| Library / Tipiṭaka / ತಿಪಿಟಕ • Tipiṭaka / ವಿನಯವಿನಿಚ್ಛಯ-ಟೀಕಾ • Vinayavinicchaya-ṭīkā |
ಸಿಕ್ಖಾಕರಣೀಯಕಥಾವಣ್ಣನಾ
Sikkhākaraṇīyakathāvaṇṇanā
೨೪೩೮. ಪಾಟಿದೇಸನೀಯಾನನ್ತರಂ ಉದ್ದಿಟ್ಠಾನಿ ಪಞ್ಚಸತ್ತತಿ ಸೇಖಿಯಾನಿ ಮಹಾವಿಭಙ್ಗೇ ವುತ್ತವಿನಿಚ್ಛಯಾನೇವಾತಿ ತದೇವ ಅತಿದಿಸನ್ತೋ ಆಹ ‘‘ಸೇಖಿಯಾ ಪನ ಯೇ ಧಮ್ಮಾ’’ತಿಆದಿ। ಯೇ ಪನ ಪಞ್ಚಸತ್ತತಿ ಸೇಖಿಯಾ ಧಮ್ಮಾ ಪಾಟಿದೇಸನೀಯಾನನ್ತರಂ ಉದ್ದಿಟ್ಠಾ, ತೇಸಂ ಅತ್ಥವಿನಿಚ್ಛಯೋ ಮಹಾವಿಭಙ್ಗೇ ವುತ್ತೋವಾತಿ ಯೋಜನಾ, ಅತ್ಥಿಕೇಹಿ ತತೋವ ಗಹೇತಬ್ಬೋ, ನ ಪುನ ಇಧ ದಸ್ಸೇಸ್ಸಾಮೀತಿ ಅಧಿಪ್ಪಾಯೋ।
2438. Pāṭidesanīyānantaraṃ uddiṭṭhāni pañcasattati sekhiyāni mahāvibhaṅge vuttavinicchayānevāti tadeva atidisanto āha ‘‘sekhiyā pana ye dhammā’’tiādi. Ye pana pañcasattati sekhiyā dhammā pāṭidesanīyānantaraṃ uddiṭṭhā, tesaṃ atthavinicchayo mahāvibhaṅge vuttovāti yojanā, atthikehi tatova gahetabbo, na puna idha dassessāmīti adhippāyo.
ಇತಿ ವಿನಯತ್ಥಸಾರಸನ್ದೀಪನಿಯಾ ವಿನಯವಿನಿಚ್ಛಯವಣ್ಣನಾಯ
Iti vinayatthasārasandīpaniyā vinayavinicchayavaṇṇanāya
ಸಿಕ್ಖಾಕರಣೀಯಕಥಾವಣ್ಣನಾ ನಿಟ್ಠಿತಾ।
Sikkhākaraṇīyakathāvaṇṇanā niṭṭhitā.
೨೪೩೯-೪೦. ಸವಿಭಙ್ಗಾನಂ ಉಭತೋವಿಭಙ್ಗಸಹಿತಾನಂ ಉಭತೋಪಾತಿಮೋಕ್ಖಾನಂ ಭಿಕ್ಖೂನಂ, ಭಿಕ್ಖುನೀನಞ್ಚ ಪಾತಿಮೋಕ್ಖಾನಂ ಅಟ್ಠಕಥಾಸಾರೋ ಸಬ್ಬಟ್ಠಕಥಾನಂ ಸಾರಭೂತೋ ಯೋ ಸೋ ಅತ್ಥೋ ವಿಸೇಸತೋ ಸಮನ್ತಪಾಸಾದಿಕಾಯಂ ವುತ್ತೋ। ತಂ ಸಬ್ಬಂ ಸಾರಭೂತಂ ಅತ್ಥಂ ಸಮಾದಾಯ ಯೋ ವಿನಯಸ್ಸವಿನಿಚ್ಛಯೋ ಭಿಕ್ಖೂನಂ, ಭಿಕ್ಖುನೀನಞ್ಚ ಹಿತತ್ಥಾಯ ಮಯಾ ಕತೋ ವಿರಚಿತೋತಿ ಸಮ್ಬನ್ಧೋ।
2439-40.Savibhaṅgānaṃ ubhatovibhaṅgasahitānaṃ ubhatopātimokkhānaṃ bhikkhūnaṃ, bhikkhunīnañca pātimokkhānaṃ aṭṭhakathāsāro sabbaṭṭhakathānaṃ sārabhūto yo so attho visesato samantapāsādikāyaṃ vutto. Taṃ sabbaṃ sārabhūtaṃ atthaṃ samādāya yo vinayassavinicchayo bhikkhūnaṃ, bhikkhunīnañca hitatthāya mayā kato viracitoti sambandho.
೨೪೪೧. ನೋ ಅಮ್ಹಾಕಂ ಪಟಿಭಾಣಜಂ ಪಟಿಭಾಣತೋ ಜಾತಂ ಇಮಂ ತು ಇಮಂ ವಿನಯವಿನಿಚ್ಛಯಂ ಪನ ಯೇ ಜನ್ತುನೋ ಸತ್ತಾ ಸುಣನ್ತಿ , ತೇ ಜನ್ತುನೋ ಜನಸ್ಸ ಸತ್ತಲೋಕಸ್ಸ ಹಿತೇ ಅಧಿಸೀಲಸಿಕ್ಖಾಪಕಾಸಕತ್ತಾ ಉಪಕಾರಕೇ ಸುಮತಸ್ಸ ಸೋಭಣನ್ತಿ ಬುದ್ಧಾದೀಹಿ ಮತಸ್ಸ, ಸೋಭಣೇಹಿ ವಾ ಬುದ್ಧಾದೀಹಿ ಮತಸ್ಸ ಪಟಿವಿದ್ಧಸ್ಸ ಅಮತಮಹಾನಿಬ್ಬಾನಸ್ಸ ಅಯನೇ ಅಞ್ಜಸಭೂತೇ ಜನಸ್ಸ ತಾಯನೇ ಕಾಯಿಕವಾಚಸಿಕವೀತಿಕ್ಕಮಪಟಿಪಕ್ಖತ್ತಾ ಅಪಾಯಭಯನಿವಾರಣಟ್ಠೇನ ತಾಣಭೂತೇ ವಿನಯೇ ವಿನಯಪಿಟಕೇ ಪಕತಞ್ಞುನೋ ಯಥಾಸಭಾವಂ ಜಾನನ್ತಾ ತಞ್ಞುನೋ ಭವನ್ತಿ ತಂ ತಂ ಕಪ್ಪಿಯಾಕಪ್ಪಿಯಂ ಸೇವಿತಬ್ಬಾಸೇವಿತಬ್ಬಂ ಜಾನನ್ತಾ ಭವನ್ತೇವಾತಿ ಅತ್ಥೋ।
2441.No amhākaṃ paṭibhāṇajaṃ paṭibhāṇato jātaṃ imaṃ tu imaṃ vinayavinicchayaṃ pana ye jantuno sattā suṇanti , te jantuno janassa sattalokassa hite adhisīlasikkhāpakāsakattā upakārake sumatassa sobhaṇanti buddhādīhi matassa, sobhaṇehi vā buddhādīhi matassa paṭividdhassa amatamahānibbānassa ayane añjasabhūte janassa tāyane kāyikavācasikavītikkamapaṭipakkhattā apāyabhayanivāraṇaṭṭhena tāṇabhūte vinaye vinayapiṭake pakataññuno yathāsabhāvaṃ jānantā taññuno bhavanti taṃ taṃ kappiyākappiyaṃ sevitabbāsevitabbaṃ jānantā bhavantevāti attho.
೨೪೪೨. ಬಹವೋ ಸಾರಭೂತಾ ನಯಾ ಏತ್ಥಾತಿ ಬಹುಸಾರನಯೋ, ತಸ್ಮಿಂ ಬಹುಸಾರನಯೇ। ಪರಮೇ ಉತ್ತಮೇ ವಿನಯೇ ವಿನಯಪಿಟಕೇ ವಿಸಾರದತಂ ವೇಸಾರಜ್ಜಂ ಅಸಂಹೀರಞಾಣಂ ಅಭಿಪತ್ಥಯತಾ ವಿಸೇಸತೋ ಇಚ್ಛನ್ತೇನ ಬುದ್ಧಿಮತಾ ಞಾಣಾತಿಸಯಮನ್ತೇನ ಯತಿನಾ ಸಬ್ಬಕಾಲಂ ತಿವಿಧಸಿಕ್ಖಾಪರಿಪೂರಣೇ ಅಸಿಥಿಲಪವತ್ತಸಮ್ಮಾವಾಯಾಮೇನ ಭಿಕ್ಖುನಾ ಇಮಸ್ಮಿಂ ವಿನಯವಿನಿಚ್ಛಯೇ ಪರಮಾ ಉತ್ತರಿತರಾ ಮಹತೀ ಆದರತಾ ಕರಣೀಯತಮಾ ವಿಸೇಸೇನ ಕಾತಬ್ಬಾಯೇವಾತಿ ಅತ್ಥೋ।
2442. Bahavo sārabhūtā nayā etthāti bahusāranayo, tasmiṃ bahusāranaye. Parame uttame vinaye vinayapiṭake visāradataṃ vesārajjaṃ asaṃhīrañāṇaṃ abhipatthayatā visesato icchantena buddhimatā ñāṇātisayamantena yatinā sabbakālaṃ tividhasikkhāparipūraṇe asithilapavattasammāvāyāmena bhikkhunā imasmiṃ vinayavinicchaye paramā uttaritarā mahatī ādaratā karaṇīyatamā visesena kātabbāyevāti attho.
೨೪೪೩. ಇಚ್ಚೇವಂ ಸೀಲವಿಸುದ್ಧಿಸಾಧನೇ ವಿನಯಪಿಟಕೇ ವೇಸಾರಜ್ಜಹೇತುತಾಯ ಇಮಸ್ಸ ವಿನಯವಿನಿಚ್ಛಯಸ್ಸ ಸೀಲವಿಸುದ್ಧಿಆದಿಸತ್ತವಿಸುದ್ಧಿಪರಮ್ಪರಾಯ ಅಧಿಗನ್ತಬ್ಬಸ್ಸ ಅಮತಮಹಾನಿಬ್ಬಾನಸ್ಸ ಪತ್ತಿಯಾಪಿ ಮೂಲಭೂತತಂ ದಸ್ಸೇತುಮಾಹ ‘‘ಅವಗಚ್ಛತೀ’’ತಿಆದಿ।
2443. Iccevaṃ sīlavisuddhisādhane vinayapiṭake vesārajjahetutāya imassa vinayavinicchayassa sīlavisuddhiādisattavisuddhiparamparāya adhigantabbassa amatamahānibbānassa pattiyāpi mūlabhūtataṃ dassetumāha ‘‘avagacchatī’’tiādi.
ಯೋ ಪನ ಭಿಕ್ಖು ಅತ್ಥಯುತ್ತಂ ಮಹತಾ ಪಯೋಜನತ್ಥೇನ, ಅಭಿಧೇಯ್ಯತ್ಥೇನ ಚ ಸಮನ್ನಾಗತಂ ಇಮಂ ವಿನಯಸ್ಸವಿನಿಚ್ಛಯಂ ಅವಗಚ್ಛತಿ ಅವೇಚ್ಚ ಯಾಥಾವತೋ ಜಾನಾತಿ, ಸೋ ಅಪರಮ್ಪರಂ ಮರಣಾಭಾವಾ ಅಮರಂ ಜರಾಯಾಭಾವಾ ಅಜರಂ ರಾಗಾದಿಕಿಲೇಸರಜಪಟಿಪಕ್ಖತ್ತಾ ಅರಜಂ ಅನೇಕಪ್ಪಕಾರರೋಗಾನಂ ಅಪ್ಪವತ್ತಿಹೇತುತ್ತಾ ಅರುಜಂ ಸನ್ತಿಪದಂ ಸಬ್ಬಕಿಲೇಸದರಥಪರಿಳಾಹಾನಂ ವೂಪಸಮಹೇತುತ್ತಾ ಸನ್ತಿಸಙ್ಖಾತಂ ನಿಬ್ಬಾನಪದಂ ಅಧಿಗಚ್ಛತಿ ಸೀಲವಿಸುದ್ಧಿಆದಿಸತ್ತವಿಸುದ್ಧಿಪರಮ್ಪರಾಯ ಗನ್ತ್ವಾ ಪಟಿವಿಜ್ಝತೀತಿ ಯೋಜನಾ।
Yo pana bhikkhu atthayuttaṃ mahatā payojanatthena, abhidheyyatthena ca samannāgataṃ imaṃ vinayassavinicchayaṃ avagacchati avecca yāthāvato jānāti, so aparamparaṃ maraṇābhāvā amaraṃ jarāyābhāvā ajaraṃ rāgādikilesarajapaṭipakkhattā arajaṃ anekappakārarogānaṃ appavattihetuttā arujaṃ santipadaṃ sabbakilesadarathapariḷāhānaṃ vūpasamahetuttā santisaṅkhātaṃ nibbānapadaṃ adhigacchati sīlavisuddhiādisattavisuddhiparamparāya gantvā paṭivijjhatīti yojanā.
ಇತಿ ವಿನಯತ್ಥಸಾರಸನ್ದೀಪನಿಯಾ ವಿನಯವಿನಿಚ್ಛಯವಣ್ಣನಾಯ
Iti vinayatthasārasandīpaniyā vinayavinicchayavaṇṇanāya
ಭಿಕ್ಖುನಿವಿಭಙ್ಗಕಥಾವಣ್ಣನಾ ನಿಟ್ಠಿತಾ।
Bhikkhunivibhaṅgakathāvaṇṇanā niṭṭhitā.
