| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೨೨. ಸಿಖೀಬುದ್ಧವಂಸೋ
22. Sikhībuddhavaṃso
೧.
1.
ವಿಪಸ್ಸಿಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ।
Vipassissa aparena, sambuddho dvipaduttamo;
ಸಿಖಿವ್ಹಯೋ ಆಸಿ ಜಿನೋ, ಅಸಮೋ ಅಪ್ಪಟಿಪುಗ್ಗಲೋ॥
Sikhivhayo āsi jino, asamo appaṭipuggalo.
೨.
2.
ಮಾರಸೇನಂ ಪಮದ್ದಿತ್ವಾ, ಪತ್ತೋ ಸಮ್ಬೋಧಿಮುತ್ತಮಂ।
Mārasenaṃ pamadditvā, patto sambodhimuttamaṃ;
ಧಮ್ಮಚಕ್ಕಂ ಪವತ್ತೇಸಿ, ಅನುಕಮ್ಪಾಯ ಪಾಣಿನಂ॥
Dhammacakkaṃ pavattesi, anukampāya pāṇinaṃ.
೩.
3.
ಕೋಟಿಸತಸಹಸ್ಸಾನಂ, ಪಠಮಾಭಿಸಮಯೋ ಅಹು॥
Koṭisatasahassānaṃ, paṭhamābhisamayo ahu.
೪.
4.
ಅಪರಮ್ಪಿ ಧಮ್ಮಂ ದೇಸೇನ್ತೇ, ಗಣಸೇಟ್ಠೇ ನರುತ್ತಮೇ।
Aparampi dhammaṃ desente, gaṇaseṭṭhe naruttame;
ನವುತಿಕೋಟಿಸಹಸ್ಸಾನಂ, ದುತಿಯಾಭಿಸಮಯೋ ಅಹು॥
Navutikoṭisahassānaṃ, dutiyābhisamayo ahu.
೫.
5.
ಅಸೀತಿಕೋಟಿಸಹಸ್ಸಾನಂ, ತತಿಯಾಭಿಸಮಯೋ ಅಹು॥
Asītikoṭisahassānaṃ, tatiyābhisamayo ahu.
೬.
6.
ಸನ್ನಿಪಾತಾ ತಯೋ ಆಸುಂ, ಸಿಖಿಸ್ಸಾಪಿ ಮಹೇಸಿನೋ।
Sannipātā tayo āsuṃ, sikhissāpi mahesino;
ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ॥
Khīṇāsavānaṃ vimalānaṃ, santacittāna tādinaṃ.
೭.
7.
ಭಿಕ್ಖುಸತಸಹಸ್ಸಾನಂ, ಪಠಮೋ ಆಸಿ ಸಮಾಗಮೋ।
Bhikkhusatasahassānaṃ, paṭhamo āsi samāgamo;
ಅಸೀತಿಭಿಕ್ಖುಸಹಸ್ಸಾನಂ, ದುತಿಯೋ ಆಸಿ ಸಮಾಗಮೋ॥
Asītibhikkhusahassānaṃ, dutiyo āsi samāgamo.
೮.
8.
ಸತ್ತತಿಭಿಕ್ಖುಸಹಸ್ಸಾನಂ, ತತಿಯೋ ಆಸಿ ಸಮಾಗಮೋ।
Sattatibhikkhusahassānaṃ, tatiyo āsi samāgamo;
ಅನುಪಲಿತ್ತೋ ಪದುಮಂವ, ತೋಯಮ್ಹಿ ಸಮ್ಪವಡ್ಢಿತಂ॥
Anupalitto padumaṃva, toyamhi sampavaḍḍhitaṃ.
೯.
9.
ಅಹಂ ತೇನ ಸಮಯೇನ, ಅರಿನ್ದಮೋ ನಾಮ ಖತ್ತಿಯೋ।
Ahaṃ tena samayena, arindamo nāma khattiyo;
ಸಮ್ಬುದ್ಧಪ್ಪಮುಖಂ ಸಙ್ಘಂ, ಅನ್ನಪಾನೇನ ತಪ್ಪಯಿಂ॥
Sambuddhappamukhaṃ saṅghaṃ, annapānena tappayiṃ.
೧೦.
10.
ಬಹುಂ ದುಸ್ಸವರಂ ದತ್ವಾ, ದುಸ್ಸಕೋಟಿಂ ಅನಪ್ಪಕಂ।
Bahuṃ dussavaraṃ datvā, dussakoṭiṃ anappakaṃ;
ಅಲಙ್ಕತಂ ಹತ್ಥಿಯಾನಂ, ಸಮ್ಬುದ್ಧಸ್ಸ ಅದಾಸಹಂ॥
Alaṅkataṃ hatthiyānaṃ, sambuddhassa adāsahaṃ.
೧೧.
11.
ಹತ್ಥಿಯಾನಂ ನಿಮ್ಮಿನಿತ್ವಾ, ಕಪ್ಪಿಯಂ ಉಪನಾಮಯಿಂ।
Hatthiyānaṃ nimminitvā, kappiyaṃ upanāmayiṃ;
ಪೂರಯಿಂ ಮಾನಸಂ ಮಯ್ಹಂ, ನಿಚ್ಚಂ ದಳ್ಹಮುಪಟ್ಠಿತಂ॥
Pūrayiṃ mānasaṃ mayhaṃ, niccaṃ daḷhamupaṭṭhitaṃ.
೧೨.
12.
ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಸಿಖೀ ಲೋಕಗ್ಗನಾಯಕೋ।
Sopi maṃ buddho byākāsi, sikhī lokagganāyako;
‘‘ಏಕತಿಂಸೇ ಇತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥
‘‘Ekatiṃse ito kappe, ayaṃ buddho bhavissati.
೧೩.
13.
‘‘ಅಹು ಕಪಿಲವ್ಹಯಾ ರಮ್ಮಾ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥
‘‘Ahu kapilavhayā rammā…pe… hessāma sammukhā imaṃ’’.
೧೪.
14.
ತಸ್ಸಾಹಂ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ।
Tassāhaṃ vacanaṃ sutvā, bhiyyo cittaṃ pasādayiṃ;
ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ॥
Uttariṃ vatamadhiṭṭhāsiṃ, dasapāramipūriyā.
೧೫.
15.
ನಗರಂ ಅರುಣವತೀ ನಾಮ, ಅರುಣೋ ನಾಮ ಖತ್ತಿಯೋ।
Nagaraṃ aruṇavatī nāma, aruṇo nāma khattiyo;
ಪಭಾವತೀ ನಾಮ ಜನಿಕಾ, ಸಿಖಿಸ್ಸಾಪಿ ಮಹೇಸಿನೋ॥
Pabhāvatī nāma janikā, sikhissāpi mahesino.
೧೬.
16.
ಸತ್ತವಸ್ಸಸಹಸ್ಸಾನಿ , ಅಗಾರಂ ಅಜ್ಝ ಸೋ ವಸಿ।
Sattavassasahassāni , agāraṃ ajjha so vasi;
೧೭.
17.
ಚತುವೀಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ।
Catuvīsasahassāni, nāriyo samalaṅkatā;
ಸಬ್ಬಕಾಮಾ ನಾಮ ನಾರೀ, ಅತುಲೋ ನಾಮ ಅತ್ರಜೋ॥
Sabbakāmā nāma nārī, atulo nāma atrajo.
೧೮.
18.
ನಿಮಿತ್ತೇ ಚತುರೋ ದಿಸ್ವಾ, ಹತ್ಥಿಯಾನೇನ ನಿಕ್ಖಮಿ।
Nimitte caturo disvā, hatthiyānena nikkhami;
ಅಟ್ಠಮಾಸಂ ಪಧಾನಚಾರಂ, ಅಚರೀ ಪುರಿಸುತ್ತಮೋ॥
Aṭṭhamāsaṃ padhānacāraṃ, acarī purisuttamo.
೧೯.
19.
ಬ್ರಹ್ಮುನಾ ಯಾಚಿತೋ ಸನ್ತೋ, ಸಿಖೀ ಲೋಕಗ್ಗನಾಯಕೋ।
Brahmunā yācito santo, sikhī lokagganāyako;
ವತ್ತಿ ಚಕ್ಕಂ ಮಹಾವೀರೋ, ಮಿಗದಾಯೇ ನರುತ್ತಮೋ॥
Vatti cakkaṃ mahāvīro, migadāye naruttamo.
೨೦.
20.
ಅಭಿಭೂ ಸಮ್ಭವೋ ಚೇವ, ಅಹೇಸುಂ ಅಗ್ಗಸಾವಕಾ।
Abhibhū sambhavo ceva, ahesuṃ aggasāvakā;
ಖೇಮಙ್ಕರೋ ನಾಮುಪಟ್ಠಾಕೋ, ಸಿಖಿಸ್ಸಾಪಿ ಮಹೇಸಿನೋ॥
Khemaṅkaro nāmupaṭṭhāko, sikhissāpi mahesino.
೨೧.
21.
ಸಖಿಲಾ ಚ ಪದುಮಾ ಚ, ಅಹೇಸುಂ ಅಗ್ಗಸಾವಿಕಾ।
Sakhilā ca padumā ca, ahesuṃ aggasāvikā;
ಬೋಧಿ ತಸ್ಸ ಭಗವತೋ, ಪುಣ್ಡರೀಕೋತಿ ವುಚ್ಚತಿ॥
Bodhi tassa bhagavato, puṇḍarīkoti vuccati.
೨೨.
22.
ಸಿರಿವಡ್ಢೋ ಚ ನನ್ದೋ ಚ, ಅಹೇಸುಂ ಅಗ್ಗುಪಟ್ಠಕಾ।
Sirivaḍḍho ca nando ca, ahesuṃ aggupaṭṭhakā;
ಚಿತ್ತಾ ಚೇವ ಸುಗುತ್ತಾ ಚ, ಅಹೇಸುಂ ಅಗ್ಗುಪಟ್ಠಿಕಾ॥
Cittā ceva suguttā ca, ahesuṃ aggupaṭṭhikā.
೨೩.
23.
ಉಚ್ಚತ್ತನೇನ ಸೋ ಬುದ್ಧೋ, ಸತ್ತತಿಹತ್ಥಮುಗ್ಗತೋ।
Uccattanena so buddho, sattatihatthamuggato;
ಕಞ್ಚನಗ್ಘಿಯಸಙ್ಕಾಸೋ, ದ್ವತ್ತಿಂಸವರಲಕ್ಖಣೋ॥
Kañcanagghiyasaṅkāso, dvattiṃsavaralakkhaṇo.
೨೪.
24.
ತಸ್ಸಾಪಿ ಬ್ಯಾಮಪ್ಪಭಾ ಕಾಯಾ, ದಿವಾರತ್ತಿಂ ನಿರನ್ತರಂ।
Tassāpi byāmappabhā kāyā, divārattiṃ nirantaraṃ;
ದಿಸೋದಿಸಂ ನಿಚ್ಛರನ್ತಿ, ತೀಣಿಯೋಜನಸೋ ಪಭಾ॥
Disodisaṃ niccharanti, tīṇiyojanaso pabhā.
೨೫.
25.
ಸತ್ತತಿವಸ್ಸಸಹಸ್ಸಾನಿ, ಆಯು ತಸ್ಸ ಮಹೇಸಿನೋ।
Sattativassasahassāni, āyu tassa mahesino;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ॥
Tāvatā tiṭṭhamāno so, tāresi janataṃ bahuṃ.
೨೬.
26.
ಧಮ್ಮಮೇಘಂ ಪವಸ್ಸೇತ್ವಾ, ತೇಮಯಿತ್ವಾ ಸದೇವಕೇ।
Dhammameghaṃ pavassetvā, temayitvā sadevake;
ಖೇಮನ್ತಂ ಪಾಪಯಿತ್ವಾನ, ನಿಬ್ಬುತೋ ಸೋ ಸಸಾವಕೋ॥
Khemantaṃ pāpayitvāna, nibbuto so sasāvako.
೨೭.
27.
ಅನುಬ್ಯಞ್ಜನಸಮ್ಪನ್ನಂ, ದ್ವತ್ತಿಂಸವರಲಕ್ಖಣಂ।
Anubyañjanasampannaṃ, dvattiṃsavaralakkhaṇaṃ;
ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ॥
Sabbaṃ tamantarahitaṃ, nanu rittā sabbasaṅkhārā.
೨೮.
28.
ಸಿಖೀ ಮುನಿವರೋ ಬುದ್ಧೋ, ಅಸ್ಸಾರಾಮಮ್ಹಿ ನಿಬ್ಬುತೋ।
Sikhī munivaro buddho, assārāmamhi nibbuto;
ತತ್ಥೇವಸ್ಸ ಥೂಪವರೋ, ತೀಣಿಯೋಜನಮುಗ್ಗತೋತಿ॥
Tatthevassa thūpavaro, tīṇiyojanamuggatoti.
ಸಿಖಿಸ್ಸ ಭಗವತೋ ವಂಸೋ ವೀಸತಿಮೋ।
Sikhissa bhagavato vaṃso vīsatimo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೨೨. ಸಿಖೀಬುದ್ಧವಂಸವಣ್ಣನಾ • 22. Sikhībuddhavaṃsavaṇṇanā
