| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
3. සික්‌ඛානිසංසසුත්‌තවණ්‌ණනා
3. Sikkhānisaṃsasuttavaṇṇanā
245. තතියෙ සික්‌ඛා ආනිසංසා එත්‌ථාති සික්‌ඛානිසංසං. පඤ්‌ඤා උත්‌තරා එත්‌ථාති පඤ්‌ඤුත්‌තරං. විමුත්‌ති සාරො එත්‌ථාති විමුත්‌තිසාරං. සති ආධිපතෙය්‍යා එත්‌ථාති සතාධිපතෙය්‍යං. එතෙසං හි සික්‌ඛාදිසඞ්‌ඛාතානං ආනිසංසාදීනං අත්‌ථාය වුස්‌සතීති වුත්‌තං හොති. ආභිසමාචාරිකාති උත්‌තමසමාචාරිකා. වත්‌තවසෙන පඤ්‌ඤත්‌තසීලස්‌සෙතං අධිවචනං. තථා තථා සො තස්‌සා සික්‌ඛායාති තථා තථා සො සික්‌ඛාකාමො භික්‌ඛු තස්‌මිං සික්‌ඛාපදෙ.
245. Tatiye sikkhā ānisaṃsā etthāti sikkhānisaṃsaṃ. Paññā uttarā etthāti paññuttaraṃ. Vimutti sāro etthāti vimuttisāraṃ. Sati ādhipateyyā etthāti satādhipateyyaṃ. Etesaṃ hi sikkhādisaṅkhātānaṃ ānisaṃsādīnaṃ atthāya vussatīti vuttaṃ hoti. Ābhisamācārikāti uttamasamācārikā. Vattavasena paññattasīlassetaṃ adhivacanaṃ. Tathā tathā so tassā sikkhāyāti tathā tathā so sikkhākāmo bhikkhu tasmiṃ sikkhāpade.
ආදිබ්‍රහ්‌මචරියිකාති මග්‌ගබ්‍රහ්‌මචරියස්‌ස ආදිභූතානං චතුන්‌නං මහාසීලානමෙතං අධිවචනං. සබ්‌බසොති සබ්‌බාකාරෙන. ධම්‌මාති චතුසච්‌චධම්‌මා. පඤ්‌ඤාය සමවෙක්‌ඛිතා හොන්‌තීති සහවිපස්‌සනාය මග්‌ගපඤ්‌ඤාය සුදිට්‌ඨා හොන්‌ති. විමුත්‌තියා ඵුසිතා හොන්‌තීති අරහත්‌තඵලවිමුත්‌තියා ඤාණඵස්‌සෙන ඵුට්‌ඨා හොන්‌ති. අජ්‌ඣත්‌තංයෙව සති සූපට්‌ඨිතා හොතීති නියකජ්‌ඣත්‌තෙයෙව සති සුට්‌ඨු උපට්‌ඨිතා හොති. පඤ්‌ඤාය අනුග්‌ගහෙස්‌සාමීති විපස්‌සනාපඤ්‌ඤාය අනුග්‌ගහෙස්‌සාමි. පඤ්‌ඤාය සමවෙක්‌ඛිස්‌සාමීති ඉධාපි විපස්‌සනාපඤ්‌ඤා අධිප්‌පෙතා. ඵුසිතං වා ධම්‌මං තත්‌ථ තත්‌ථ පඤ්‌ඤාය අනුග්‌ගහෙස්‌සාමීති එත්‌ථ පන මග්‌ගපඤ්‌ඤාව අධිප්‌පෙතා.
Ādibrahmacariyikāti maggabrahmacariyassa ādibhūtānaṃ catunnaṃ mahāsīlānametaṃ adhivacanaṃ. Sabbasoti sabbākārena. Dhammāti catusaccadhammā. Paññāya samavekkhitā hontīti sahavipassanāya maggapaññāya sudiṭṭhā honti. Vimuttiyā phusitā hontīti arahattaphalavimuttiyā ñāṇaphassena phuṭṭhā honti. Ajjhattaṃyeva sati sūpaṭṭhitā hotīti niyakajjhatteyeva sati suṭṭhu upaṭṭhitā hoti. Paññāya anuggahessāmīti vipassanāpaññāya anuggahessāmi. Paññāyasamavekkhissāmīti idhāpi vipassanāpaññā adhippetā. Phusitaṃ vā dhammaṃ tattha tattha paññāya anuggahessāmīti ettha pana maggapaññāva adhippetā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 3. සික්‌ඛානිසංසසුත්‌තං • 3. Sikkhānisaṃsasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 2-3. ආපත්‌තිභයසුත්‌තාදිවණ්‌ණනා • 2-3. Āpattibhayasuttādivaṇṇanā
