| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៣. សិក្ខានិសំសសុត្តំ
3. Sikkhānisaṃsasuttaṃ
២៤៥. ‘‘សិក្ខានិសំសមិទំ, ភិក្ខវេ, ព្រហ្មចរិយំ វុស្សតិ បញ្ញុត្តរំ វិមុត្តិសារំ សតាធិបតេយ្យំ។ កថញ្ច, ភិក្ខវេ, សិក្ខានិសំសំ ហោតិ? ឥធ, ភិក្ខវេ, មយា សាវកានំ អាភិសមាចារិកា សិក្ខា បញ្ញត្តា អប្បសន្នានំ បសាទាយ បសន្នានំ ភិយ្យោភាវាយ។ យថា យថា, ភិក្ខវេ, មយា សាវកានំ អាភិសមាចារិកា សិក្ខា បញ្ញត្តា អប្បសន្នានំ បសាទាយ បសន្នានំ ភិយ្យោភាវាយ តថា តថា សោ តស្សា សិក្ខាយ អខណ្ឌការី ហោតិ អច្ឆិទ្ទការី អសពលការី អកម្មាសការី, សមាទាយ សិក្ខតិ សិក្ខាបទេសុ។
245. ‘‘Sikkhānisaṃsamidaṃ, bhikkhave, brahmacariyaṃ vussati paññuttaraṃ vimuttisāraṃ satādhipateyyaṃ. Kathañca, bhikkhave, sikkhānisaṃsaṃ hoti? Idha, bhikkhave, mayā sāvakānaṃ ābhisamācārikā sikkhā paññattā appasannānaṃ pasādāya pasannānaṃ bhiyyobhāvāya. Yathā yathā, bhikkhave, mayā sāvakānaṃ ābhisamācārikā sikkhā paññattā appasannānaṃ pasādāya pasannānaṃ bhiyyobhāvāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu.
‘‘បុន ចបរំ, ភិក្ខវេ, មយា សាវកានំ អាទិព្រហ្មចរិយិកា សិក្ខា បញ្ញត្តា សព្ពសោ សម្មា ទុក្ខក្ខយាយ។ យថា យថា, ភិក្ខវេ, មយា សាវកានំ អាទិព្រហ្មចរិយិកា សិក្ខា បញ្ញត្តា សព្ពសោ សម្មា ទុក្ខក្ខយាយ តថា តថា សោ តស្សា សិក្ខាយ អខណ្ឌការី ហោតិ អច្ឆិទ្ទការី អសពលការី អកម្មាសការី, សមាទាយ សិក្ខតិ សិក្ខាបទេសុ។ ឯវំ ខោ, ភិក្ខវេ, សិក្ខានិសំសំ ហោតិ។
‘‘Puna caparaṃ, bhikkhave, mayā sāvakānaṃ ādibrahmacariyikā sikkhā paññattā sabbaso sammā dukkhakkhayāya. Yathā yathā, bhikkhave, mayā sāvakānaṃ ādibrahmacariyikā sikkhā paññattā sabbaso sammā dukkhakkhayāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu. Evaṃ kho, bhikkhave, sikkhānisaṃsaṃ hoti.
‘‘កថញ្ច, ភិក្ខវេ, បញ្ញុត្តរំ ហោតិ? ឥធ, ភិក្ខវេ, មយា សាវកានំ ធម្មា ទេសិតា សព្ពសោ សម្មា ទុក្ខក្ខយាយ។ យថា យថា, ភិក្ខវេ, មយា សាវកានំ ធម្មា ទេសិតា សព្ពសោ សម្មា ទុក្ខក្ខយាយ តថា តថាស្ស តេ ធម្មា បញ្ញាយ សមវេក្ខិតា ហោន្តិ។ ឯវំ ខោ, ភិក្ខវេ, បញ្ញុត្តរំ ហោតិ។
‘‘Kathañca, bhikkhave, paññuttaraṃ hoti? Idha, bhikkhave, mayā sāvakānaṃ dhammā desitā sabbaso sammā dukkhakkhayāya. Yathā yathā, bhikkhave, mayā sāvakānaṃ dhammā desitā sabbaso sammā dukkhakkhayāya tathā tathāssa te dhammā paññāya samavekkhitā honti. Evaṃ kho, bhikkhave, paññuttaraṃ hoti.
‘‘កថញ្ច , ភិក្ខវេ, វិមុត្តិសារំ ហោតិ? ឥធ, ភិក្ខវេ, មយា សាវកានំ ធម្មា ទេសិតា សព្ពសោ សម្មា ទុក្ខក្ខយាយ។ យថា យថា, ភិក្ខវេ, មយា សាវកានំ ធម្មា ទេសិតា សព្ពសោ សម្មា ទុក្ខក្ខយាយ តថា តថាស្ស តេ ធម្មា វិមុត្តិយា ផុសិតា ហោន្តិ។ ឯវំ ខោ, ភិក្ខវេ, វិមុត្តិសារំ ហោតិ។
‘‘Kathañca , bhikkhave, vimuttisāraṃ hoti? Idha, bhikkhave, mayā sāvakānaṃ dhammā desitā sabbaso sammā dukkhakkhayāya. Yathā yathā, bhikkhave, mayā sāvakānaṃ dhammā desitā sabbaso sammā dukkhakkhayāya tathā tathāssa te dhammā vimuttiyā phusitā honti. Evaṃ kho, bhikkhave, vimuttisāraṃ hoti.
‘‘កថញ្ច, ភិក្ខវេ, សតាធិបតេយ្យំ ហោតិ? ‘ឥតិ អបរិបូរំ វា អាភិសមាចារិកំ សិក្ខំ បរិបូរេស្សាមិ, បរិបូរំ វា អាភិសមាចារិកំ សិក្ខំ តត្ថ តត្ថ បញ្ញាយ អនុគ្គហេស្សាមី’តិ – អជ្ឈត្តំយេវ សតិ សូបដ្ឋិតា ហោតិ។ ‘ឥតិ អបរិបូរំ វា អាទិព្រហ្មចរិយិកំ សិក្ខំ បរិបូរេស្សាមិ, បរិបូរំ វា អាទិព្រហ្មចរិយិកំ សិក្ខំ តត្ថ តត្ថ បញ្ញាយ អនុគ្គហេស្សាមី’តិ – អជ្ឈត្តំយេវ សតិ សូបដ្ឋិតា ហោតិ។ ‘ឥតិ អសមវេក្ខិតំ វា ធម្មំ បញ្ញាយ សមវេក្ខិស្សាមិ, សមវេក្ខិតំ វា ធម្មំ តត្ថ តត្ថ បញ្ញាយ អនុគ្គហេស្សាមី’តិ – អជ្ឈត្តំយេវ សតិ សូបដ្ឋិតា ហោតិ។ ‘ឥតិ អផុសិតំ វា ធម្មំ វិមុត្តិយា ផុសិស្សាមិ, ផុសិតំ វា ធម្មំ តត្ថ តត្ថ បញ្ញាយ អនុគ្គហេស្សាមី’តិ – អជ្ឈត្តំយេវ សតិ សូបដ្ឋិតា ហោតិ។ ឯវំ ខោ, ភិក្ខវេ, សតាធិបតេយ្យំ ហោតិ។ ‘សិក្ខានិសំសមិទំ, ភិក្ខវេ, ព្រហ្មចរិយំ វុស្សតិ បញ្ញុត្តរំ វិមុត្តិសារំ សតាធិបតេយ្យ’ន្តិ, ឥតិ យំ តំ វុត្តំ ឥទមេតំ បដិច្ច វុត្ត’’ន្តិ។ តតិយំ។
‘‘Kathañca, bhikkhave, satādhipateyyaṃ hoti? ‘Iti aparipūraṃ vā ābhisamācārikaṃ sikkhaṃ paripūressāmi, paripūraṃ vā ābhisamācārikaṃ sikkhaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti aparipūraṃ vā ādibrahmacariyikaṃ sikkhaṃ paripūressāmi, paripūraṃ vā ādibrahmacariyikaṃ sikkhaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti asamavekkhitaṃ vā dhammaṃ paññāya samavekkhissāmi, samavekkhitaṃ vā dhammaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti aphusitaṃ vā dhammaṃ vimuttiyā phusissāmi, phusitaṃ vā dhammaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. Evaṃ kho, bhikkhave, satādhipateyyaṃ hoti. ‘Sikkhānisaṃsamidaṃ, bhikkhave, brahmacariyaṃ vussati paññuttaraṃ vimuttisāraṃ satādhipateyya’nti, iti yaṃ taṃ vuttaṃ idametaṃ paṭicca vutta’’nti. Tatiyaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៣. សិក្ខានិសំសសុត្តវណ្ណនា • 3. Sikkhānisaṃsasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ២-៣. អាបត្តិភយសុត្តាទិវណ្ណនា • 2-3. Āpattibhayasuttādivaṇṇanā
