| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. සික්‌ඛානිසංසසුත්‌තං
3. Sikkhānisaṃsasuttaṃ
245. ‘‘සික්‌ඛානිසංසමිදං, භික්‌ඛවෙ, බ්‍රහ්‌මචරියං වුස්‌සති පඤ්‌ඤුත්‌තරං විමුත්‌තිසාරං සතාධිපතෙය්‍යං. කථඤ්‌ච, භික්‌ඛවෙ, සික්‌ඛානිසංසං හොති? ඉධ, භික්‌ඛවෙ, මයා සාවකානං ආභිසමාචාරිකා සික්‌ඛා පඤ්‌ඤත්‌තා අප්‌පසන්‌නානං පසාදාය පසන්‌නානං භිය්‍යොභාවාය. යථා යථා, භික්‌ඛවෙ, මයා සාවකානං ආභිසමාචාරිකා සික්‌ඛා පඤ්‌ඤත්‌තා අප්‌පසන්‌නානං පසාදාය පසන්‌නානං භිය්‍යොභාවාය තථා තථා සො තස්‌සා සික්‌ඛාය අඛණ්‌ඩකාරී හොති අච්‌ඡිද්‌දකාරී අසබලකාරී අකම්‌මාසකාරී, සමාදාය සික්‌ඛති සික්‌ඛාපදෙසු.
245. ‘‘Sikkhānisaṃsamidaṃ, bhikkhave, brahmacariyaṃ vussati paññuttaraṃ vimuttisāraṃ satādhipateyyaṃ. Kathañca, bhikkhave, sikkhānisaṃsaṃ hoti? Idha, bhikkhave, mayā sāvakānaṃ ābhisamācārikā sikkhā paññattā appasannānaṃ pasādāya pasannānaṃ bhiyyobhāvāya. Yathā yathā, bhikkhave, mayā sāvakānaṃ ābhisamācārikā sikkhā paññattā appasannānaṃ pasādāya pasannānaṃ bhiyyobhāvāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu.
‘‘පුන චපරං, භික්‌ඛවෙ, මයා සාවකානං ආදිබ්‍රහ්‌මචරියිකා සික්‌ඛා පඤ්‌ඤත්‌තා සබ්‌බසො සම්‌මා දුක්‌ඛක්‌ඛයාය. යථා යථා, භික්‌ඛවෙ, මයා සාවකානං ආදිබ්‍රහ්‌මචරියිකා සික්‌ඛා පඤ්‌ඤත්‌තා සබ්‌බසො සම්‌මා දුක්‌ඛක්‌ඛයාය තථා තථා සො තස්‌සා සික්‌ඛාය අඛණ්‌ඩකාරී හොති අච්‌ඡිද්‌දකාරී අසබලකාරී අකම්‌මාසකාරී, සමාදාය සික්‌ඛති සික්‌ඛාපදෙසු. එවං ඛො, භික්‌ඛවෙ, සික්‌ඛානිසංසං හොති.
‘‘Puna caparaṃ, bhikkhave, mayā sāvakānaṃ ādibrahmacariyikā sikkhā paññattā sabbaso sammā dukkhakkhayāya. Yathā yathā, bhikkhave, mayā sāvakānaṃ ādibrahmacariyikā sikkhā paññattā sabbaso sammā dukkhakkhayāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu. Evaṃ kho, bhikkhave, sikkhānisaṃsaṃ hoti.
‘‘කථඤ්‌ච, භික්‌ඛවෙ, පඤ්‌ඤුත්‌තරං හොති? ඉධ, භික්‌ඛවෙ, මයා සාවකානං ධම්‌මා දෙසිතා සබ්‌බසො සම්‌මා දුක්‌ඛක්‌ඛයාය. යථා යථා, භික්‌ඛවෙ, මයා සාවකානං ධම්‌මා දෙසිතා සබ්‌බසො සම්‌මා දුක්‌ඛක්‌ඛයාය තථා තථාස්‌ස තෙ ධම්‌මා පඤ්‌ඤාය සමවෙක්‌ඛිතා හොන්‌ති. එවං ඛො, භික්‌ඛවෙ, පඤ්‌ඤුත්‌තරං හොති.
‘‘Kathañca, bhikkhave, paññuttaraṃ hoti? Idha, bhikkhave, mayā sāvakānaṃ dhammā desitā sabbaso sammā dukkhakkhayāya. Yathā yathā, bhikkhave, mayā sāvakānaṃ dhammā desitā sabbaso sammā dukkhakkhayāya tathā tathāssa te dhammā paññāya samavekkhitā honti. Evaṃ kho, bhikkhave, paññuttaraṃ hoti.
‘‘කථඤ්‌ච , භික්‌ඛවෙ, විමුත්‌තිසාරං හොති? ඉධ, භික්‌ඛවෙ, මයා සාවකානං ධම්‌මා දෙසිතා සබ්‌බසො සම්‌මා දුක්‌ඛක්‌ඛයාය. යථා යථා, භික්‌ඛවෙ, මයා සාවකානං ධම්‌මා දෙසිතා සබ්‌බසො සම්‌මා දුක්‌ඛක්‌ඛයාය තථා තථාස්‌ස තෙ ධම්‌මා විමුත්‌තියා ඵුසිතා හොන්‌ති. එවං ඛො, භික්‌ඛවෙ, විමුත්‌තිසාරං හොති.
‘‘Kathañca , bhikkhave, vimuttisāraṃ hoti? Idha, bhikkhave, mayā sāvakānaṃ dhammā desitā sabbaso sammā dukkhakkhayāya. Yathā yathā, bhikkhave, mayā sāvakānaṃ dhammā desitā sabbaso sammā dukkhakkhayāya tathā tathāssa te dhammā vimuttiyā phusitā honti. Evaṃ kho, bhikkhave, vimuttisāraṃ hoti.
‘‘කථඤ්‌ච, භික්‌ඛවෙ, සතාධිපතෙය්‍යං හොති? ‘ඉති අපරිපූරං වා ආභිසමාචාරිකං සික්‌ඛං පරිපූරෙස්‌සාමි, පරිපූරං වා ආභිසමාචාරිකං සික්‌ඛං තත්‌ථ තත්‌ථ පඤ්‌ඤාය අනුග්‌ගහෙස්‌සාමී’ති – අජ්‌ඣත්‌තංයෙව සති සූපට්‌ඨිතා හොති. ‘ඉති අපරිපූරං වා ආදිබ්‍රහ්‌මචරියිකං සික්‌ඛං පරිපූරෙස්‌සාමි, පරිපූරං වා ආදිබ්‍රහ්‌මචරියිකං සික්‌ඛං තත්‌ථ තත්‌ථ පඤ්‌ඤාය අනුග්‌ගහෙස්‌සාමී’ති – අජ්‌ඣත්‌තංයෙව සති සූපට්‌ඨිතා හොති. ‘ඉති අසමවෙක්‌ඛිතං වා ධම්‌මං පඤ්‌ඤාය සමවෙක්‌ඛිස්‌සාමි, සමවෙක්‌ඛිතං වා ධම්‌මං තත්‌ථ තත්‌ථ පඤ්‌ඤාය අනුග්‌ගහෙස්‌සාමී’ති – අජ්‌ඣත්‌තංයෙව සති සූපට්‌ඨිතා හොති. ‘ඉති අඵුසිතං වා ධම්‌මං විමුත්‌තියා ඵුසිස්‌සාමි, ඵුසිතං වා ධම්‌මං තත්‌ථ තත්‌ථ පඤ්‌ඤාය අනුග්‌ගහෙස්‌සාමී’ති – අජ්‌ඣත්‌තංයෙව සති සූපට්‌ඨිතා හොති. එවං ඛො, භික්‌ඛවෙ, සතාධිපතෙය්‍යං හොති. ‘සික්‌ඛානිසංසමිදං, භික්‌ඛවෙ, බ්‍රහ්‌මචරියං වුස්‌සති පඤ්‌ඤුත්‌තරං විමුත්‌තිසාරං සතාධිපතෙය්‍ය’න්‌ති, ඉති යං තං වුත්‌තං ඉදමෙතං පටිච්‌ච වුත්‌ත’’න්‌ති. තතියං.
‘‘Kathañca, bhikkhave, satādhipateyyaṃ hoti? ‘Iti aparipūraṃ vā ābhisamācārikaṃ sikkhaṃ paripūressāmi, paripūraṃ vā ābhisamācārikaṃ sikkhaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti aparipūraṃ vā ādibrahmacariyikaṃ sikkhaṃ paripūressāmi, paripūraṃ vā ādibrahmacariyikaṃ sikkhaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti asamavekkhitaṃ vā dhammaṃ paññāya samavekkhissāmi, samavekkhitaṃ vā dhammaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti aphusitaṃ vā dhammaṃ vimuttiyā phusissāmi, phusitaṃ vā dhammaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. Evaṃ kho, bhikkhave, satādhipateyyaṃ hoti. ‘Sikkhānisaṃsamidaṃ, bhikkhave, brahmacariyaṃ vussati paññuttaraṃ vimuttisāraṃ satādhipateyya’nti, iti yaṃ taṃ vuttaṃ idametaṃ paṭicca vutta’’nti. Tatiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 3. සික්‌ඛානිසංසසුත්‌තවණ්‌ණනා • 3. Sikkhānisaṃsasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 2-3. ආපත්‌තිභයසුත්‌තාදිවණ්‌ණනා • 2-3. Āpattibhayasuttādivaṇṇanā
