| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
ஸிக்கா²கரணீயகதா²வண்ணனா
Sikkhākaraṇīyakathāvaṇṇanā
2438. பாடிதே³ஸனீயானந்தரங் உத்³தி³ட்டா²னி பஞ்சஸத்ததி ஸேகி²யானி மஹாவிப⁴ங்கே³ வுத்தவினிச்ச²யானேவாதி ததே³வ அதிதி³ஸந்தோ ஆஹ ‘‘ஸேகி²யா பன யே த⁴ம்மா’’திஆதி³. யே பன பஞ்சஸத்ததி ஸேகி²யா த⁴ம்மா பாடிதே³ஸனீயானந்தரங் உத்³தி³ட்டா², தேஸங் அத்த²வினிச்ச²யோ மஹாவிப⁴ங்கே³ வுத்தோவாதி யோஜனா, அத்தி²கேஹி ததோவ க³ஹேதப்³போ³, ந புன இத⁴ த³ஸ்ஸெஸ்ஸாமீதி அதி⁴ப்பாயோ.
2438. Pāṭidesanīyānantaraṃ uddiṭṭhāni pañcasattati sekhiyāni mahāvibhaṅge vuttavinicchayānevāti tadeva atidisanto āha ‘‘sekhiyā pana ye dhammā’’tiādi. Ye pana pañcasattati sekhiyā dhammā pāṭidesanīyānantaraṃ uddiṭṭhā, tesaṃ atthavinicchayo mahāvibhaṅge vuttovāti yojanā, atthikehi tatova gahetabbo, na puna idha dassessāmīti adhippāyo.
இதி வினயத்த²ஸாரஸந்தீ³பனியா வினயவினிச்ச²யவண்ணனாய
Iti vinayatthasārasandīpaniyā vinayavinicchayavaṇṇanāya
ஸிக்கா²கரணீயகதா²வண்ணனா நிட்டி²தா.
Sikkhākaraṇīyakathāvaṇṇanā niṭṭhitā.
2439-40. ஸவிப⁴ங்கா³னங் உப⁴தோவிப⁴ங்க³ஸஹிதானங் உப⁴தோபாதிமொக்கா²னங் பி⁴க்கூ²னங், பி⁴க்கு²னீனஞ்ச பாதிமொக்கா²னங் அட்ட²கதா²ஸாரோ ஸப்³ப³ட்ட²கதா²னங் ஸாரபூ⁴தோ யோ ஸோ அத்தோ² விஸேஸதோ ஸமந்தபாஸாதி³காயங் வுத்தோ. தங் ஸப்³ப³ங் ஸாரபூ⁴தங் அத்த²ங் ஸமாதா³ய யோ வினயஸ்ஸவினிச்ச²யோ பி⁴க்கூ²னங், பி⁴க்கு²னீனஞ்ச ஹிதத்தா²ய மயா கதோ விரசிதோதி ஸம்ப³ந்தோ⁴.
2439-40.Savibhaṅgānaṃ ubhatovibhaṅgasahitānaṃ ubhatopātimokkhānaṃ bhikkhūnaṃ, bhikkhunīnañca pātimokkhānaṃ aṭṭhakathāsāro sabbaṭṭhakathānaṃ sārabhūto yo so attho visesato samantapāsādikāyaṃ vutto. Taṃ sabbaṃ sārabhūtaṃ atthaṃ samādāya yo vinayassavinicchayo bhikkhūnaṃ, bhikkhunīnañca hitatthāya mayā kato viracitoti sambandho.
2441. நோ அம்ஹாகங் படிபா⁴ணஜங் படிபா⁴ணதோ ஜாதங் இமங் து இமங் வினயவினிச்ச²யங் பன யே ஜந்துனோ ஸத்தா ஸுணந்தி , தே ஜந்துனோ ஜனஸ்ஸ ஸத்தலோகஸ்ஸ ஹிதே அதி⁴ஸீலஸிக்கா²பகாஸகத்தா உபகாரகே ஸுமதஸ்ஸ ஸோப⁴ணந்தி பு³த்³தா⁴தீ³ஹி மதஸ்ஸ, ஸோப⁴ணேஹி வா பு³த்³தா⁴தீ³ஹி மதஸ்ஸ படிவித்³த⁴ஸ்ஸ அமதமஹானிப்³பா³னஸ்ஸ அயனே அஞ்ஜஸபூ⁴தே ஜனஸ்ஸ தாயனே காயிகவாசஸிகவீதிக்கமபடிபக்க²த்தா அபாயப⁴யனிவாரணட்டே²ன தாணபூ⁴தே வினயே வினயபிடகே பகதஞ்ஞுனோ யதா²ஸபா⁴வங் ஜானந்தா தஞ்ஞுனோ ப⁴வந்தி தங் தங் கப்பியாகப்பியங் ஸேவிதப்³பா³ஸேவிதப்³ப³ங் ஜானந்தா ப⁴வந்தேவாதி அத்தோ².
2441.No amhākaṃ paṭibhāṇajaṃ paṭibhāṇato jātaṃ imaṃ tu imaṃ vinayavinicchayaṃ pana ye jantuno sattā suṇanti , te jantuno janassa sattalokassa hite adhisīlasikkhāpakāsakattā upakārake sumatassa sobhaṇanti buddhādīhi matassa, sobhaṇehi vā buddhādīhi matassa paṭividdhassa amatamahānibbānassa ayane añjasabhūte janassa tāyane kāyikavācasikavītikkamapaṭipakkhattā apāyabhayanivāraṇaṭṭhena tāṇabhūte vinaye vinayapiṭake pakataññuno yathāsabhāvaṃ jānantā taññuno bhavanti taṃ taṃ kappiyākappiyaṃ sevitabbāsevitabbaṃ jānantā bhavantevāti attho.
2442. ப³ஹவோ ஸாரபூ⁴தா நயா எத்தா²தி ப³ஹுஸாரனயோ, தஸ்மிங் ப³ஹுஸாரனயே. பரமே உத்தமே வினயே வினயபிடகே விஸாரத³தங் வேஸாரஜ்ஜங் அஸங்ஹீரஞாணங் அபி⁴பத்த²யதா விஸேஸதோ இச்ச²ந்தேன பு³த்³தி⁴மதா ஞாணாதிஸயமந்தேன யதினா ஸப்³ப³காலங் திவித⁴ஸிக்கா²பரிபூரணே அஸிதி²லபவத்தஸம்மாவாயாமேன பி⁴க்கு²னா இமஸ்மிங் வினயவினிச்ச²யே பரமா உத்தரிதரா மஹதீ ஆத³ரதா கரணீயதமா விஸேஸேன காதப்³பா³யேவாதி அத்தோ².
2442. Bahavo sārabhūtā nayā etthāti bahusāranayo, tasmiṃ bahusāranaye. Parame uttame vinaye vinayapiṭake visāradataṃ vesārajjaṃ asaṃhīrañāṇaṃ abhipatthayatā visesato icchantena buddhimatā ñāṇātisayamantena yatinā sabbakālaṃ tividhasikkhāparipūraṇe asithilapavattasammāvāyāmena bhikkhunā imasmiṃ vinayavinicchaye paramā uttaritarā mahatī ādaratā karaṇīyatamā visesena kātabbāyevāti attho.
2443. இச்சேவங் ஸீலவிஸுத்³தி⁴ஸாத⁴னே வினயபிடகே வேஸாரஜ்ஜஹேதுதாய இமஸ்ஸ வினயவினிச்ச²யஸ்ஸ ஸீலவிஸுத்³தி⁴ஆதி³ஸத்தவிஸுத்³தி⁴பரம்பராய அதி⁴க³ந்தப்³ப³ஸ்ஸ அமதமஹானிப்³பா³னஸ்ஸ பத்தியாபி மூலபூ⁴ததங் த³ஸ்ஸேதுமாஹ ‘‘அவக³ச்ச²தீ’’திஆதி³.
2443. Iccevaṃ sīlavisuddhisādhane vinayapiṭake vesārajjahetutāya imassa vinayavinicchayassa sīlavisuddhiādisattavisuddhiparamparāya adhigantabbassa amatamahānibbānassa pattiyāpi mūlabhūtataṃ dassetumāha ‘‘avagacchatī’’tiādi.
யோ பன பி⁴க்கு² அத்த²யுத்தங் மஹதா பயோஜனத்தே²ன, அபி⁴தெ⁴ய்யத்தே²ன ச ஸமன்னாக³தங் இமங் வினயஸ்ஸவினிச்ச²யங் அவக³ச்ச²தி அவேச்ச யாதா²வதோ ஜானாதி, ஸோ அபரம்பரங் மரணாபா⁴வா அமரங் ஜராயாபா⁴வா அஜரங் ராகா³தி³கிலேஸரஜபடிபக்க²த்தா அரஜங் அனேகப்பகாரரோகா³னங் அப்பவத்திஹேதுத்தா அருஜங் ஸந்திபத³ங் ஸப்³ப³கிலேஸத³ரத²பரிளாஹானங் வூபஸமஹேதுத்தா ஸந்திஸங்கா²தங் நிப்³பா³னபத³ங் அதி⁴க³ச்ச²தி ஸீலவிஸுத்³தி⁴ஆதி³ஸத்தவிஸுத்³தி⁴பரம்பராய க³ந்த்வா படிவிஜ்ஜ²தீதி யோஜனா.
Yo pana bhikkhu atthayuttaṃ mahatā payojanatthena, abhidheyyatthena ca samannāgataṃ imaṃ vinayassavinicchayaṃ avagacchati avecca yāthāvato jānāti, so aparamparaṃ maraṇābhāvā amaraṃ jarāyābhāvā ajaraṃ rāgādikilesarajapaṭipakkhattā arajaṃ anekappakārarogānaṃ appavattihetuttā arujaṃ santipadaṃ sabbakilesadarathapariḷāhānaṃ vūpasamahetuttā santisaṅkhātaṃ nibbānapadaṃ adhigacchati sīlavisuddhiādisattavisuddhiparamparāya gantvā paṭivijjhatīti yojanā.
இதி வினயத்த²ஸாரஸந்தீ³பனியா வினயவினிச்ச²யவண்ணனாய
Iti vinayatthasārasandīpaniyā vinayavinicchayavaṇṇanāya
பி⁴க்கு²னிவிப⁴ங்க³கதா²வண்ணனா நிட்டி²தா.
Bhikkhunivibhaṅgakathāvaṇṇanā niṭṭhitā.
