| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৩. সিক্খানিসংসসুত্তং
3. Sikkhānisaṃsasuttaṃ
২৪৫. ‘‘সিক্খানিসংসমিদং, ভিক্খৰে, ব্রহ্মচরিযং ৰুস্সতি পঞ্ঞুত্তরং ৰিমুত্তিসারং সতাধিপতেয্যং। কথঞ্চ, ভিক্খৰে, সিক্খানিসংসং হোতি? ইধ, ভিক্খৰে, মযা সাৰকানং আভিসমাচারিকা সিক্খা পঞ্ঞত্তা অপ্পসন্নানং পসাদায পসন্নানং ভিয্যোভাৰায। যথা যথা, ভিক্খৰে, মযা সাৰকানং আভিসমাচারিকা সিক্খা পঞ্ঞত্তা অপ্পসন্নানং পসাদায পসন্নানং ভিয্যোভাৰায তথা তথা সো তস্সা সিক্খায অখণ্ডকারী হোতি অচ্ছিদ্দকারী অসবলকারী অকম্মাসকারী, সমাদায সিক্খতি সিক্খাপদেসু।
245. ‘‘Sikkhānisaṃsamidaṃ, bhikkhave, brahmacariyaṃ vussati paññuttaraṃ vimuttisāraṃ satādhipateyyaṃ. Kathañca, bhikkhave, sikkhānisaṃsaṃ hoti? Idha, bhikkhave, mayā sāvakānaṃ ābhisamācārikā sikkhā paññattā appasannānaṃ pasādāya pasannānaṃ bhiyyobhāvāya. Yathā yathā, bhikkhave, mayā sāvakānaṃ ābhisamācārikā sikkhā paññattā appasannānaṃ pasādāya pasannānaṃ bhiyyobhāvāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu.
‘‘পুন চপরং, ভিক্খৰে, মযা সাৰকানং আদিব্রহ্মচরিযিকা সিক্খা পঞ্ঞত্তা সব্বসো সম্মা দুক্খক্খযায। যথা যথা, ভিক্খৰে, মযা সাৰকানং আদিব্রহ্মচরিযিকা সিক্খা পঞ্ঞত্তা সব্বসো সম্মা দুক্খক্খযায তথা তথা সো তস্সা সিক্খায অখণ্ডকারী হোতি অচ্ছিদ্দকারী অসবলকারী অকম্মাসকারী, সমাদায সিক্খতি সিক্খাপদেসু। এৰং খো, ভিক্খৰে, সিক্খানিসংসং হোতি।
‘‘Puna caparaṃ, bhikkhave, mayā sāvakānaṃ ādibrahmacariyikā sikkhā paññattā sabbaso sammā dukkhakkhayāya. Yathā yathā, bhikkhave, mayā sāvakānaṃ ādibrahmacariyikā sikkhā paññattā sabbaso sammā dukkhakkhayāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu. Evaṃ kho, bhikkhave, sikkhānisaṃsaṃ hoti.
‘‘কথঞ্চ, ভিক্খৰে, পঞ্ঞুত্তরং হোতি? ইধ, ভিক্খৰে, মযা সাৰকানং ধম্মা দেসিতা সব্বসো সম্মা দুক্খক্খযায। যথা যথা, ভিক্খৰে, মযা সাৰকানং ধম্মা দেসিতা সব্বসো সম্মা দুক্খক্খযায তথা তথাস্স তে ধম্মা পঞ্ঞায সমৰেক্খিতা হোন্তি। এৰং খো, ভিক্খৰে, পঞ্ঞুত্তরং হোতি।
‘‘Kathañca, bhikkhave, paññuttaraṃ hoti? Idha, bhikkhave, mayā sāvakānaṃ dhammā desitā sabbaso sammā dukkhakkhayāya. Yathā yathā, bhikkhave, mayā sāvakānaṃ dhammā desitā sabbaso sammā dukkhakkhayāya tathā tathāssa te dhammā paññāya samavekkhitā honti. Evaṃ kho, bhikkhave, paññuttaraṃ hoti.
‘‘কথঞ্চ , ভিক্খৰে, ৰিমুত্তিসারং হোতি? ইধ, ভিক্খৰে, মযা সাৰকানং ধম্মা দেসিতা সব্বসো সম্মা দুক্খক্খযায। যথা যথা, ভিক্খৰে, মযা সাৰকানং ধম্মা দেসিতা সব্বসো সম্মা দুক্খক্খযায তথা তথাস্স তে ধম্মা ৰিমুত্তিযা ফুসিতা হোন্তি। এৰং খো, ভিক্খৰে, ৰিমুত্তিসারং হোতি।
‘‘Kathañca , bhikkhave, vimuttisāraṃ hoti? Idha, bhikkhave, mayā sāvakānaṃ dhammā desitā sabbaso sammā dukkhakkhayāya. Yathā yathā, bhikkhave, mayā sāvakānaṃ dhammā desitā sabbaso sammā dukkhakkhayāya tathā tathāssa te dhammā vimuttiyā phusitā honti. Evaṃ kho, bhikkhave, vimuttisāraṃ hoti.
‘‘কথঞ্চ, ভিক্খৰে, সতাধিপতেয্যং হোতি? ‘ইতি অপরিপূরং ৰা আভিসমাচারিকং সিক্খং পরিপূরেস্সামি, পরিপূরং ৰা আভিসমাচারিকং সিক্খং তত্থ তত্থ পঞ্ঞায অনুগ্গহেস্সামী’তি – অজ্ঝত্তংযেৰ সতি সূপট্ঠিতা হোতি। ‘ইতি অপরিপূরং ৰা আদিব্রহ্মচরিযিকং সিক্খং পরিপূরেস্সামি, পরিপূরং ৰা আদিব্রহ্মচরিযিকং সিক্খং তত্থ তত্থ পঞ্ঞায অনুগ্গহেস্সামী’তি – অজ্ঝত্তংযেৰ সতি সূপট্ঠিতা হোতি। ‘ইতি অসমৰেক্খিতং ৰা ধম্মং পঞ্ঞায সমৰেক্খিস্সামি, সমৰেক্খিতং ৰা ধম্মং তত্থ তত্থ পঞ্ঞায অনুগ্গহেস্সামী’তি – অজ্ঝত্তংযেৰ সতি সূপট্ঠিতা হোতি। ‘ইতি অফুসিতং ৰা ধম্মং ৰিমুত্তিযা ফুসিস্সামি, ফুসিতং ৰা ধম্মং তত্থ তত্থ পঞ্ঞায অনুগ্গহেস্সামী’তি – অজ্ঝত্তংযেৰ সতি সূপট্ঠিতা হোতি। এৰং খো, ভিক্খৰে, সতাধিপতেয্যং হোতি। ‘সিক্খানিসংসমিদং, ভিক্খৰে, ব্রহ্মচরিযং ৰুস্সতি পঞ্ঞুত্তরং ৰিমুত্তিসারং সতাধিপতেয্য’ন্তি, ইতি যং তং ৰুত্তং ইদমেতং পটিচ্চ ৰুত্ত’’ন্তি। ততিযং।
‘‘Kathañca, bhikkhave, satādhipateyyaṃ hoti? ‘Iti aparipūraṃ vā ābhisamācārikaṃ sikkhaṃ paripūressāmi, paripūraṃ vā ābhisamācārikaṃ sikkhaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti aparipūraṃ vā ādibrahmacariyikaṃ sikkhaṃ paripūressāmi, paripūraṃ vā ādibrahmacariyikaṃ sikkhaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti asamavekkhitaṃ vā dhammaṃ paññāya samavekkhissāmi, samavekkhitaṃ vā dhammaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti aphusitaṃ vā dhammaṃ vimuttiyā phusissāmi, phusitaṃ vā dhammaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. Evaṃ kho, bhikkhave, satādhipateyyaṃ hoti. ‘Sikkhānisaṃsamidaṃ, bhikkhave, brahmacariyaṃ vussati paññuttaraṃ vimuttisāraṃ satādhipateyya’nti, iti yaṃ taṃ vuttaṃ idametaṃ paṭicca vutta’’nti. Tatiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৩. সিক্খানিসংসসুত্তৰণ্ণনা • 3. Sikkhānisaṃsasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২-৩. আপত্তিভযসুত্তাদিৰণ্ণনা • 2-3. Āpattibhayasuttādivaṇṇanā
