិយ្យោ ចិត្តំ បសាទយិំ;
Tassāhaṃ vacanaṃ sutvā, bhiyyo cittaṃ pasādayiṃ;
ឧត្តរិំ វតមធិដ្ឋាសិំ, ទសបារមិបូរិយា។
Uttariṃ vatamadhiṭṭhāsiṃ, dasapāramipūriyā.
១៥.
15.
នគរំ អរុណវតី នាម, អរុណោ នាម ខត្តិយោ;
Nagaraṃ aruṇavatī nāma, aruṇo nāma khattiyo;
បភាវតី នាម ជនិកា, សិខិស្សាបិ មហេសិនោ។
Pabhāvatī nāma janikā, sikhissāpi mahesino.
១៦.
16.
សត្តវស្សសហស្សានិ , អគារំ អជ្ឈ សោ វសិ;
Sattavassasahassāni , agāraṃ ajjha so vasi;
១៧.
17.
ចតុវីសសហស្សានិ, នារិយោ សមលង្កតា;
Catuvīsasahassāni, nāriyo samalaṅkatā;
សព្ពកាមា នាម នារី, អតុលោ នាម អត្រជោ។
Sabbakāmā nāma nārī, atulo nāma atrajo.
១៨.
18.
និមិត្តេ ចតុរោ ទិស្វា, ហត្ថិយានេន និក្ខមិ;
Nimitte caturo disvā, hatthiyānena nikkhami;
អដ្ឋមាសំ បធានចារំ, អចរី បុរិសុត្តមោ។
Aṭṭhamāsaṃ padhānacāraṃ, acarī purisuttamo.
១៩.
19.
ព្រហ្មុនា យាចិតោ សន្តោ, សិខី លោកគ្គនាយកោ;
Brahmunā yācito santo, sikhī lokagganāyako;
វត្តិ ចក្កំ មហាវីរោ, មិគទាយេ នរុត្តមោ។
Vatti cakkaṃ mahāvīro, migadāye naruttamo.
២០.
20.
អភិភូ សម្ភវោ ចេវ, អហេសុំ អគ្គសាវកា;
Abhibhū sambhavo ceva, ahesuṃ aggasāvakā;
ខេមង្ករោ នាមុបដ្ឋាកោ, សិខិស្សាបិ មហេសិនោ។
Khemaṅkaro nāmupaṭṭhāko, sikhissāpi mahesino.
២១.
21.
សខិលា ច បទុមា ច, អហេសុំ អគ្គសាវិកា;
Sakhilā ca padumā ca, ahesuṃ aggasāvikā;
ពោធិ តស្ស ភគវតោ, បុណ្ឌរីកោតិ វុច្ចតិ។
Bodhi tassa bhagavato, puṇḍarīkoti vuccati.
២២.
22.
សិរិវឌ្ឍោ ច នន្ទោ ច, អហេសុំ អគ្គុបដ្ឋកា;
Sirivaḍḍho ca nando ca, ahesuṃ aggupaṭṭhakā;
ចិត្តា ចេវ សុគុត្តា ច, អហេសុំ អគ្គុបដ្ឋិកា។
Cittā ceva suguttā ca, ahesuṃ aggupaṭṭhikā.
២៣.
23.
ឧច្ចត្តនេន សោ ពុទ្ធោ, សត្តតិហត្ថមុគ្គតោ;
Uccattanena so buddho, sattatihatthamuggato;
កញ្ចនគ្ឃិយសង្កាសោ, ទ្វត្តិំសវរលក្ខណោ។
Kañcanagghiyasaṅkāso, dvattiṃsavaralakkhaṇo.
២៤.
24.
តស្សាបិ ព្យាមប្បភា កាយា, ទិវារត្តិំ និរន្តរំ;
Tassāpi byāmappabhā kāyā, divārattiṃ nirantaraṃ;
ទិសោទិសំ និច្ឆរន្តិ, តីណិយោជនសោ បភា។
Disodisaṃ niccharanti, tīṇiyojanaso pabhā.
២៥.
25.
សត្តតិវស្សសហស្សានិ, អាយុ តស្ស មហេសិនោ;
Sattativassasahassāni, āyu tassa mahesino;
តាវតា តិដ្ឋមានោ សោ, តារេសិ ជនតំ ពហុំ។
Tāvatā tiṭṭhamāno so, tāresi janataṃ bahuṃ.
២៦.
26.
ធម្មមេឃំ បវស្សេត្វា, តេមយិត្វា សទេវកេ;
Dhammameghaṃ pavassetvā, temayitvā sadevake;
ខេមន្តំ បាបយិត្វាន, និព្ពុតោ សោ សសាវកោ។
Khemantaṃ pāpayitvāna, nibbuto so sasāvako.
២៧.
27.
អនុព្យញ្ជនសម្បន្នំ, ទ្វត្តិំសវរលក្ខណំ;
Anubyañjanasampannaṃ, dvattiṃsavaralakkhaṇaṃ;
សព្ពំ តមន្តរហិតំ, ននុ រិត្តា សព្ពសង្ខារា។
Sabbaṃ tamantarahitaṃ, nanu rittā sabbasaṅkhārā.
២៨.
28.
សិខី មុនិវរោ ពុទ្ធោ, អស្សារាមម្ហិ និព្ពុតោ;
Sikhī munivaro buddho, assārāmamhi nibbuto;
តត្ថេវស្ស ថូបវរោ, តីណិយោជនមុគ្គតោតិ។
Tatthevassa thūpavaro, tīṇiyojanamuggatoti.
សិខិស្ស ភគវតោ វំសោ វីសតិមោ។
Sikhissa bhagavato vaṃso vīsatimo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ២២. សិខីពុទ្ធវំសវណ្ណនា • 22. Sikhībuddhavaṃsavaṇṇanā
