| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༣. སིཀྑཱནིསཾསསུཏྟཾ
3. Sikkhānisaṃsasuttaṃ
༢༤༥. ‘‘སིཀྑཱནིསཾསམིདཾ, བྷིཀྑཝེ, བྲཧྨཙརིཡཾ ཝུསྶཏི པཉྙུཏྟརཾ ཝིམུཏྟིསཱརཾ སཏཱདྷིཔཏེཡྻཾ། ཀཐཉྩ, བྷིཀྑཝེ, སིཀྑཱནིསཾསཾ ཧོཏི? ཨིདྷ, བྷིཀྑཝེ, མཡཱ སཱཝཀཱནཾ ཨཱབྷིསམཱཙཱརིཀཱ སིཀྑཱ པཉྙཏྟཱ ཨཔྤསནྣཱནཾ པསཱདཱཡ པསནྣཱནཾ བྷིཡྻོབྷཱཝཱཡ། ཡཐཱ ཡཐཱ, བྷིཀྑཝེ, མཡཱ སཱཝཀཱནཾ ཨཱབྷིསམཱཙཱརིཀཱ སིཀྑཱ པཉྙཏྟཱ ཨཔྤསནྣཱནཾ པསཱདཱཡ པསནྣཱནཾ བྷིཡྻོབྷཱཝཱཡ ཏཐཱ ཏཐཱ སོ ཏསྶཱ སིཀྑཱཡ ཨཁཎྜཀཱརཱི ཧོཏི ཨཙྪིདྡཀཱརཱི ཨསབལཀཱརཱི ཨཀམྨཱསཀཱརཱི, སམཱདཱཡ སིཀྑཏི སིཀྑཱཔདེསུ།
245. ‘‘Sikkhānisaṃsamidaṃ, bhikkhave, brahmacariyaṃ vussati paññuttaraṃ vimuttisāraṃ satādhipateyyaṃ. Kathañca, bhikkhave, sikkhānisaṃsaṃ hoti? Idha, bhikkhave, mayā sāvakānaṃ ābhisamācārikā sikkhā paññattā appasannānaṃ pasādāya pasannānaṃ bhiyyobhāvāya. Yathā yathā, bhikkhave, mayā sāvakānaṃ ābhisamācārikā sikkhā paññattā appasannānaṃ pasādāya pasannānaṃ bhiyyobhāvāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu.
‘‘པུན ཙཔརཾ, བྷིཀྑཝེ, མཡཱ སཱཝཀཱནཾ ཨཱདིབྲཧྨཙརིཡིཀཱ སིཀྑཱ པཉྙཏྟཱ སབྦསོ སམྨཱ དུཀྑཀྑཡཱཡ། ཡཐཱ ཡཐཱ, བྷིཀྑཝེ, མཡཱ སཱཝཀཱནཾ ཨཱདིབྲཧྨཙརིཡིཀཱ སིཀྑཱ པཉྙཏྟཱ སབྦསོ སམྨཱ དུཀྑཀྑཡཱཡ ཏཐཱ ཏཐཱ སོ ཏསྶཱ སིཀྑཱཡ ཨཁཎྜཀཱརཱི ཧོཏི ཨཙྪིདྡཀཱརཱི ཨསབལཀཱརཱི ཨཀམྨཱསཀཱརཱི, སམཱདཱཡ སིཀྑཏི སིཀྑཱཔདེསུ། ཨེཝཾ ཁོ, བྷིཀྑཝེ, སིཀྑཱནིསཾསཾ ཧོཏི།
‘‘Puna caparaṃ, bhikkhave, mayā sāvakānaṃ ādibrahmacariyikā sikkhā paññattā sabbaso sammā dukkhakkhayāya. Yathā yathā, bhikkhave, mayā sāvakānaṃ ādibrahmacariyikā sikkhā paññattā sabbaso sammā dukkhakkhayāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu. Evaṃ kho, bhikkhave, sikkhānisaṃsaṃ hoti.
‘‘ཀཐཉྩ, བྷིཀྑཝེ, པཉྙུཏྟརཾ ཧོཏི? ཨིདྷ, བྷིཀྑཝེ, མཡཱ སཱཝཀཱནཾ དྷམྨཱ དེསིཏཱ སབྦསོ སམྨཱ དུཀྑཀྑཡཱཡ། ཡཐཱ ཡཐཱ, བྷིཀྑཝེ, མཡཱ སཱཝཀཱནཾ དྷམྨཱ དེསིཏཱ སབྦསོ སམྨཱ དུཀྑཀྑཡཱཡ ཏཐཱ ཏཐཱསྶ ཏེ དྷམྨཱ པཉྙཱཡ སམཝེཀྑིཏཱ ཧོནྟི། ཨེཝཾ ཁོ, བྷིཀྑཝེ, པཉྙུཏྟརཾ ཧོཏི།
‘‘Kathañca, bhikkhave, paññuttaraṃ hoti? Idha, bhikkhave, mayā sāvakānaṃ dhammā desitā sabbaso sammā dukkhakkhayāya. Yathā yathā, bhikkhave, mayā sāvakānaṃ dhammā desitā sabbaso sammā dukkhakkhayāya tathā tathāssa te dhammā paññāya samavekkhitā honti. Evaṃ kho, bhikkhave, paññuttaraṃ hoti.
‘‘ཀཐཉྩ , བྷིཀྑཝེ, ཝིམུཏྟིསཱརཾ ཧོཏི? ཨིདྷ, བྷིཀྑཝེ, མཡཱ སཱཝཀཱནཾ དྷམྨཱ དེསིཏཱ སབྦསོ སམྨཱ དུཀྑཀྑཡཱཡ། ཡཐཱ ཡཐཱ, བྷིཀྑཝེ, མཡཱ སཱཝཀཱནཾ དྷམྨཱ དེསིཏཱ སབྦསོ སམྨཱ དུཀྑཀྑཡཱཡ ཏཐཱ ཏཐཱསྶ ཏེ དྷམྨཱ ཝིམུཏྟིཡཱ ཕུསིཏཱ ཧོནྟི། ཨེཝཾ ཁོ, བྷིཀྑཝེ, ཝིམུཏྟིསཱརཾ ཧོཏི།
‘‘Kathañca , bhikkhave, vimuttisāraṃ hoti? Idha, bhikkhave, mayā sāvakānaṃ dhammā desitā sabbaso sammā dukkhakkhayāya. Yathā yathā, bhikkhave, mayā sāvakānaṃ dhammā desitā sabbaso sammā dukkhakkhayāya tathā tathāssa te dhammā vimuttiyā phusitā honti. Evaṃ kho, bhikkhave, vimuttisāraṃ hoti.
‘‘ཀཐཉྩ, བྷིཀྑཝེ, སཏཱདྷིཔཏེཡྻཾ ཧོཏི? ‘ཨིཏི ཨཔརིཔཱུརཾ ཝཱ ཨཱབྷིསམཱཙཱརིཀཾ སིཀྑཾ པརིཔཱུརེསྶཱམི, པརིཔཱུརཾ ཝཱ ཨཱབྷིསམཱཙཱརིཀཾ སིཀྑཾ ཏཏྠ ཏཏྠ པཉྙཱཡ ཨནུགྒཧེསྶཱམཱི’ཏི – ཨཛ྄ཛྷཏྟཾཡེཝ སཏི སཱུཔཊྛིཏཱ ཧོཏི། ‘ཨིཏི ཨཔརིཔཱུརཾ ཝཱ ཨཱདིབྲཧྨཙརིཡིཀཾ སིཀྑཾ པརིཔཱུརེསྶཱམི, པརིཔཱུརཾ ཝཱ ཨཱདིབྲཧྨཙརིཡིཀཾ སིཀྑཾ ཏཏྠ ཏཏྠ པཉྙཱཡ ཨནུགྒཧེསྶཱམཱི’ཏི – ཨཛ྄ཛྷཏྟཾཡེཝ སཏི སཱུཔཊྛིཏཱ ཧོཏི། ‘ཨིཏི ཨསམཝེཀྑིཏཾ ཝཱ དྷམྨཾ པཉྙཱཡ སམཝེཀྑིསྶཱམི, སམཝེཀྑིཏཾ ཝཱ དྷམྨཾ ཏཏྠ ཏཏྠ པཉྙཱཡ ཨནུགྒཧེསྶཱམཱི’ཏི – ཨཛ྄ཛྷཏྟཾཡེཝ སཏི སཱུཔཊྛིཏཱ ཧོཏི། ‘ཨིཏི ཨཕུསིཏཾ ཝཱ དྷམྨཾ ཝིམུཏྟིཡཱ ཕུསིསྶཱམི, ཕུསིཏཾ ཝཱ དྷམྨཾ ཏཏྠ ཏཏྠ པཉྙཱཡ ཨནུགྒཧེསྶཱམཱི’ཏི – ཨཛ྄ཛྷཏྟཾཡེཝ སཏི སཱུཔཊྛིཏཱ ཧོཏི། ཨེཝཾ ཁོ, བྷིཀྑཝེ, སཏཱདྷིཔཏེཡྻཾ ཧོཏི། ‘སིཀྑཱནིསཾསམིདཾ, བྷིཀྑཝེ, བྲཧྨཙརིཡཾ ཝུསྶཏི པཉྙུཏྟརཾ ཝིམུཏྟིསཱརཾ སཏཱདྷིཔཏེཡྻ’ནྟི, ཨིཏི ཡཾ ཏཾ ཝུཏྟཾ ཨིདམེཏཾ པཊིཙྩ ཝུཏྟ’’ནྟི། ཏཏིཡཾ།
‘‘Kathañca, bhikkhave, satādhipateyyaṃ hoti? ‘Iti aparipūraṃ vā ābhisamācārikaṃ sikkhaṃ paripūressāmi, paripūraṃ vā ābhisamācārikaṃ sikkhaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti aparipūraṃ vā ādibrahmacariyikaṃ sikkhaṃ paripūressāmi, paripūraṃ vā ādibrahmacariyikaṃ sikkhaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti asamavekkhitaṃ vā dhammaṃ paññāya samavekkhissāmi, samavekkhitaṃ vā dhammaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. ‘Iti aphusitaṃ vā dhammaṃ vimuttiyā phusissāmi, phusitaṃ vā dhammaṃ tattha tattha paññāya anuggahessāmī’ti – ajjhattaṃyeva sati sūpaṭṭhitā hoti. Evaṃ kho, bhikkhave, satādhipateyyaṃ hoti. ‘Sikkhānisaṃsamidaṃ, bhikkhave, brahmacariyaṃ vussati paññuttaraṃ vimuttisāraṃ satādhipateyya’nti, iti yaṃ taṃ vuttaṃ idametaṃ paṭicca vutta’’nti. Tatiyaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༣. སིཀྑཱནིསཾསསུཏྟཝཎྞནཱ • 3. Sikkhānisaṃsasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༢-༣. ཨཱཔཏྟིབྷཡསུཏྟཱདིཝཎྞནཱ • 2-3. Āpattibhayasuttādivaṇṇanā
