| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
៩. សិក្ខានិសំសសុត្តំ
9. Sikkhānisaṃsasuttaṃ
៤៦. វុត្តញ្ហេតំ ភគវតា, វុត្តមរហតាតិ មេ សុតំ –
46. Vuttañhetaṃ bhagavatā, vuttamarahatāti me sutaṃ –
‘‘សិក្ខានិសំសា , ភិក្ខវេ, វិហរថ បញ្ញុត្តរា វិមុត្តិសារា សតាធិបតេយ្យា។ សិក្ខានិសំសានំ, ភិក្ខវេ, វិហរតំ បញ្ញុត្តរានំ វិមុត្តិសារានំ សតាធិបតេយ្យានំ ទ្វិន្នំ ផលានំ អញ្ញតរំ ផលំ បាដិកង្ខំ – ទិដ្ឋេវ ធម្មេ អញ្ញា, សតិ វា ឧបាទិសេសេ អនាគាមិតា’’តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Sikkhānisaṃsā , bhikkhave, viharatha paññuttarā vimuttisārā satādhipateyyā. Sikkhānisaṃsānaṃ, bhikkhave, viharataṃ paññuttarānaṃ vimuttisārānaṃ satādhipateyyānaṃ dvinnaṃ phalānaṃ aññataraṃ phalaṃ pāṭikaṅkhaṃ – diṭṭheva dhamme aññā, sati vā upādisese anāgāmitā’’ti. Etamatthaṃ bhagavā avoca. Tatthetaṃ iti vuccati –
‘‘បរិបុណ្ណសិក្ខំ 1 អបហានធម្មំ, បញ្ញុត្តរំ ជាតិខយន្តទស្សិំ;
‘‘Paripuṇṇasikkhaṃ 2 apahānadhammaṃ, paññuttaraṃ jātikhayantadassiṃ;
តំ វេ មុនិំ អន្តិមទេហធារិំ, មារញ្ជហំ ព្រូមិ ជរាយ បារគុំ។
Taṃ ve muniṃ antimadehadhāriṃ, mārañjahaṃ brūmi jarāya pāraguṃ.
‘‘តស្មា សទា ឈានរតា សមាហិតា, អាតាបិនោ ជាតិខយន្តទស្សិនោ;
‘‘Tasmā sadā jhānaratā samāhitā, ātāpino jātikhayantadassino;
មារំ សសេនំ អភិភុយ្យ ភិក្ខវោ, ភវថ ជាតិមរណស្ស បារគា’’តិ។
Māraṃ sasenaṃ abhibhuyya bhikkhavo, bhavatha jātimaraṇassa pāragā’’ti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ នវមំ។
Ayampi attho vutto bhagavatā, iti me sutanti. Navamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ៩. សិក្ខានិសំសសុត្តវណ្ណនា • 9. Sikkhānisaṃsasuttavaṇṇanā
