| Library / Tipiṭaka / ติปิฎก • Tipiṭaka / วินยวินิจฺฉย-ฎีกา • Vinayavinicchaya-ṭīkā |
สิกฺขากรณียกถาวณฺณนา
Sikkhākaraṇīyakathāvaṇṇanā
๒๔๓๘. ปาฎิเทสนียานนฺตรํ อุทฺทิฎฺฐานิ ปญฺจสตฺตติ เสขิยานิ มหาวิภเงฺค วุตฺตวินิจฺฉยาเนวาติ ตเทว อติทิสโนฺต อาห ‘‘เสขิยา ปน เย ธมฺมา’’ติอาทิฯ เย ปน ปญฺจสตฺตติ เสขิยา ธมฺมา ปาฎิเทสนียานนฺตรํ อุทฺทิฎฺฐา, เตสํ อตฺถวินิจฺฉโย มหาวิภเงฺค วุโตฺตวาติ โยชนา, อตฺถิเกหิ ตโตว คเหตโพฺพ, น ปุน อิธ ทเสฺสสฺสามีติ อธิปฺปาโยฯ
2438. Pāṭidesanīyānantaraṃ uddiṭṭhāni pañcasattati sekhiyāni mahāvibhaṅge vuttavinicchayānevāti tadeva atidisanto āha ‘‘sekhiyā pana ye dhammā’’tiādi. Ye pana pañcasattati sekhiyā dhammā pāṭidesanīyānantaraṃ uddiṭṭhā, tesaṃ atthavinicchayo mahāvibhaṅge vuttovāti yojanā, atthikehi tatova gahetabbo, na puna idha dassessāmīti adhippāyo.
อิติ วินยตฺถสารสนฺทีปนิยา วินยวินิจฺฉยวณฺณนาย
Iti vinayatthasārasandīpaniyā vinayavinicchayavaṇṇanāya
สิกฺขากรณียกถาวณฺณนา นิฎฺฐิตาฯ
Sikkhākaraṇīyakathāvaṇṇanā niṭṭhitā.
๒๔๓๙-๔๐. สวิภงฺคานํ อุภโตวิภงฺคสหิตานํ อุภโตปาติโมกฺขานํ ภิกฺขูนํ, ภิกฺขุนีนญฺจ ปาติโมกฺขานํ อฎฺฐกถาสาโร สพฺพฎฺฐกถานํ สารภูโต โย โส อโตฺถ วิเสสโต สมนฺตปาสาทิกายํ วุโตฺตฯ ตํ สพฺพํ สารภูตํ อตฺถํ สมาทาย โย วินยสฺสวินิจฺฉโย ภิกฺขูนํ, ภิกฺขุนีนญฺจ หิตตฺถาย มยา กโต วิรจิโตติ สมฺพโนฺธฯ
2439-40.Savibhaṅgānaṃ ubhatovibhaṅgasahitānaṃ ubhatopātimokkhānaṃ bhikkhūnaṃ, bhikkhunīnañca pātimokkhānaṃ aṭṭhakathāsāro sabbaṭṭhakathānaṃ sārabhūto yo so attho visesato samantapāsādikāyaṃ vutto. Taṃ sabbaṃ sārabhūtaṃ atthaṃ samādāya yo vinayassavinicchayo bhikkhūnaṃ, bhikkhunīnañca hitatthāya mayā kato viracitoti sambandho.
๒๔๔๑. โน อมฺหากํ ปฎิภาณชํ ปฎิภาณโต ชาตํ อิมํ ตุ อิมํ วินยวินิจฺฉยํ ปน เย ชนฺตุโน สตฺตา สุณนฺติ , เต ชนฺตุโน ชนสฺส สตฺตโลกสฺส หิเต อธิสีลสิกฺขาปกาสกตฺตา อุปการเก สุมตสฺส โสภณนฺติ พุทฺธาทีหิ มตสฺส, โสภเณหิ วา พุทฺธาทีหิ มตสฺส ปฎิวิทฺธสฺส อมตมหานิพฺพานสฺส อยเน อญฺชสภูเต ชนสฺส ตายเน กายิกวาจสิกวีติกฺกมปฎิปกฺขตฺตา อปายภยนิวารณเฎฺฐน ตาณภูเต วินเย วินยปิฎเก ปกตญฺญุโน ยถาสภาวํ ชานนฺตา ตญฺญุโน ภวนฺติ ตํ ตํ กปฺปิยากปฺปิยํ เสวิตพฺพาเสวิตพฺพํ ชานนฺตา ภวเนฺตวาติ อโตฺถฯ
2441.No amhākaṃ paṭibhāṇajaṃ paṭibhāṇato jātaṃ imaṃ tu imaṃ vinayavinicchayaṃ pana ye jantuno sattā suṇanti , te jantuno janassa sattalokassa hite adhisīlasikkhāpakāsakattā upakārake sumatassa sobhaṇanti buddhādīhi matassa, sobhaṇehi vā buddhādīhi matassa paṭividdhassa amatamahānibbānassa ayane añjasabhūte janassa tāyane kāyikavācasikavītikkamapaṭipakkhattā apāyabhayanivāraṇaṭṭhena tāṇabhūte vinaye vinayapiṭake pakataññuno yathāsabhāvaṃ jānantā taññuno bhavanti taṃ taṃ kappiyākappiyaṃ sevitabbāsevitabbaṃ jānantā bhavantevāti attho.
๒๔๔๒. พหโว สารภูตา นยา เอตฺถาติ พหุสารนโย, ตสฺมิํ พหุสารนเยฯ ปรเม อุตฺตเม วินเย วินยปิฎเก วิสารทตํ เวสารชฺชํ อสํหีรญาณํ อภิปตฺถยตา วิเสสโต อิจฺฉเนฺตน พุทฺธิมตา ญาณาติสยมเนฺตน ยตินา สพฺพกาลํ ติวิธสิกฺขาปริปูรเณ อสิถิลปวตฺตสมฺมาวายาเมน ภิกฺขุนา อิมสฺมิํ วินยวินิจฺฉเย ปรมา อุตฺตริตรา มหตี อาทรตา กรณียตมา วิเสเสน กาตพฺพาเยวาติ อโตฺถฯ
2442. Bahavo sārabhūtā nayā etthāti bahusāranayo, tasmiṃ bahusāranaye. Parame uttame vinaye vinayapiṭake visāradataṃ vesārajjaṃ asaṃhīrañāṇaṃ abhipatthayatā visesato icchantena buddhimatā ñāṇātisayamantena yatinā sabbakālaṃ tividhasikkhāparipūraṇe asithilapavattasammāvāyāmena bhikkhunā imasmiṃ vinayavinicchaye paramā uttaritarā mahatī ādaratā karaṇīyatamā visesena kātabbāyevāti attho.
๒๔๔๓. อิเจฺจวํ สีลวิสุทฺธิสาธเน วินยปิฎเก เวสารชฺชเหตุตาย อิมสฺส วินยวินิจฺฉยสฺส สีลวิสุทฺธิอาทิสตฺตวิสุทฺธิปรมฺปราย อธิคนฺตพฺพสฺส อมตมหานิพฺพานสฺส ปตฺติยาปิ มูลภูตตํ ทเสฺสตุมาห ‘‘อวคจฺฉตี’’ติอาทิฯ
2443. Iccevaṃ sīlavisuddhisādhane vinayapiṭake vesārajjahetutāya imassa vinayavinicchayassa sīlavisuddhiādisattavisuddhiparamparāya adhigantabbassa amatamahānibbānassa pattiyāpi mūlabhūtataṃ dassetumāha ‘‘avagacchatī’’tiādi.
โย ปน ภิกฺขุ อตฺถยุตฺตํ มหตา ปโยชนเตฺถน, อภิเธยฺยเตฺถน จ สมนฺนาคตํ อิมํ วินยสฺสวินิจฺฉยํ อวคจฺฉติ อเวจฺจ ยาถาวโต ชานาติ, โส อปรมฺปรํ มรณาภาวา อมรํ ชรายาภาวา อชรํ ราคาทิกิเลสรชปฎิปกฺขตฺตา อรชํ อเนกปฺปการโรคานํ อปฺปวตฺติเหตุตฺตา อรุชํ สนฺติปทํ สพฺพกิเลสทรถปริฬาหานํ วูปสมเหตุตฺตา สนฺติสงฺขาตํ นิพฺพานปทํ อธิคจฺฉติ สีลวิสุทฺธิอาทิสตฺตวิสุทฺธิปรมฺปราย คนฺตฺวา ปฎิวิชฺฌตีติ โยชนาฯ
Yo pana bhikkhu atthayuttaṃ mahatā payojanatthena, abhidheyyatthena ca samannāgataṃ imaṃ vinayassavinicchayaṃ avagacchati avecca yāthāvato jānāti, so aparamparaṃ maraṇābhāvā amaraṃ jarāyābhāvā ajaraṃ rāgādikilesarajapaṭipakkhattā arajaṃ anekappakārarogānaṃ appavattihetuttā arujaṃ santipadaṃ sabbakilesadarathapariḷāhānaṃ vūpasamahetuttā santisaṅkhātaṃ nibbānapadaṃ adhigacchati sīlavisuddhiādisattavisuddhiparamparāya gantvā paṭivijjhatīti yojanā.
อิติ วินยตฺถสารสนฺทีปนิยา วินยวินิจฺฉยวณฺณนาย
Iti vinayatthasārasandīpaniyā vinayavinicchayavaṇṇanāya
ภิกฺขุนิวิภงฺคกถาวณฺณนา นิฎฺฐิตาฯ
Bhikkhunivibhaṅgakathāvaṇṇanā niṭṭhitā.
